Ieqfu Sħaħ u B’Konvinzjoni Soda

‘Ara! Il-​Kotra Kbira!’

KIENET mistoqsija li kienet ilha f’moħħ il-​qaddejja taʼ Jehovah għal għaxriet taʼ snin. Kienu ilhom jipprovaw isibu t-​tweġiba għaliha mill-​Iskrittura. Barra minn hekk, is-​suġġett qajjem ħafna diskussjonijiet. Imma fl-​aħħar mill-​aħħar instabet it-​tweġiba Biblika, u din qanqlet l-​eċċitament taʼ l-​udjenza miġbura għall-​konvenzjoni li saret fl-​1935 f’Washington, D.C.

Il-bażi għad-​diskussjoni kienet waħda komuni: Min kienu dawk tal-​“kotra kbira” msemmija f’Apokalissi 7:9? Kien dan il-​grupp taʼ kredenti sejjer fis-​sema?

Mistoqsija Antika

Minn żmien l-​appostlu Ġwanni sa llum, il-​Kristjani kienu mħawdin dwar min kienu dawk tal-​“kotra kbira.” L-​Istudenti tal-​Bibbja kienu jqisu l-​kotra kbira bħala klassi sekondarja għas-​sema, grupp li kellu l-​għarfien dwar il-​verità tal-​Bibbja imma ftit li xejn kien ixandarha.

Madankollu, il-​Kristjani midlukin kellhom ċerti wħud imseħbin magħhom li saru żelużi ferm fix-​xogħol taʼ l-​ippridkar. Huma ma kellhom l-​ebda xewqa li jmorru fis-​sema. Tabilħaqq, it-​tama tagħhom kienet fi qbil maʼ dak li ntqal fit-​taħdita pubblika “Millions Now Living Will Never Die” (Miljuni li Qegħdin Jgħixu Issa Ma Se Jmutu Qatt), li ngħatat mill-​poplu taʼ Jehovah bejn l-​1918 u l-​1922. Dawn l-​individwi kienu se jitbierku b’ħajja taʼ dejjem fuq l-​art.

The Watch Tower tal-​15 t’Ottubru, 1923, iddiskuta l-​parabbola taʼ Ġesù dwar in-​nagħaġ u l-​mogħoż u qal: “In-​nagħaġ jirrappreżentaw lin-​nies kollha tal-​ġnus, mhux imnisslin mill-​ispirtu imma inklinati lejn it-​tjieba, li mentalment jagħrfu lil Ġesù Kristu bħala l-​Mulej u li qed jistennew billi jittamaw għal żmien aħjar taħt ir-​renju tiegħu.”—Mattew 25:​31-​46.

Id-​Dawl Ikompli Jiżdied

Fis-​sena 1931, l-​ewwel ktieb mis-​serje Vindication iddiskuta kapitlu 9 taʼ Eżekjel. Dan il-​ktieb identifika lil dawk li ġew immarkati fuq ġbinhom għas-​salvazzjoni fl-​aħħar tad-​dinja bħala n-​nagħaġ tal-​parabbola taʼ Ġesù. It-​tielet ktieb mis-​serje Vindication (pubblikat fl-​1932), iddeskriva l-​qalb retta li wera Ġeħonadab, ir-​raġel mhux Iżraeli li telaʼ fuq il-​karru taʼ Ġeħu, is-​sultan midluk taʼ Iżrael, u mar miegħu biex jara b’liema ħeġġa Ġeħu qered lill-​adoraturi foloz. (2 Slaten 10:​15-28) Il-​ktieb qal: “Ġeħonadab irrappreżenta jew iffigura bil-​quddiem lil dik il-​klassi taʼ nies fid-​dinja li issa m’għadhomx fi qbil maʼ l-​organizzazzjoni taʼ Satana, li jieħdu l-​waqfa tagħhom fuq in-​naħa tat-​tjieba, u huma l-​uħud li l-​Mulej se jsalva f’Armageddon, iwiżinhom fl-​inkwiet, u jagħtihom ħajja taʼ dejjem fuq l-​art. Dawn jifformaw il-​klassi tan-​‘nagħaġ.’”

Fl-1934, The Watchtower għamilha ċara li l-​Kristjani b’tama għall-​art għandhom jiddedikaw lilhom infushom lil Jehovah u jitgħammdu. Tabilħaqq, id-​dawl dwar din il-​klassi għall-​art kien qed jiddi dejjem iktar u iktar!—Proverbji 4:18.

Leħħa Qawwija tal-​Fehma

Il-​fehma t’Apokalissi 7:​9-17 kienet waslet biex tibda tiddi bħal qatt qabel. (Salm 97:11) The Watchtower kien esprima t-​tama li l-​konvenzjoni ppjanata li ssir mit-​30 taʼ Mejju sat-​3 taʼ Ġunju, 1935, f’Washington, D.C., fl-​Istati Uniti taʼ l-​Amerika, kienet se tagħti “faraġ u benefiċċji veri” lil dawk iffigurati bil-​quddiem minn Ġeħonadab. U hekk ġara!

F’taħdita li tqanqal dwar “Il-​Kotra Kbira,” mogħtija lil madwar 20,000 ruħ li attendew għall-​konvenzjoni, J. F. Rutherford ta provi Skritturali li “n-​nagħaġ oħra” taʼ llum u l-​“kotra kbira” t’Apokalissi 7:9 huma l-​istess ħaġa. (Ġwann 10:16) Il-​quċċata taʼ din it-​taħdita kienet meta l-​kelliemi staqsa: “Jistgħu dawk kollha li għandhom it-​tama li jgħixu għal dejjem fuq l-​art iqumu bil-​wieqfa jekk jogħġobhom?” Hekk kif parti kbira mill-​udjenza qamet bil-​wieqfa, Rutherford iddikjara: “Ara! Il-​kotra kbira!” Għall-​ewwel waqaʼ s-​skiet, imma mbagħad kulħadd infexx f’ċapċip kbir. L-​għada, tgħammdu 840 Xhud taʼ Jehovah ġodda, li l-​biċċa l-​kbira minnhom qalu li kienu mill-​kotra kbira.

Preżenza Straordinarja

Qabel l-​1935, numru li dejjem jiżdied mill-​uħud li wieġbu għall-​messaġġ tal-​Bibbja u ħadu sehem b’ħeġġa kbira fl-​ippridkar taʼ l-​aħbar tajba wrew interess f’li jgħixu għal dejjem fuq Ġenna taʼ l-​art. Huma ma kellhom l-​ebda xewqa li jmorru fis-​sema, għax Alla ma kienx tahom it-​tama taʼ ħajja fis-​sema. Il-​fatt li huma identifikaw ruħhom mal-​kotra kbira taʼ nagħaġ oħra wera li sa l-​1935 il-​ġbir tal-​144,000 Kristjani midlukin kien kważi lest.—Apokalissi 7:4.

Meta faqqgħet it-​Tieni Gwerra Dinjija, Satana x-​Xitan ħadem kemm felaħ biex iwaqqaf il-​ġbir taʼ dawk li kellhom jifformaw il-​kotra kbira. Ix-​xogħol taʼ l-​ippridkar dwar is-​Saltna ġie projbit f’ħafna pajjiżi. Matul dawk iż-​żminijiet koroh, u ftit qabel ma miet f’Jannar taʼ l-​1942, J. F. Rutherford qal: “Milli jidher il-​‘kotra kbira’ mhux se tkun daqshekk kbira wara kollox.”

Imma bil-​barka divina, ġara mod ieħor. Filwaqt li ‘waqfu sħaħ u b’konvinzjoni soda,’ il-​midlukin u sħabhom, in-​nagħaġ oħra, wettqu l-​inkarigu tagħhom taʼ li jagħmlu dixxipli. (Kolossin 4:​12; Mattew 24:14; 28:​19, 20) Sas-​sena 1946, in-​numru taʼ Xhieda taʼ Jehovah jippridkaw madwar id-​dinja kollha kien 176,456. Il-​biċċa l-​kbira minn dawn kienu tal-​kotra kbira. Fis-​sena 2000, kien hemm iktar minn 6,000,000 Xhud jaqdu lealment lil Jehovah f’235 pajjiż. Kotra kbira tabilħaqq! U n-​numru jkompli jiżdied.