Mistoqsijiet mill-Qarrejja
“Il-Post il-Qaddis [“il-Qaddis tal-Qaddisin,” NW]” meta ġie konsagrat, jew midluk, bħalma tbassar f’Danjel 9:24?
Danjel 9:24-27 hija profezija dwar id-dehra taʼ “wieħed ikkonsagrat bħala prinċep”—il-Kristu. Għalhekk, id-dlik imbassar tal-“Qaddis tal-Qaddisin” ma jirreferix għad-dlik tal-post l-Iktar Qaddis tat-tempju f’Ġerusalemm. Minflok, l-espressjoni “l-Qaddis tal-Qaddisin” tirreferi għas-santwarju t’Alla fis-sema—l-Iktar Qaddis fis-sema—fit-tempju spiritwali l-kbir taʼ Jehovah.a—Lhud 8:1-5; 9:2-10, 23.
It-tempju spiritwali t’Alla meta beda jopera? Sewwa, ikkunsidra dak li ġara meta Ġesù ppreżenta ruħu biex jitgħammed fis-sena 29 E.K. Minn dak il-mument ’il quddiem, Ġesù wettaq il-kliem taʼ Salm 40:7-9 [40:6-8, NW]. L-appostlu Pawlu iktar tard indika li Ġesù kien talab lil Alla: “Sagrifiċċju u offerta int ma ridtx, imma ġisem int ħejjejt għalija.” (Lhud 10:5) Ġesù kien jaf li Alla ‘ma riedx’ li s-sagrifiċċji taʼ l-annimali jkomplu jiġu offruti fit-tempju taʼ Ġerusalemm. Minflok, Jehovah kien ħejja ġisem uman perfett għal Ġesù biex joffrih bħala sagrifiċċju. Waqt li esprima x-xewqa tiegħu mill-qalb, Ġesù kompla: “Hawn jien, ġejt biex nagħmel ir-rieda tiegħek, O Alla, kif fil-ktieb hemm miktub fuqi.” (Lhud 10:7) U Jehovah kif wieġeb? L-Evanġelju taʼ Mattew jgħid: “Ġesù, wara li tgħammed, minnufih talaʼ mill-ilma; u ara, is-smewwiet infetħu, u ra l-Ispirtu taʼ Alla nieżel qisu ħamiema u ġej għal fuqu. U mis-smewwiet instamaʼ leħen jgħid: ‘Dan hu Ibni l-għażiż: fih sibt l-għaxqa tiegħi.’”—Mattew 3:16, 17.
Il-fatt li Alla Jehovah aċċetta l-preżentazzjoni taʼ ġisem Ġesù għas-sagrifiċċju kien ifisser li beda jeżisti artal akbar mill-artal letterali li kien hemm fit-tempju taʼ Ġerusalemm. Dan kien artal tar-“rieda,” jew l-arranġament t’Alla biex il-ħajja umana taʼ Ġesù tiġi aċċettata bħala sagrifiċċju. (Lhud 10:10) Id-dlik taʼ Ġesù bl-ispirtu qaddis kien ifisser li Alla kien issa introduċa l-arranġament kollu tat-tempju spiritwali tiegħu.b Għaldaqstant, dak in-nhar li tgħammed Ġesù, l-għamara t’Alla fis-sema ġiet midluka, jew imwarrba apparti, bħala “l-Qaddis tal-Qaddisin” fl-arranġament tat-tempju spiritwali l-kbir.
[Noti taʼ taħt]
a Għal diskussjoni dwar id-diversi karatteristiċi tat-tempju spiritwali t’Alla, ara paġni 21-27 taʼ It-Torri taʼ l-Għassa taʼ l-1 taʼ Lulju, 1996.
b Dan saret referenza għalih f’paġna 195 tal-ktieb Oqgħod Attent għall-Profezija taʼ Danjel!
[Stampa f’paġna 27]
“Il-Qaddis tal-Qaddisin” ġie midluk meta tgħammed Ġesù