Dawk li Jimxu fid-​Dawl Se Jithennew

“Ejja . . . ħalli nimxu fid-​dawl tal-​Mulej!”—ISAIJA 2:5.

1, 2. (a) Kemm hu importanti d-​dawl? (b) It-​twissija li d-​dlamijiet se jiksu l-​art għala hija daqshekk serja?

JEHOVAH hu s-​Sors tad-​dawl. Il-​Bibbja tgħid li hu Dak li “għamel ix-​xemx għad-​dawl binhar, il-​qamar u l-​kwiekeb b’liġijiethom għad-​dawl billejl.” (Ġeremija 31:35; Salm 8:4 [8:​3, NW]) Hu Dak li ħalaq ix-​xemx tagħna, li hi tistaʼ tgħid forn nukleari enormi li jipproduċi kwantità kbira taʼ enerġija. Ftit minn din l-​enerġija toħroġ fl-​ispazju bħala dawl u sħana, u l-​ammont żgħir ħafna minn din l-​enerġija li jilħaq id-​dinja tagħna bħala dawl tax-​xemx jagħmilha possibbli li jkun hawn il-​ħajja. Mingħajr id-​dawl tax-​xemx ma konniex inkunu nistgħu neżistu. Id-​dinja kienet tkun pjaneta bla ħajja.

² B’dan f’moħħna, nistgħu nifhmu kemm kienet serja s-​sitwazzjoni li ddeskriva l-​profeta Isaija. Hu qal: “Ara d-​dlamijiet jiksu l-​art, u sħab iswed il-​popli.” (Isaija 60:2) M’għandniex xi ngħidu, hawnhekk mhux qed jirreferi għad-​dlam f’sens fiżiku. Isaija ma kienx qed ifisser li xi darba x-​xemx, il-​qamar, u l-​kwiekeb m’humiex se jibqgħu jiddu. (Salm 89:​37, 38 [89:​36, 37, NW]; 136:​7-9) Minflok, kien qed jitkellem dwar id-​dlam spiritwali. Imma d-​dlam spiritwali huwa taʼ periklu għall-​ħajja. Mingħajr id-​dawl spiritwali ma nistgħux ngħixu wisq, daqskemm ma nistgħux ngħixu għal ħafna żmien mingħajr id-​dawl fiżiku.—Luqa 1:79.

3. Meta wieħed iqis dak li qal Isaija, il-​Kristjani x’għandhom jagħmlu?

³ Meta nqisu dan, hu importanti ħafna li nkunu nafu li, għalkemm il-​kliem taʼ Isaija twettaq fuq Ġuda tal-​qedem, dan qed ikollu twettiq akbar illum. Iva, fi żmienna d-​dinja hija miksija bi dlam spiritwali. F’sitwazzjoni perikoluża bħal din, id-​dawl spiritwali huwa vitali. Għal din ir-​raġuni, il-​Kristjani għandhom jagħmlu dak li jħeġġeġ Ġesù: “[“Ħallu,” NW] jiddi d-​dawl tagħkom quddiem il-​bnedmin.” (Mattew 5:16) Kristjani leali jistgħu jkunu dawwala f’nofs id-​dlam għal uħud ġwejdin, u b’hekk jagħtuhom l-​opportunità li jiksbu l-​ħajja.—Ġwann 8:12.

Żminijiet taʼ Dlam f’Iżrael

4. Il-​kliem profetiku taʼ Isaija meta seħħ għall-​ewwel darba, imma liema sitwazzjoni diġà kienet teżisti fi żmienu stess?

⁴ Il-​kliem taʼ Isaija dwar id-​dlam li jiksi l-​art twettaq l-​ewwel meta s-​saltna taʼ Ġuda kienet ħerba u l-​poplu tagħha kien eżiljat f’Babilonja. Madankollu, saħansitra qabel seħħ dan kollu, fi żmien Isaija stess, ħafna mill-​ġens kien diġà f’dalma spiritwali kbira. Dan qanqal lil Isaija biex iħeġġeġ lill-​Iżraelin sħabu: “Ejja, dar Ġakobb, ħalli nimxu fid-​dawl tal-​Mulej!”—Isaija 2:5; 5:20.

5, 6. Liema fatturi wasslu biex żmien Isaija jkun żmien taʼ dlam?

⁵ Isaija pprofetizza f’Ġuda “fi żmien Għużżija, Ġotam, Aħaż, Ħeżekija, slaten taʼ Ġuda.” (Isaija 1:1) Kien żmien taʼ taqlib li fih kien hemm ħafna inkwiet politiku, ipokresija reliġjuża, korruzzjoni fis-​sistema ġudizzjarja, u moħqrija fuq il-​fqir. Wieħed setaʼ jara artali taʼ l-​allat foloz fuq il-​qċaċet taʼ l-​għoljiet saħansitra meta kienu jaħkmu slaten leali, bħas-​Sultan Ġotam. Meta kienu jaħkmu slaten li ma kinux leali, is-​sitwazzjoni kienet agħar. Per eżempju, is-​Sultan mill-​agħar Aħaż saħansitra wasal biex offra lil nislu f’sagrifiċċju ċerimonjali lill-​alla Molek. Dan kien dlam tabilħaqq!—2 Slaten 15:​32-34; 16:​2-4.

⁶ Is-​sitwazzjoni internazzjonali kienet imdallma wkoll. Mowab, Edom, u l-​Filistja, li kienu ġirien tas-​saltna taʼ Ġuda, kienu taʼ theddida kontinwa. Għalkemm kienu demm wieħed, is-​saltna taʼ Iżrael, li kienet fit-​tramuntana, iddikjarat lilha nfisha għadu taʼ Ġuda. Is-​Sirja, li kienet tinsab iktar ’il fuq, ukoll kienet qed thedded il-​paċi taʼ Ġuda. Saħansitra iktar perikoluża kienet l-​Assirja tant kiefra, li dejjem kienet attenta għal kull opportunità biex iżżid il-​poter tagħha. Matul il-​perijodu li fih ipprofetizza Isaija, l-​Assirja għelbet lil Iżrael u kważi qerdet lil Ġuda. Kien hemm żmien meta l-​Assirja kienet għelbet lil kull belt fortifikata f’Ġuda minbarra ’l Ġerusalemm.—Isaija 1:​7, 8; 36:1.

7. Liema triq għażlu Iżrael u Ġuda, u Jehovah kif aġixxa minħabba f’dan?

⁷ Il-​poplu li kien f’patt m’Alla sofra dawn id-​diżastri għaliex Iżrael u Ġuda ma baqgħux leali lejh. L-​istess bħal dawk li huma msemmijin fil-​ktieb tal-​Proverbji, huma kienu qed ‘jitilqu t-​toroq it-​tajba, biex jimxu f’toroq mudlama.’ (Proverbji 2:​13, KŻ) Madankollu, għalkemm Jehovah kien irrabjat għall-​poplu tiegħu, hu m’abbandunahx għalkollox. Minflok, ħatar lil Isaija u lil profeti oħrajn biex jipprovdu d-​dawl spiritwali għal dawk fost il-​ġens li kienu għadhom qed jagħmlu ħilithom biex jaqdu lil Jehovah lealment. Id-​dawl provdut permezz taʼ dawn il-​profeti kien prezzjuż tabilħaqq. Kien jagħti l-​ħajja.

Żminijiet taʼ Dlam Illum

8, 9. Liema fatturi jwasslu biex żmienna jkun żmien taʼ dlam?

⁸ Is-​sitwazzjoni fi żmien Isaija kienet simili ferm għal dik li naraw illum. Fi żmienna, il-​mexxejja umani taw daharhom lil Jehovah u lis-​Sultan tiegħu, Ġesù Kristu, li jinsab fuq it-​tron. (Salm 2:​2, 3) Il-​mexxejja reliġjużi tal-​Kristjaneżmu qarrqu bil-​merħliet tagħhom. Dawn il-​mexxejja jgħidu li jaqdu lil Alla, imma fir-​realtà l-​biċċa l-​kbira minnhom jinkuraġġixxu l-​appoġġ lill-​allat taʼ din id-​dinja—in-​nazzjonaliżmu, il-​militariżmu, ir-​rikkezzi, u n-​nies prominenti—minbarra li jgħallmu duttrini pagani.

⁹ F’post wara l-​ieħor, ir-​reliġjonijiet tal-​Kristjaneżmu ħadu sehem fi gwerer u konflitti ċivili karatterizzati minn tindif etniku u ħruxijiet oħrajn. Barra minn hekk, minflok ma jżommu sod mal-​moralità tal-​Bibbja, ħafna reliġjonijiet qegħdin jagħlqu għajnejhom jew jagħtu l-​appoġġ bl-​azzjonijiet tagħhom għal prattiċi immorali bħall-​fornikazzjoni u l-​omosesswalità. Minħabba li l-​prinċipji tal-​Bibbja ġew imwarrbin b’dan il-​mod, il-​merħliet tal-​Kristjaneżmu huma bħal dawk in-​nies li tkellem dwarhom is-​salmista tal-​qedem: “La jafu u lanqas jifhmu, fid-​dlam qegħdin jimxu.” (Salm 82:5) Kemm hu veru li l-​Kristjaneżmu, bħal Ġuda tal-​qedem, qiegħed f’dalma ħoxna!—Apokalissi 8:12.

10. Id-​dawl kif jiddi fid-​dlam li hawn illum, u nies ġwejdin kif jibbenefikaw?

¹⁰ F’nofs dan id-​dlam kollu, Jehovah qed iġiegħel id-​dawl jiddi għall-​benefiċċju taʼ wħud ġwejdin. Għal dan l-​għan, hu qiegħed juża lill-​qaddejja midlukin tiegħu fuq l-​art, “l-​ilsir leali u diskret,” u dawn qegħdin ‘jiddu fid-​dinja bħal kwiekeb.’ (Mattew 24:​45, NW; Filippin 2:15) Din il-​klassi taʼ l-​ilsir, li hi appoġġata minn miljuni taʼ “nagħaġ oħra” sħabhom, tirrifletti dawl spiritwali bbażat fuq il-​Kelma t’Alla, il-​Bibbja. (Ġwann 10:16) F’din id-​dinja miksija bid-​dlam, dan id-​dawl jagħti t-​tama lill-​ġwejdin, ikun t’għajnuna biex ikollhom relazzjoni m’Alla, u jgħinhom jevitaw in-​nases spiritwali. Huwa prezzjuż, u jagħti l-​ħajja.

“Infaħħar Ismek”

11. Jehovah liema informazzjoni pprovda fi żmien Isaija?

¹¹ Liema tip taʼ gwida pprovda Jehovah fiż-​żmien taʼ dlam li kien jgħix fih Isaija u fiż-​żmien saħansitra iktar mudlam li ġie wara, meta l-​Babiloniżi ħadu lill-​poplu taʼ Jehovah fil-​jasar? Minbarra li pprovda gwida morali, hu wera biċ-​ċar minn qabel kif kien se jwettaq l-​iskopijiet li kienu jinvolvu lill-​poplu tiegħu. Per eżempju, ikkunsidra l-​profeziji sbieħ li hemm f’Isaija kapitli 25 sa 27. Il-​kliem li hemm f’dawn il-​kapitli jindika kif aġixxa Jehovah dak iż-​żmien u kif jaġixxi llum.

12. Isaija kif jesprimi ruħu mill-​qalb?

¹² L-​ewwel, Isaija jiddikjara: “O Mulej, int Alla tiegħi: jien neżaltak, u nfaħħar ismek.” X’espressjoni taʼ tifħir mill-​qalb! Imma x’kien li qanqal lill-​profeta biex ilissen talba bħal din? Fattur ewlieni nsiru nafuh mill-​bqija tal-​vers, fejn naqraw: “Għax int [Jehovah] għamilt ħwejjeġ tal-​għaġeb; il-​ħsibijiet tiegħek, taʼ żmien ilu, huma fidili u ma jonqsux.”—Isaija 25:​1, KŻ.

13. (a) Liema għarfien ġiegħel lil Isaija japprezza iktar lil Jehovah? (b) Kif nistgħu nitgħallmu mill-​eżempju taʼ Isaija?

¹³ Sa żmien Isaija, Jehovah kien wettaq ħafna għemejjel taʼ l-​għaġeb għal Iżrael, u dawn kienu tniżżlu bil-​miktub. Mid-​dehra Isaija kien familjari maʼ dawn il-​kitbiet. Per eżempju, hu kien jaf li Jehovah kien ħareġ lill-​poplu tiegħu mill-​jasar fl-​Eġittu u salvahom mill-​korla taʼ l-​armata tal-​Fargħun ħdejn il-​Baħar l-​Aħmar. Kien jaf li Jehovah mexxa ’l-poplu tiegħu minn ġod-​deżert u daħħalhom fl-​Art Imwegħda. (Salm 136:​1, 10-26) Rakkonti storiċi bħal dawn urew li Alla Jehovah hu leali u taʼ min jafdah. Il-​“ħsibijiet” tiegħu—l-​affarijiet kollha li jidħlu fl-​iskop tiegħu—iseħħu. Dan l-​għarfien eżatt li Isaija rċieva mingħand Alla saħħu biex ikompli miexi fid-​dawl. F’dan ir-​rigward, hu kien taʼ eżempju mill-​aqwa għalina. Jekk nistudjaw il-​Kelma miktuba t’Alla bir-​reqqa u napplikawha f’ħajjitna, aħna wkoll se nibqgħu fid-​dawl.—Salm 119:105; 2 Korintin 4:6.

Belt Tiġi Meqruda

14. X’jiġi profetizzat dwar ċerta belt, u din liema belt x’aktarx li kienet?

¹⁴ Eżempju wieħed tal-​ħsibijiet t’Alla nsibuh f’Isaija 25:​2, fejn naqraw: “Għax il-​belt għamiltha gozz ġebel, ħerba l-​belt bis-​swar imdawwra. Il-​fortizza tal-​kburin ma għadhiex belt iżjed, ma tinbena qatt aktar.” X’inhi din il-​belt? X’aktarx li Isaija kien qed jitkellem profetikament dwar Babilonja. Tabilħaqq, iż-​żmien meta Babilonja saret sempliċi gozz ġebel wasal tassew.

15. Liema ‘belt kbira’ teżisti llum, u x’se jiġrilha?

¹⁵ Il-​belt imsemmija minn Isaija għandha pariġġ illum? Iva. Il-​ktieb taʼ l-​Apokalissi jitkellem dwar il-​“Belt il-​Kbira, li għandha s-​saltna fuq is-​slaten taʼ l-​art.” (Apokalissi 17:18) Din il-​belt il-​kbira hija “Babilonja l-​Kbira,” l-​imperu dinji taʼ reliġjon falza. (Apokalissi 17:5) Illum, il-​parti prinċipali taʼ Babilonja l-​Kbira hija l-​Kristjaneżmu, li l-​kleru tiegħu huwa minn taʼ quddiem f’li jopponi x-​xogħol taʼ l-​ippridkar tas-​Saltna li jwettaq il-​poplu taʼ Jehovah. (Mattew 24:14) Madankollu, l-​istess bħal Babilonja tal-​qedem, Babilonja l-​Kbira dalwaqt se tinqered, u qatt ma se terġaʼ tqum.

16, 17. L-għedewwa taʼ Jehovah kif igglorifikawh fl-​imgħoddi u fi żmienna?

¹⁶ X’jipprofetizza iktar Isaija dwar il-​‘belt imdawra bis-​swar’? Waqt li jindirizza lil Jehovah, Isaija jgħid: “Għalhekk ifaħħrek poplu b’saħħtu, il-​belt taʼ ġnus [“kiefra,” KŻ] tibżaʼ minnek.” (Isaija 25:3) Din il-​belt taʼ l-​għedewwa, “il-​belt taʼ ġnus [“kiefra,” KŻ],” kif se tigglorifikah lil Jehovah? Sewwa, ftakar f’dak li ġara lil Nabukodonosor, l-​iktar sultan setgħan taʼ Babilonja. Wara li għadda minn esperjenza li ġagħlitu jidħol f’qoxortu u wriet x’kienet id-​dgħjufija tiegħu stess, hu ġie mġiegħel jammetti li Jehovah huwa tassew kbir u jistaʼ kollox. (Danjel 4:​31, 32 [4:​34, 35, NW]) Meta Jehovah juża l-​qawwa tiegħu, saħansitra l-​għedewwa tiegħu jkollhom jirrikonoxxu, għalkemm kontra qalbhom, ix-​xogħlijiet setgħana taʼ Jehovah.

¹⁷ Babilonja l-​Kbira qatt ġiet imġagħla tirrikonoxxi x-​xogħlijiet setgħana taʼ Jehovah? Iva. Matul l-​ewwel gwerra dinjija, il-​qaddejja midlukin taʼ Jehovah wettqu x-​xogħol taʼ l-​ippridkar bi tbatija. Fl-​1918, huma ttieħdu f’jasar spiritwali meta xi uffiċjali ewlenin tal-​Watch Tower Society ġew mitfugħin il-​ħabs. Ix-​xogħol organizzat taʼ l-​ippridkar tistaʼ tgħid waqaf. Imbagħad, fl-​1919, Jehovah tahom il-​ħajja mill-​ġdid u saħħaħhom permezz taʼ l-​ispirtu tiegħu, sabiex b’hekk setgħu jibdew iwettqu l-​inkarigu li jippridkaw l-​aħbar tajba fl-​art abitata kollha. (Mark 13:10) Dan kollu, kif ukoll l-​effett li dan kellu fuq l-​opponenti tagħhom, ġie profetizzat fil-​ktieb taʼ l-​Apokalissi. L-​opponenti tagħhom “twerwru u taw glorja lil Alla tas-​sema.” (Apokalissi 11:​3, 7, 11-13) Dan ma jfissirx li dawn kollha kkonvertew, imma ġew imġagħlin jirrikonoxxu l-​għemil setgħani li Jehovah kien wettaq f’din l-​okkażjoni, bħalma kien bassar Isaija.

“Fortizza għall-​Imsejken”

18, 19. (a) Dawk li jopponu għala ma rnexxilhomx ikissru l-​integrità tal-​poplu taʼ Jehovah? (b) “L-​għanja tan-​nies kefrin” kif se tiġi msikkta?

¹⁸ Isaija issa jitkellem dwar il-​mod ħanin kif Jehovah jittratta maʼ dawk li jimxu fid-​dawl. Hu jgħid lil Jehovah: “Għax int kont fortizza għall-​imsejken, fortizza għall-​fqir fid-​dwejjaq tiegħu, kenn mit-​tempesta, dell għas-​sħana, għax in-​nefħa tal-​kefrin hi bħal tempesta tax-​xita li taħbat mal-​ħajt. Inti trażżan l-​għagħa tal-​barranin, bħas-​sħana f’art niexfa; bħas-​sħana bid-​dell taʼ sħaba, titbaxxa [jew, tissikket] l-​għanja tan-​nies kefrin.”—Isaija 25:​4, 5, KŻ.

¹⁹ Mill-​1919 ’l hawn, uħud kefrin ipprovaw minn kollox biex ikissru l-​integrità taʼ l-​adoraturi veri, imma fallielhom. Għala? Għaliex Jehovah hu l-​fortizza u l-​kenn tan-​nies tiegħu. Hu jipprovdi l-​frisk fid-​dell mis-​sħana tikwi tal-​persekuzzjoni u hu wieqaf bħal ħajt sod kontra x-​xita qawwija taʼ l-​oppożizzjoni. Aħna li nimxu fid-​dawl t’Alla nħarsu ’l quddiem bil-​fiduċja lejn iż-​żmien meta “titbaxxa [jew, tissikket] l-​għanja tan-​nies kefrin.” Iva, aħna nistennew bil-​ħerqa l-​jum meta l-​għedewwa taʼ Jehovah jkunu sparixxew.

20, 21. Liema pranzu kbir jipprovdi Jehovah, u x’se jinkludi dan il-​pranzu fid-​dinja l-​ġdida?

²⁰ Jehovah mhux biss jipproteġi lill-​qaddejja tiegħu, iżda jipprovdilhom bħala Missier li jħobbhom. Wara li ħeles lin-​nies tiegħu minn Babilonja l-​Kbira fl-​1919, hu poġġa quddiemhom pranzu kbir tar-​rebħa, provvista abbundanti taʼ ikel spiritwali. Dan tbassar f’Isaija 25:​6, fejn naqraw: “Jagħmel il-​Mulej taʼ l-​eżerċti għall-​popli kollha fuq din il-​muntanja, mejda b’ikel fin, mejda bi nbejjed ħelwa, b’laħam imsemmen bil-​mudullun, u nbejjed fini.” Kemm aħna mberkin li nistgħu ngawdu minn din il-​festa! (Mattew 4:4) Tabilħaqq, hemm abbundanza taʼ ikel tajjeb fuq “il-​Mejda tal-​Mulej.” (1 Korintin 10:21) Permezz taʼ “l-​ilsir leali u diskret,” aħna ningħataw dak kollu li qatt jistaʼ jkollna bżonn f’sens spiritwali.

²¹ Dan il-​pranzu provdut minn Alla jinkludi iktar affarijiet. Il-​festa spiritwali li qed ingawdu issa tfakkarna fl-​abbundanza taʼ ikel materjali li se jkun hemm fid-​dinja l-​ġdida mwegħda minn Alla. F’dak iż-​żmien, il-​“mejda b’ikel fin” se tinkludi ikel materjali bix-​xabaʼ. Ħadd ma se jkun bil-​ġuħ, la f’sens fiżiku u lanqas f’sens spiritwali. X’serħan se jkun dan għall-​għeżież ħutna leali li issa qed ibatu minħabba l-​“ġuħ kbir” imbassar bħala parti mis-​“sinjal” tal-​preżenza taʼ Ġesù! (Mattew 24:​3, 7) Għalihom, il-​kliem tas-​salmista huwa verament taʼ faraġ. Hu qal: “Ikun kotran il-​qamħ fuq l-​art, jogħla sal-​qċaċet taʼ l-​għoljiet.”—Salm 72:16.

22, 23. (a) Liema “għata,” jew “velu,” se titneħħa, u kif? (b) ‘L-​għajb tal-​poplu taʼ Jehovah’ kif se jitneħħa?

²² Jehovah jwiegħed li se jwettaq affarijiet saħansitra iktar taʼ l-​għaġeb. Isaija issa jqabbel id-​dnub u l-​mewt maʼ “għata,” jew “velu.” Hu jgħid: “[Jehovah] jċarrat minn fuq din il-​muntanja l-​velu li kien jgħatti wiċċ il-​popli kollha, għata li kien jaħbi kollha kemm huma l-​ġnus.” (Isaija 25:7) Aħseb ftit! Id-​dnub u l-​mewt, li taqqlu lill-​umanità bħal kutra ħoxna li ma tgħaddix arja minnha, mhux se jibqgħu jeżistu. Kemm nixxennqu għal dak il-​jum meta l-​benefiċċji tas-​sagrifiċċju li Ġesù ħallas bħala prezz tal-​fidwa jiġu applikati bis-​sħiħ fuq l-​umanità ubbidjenti u leali!—Apokalissi 21:​3, 4.

²³ Dwar dak iż-​żmien sabiħ, il-​profeta ispirat jassigurana: “[Alla] jeqred il-​mewt għal dejjem, jixxotta Sidi l-​Mulej id-​dmugħ minn fuq kull wiċċ, u jħassar l-​għajb tal-​poplu tiegħu minn wiċċ l-​art kollha: għax il-​Mulej tkellem.” (Isaija 25:8) Ħadd ma se jmut b’kawżi naturali jew jibki għax ikun tilef lil xi ħadd maħbub. X’barka se tkun din il-​bidla! Barra minn hekk, imkien fuq l-​art ma se jinstemaʼ t-​tmaqdir u t-​tixrid taʼ gideb li tant ilhom jissaportu Alla u l-​qaddejja tiegħu. Għala le? Għaliex Jehovah se jwarrab min-​nofs lis-​sors tagħhom—missier il-​gidba, Satana x-​Xitan, flimkien maż-​żerriegħa kollha taʼ Satana.—Ġwann 8:44.

24. Dawk li jimxu fid-​dawl kif jirreaġixxu meta joqogħdu jirriflettu dwar ix-​xogħlijiet setgħana li Jehovah jagħmel għalihom?

²⁴ Meta joqogħdu jirriflettu dwar dawn it-​turijiet tal-​qawwa taʼ Jehovah, dawk li jimxu fid-​dawl jitqanqlu biex jgħidu bil-​ferħ: “Dan hu Alla tagħna: fih ittamajna li jsalvana; dan hu lMulej li fih ittamajna: nifirħu u nithennew bis-​salvazzjoni tiegħu.” (Isaija 25:9) Dalwaqt, il-​bnedmin twajbin tabilħaqq li se jkollhom għalfejn jithennew. Id-​dlam se jisparixxi għalkollox, u dawk li jibqgħu leali se jgawdu bis-​sħiħ id-​dawl taʼ Jehovah għall-​eternità kollha. Jistaʼ jkollna tama isbaħ minn din? Le, tabilħaqq!

Tistaʼ Tispjega?

• Illum għala hu vitali li nimxu fid-​dawl?

• Isaija għala faħħar isem Jehovah?

• L-għedewwa għala qatt m’huma se jkissru l-​integrità tal-​poplu t’Alla?

• Liema barkiet kbar hemm jistennew lil dawk li jimxu fid-​dawl?

[Stampa f’paġna 13]

L-​abitanti taʼ Ġuda ssagrifikaw it-​tfal lil Molek

[Stampi f’paġna 15]

Għarfien dwar l-​għemejjel setgħana taʼ Jehovah qanqal lil Isaija biex ifaħħar isem Jehovah

[Stampa f’paġna 16]

It-​twajbin se jgawdu bis-​sħiħ id-​dawl taʼ Jehovah għal dejjem