Ktieb t’Għerf b’Messaġġ għal-​Lum

“BORŻA mimlija għerf tiswa iktar minn waħda mimlija perli,” osserva l-​patrijarka tal-​qedem Ġob, li bla dubju kien wieħed mill-​iktar nies għonja taʼ żmienu. (Ġob 1:3; 28:18, New World Translation;Ġob 42:12) Verament, l-​għerf jiswa ferm iktar mill-​ġid materjali biex jgħin lil persuna tagħmel ħajjitha waħda taʼ suċċess. “Fih kenn l-​għerf u fihom kenn il-​flus,” qal is-​Sultan għaref Salamun, “imma aħjar l-​għerf għax iħarreġ għall-​ħajja lil min għandu lilu.”—Koħèlet 7:12.

Imma fejn jistaʼ jinstab għerf bħal dan illum? In-​nies iduru lejn dawk li jagħtu l-​pariri fil-​gazzetti u fir-​rivisti, il-​psikologi, il-​psikjatri, u saħansitra lejn il-​hairdressers u x-​xufiera tat-​taxis, biex isolvu l-​problemi persunali tagħhom. U numru bla għadd taʼ esperti huma lesti li joffru pariri fuq tistaʼ tgħid kull suġġett​—jekk jingħataw ħlas tajjeb. Taʼ spiss, iżda, kliem t’“għerf” bħal dan wassal biss għal diżappunt, saħansitra diżastri. Kif, allura, nistgħu nsibu għerf veru?

Ġesù Kristu, li kellu dehen kbir rigward l-​affarijiet tal-​bnedmin, darba qal: “L-​Għerf taʼ Alla tawh raġun l-​opri tiegħu stess.” (Mattew 11:19) Ejja nagħtu ħarsa lejn xi problemi komuni fil-​ħajjiet tan-​nies u naraw liema kliem t’għerf għenhom tassew u ta prova li għalihom kien jiswa iktar minn ‘borża mimlija perli.’ Int ukoll tistaʼ ssib dik il-​“borża mimlija għerf” u tibbenefika minnha.

Għaddej minn Dipressjoni?

“Jekk is-​seklu 20 introduċa l-​Era taʼ l-​Ansjetà, tmiemu qiegħed jara ż-​żerniq taʼ l-​Era tal-​Malinkonija,” tosserva l-​International Herald Tribune taʼ Londra. Din iżżid li “l-​ewwel studju internazzjonali dwar id-​dipressjoni serja jirrivela żjieda kostanti f’din id-​diżordni mad-​dinja kollha. Anki f’pajjiżi li huma differenti ħafna minn xulxin, bħat-​Tajwan, il-​Libanu u New Zealand, kull ġenerazzjoni suċċessiva qed issir iktar vulnerabbli għal din il-​marda.” Dawk li twieldu wara l-​1955 jintqal li għandhom tliet darbiet iktar ċans li jbatu minn dipressjoni serja milli kellhom in-​nanniet tagħhom.

Hekk ġralha Tomoe, li kienet tbati minn dipressjoni serja u qattgħet il-​biċċa l-​kbira taʼ ħajjitha f’qiegħ taʼ sodda. Minħabba li ma setgħetx tieħu ħsieb binha taʼ sentejn, hi reġgħet marret toqgħod mal-​ġenituri tagħha. Waħda mill-​ġirien, li kellha tifla taʼ l-​istess età tat-​tifel taʼ Tomoe, malajr għamlet ħbieb magħha. Meta Tomoe qalet lill-​ġâra kemm kienet tħossha m’hi tajba għal xejn, il-​ġâra wrietha silta minn ktieb. Din kienet tgħid: “L-​għajn ma tistax tgħid lill-​id: ‘Jiena ma għandix bżonnok’, anqas ir-​ras ma tgħid lis-​saqajn: ‘Ma għandix bżonnkom’. Mhux hekk biss, imma l-​membri tal-​ġisem li jidhru l-​aktar dgħajfa, huma l-​aktar meħtieġa.”a Tomoe qabżilha d-​dmugħ hekk kif irrealizzat li kulħadd għandu postu fid-​dinja u kulħadd huwa meħtieġ.

Il-ġâra rrikkmandatilha li teżamina l-​ktieb li kien fih dan il-​kliem. Tomoe ċaqalqet rasha biex turiha li kienet taqbel maʼ dan, avolja sa dakinhar ma kienet kapaċi tagħmel xejn, lanqas saħansitra tikkommetti ruħha biex tagħmel wegħda sempliċi. Il-​ġâra kienet tgħinha wkoll fix-​xiri, u taʼ kuljum kienet tipprepara l-​ikel maʼ Tomoe. Xahar wara, Tomoe kienet qed tqum kull fil-​għodu, tagħmel il-​ħasla, tnaddaf id-​dar, tmur tixtri, u tipprepara l-​ikel, bħalma tagħmel kull mara tad-​dar. Hi kellha tegħleb ħafna diffikultajiet, imma qalet, “Kont fiduċjuża li jekk sempliċement nimxi fuq il-​kliem t’għerf li kont sibt, kien se jirnexxili.”

Billi applikat l-​għerf li kienet sabet, Tomoe għelbet il-​jiem koroh tad-​dipressjoni tagħha. Issa Tomoe qed taħdem full-time biex tgħin lil oħrajn japplikaw l-​istess kliem li għenha tkampa mal-​problemi tagħha. Dan il-​kliem tad-​deheb jinsab fi ktieb antik li għandu messaġġ għan-​nies kollha llum.

Qed Tiffaċċja Problemi fid-​Dar?

Madwar id-​dinja r-​rata tad-​divorzju qegħda togħla. Il-​problemi fid-​dar qegħdin jiżdiedu wkoll f’pajjiżi Orjentali, fejn in-​nies darba kienu kburin bil-​familji magħqudin tagħhom. Fejn nistgħu nsibu gwida għaqlija u prattika għaż-​żwieġ?

Ikkunsidra l-​każ taʼ Shugo u Mihoko, koppja li kellhom problemi li ma jispiċċaw qatt fiż-​żwieġ tagħhom. Kienu jiġġieldu għal kull ħaġa taʼ xejn. Shugo kien jitlagħlu malajr, u Mihoko kienet tpattihielu kull darba li hu kien isib xi ħaġa fuqiex jaqbad magħha. Mihoko saħansitra kienet taħseb, ‘Huwa impossibbli li naqblu fuq xi ħaġa.’

Jum fost l-​oħrajn, waħda mara żaret lil Mihoko u qratilha dan il-​kliem minn fuq ktieb: “Mela dak kollu li tridu li l-​bnedmin jagħmlu lilkom, agħmluh ukoll intom lilhom; għax din hi l-​Liġi u l-​Profeti.”b Għalkemm ma kinitx interessata fir-​reliġjon, Mihoko aċċettat li tistudja l-​ktieb li fih kien hemm dan il-​kliem. Hi kienet interessata f’li ttejjeb il-​ħajja tal-​familja tagħha. Għalhekk, meta ġiet mistiedna biex tattendi għal laqgħa fejn kienet qed tiġi diskussa pubblikazzjoni intitolata Making Your Family Life Happy, Mihoko​—u żewġha—​aċċettaw mill-​ewwel.c

Meta marru għal-​laqgħa, Shugo nnota li dawk preżenti kienu attwalment qed japplikaw dak li kienu qed jitgħallmu u li kienu jidhru verament ferħanin. Iddeċieda li jeżamina l-​ktieb li kienet qed tistudja martu. Stqarrija minnhom malajr ġibditlu l-​attenzjoni: “Min għandu s-​sabar jimxi b’għaqal kbir, min jisbel malajr bluhat kbar jagħmel.”d Għalkemm ħa ż-​żmien biex applika dan il-​prinċipju f’ħajtu, il-​bidla gradwali li għamel setgħu jarawha dawk taʼ madwaru, inkluż martu.

Meta rat il-​bidliet li għamel żewġha, Mihoko wkoll bdiet tapplika dak li kienet qed titgħallem. Prinċipju wieħed li sabitu t’għajnuna b’mod speċjali kien dan: “Tiġġudikawx, biex ma tkunux iġġudikati; għax bl-​istess ġudizzju li tagħmlu intom, tkunu ġġudikati.”e Għalhekk, Mihoko u żewġha ddeċidew li jibdew jitkellmu dwar il-​kwalitajiet tajbin tagħhom u kif setgħu jitjiebu, pjuttost milli joqogħdu jsibu n-​nuqqasijiet f’xulxin. X’kien ir-​riżultat? Mihoko tiftakar: “Din il-​ħaġa għamlitni tassew ferħana. Qegħdin nagħmluha waqt l-​ikla taʼ fil-​għaxija. Anki t-​tifel tagħna taʼ tliet snin jingħaqad magħna fil-​konversazzjoni. Hija xi ħaġa verament rifreskanti għalina!”

Meta din il-​familja poġġiet fil-​prattika l-​pariri siewja li ngħatat, kienu kapaċi jegħlbu l-​problemi li kienu kważi ġabu fix-​xejn ir-​relazzjoni tagħhom. Dan ma kienx jiswielhom iktar minn borża mimlija perli?

Trid li Ħajtek Tagħmilha Waħda taʼ Suċċess?

Għal ħafna llum, il-​mira tagħhom fil-​ħajja hi li jakkumulaw il-​ġid. Madankollu, negozjant sinjur fl-​Istati Uniti li ta mijiet taʼ miljuni taʼ dollari għall-​karità darba qal: “Il-​flus jidhru sbieħ f’għajnejn xi nies, imma ħadd ma jistaʼ jilbes żewġ pari żraben f’daqqa.” Ftit huma dawk li jammettu dan il-​fatt u jerġaʼ inqas huma dawk li jieqfu jiġru wara r-​rikkezzi.

Hitoshi trabba ġo familja fqira, u għalhekk kellu xewqa kbira li jkun sinjur. Wara li ra kif il-​kredituri jdawru lin-​nies maʼ sebagħhom kif iridu, hu ddeċieda: “Min jaħtaf l-​iżjed flus huwa r-​rebbieħ.” Hitoshi tant kien jemmen fil-​poter tal-​flus li kien jaħseb li saħansitra l-​ħajjiet tan-​nies jistgħu jinxtraw bihom. Sabiex jakkumula l-​ġid, hu ntefaʼ b’ruħu u b’ġismu għan-​negozju tiegħu tal-​plaming u kien jaħdem is-​sena kollha, mingħajr qatt ma jieħu ġurnata franka. Għalkemm kien jaħdem fuq li jaħdem, Hitoshi malajr irrealizza li hu, li kien jingħata x-​xogħol mingħand kuntratturi oħrajn, qatt ma kien se jkun b’saħħtu daqs il-​kuntratturi li kienu jagħtuh ix-​xogħol. Taʼ kuljum kien ikollu jiffaċċja l-​frustrazzjoni u l-​biżaʼ li jfalli.

Imbagħad wieħed raġel mar iħabbat il-​bieb taʼ Hitoshi u staqsieh jekk kienx jaf li Ġesù Kristu kien miet għalih. Ladarba Hitoshi kien iħoss li ħadd ma kien se jmut għal xi ħadd bħalu, dan qajjimlu l-​kurżità, u aċċetta li jkollhom iktar diskussjonijiet. Il-​ġimgħa taʼ wara, attenda lekċer u ħassu xxokkjat meta samaʼ t-​twissija biex ‘iżomm għajn sempliċi.’ Il-​kelliemi spjega li għajn “sempliċi” hija waħda li tħares fil-​bogħod u hija ffokata fuq affarijiet spiritwali; mill-​banda l-​oħra, għajn “mill-​agħar,” jew “invidjuża,” hija ffokata biss fuq xewqat immedjati tal-​laħam u ma tħarisx fil-​bogħod. Il-​parir “Fejn qiegħed it-​teżor tiegħek, hemm se tkun ukoll qalbek,” ħalla impatt kbir fuqu.f Hemm xi ħaġa iktar importanti milli tikseb il-​ġid! Qatt ma kien samaʼ xi ħaġa bħal din.

Impressjonat, hu beda japplika dak li kien qed jitgħallem. Minflok ma jitħabat għall-​flus, beda jpoġġi valuri spiritwali l-​ewwel f’ħajtu. Beda wkoll iqattaʼ l-​ħin jieħu ħsieb il-​benesseri spiritwali tal-​familja tiegħu. Naturalment, dan kien ifisser inqas ħin għax-​xogħol, imma minkejja dan, in-​negozju tiegħu beda miexi ’l quddiem. Għala?

Il-personalità aggressiva tiegħu nbidlet għal waħda ġentili u dħulija hekk kif beda jirreaġixxi għall-​pariri li ngħata. Baqaʼ impressjonat b’mod partikulari bit-​twissija: “Intom ukoll ħallu kollox: korla, passjoni, ħażen, dagħa, u l-​kliem mhux xieraq warrbuh minn fommkom. Tigdbux lil xulxin, intom li nżajtu l-​bniedem il-​qadim bl-​għemil kollu tiegħu, u lbistu l-​bniedem il-​ġdid, li jiġġedded dejjem skond ix-​xbieha taʼ min ħalqu u jikber fl-​għerf.”g Billi segwa dan il-​parir ma sarx sinjur, imma l-​fatt li libes il-​“bniedem il-​ġdid” tassew għamel impressjoni tajba fuq il-​klijenti tiegħu tant li bdew jafdawh u rebaħ il-​fiduċja tagħhom. Iva, il-​kliem t’għerf li sab għenu biex jagħmel ħajtu waħda taʼ suċċess. Għalih, dan kien litteralment jiswa ferm iktar minn borża mimlija perli jew flus.

Se Tiftaħha l-​Borża?

Tistaʼ tidentifikaha l-​borża mimlija għerf li wriet li kienet tant prezzjuża għall-​individwi fl-​eżempji t’hawn fuq? Din hija l-​għerf misjub fil-​Bibbja, l-​iktar ktieb li ġie ċċirkolat maʼ kullimkien u l-​iktar wieħed li hu disponibbli fid-​dinja kollha. Forsi għandek kopja jew tistaʼ faċilment tikseb waħda. Madankollu, sewwa sew bħalma l-​fatt li xi ħadd ikollu borża mimlija perli prezzjużi u ma jużahomx ftit se jagħmel ġid lil min jippossediha, anki li sempliċement ikollok il-​Bibbja, ftit li xejn se jkun taʼ valur. Għala ma tiftaħhiex il-​borża, biex ngħidu hekk, u tapplika l-​pariri għaqlin u t-​twissijiet f’waqthom li hemm fil-​Bibbja u tara kif jistgħu jgħinuk tittratta mal-​problemi tal-​ħajja b’suċċess.

Jekk qatt tirċievi borża perli, ma tħossokx grat u tipprova ssib min hu l-​benefattur tiegħek ħalli tkun tistaʼ tirringrazzjah? Taf min hu d-​Donatur fil-​każ tal-​Bibbja?

Il-Bibbja tirrivela s-​Sors taʼ l-​għerf misjub fiha meta tgħid: “L-​Iskrittura kollha hija mnebbħa minn Alla, u tiswa.” (2 Timotju 3:16) Tgħidilna wkoll li “l-​kelma taʼ Alla hi ħajja u qawwija.” (Lhud 4:12) Huwa għalhekk li l-​kliem tad-​deheb misjub fil-​Bibbja huwa f’waqtu u effettiv għalina llum. Ix-​Xhieda taʼ Jehovah jieħdu gost ħafna jgħinuk titgħallem dwar dan id-​Donatur ġeneruż, Alla Jehovah, sabiex b’hekk ikun jistaʼ jkollok il-​prospett li tkun benefiċjarju tal-​“borża mimlija għerf” li hemm fil-​Bibbja​—il-​ktieb t’għerf b’messaġġ għan-​nies illum.

[Noti taʼ taħt]

[Kaxxa/Stampa f’paġna 4]

Kliem tad-​Deheb biex Inżommu Bilanċ Emozzjonali

“Jekk tal-​ħtijiet int tagħti kas, Mulej, Sidi, min jistaʼ jżomm sħiħ? Imma għandek hemm il-​maħfra, biex hekk inqimuk fil-​biżaʼ tiegħek.”—Salm 130:3, 4.

“Il-​qalb ferħana tagħmel il-​wiċċ daħkan, imma l-​qalb imnikkta tmewwet ir-​ruħ.”—Proverbji 15:13.

“La għandek tkun ġust iżżejjed u lanqas għaref bil-​bosta. Għalfejn toqgħod tinfena?”—Koħèlet 7:16.

“Min jagħti hu aktar hieni minn min jieħu.”—Atti 20:35.

“Tinkurlaw? Imma tidinbux; tħallux ix-​xemx tgħib fuq il-​korla tagħkom.”—Efesin 4:26.

[Kaxxa/Stampa f’paġna 5]

Kliem tad-​Deheb biex Ikollok Ħajja tal-​Familja Ferħana

“Tifsil taʼ xogħol bla ħsieb jisfaʼ fix-​xejn, imma bil-​pariri taʼ ħafna jmur tajjeb.”—Proverbji 15:22.

“Moħħ miftuħ jikseb l-​għerf; l-​għorrief jagħtu widen għat-​tagħlim.”—Proverbji 18:15.

“Bħal tuffieħ tad-​deheb fuq platt tal-​fidda, hi l-​kelma li tingħad f’waqtha.”—Proverbji 25:11.

“Stabru b’xulxin, u, jekk xi ħadd minnkom ikollu xi jgħid maʼ ħaddieħor, aħfru lil xulxin; bħalma l-​Mulej ħafer lilkom, hekk agħmlu intom ukoll. U fuq kollox ilbsu l-​imħabba, li hi l-​qofol tal-​perfezzjoni.”—Kolossin 3:13, 14.

“Kunu afu dan, ħuti għeżież. Araw li kull bniedem ikun ħafif biex jismaʼ, tqil biex jitkellem, tqil biex jinkorla.”—Ġakbu 1:19.

[Kaxxa/Stampa f’paġna 6]

Kliem tad-​Deheb biex Ħajtek Tagħmilha Waħda taʼ Suċċess

“Miżien falz jobogħdu l-​Mulej, imma jogħġbu l-​użin tajjeb.”—Proverbji 11:1.

“Qabel il-​qerda tiġi l-​kburija, u qabel il-​waqgħa t-​tkabbir.”—Proverbji 16:18.

“Bħal belt miftuħa u bla ħitan, hekk hu l-​bniedem li ma jitrażżanx.”—Proverbji 25:28.

“Tħallix il-​korla tikbes malajr f’qalbek, għax f’qalb il-​boloh tbejjet il-​korla.”—Koħèlet 7:9.

“Ibgħat ħobżok fuq wiċċ il-​baħar, għax wara żmien twil jerġagħlek lura.”—Koħèlet 11:1.

“Ebda kelma mhux xierqa m’għandha toħroġ minn fommkom, imma kliem sewwa li jedifika skond il-​ħtieġa, kliem li jagħmel il-​ġid lil min jisimgħu.”—Efesin 4:29.

[Stampa f’paġna 7]

Li wieħed jistudja l-​Bibbja huwa l-​ewwel pass biex isir benefiċjarju tal-​“borża mimlija għerf”