Jehovah Hu Alla taʼ Qalb Tajba bl-​Imħabba Miegħi

KIF RAKKONTAT MINN JOHN ANDRONIKOS

Kienet is-​sena 1956. Disat ijiem biss wara li żżewwiġt, kont ninsab quddiem il-​qorti taʼ l-​appell f’Komotiní, fit-​tramuntana tal-​Greċja. It-​tama tiegħi kienet li tiġi annullata s-​sentenza li rċivejt taʼ 12-il xahar ħabs minħabba li kont qed nippriedka dwar is-​Saltna t’Alla. Id-​deċiżjoni tal-​qorti taʼ l-​appell​—taʼ sitt xhur ħabs—​ġabitli fix-​xejn dik it-​tama u kienet biss il-​bidu taʼ sensiela twila taʼ provi. Madankollu, matul dan it-​tiġrib kollu, Jehovah ta prova kemm hu Alla taʼ qalb tajba bl-​imħabba miegħi.

META twelidt jien fl-​1 t’Ottubru, 1931, il-​familja tiegħi kienet tgħix fil-​belt taʼ Kaválla, in-​Neapoli tal-​Maċedonja li l-​appostlu Pawlu żar matul it-​tieni mawra missjunarja tiegħu. Ommi saret waħda mix-​Xhieda taʼ Jehovah meta kelli ħames snin, u għalkemm ma kienet taf taqra kważi xejn, għamlet mill-​aħjar biex tonqox ġewwa fija mħabba għal Alla u biżaʼ minnu. Missieri kien raġel estremament konservattiv u baqaʼ mqabbad b’mod stinat mat-​tradizzjoni Ortodossa Griega. Ma kellu ebda interess fil-​verità tal-​Bibbja u lil ommi kien jopponilha, u taʼ sikwit kien juża l-​vjolenza.

B’hekk, jien trabbejt f’dar maqsuma, fejn missieri kien isawwat u jabbuża lil ommi u saħansitra abbandunana. Minn mindu kont żgħir, ommi kienet tieħu lili u lil oħti ż-​żgħira għal-​laqgħat Kristjani. Madankollu, meta għalaqt il-​15-il sena, ix-​xewqat taż-​żgħożija u l-​ispirtu taʼ indipendenza begħduni mix-​Xhieda taʼ Jehovah. Minkejja dan, ommi li tant kienet leali tgħidx kemm ipprovat tgħinni, u xerrdet ħafna dmugħ fl-​isforzi tagħha sabiex tagħmel dan.

Minħabba l-​faqar u l-​ħajja ħażina li kont qed ngħix, imradt serjament u kelli ninxteħet fis-​sodda għal iktar minn tliet xhur. Kien f’dak iż-​żmien li ħu tassew umli, li kien għen lil ommi ssir taf il-​verità, induna li ġo fija kelli mħabba sinċiera għal Alla. Hu ħass li stajt niġi megħjun biex nirkupra spiritwalment. Oħrajn qalulu: “Int qed taħli l-​ħin tiegħek f’li tipprova tgħin lil John; hu qatt ma se jerġaʼ jieħu interess fl-​affarijiet spiritwali.” Imma l-​paċenzja taʼ dan il-​ħu u l-​perseveranza tiegħu f’li jassistini taw il-​frott. Fil-​15 t’Awissu, 1952, meta kelli 21 sena, jien issimbolizzajt id-​dedikazzjoni tiegħi lil Jehovah permezz tal-​magħmudija fl-​ilma.

Miżżewweġ Frisk u fil-​Ħabs

Tliet snin wara sirt naf lil Martha, oħt spiritwali ħafna bi kwalitajiet mill-​aħjar, u f’qasir żmien tgħarrasna. Jum wieħed bqajt tassew mistagħġeb meta Martha qaltli: “Illum ippjanajt li mmur nippriedka minn bieb għal bieb. Trid tiġi miegħi?” Sa dakinhar qatt ma kont għadni pparteċipajt f’dan l-​aspett tax-​xogħol, għax il-​biċċa l-​kbira kont nippriedka b’mod informali. F’dak iż-​żmien ix-​xogħol taʼ l-​ippridkar fil-​Greċja kien projbit, u kellna nkomplu l-​attività tagħna taʼ l-​ippridkar bil-​moħbi. Minħabba f’hekk, kien hemm diversi arresti, kawżi fil-​qorti, u sentenzi ħorox fil-​ħabs. Xorta waħda, ma stajtx ngħidilha le lill-​għarusa tiegħi!

Martha saret marti fl-​1956. Kien f’dak iż-​żmien, disat ijiem wara li żżewwiġna, li rċivejt is-​sentenza taʼ sitt xhur ħabs mill-​qorti taʼ l-​appell f’Komotiní. Dan ġagħalni niftakar f’mistoqsija li kont għamilt ftit taż-​żmien qabel lil waħda oħt Kristjana, ħabiba t’ommi: “Kif nistaʼ xi darba nuri li jien Xhud veru taʼ Jehovah? Jien qatt ma ġietni l-​opportunità biex nagħti prova tal-​fidi tiegħi.” Meta din l-​oħt ġiet tarani l-​ħabs, fakkritni f’dik il-​mistoqsija u qaltli: “Issa tistaʼ turi lil Jehovah kemm tassew tħobbu. Dan hu l-​inkarigu tiegħek.”

Meta sirt naf li l-​avukat tiegħi pprova jikseb somma biex inkun nistaʼ noħroġ bi pleġġ mill-​ħabs, jien għedtlu li kont nippreferi niskonta s-​sentenza tiegħi. Kemm kont ferħan meta fi tmiem is-​sitt xhur ħabs rajt tnejn minn dawk li kienu l-​ħabs miegħi jaċċettaw il-​verità! Matul is-​snin taʼ wara, kont involut f’ħafna kawżi fil-​qorti minħabba l-​aħbar tajba.

Għażliet li qatt ma Ddispjaċiena Minnhom

Fl-​1959, ftit tas-​snin wara li ħriġt mill-​ħabs, kont qed naqdi bħala qaddej tal-​kongregazzjoni, jew indokratur li jippresiedi, u ġejt mistieden nattendi l-​Iskola tal-​Ministeru tas-​Saltna, kors taʼ taħriġ għall-​anzjani tal-​kongregazzjoni. Iżda, fl-​istess ħin ġejt offrut pożizzjoni permanenti fi sptar pubbliku, xogħol li lili u lill-​familja tiegħi kien se jagħtina sigurtà finanzjarja għal għomorna. X’għandi nagħżel? Kont diġà ili tliet xhur naħdem temporanjament fl-​isptar, u d-​direttur kien entużjast ferm b’xogħli, imma meta waslitli l-​istedina għall-​iskola, lanqas biss riedni nieħu saħansitra xi ftit tal-​jiem frank mingħajr ma nitħallas. Wara li qgħadt naħseb u nitlob fuq din id-​dilemma, iddeċidejt li npoġġi l-​interessi tas-​Saltna l-​ewwel u li nirrifjuta l-​offerta tax-​xogħol.—Mattew 6:33.

Fl-istess perijodu taʼ żmien ġew l-​indokraturi tad-​distrett u tas-​circuit iżuru l-​kongregazzjoni tagħna. Kellna nagħmlu l-​laqgħat tagħna bil-​moħbi fi djar privati minħabba l-​oppożizzjoni qawwija tal-​kleru Ortodoss Grieg u taʼ l-​awtoritajiet. Wara laqgħa minnhom, l-​indokratur tad-​distrett avviċinani u staqsieni jekk qattx ħsibt dwar li nibda fis-​servizz full-time. Is-​suġġeriment tiegħu tant qanqalni għax din kienet il-​ħolma tiegħi minn mindu tgħammidt. Weġibtu: “Nixtieq ħafna.” Madankollu, diġà kelli responsabbiltà oħra taʼ li nrabbi lil binti. Il-​ħu qalli: “Afda f’Jehovah, u hu se jgħinek twettaq il-​pjanijiet tiegħek.” B’hekk, mingħajr ma ttraskurajna r-​responsabbiltajiet tal-​familja tagħna, jien u marti stajna nirranġaw iċ-​ċirkustanzi tagħna, sabiex f’Diċembru taʼ l-​1960, jien bdejt naqdi fil-​Maċedonja tal-​lvant bħala pijunier speċjali​—wieħed mill-​uniċi ħames pijunieri speċjali li kien hemm fil-​pajjiż.

Wara li kont qdejt bħala pijunier speċjali għal sena sħiħa, irċivejt l-​istedina mill-​uffiċċju tal-​fergħa f’Ateni biex naqdi bħala indokratur li jivvjaġġa. Meta rritornajt id-​dar wara xahar taʼ taħriġ f’dan l-​aspett taʼ servizz, u waqt li kont għadni qed nirrakkonta l-​esperjenzi tiegħi lil Martha, ġie jżurni d-​direttur taʼ minjiera kbira tal-​manganiż u offrieli li nsir il-​maniġer tat-​taqsima tar-​raffinar, kif ukoll kuntratt tajjeb għal ħames snin, dar sabiħa, u karozza. Tani jumejn ċans biex nagħtih risposta. Għal darb’oħra, mingħajr ma qgħadt naħsibha, tlabt lil Jehovah: “Hawn jien: ibgħat lili!” (Isaija 6:8) Marti qablet kompletament miegħi. Billi fdajna f’Jehovah, bdejna x-​xogħol taʼ l-​ivvjaġġar, u Jehovah bħala Dak Alla taʼ qalb tajba bl-​imħabba li hu qatt ma ddiżappuntana.

Naqdu Minkejja Diffikultajiet u Ostakli

Għalkemm kellna problemi ekonomiċi, bqajna mexjin ’il quddiem u Jehovah pprovdielna n-​neċessitajiet. Fil-​bidu, jien kont inżur il-​kongregazzjonijiet fuq mutur żgħir, u kont nagħmel sa 500 kilometru. Kemm-il darba kelli xi diffikultajiet, u anki ġrawli xi ftit inċidenti. Darba fix-​xitwa jien u sejjer lura minn kongregazzjoni, kont qed naqsam xmara żgħira li faret meta f’daqqa waħda waqafli l-​mutur, u xxarrabt għasra sa rkobbtejja. Imbagħad, kelli panċer. Wieħed li nzerta għaddej u li kellu pompa tani daqqa t’id, u b’hekk stajt nasal sa l-​eqreb villaġġ fejn stajt insewwi t-​tajer. Fl-​aħħar, fit-​tlieta taʼ fil-​għodu, wasalt id-​dar kiesaħ silġ u għajjien.

F’okkażjoni oħra, hekk kif kont sejjer minn kongregazzjoni għall-​oħra, skiddjajt bil-​mutur u ġejt fuq irkobbtejja. B’riżultat taʼ dan, tqattagħli l-​qalziet u mtlieli kollu demm. Ma kellix qalziet ieħor, u għalhekk dik il-​lejla kelli nagħti t-​taħdita b’qalziet taʼ ħu ieħor, li tgħidx kemm kien kbir għalija. Xorta waħda, l-​ebda diffikultà ma setgħet tberridli x-​xewqa li naqdi lil Jehovah u lill-​għeżież ħuti.

F’inċident ieħor, weġġajt serjament, billi ksirt idi u rrovinajt snieni taʼ quddiem. Kien għal dik il-​ħabta li ġiet iżżurni oħti, li ma kinitx Xhud, u li kienet tgħix fl-​Istati Uniti. X’barka kienet meta hi għenitni biex nixtri karozza! Meta l-​aħwa fil-​fergħa t’Ateni saru jafu dwar l-​inċident tiegħi, bagħtuli ittra inkuraġġanti, u fost affarijiet oħra inkludew il-​kliem taʼ Rumani 8:​28, li parti minnu jgħid: “Alla, maʼ dawk li jħobbuh, . . . f’kollox jaħdem id f’id għall-​ġid tagħhom.” Bosta drabi f’ħajti, din l-​assiguranza kemm tat prova li hi tassew minnha!

Sorpriża Pjaċevoli

Fl-​1963, kont qed naħdem maʼ pijunier speċjali f’raħal fejn in-​nies ma kinux interessati fil-​messaġġ. Iddeċidejna li naħdmu separatament, billi wieħed jaħdem naħa u l-​ieħor jaħdem in-​naħa l-​oħra tat-​triq. F’dar minnhom, eżatt kif ħabbatt il-​bieb ħarġet waħda mara li f’daqqa waħda ġibditni ’l ġewwa, għalqet u sakkret il-​bieb warajja. Bqajt iċċassat, u ma stajtx nifhem x’kien qed jiġri. Ftit wara, hi malajr għajtet ukoll lill-​pijunier speċjali biex jidħol ġewwa. Imbagħad il-​mara qaltilna: “Isktu! Tiċċaqalqux!” Wara ftit, smajna ilħna rrabjati fuq barra. Kien hemm xi nies qed ifittxuna. Meta l-​affarijiet ikkalmaw, il-​mara qaltilna: “Dan għamiltu għall-​protezzjoni tagħkom stess. Jien nirrispettakom għax nemmen li intom Kristjani veri.” Aħna rringrazzjajnieha minn qalbna u tlaqna, waqt li ħallejnielha ħafna letteratura.

Erbatax-il sena wara, waqt li kont qed nattendi konvenzjoni distrettwali fil-​Greċja, avviċinatni waħda mara u qaltli: “Ħija, tiftakarni? Jien dik il-​mara li daħħaltkom f’dari biex nipproteġikom minn dawk li bdew ifittxukom meta ġejtu tagħtu xiehda fir-​raħal tagħna.” Din kienet emigrat lejn il-​Ġermanja, studjat il-​Bibbja, u bdiet tassoċja mal-​poplu taʼ Jehovah. Issa, il-​familja tagħha kollha qegħda fil-​verità.

Tabilħaqq, matul dawn is-​snin kollha, ġejna mberkin b’ħafna “ittri taʼ rakkomandazzjoni.” (2 Korintin 3:1) Uħud minn dawk li kellna l-​privileġġ ngħinuhom jiksbu għarfien tal-​verità tal-​Bibbja qegħdin issa jaqdu bħala anzjani, qaddejja ministerjali, u pijunieri. Kemm inħossni mqanqal meta nara dawk il-​ftit pubblikaturi fis-​circuits fejn jien qdejt lura fil-​bidu tas-​snin sittin jiżdiedu għal iktar minn 10,000 adoratur taʼ Jehovah! Il-​kredtu kollu jmur għal Alla tagħna taʼ qalb tajba bl-​imħabba, li jużana bil-​mod li jrid hu.

“Fuq is-​Sodda tal-​Mard”

Matul is-​snin tagħna fix-​xogħol taʼ l-​ivvjaġġar, Martha wriet kemm kienet verament sieħba li tant għenitni, billi dejjem kien ikollha attitudni ferriħija. Madankollu, f’Ottubru taʼ l-​1976, mardet serjament u għamlet operazzjoni diffiċli. Spiċċat paralizzata minn qaddha ’l isfel fuq siġġu tar-​roti. Kif stajna nkampaw maʼ l-​ispejjeż u man-​niket emozzjonali? Billi għal darb’oħra rġajna fdajna f’Jehovah, bdejna nesperjenzaw l-​id kollha mħabba u ġeneruża tiegħu. Meta tlaqt biex naqdi fil-​Maċedonja, Martha baqgħet fid-​dar taʼ Xhud f’Ateni għat-​terapija fiżika. Kienet iċċempilli u tgħidli dan il-​kliem inkuraġġanti: “Jien ninsab tajba. Int kompli bix-​xogħol tiegħek, u meta nerġaʼ nibda niċċaqlaq, nakkumpanjak fuq is-​siġġu tar-​roti tiegħi.” U għamlet eżattament hekk. L-​għeżież ħutna mill-​Betel bagħtulna ħafna ittri inkuraġġanti. Lil Martha kienu jfakkruha ripetutament fil-​kliem taʼ Salm 41:4 [Salm 41:3, NW]: “Il-​Mulej jieqaf miegħu fuq is-​sodda tal-​mard; ifejjqu mill-​mard meta jkun mixħut.”

Minħabba dawn il-​problemi serji taʼ saħħa, fl-​1986 ġie deċiż li jkun xieraq li naqdi bħala pijunier speċjali f’Kaválla, fejn hawnhekk ngħix viċin il-​familja taʼ l-​għażiża bintna. L-​għażiża tiegħi Martha mietet f’Marzu li għadda, u baqgħet leali sa l-​aħħar. Qabel ma mietet, meta l-​aħwa kienu jistaqsuha: “Kif int?” hi normalment kienet tweġibhom: “Ladarba jien qrib Jehovah, inħossni tajba ħafna!” Meta konna nippreparaw għal-​laqgħat jew meta konna nirċievu xi stedina li tħajjarna naqdu f’inħawi fejn il-​ħsad hu kbir, Martha xorta baqgħet tgħidli: “John, ejja mmorru naqdu fejn il-​bżonn hu akbar.” Qatt ma tilfet l-​ispirtu żeluż tagħha.

Ftit snin ilu, jien ukoll kelli nkampa maʼ problema serja taʼ saħħa. F’Marzu taʼ l-​1994 indunaw li kelli problema serja tal-​qalb, u bilfors kelli bżonn nagħmel operazzjoni. Għal darb’oħra ħassejt l-​id kollha mħabba taʼ Jehovah tappoġġani matul dak il-​perijodu kritiku. Qatt ma se ninsa t-​talba li offra indokratur tas-​circuit ħdejn soddti meta ħriġt mill-​kura intensiva, kif ukoll iċ-​ċelebrazzjoni tal-​Mafkar li kkonduċejt fil-​kamra tiegħi stess fl-​isptar maʼ erbaʼ pazjenti li kienu wrew xi interess għall-​verità.

Jehovah Kien u Għadu l-​Ajjutant Tagħna

Iż-​żmien itir, u ġisimna jiddgħajjef, imma l-​ispirtu tagħna jiġġedded permezz taʼ l-​istudju u s-​servizz. (2 Korintin 4:16) Issa għaddew 39 sena minn mindu għedt, “Hawn jien: ibgħat lili!” Kelli ħajja mimlija, ferħana, u kollha barkiet. Iva, xi drabi nħossni “fqajjar u msejken,” imma mbagħad b’fiduċja sħiħa nkun nistaʼ ngħid lil Jehovah: “Inti l-​għajnuna u l-​ħelsien tiegħi.” (Salm 40:18 [Salm 40:17, NW]) Hu tabilħaqq Alla li wera qalb tajba bl-​imħabba miegħi.

[Stampa f’paġna 25]

Maʼ Martha fl-​1956

[Stampa f’paġna 26]

Il-​port f’Kaválla

[Stampa f’paġna 26]

Maʼ Martha fl-​1997