Il-​Barkiet tas-​Saltna Jistgħu Jkunu Tiegħek

L-​APPOSTLU Kristjan Pawlu kien jaf jitkellem tajjeb b’ċerti lingwi ewlenin taʼ żmienu. Kellu edukazzjoni li hija simili għall-​edukazzjoni universitarja tal-​lum. Kellu l-​vantaġġi u d-​drittijiet kollha taʼ ċittadin Ruman. (Atti 21:​37-40; 22:​3, 28) Dawn il-​kwalifiki setgħu, kieku ried, għenuh isir sinjur u famuż. Madankollu, hu qal: “Dak kollu li għalija kien qligħ, jien għaddejtu bħala telf minħabba Kristu . . . u ngħodd kollox bħala knis, biex nirbaħ lil Kristu.” (Filippin 3:​7, 8) Pawlu għala għamel stqarrija bħal din?

Pawlu, li qabel kien magħruf bħala Sawl taʼ Tarsu u bħala persekutur taʼ dawk li kienu “miexja fit-​Triq tal-​Mulej,” beda jemmen wara li ngħata viżjoni taʼ Ġesù rxoxtat u glorifikat. (Atti 9:​1-19) Din l-​esperjenza li Pawlu kellu fi triqtu lejn Damasku ma ħallietlu l-​ebda dubju li Ġesù kien il-​Messija mwiegħed, jew il-​Kristu, il-​ħakkiem futur tas-​Saltna mwegħda. Din ġabet ukoll bidla kbira f’ħajjet Pawlu, kif tindika l-​istqarrija qawwija tiegħu li għadha kif issemmiet. Fi kliem ieħor, minħabba li kellu qalbu sinċiera u onesta, Pawlu nidem.—Galatin 1:​13-16.

Fil-​Bibbja, il-​verb “nidem” taʼ spiss jiġi tradott mill-​kelma Griega li tfisser letteralment “taf wara,” bħala l-​oppost taʼ “taf minn qabel.” B’hekk, l-​indiema tinvolvi bidla fil-​ħsieb, fl-​attitudni, jew fl-​iskop, li tiċħad il-​modi taʼ qabel bħala li m’humiex sodisfaċenti. (Atti 3:19, 20a [3:​19, NW]; Apokalissi 2:5) Fil-​każ tiegħu, Pawlu ma ħalliex din il-​ġrajja tant sinifikanti fi triqtu lejn Damasku tkun sempliċement xi esperjenza emozzjonali jew saħansitra xi esperjenza spiritwali, kif isejħulha xi wħud. Għalih, din bħallikieku fetħitlu għajnejh għall-​fatt li l-​ħajja tiegħu taʼ qabel, meta ma kienx jaf lil Kristu, kienet bla siwi. Hu rrealizza wkoll li sabiex setaʼ jibbenefika mill-​għarfien li kien għadu kif sab dwar il-​Kristu, ried bilfors jagħmel xi ħaġa biex jirranġa ħajtu.—Rumani 2:4; Efesin 4:24.

Bidla li Ġabet Barkiet

Qabel, l-​għarfien li Pawlu kellu dwar Alla kien fil-​biċċa l-​kbira kisbu mingħand is-​setta tal-​Fariżej, li hu kien membru tagħha. It-​twemmin tagħhom kien jinkludi ħafna filosofiji u tradizzjonijiet tal-​bnedmin. Minħabba l-​preġudizzji reliġjużi, iż-​żelu u l-​isforzi taʼ Pawlu ma kinux qed jaqdu skop tajjeb. Għalkemm ħaseb li kien qed jaqdi lil Alla, fil-​fatt kien qed jiġġieled kontrih.—Filippin 3:​5, 6.

Wara li rċieva għarfien eżatt dwar il-​Kristu u l-​irwol tiegħu fl-​iskop t’Alla, Pawlu setaʼ jara li kellu jagħmel għażla: Kellu hu jibqaʼ Fariżew u jkompli jgawdi pożizzjoni u stima, jew kellu jbiddel ħajtu u jibda jagħmel dak kollu li kien hemm bżonn biex jikseb l-​approvazzjoni t’Alla? B’ferħ, Pawlu għamel l-​għażla t-​tajba, għax hu qal: “Jiena ma nistħix mill-​Evanġelju; għax l-​Evanġelju hu qawwa taʼ Alla għas-​salvazzjoni taʼ dawk kollha li jemmnu, l-​ewwel il-​Lhud u mbagħad il-​Griegi.” (Rumani 1:16) Pawlu sar predikatur żeluż taʼ l-​aħbar tajba dwar il-​Kristu u s-​Saltna.

Bosta snin wara, Pawlu qal lil sħabu l-​Kristjani: “Ma jidhirlix li dan ġa lħaqtu; imma ħaġa waħda ngħid: waqt li ninsa ’l taʼ warajja kollu, jiena nagħmel ħilti kollha biex nilħaq dak li hemm quddiemi; niġri ’l quddiem lejn it-​tmiem, biex nikseb il-​premju li għalih Alla qed isejjħilna hemm fuq fi Kristu Ġesù.” (Filippin 3:​13, 14) Pawlu bbenefika mill-​aħbar tajba għaliex minn jeddu abbanduna dak li kien qed ibegħdu minn Alla u b’qalbu kollha segwa miri li kienu fi qbil maʼ l-​iskop t’Alla.

Int X’Se Tagħmel?

Forsi m’ilekx li smajt bl-​aħbar tajba tas-​Saltna. Togħġbok it-​tama li tgħix għal dejjem f’ġenna taʼ l-​art perfetta? Normalment lil kulħadd togħġob, għax aħna lkoll għandna x-​xewqa ġewwa fina li rridu ngħixu u ngawdu ħajja fil-​paċi u s-​sigurtà. Il-​Bibbja tgħid li Alla poġġa “l-​eternità” fi qlubna. (Ekkleżjażti 3:​11, Karm Żammit) Għalhekk, hija xi ħaġa naturali li nittamaw għal dak iż-​żmien meta n-​nies se jkunu jistgħu jgħixu għal dejjem fil-​paċi u l-​hena. U dan hu li toffri l-​aħbar tajba tas-​Saltna.

Madankollu, biex din it-​tama ssir realtà jeħtieġ li tfittex u tiskopri x’inhi verament l-​aħbar tajba. L-​appostlu Pawlu wissa: ‘Irid iseħħlek tagħraf x’inhi r-​rieda taʼ Alla, x’inhu t-​tajjeb li jogħġbu, x’inhu perfett.’ (Rumani 12:2) Għalhekk, wara li tikseb l-​għarfien u l-​fehma, int trid tagħmel għażla bħalma kellu jagħmel Pawlu.

Mill-banda l-​oħra, int forsi diġà għandek it-​twemmin tiegħek dwar x’se jiġri minnek fil-​futur. Ftakar li Sawl kellu l-​ideat tiegħu dwar x’kienet ir-​rieda t’Alla qabel ma sar l-​appostlu Pawlu. Imma minflok ma tistenna xi rivelazzjoni mirakoluża mingħand Alla, għala ma tħarisx lejn il-​kwistjoni b’moħħ miftuħ? Staqsi lilek innifsek: ‘Naf jien x’inhi verament ir-​rieda t’Alla għall-​bnedmin u għall-​art? Xi provi nistaʼ nġib biex insaħħaħ dak li nemmen? Se jibqgħu sodi dawn il-​provi meta jiġu eżaminati fid-​dawl taʼ dak li tgħid il-​Kelma t’Alla, il-​Bibbja?’ M’int se titlef xejn jekk teżamina t-​twemmin reliġjuż tiegħek b’dan il-​mod. Fil-​fatt, suppost li hekk tagħmel għaliex il-​Bibbja tħeġġiġna: “Kunu żguri mill-​affarijiet kollha; żommu sodi maʼ dak li hu mill-​aħjar.” (1 Tessalonikin 5:​21, NW) Wara kollox, m’hijiex l-​approvazzjoni t’Alla l-​iktar ħaġa importanti?—Ġwann 17:3; 1 Timotju 2:​3, 4.

Il-mexxejja reliġjużi jistgħu jwegħduna futur etern. Imma jekk din il-​wegħda m’hijiex ibbażata fuq it-​tagħlim tal-​Bibbja, m’hijiex se tgħinna niksbu l-​barkiet tas-​Saltna t’Alla. Fil-​Priedka famuża tiegħu taʼ fuq il-​Muntanja, Ġesù ma ħalla l-​ebda dubju meta wissa: “Mhux kulmin jgħidli; ‘Mulej, Mulej’, jidħol fis-​Saltna tas-​Smewwiet, iżda min jagħmel ir-​rieda taʼ Missieri li hu fis-​smewwiet!”—Mattew 7:21.

Innota li Ġesù poġġa l-​enfasi fuq li jagħmel ir-​rieda taʼ Missieru bħala l-​bażi biex jiġi deċiż jekk wieħed jirċivix il-​barkiet tas-​Saltna t’Alla jew le. Fi kliem ieħor, dak li minbarra jidher tajjeb mhux bilfors li jkun jogħġob lil Alla. Fil-​fatt, Ġesù kompla jgħid: “F’dak il-​jum ikun hemm ħafna li jgħiduli, ‘Mulej, Mulej, m’hux f’ismek ħabbarna aħna, u m’hux f’ismek keċċejna x-​xjaten u f’ismek għamilna ħafna mirakli?’ Mbagħad jien ngħidilhom, ‘Lilkom qatt ma kont nafkom! Warrbu minn quddiemi, intom li tagħmlu l-​ħażen!’” (Mattew 7:​22, 23) Jidher ċar li l-​iktar ħaġa importanti hi li nkunu żguri li nifhmu eżatt x’inhi verament l-​aħbar tajba tas-​Saltna u mbagħad naġixxu fi qbil magħha.—Mattew 7:​24, 25.

L-​Għajnuna Tistaʼ Tinkiseb

Ix-​Xhieda taʼ Jehovah issa ilhom iktar minn 100 sena jxandru l-​aħbar tajba tas-​Saltna t’Alla. Permezz tal-​letteratura u bil-​fomm qegħdin jgħinu lin-​nies madwar id-​dinja jiksbu għarfien eżatt dwar dak li tfisser is-​Saltna, liema barkiet se ġġib, u x’għandu jagħmel min irid jikseb dawn il-​barkiet.

Ninkuraġġuk biex tagħti kas il-​messaġġ li qed jixxandar mix-​Xhieda taʼ Jehovah. Jekk taċċetta l-​aħbar tajba u taġixxi fi qbil magħha, int tistaʼ tirċievi barkiet kbar ferm, mhux biss issa imma wkoll fil-​futur meta s-​Saltna t’Alla taħkem fuq l-​art kollha.—1 Timotju 4:8.

Issa l-​waqt li taġixxi, għax il-​barkiet tas-​Saltna t’Alla qegħdin fil-​qrib!

[Stampi f’paġna 7]

Ix-​Xhieda taʼ Jehovah qed ixandru l-​aħbar tajba tas-​Saltna t’Alla kemm permezz tal-​letteratura u kemm bil-​fomm