Ktieb li l-​Biċċa l-​Kbira miż-​Żgħażagħ Ma Jagħtux Kasu

“KIF nistaʼ nkun ċerta li l-​Bibbja hija tassew il-​Kelma t’Alla? Bħala ktieb, ma jinteressanix,” qalet waħda żagħżugħa jisimha Beate.

Fil-​Ġermanja, fejn tgħix Beate, il-​biċċa l-​kbira miż-​żgħażagħ jaħsbuha bħalha; għaldaqstant il-​qari tal-​Bibbja ma tantx jagħtuh importanza. Minn stħarriġ li sar hemmhekk dan l-​aħħar ħareġ li, bejn wieħed u ieħor, 1 fil-​mija taż-​żgħażagħ jaqraw il-​Bibbja regolarment, 2 fil-​mija taʼ spiss, 19 fil-​mija rari, u kważi 80 fil-​mija qatt. X’aktarx li hemm statistiċi simili f’pajjiżi oħrajn, forsi anki fejn tgħix int. B’mod ċar, il-​Bibbja hija ktieb li l-​biċċa l-​kbira miż-​żgħażagħ ma jagħtux kasu.

Mela, m’għandniex għalfejn nistagħġbu li b’mod ġenerali l-​ġenerazzjoni żagħżugħa ftit li xejn taf dwar il-​Bibbja! Kmieni fis-​sena 2000, il-​gazzetta Lausitzer Rundschau irrapportat dwar stħarriġ li wera kemm hemm nies familjari maʼ l-​Għaxar Kmandamenti u jużawhom bħala gwida f’ħajjithom. Mill-​ġenerazzjoni taʼ fuq is-​60 sena kien hemm 67 fil-​mija li kienu jafu l-​kmandamenti u jimxu fuqhom. Għall-​ġenerazzjoni taʼ taħt it-​30 sena, il-​figura kienet biss 28 fil-​mija. Tabilħaqq, ħafna żgħażagħ m’humiex familjari mal-​Kelma t’Alla.

Xi Wħud Għandhom Ħarsa Differenti

Mill-​banda l-​oħra, mad-​dinja kollha hemm miljuni taʼ żgħażagħ li l-​Kelma t’Alla sabuha taʼ valur kbir. Per eżempju, Alexander għandu 19-il sena u jaqra l-​Bibbja kull fil-​għodu qabel ma joħroġ għax-​xogħol. “Ma nistax nimmaġina mod aħjar kif nibda l-​ġurnata,” jinnota hu. Sandra għandha d-​drawwa li taqra porzjon mill-​Bibbja kull fil-​għaxija. “Din saret parti mir-​rutina tiegħi taʼ kuljum,” tispjega hi. U Julia, li għandha 13-il sena, diġà għamlet skeda biex taqra għallinqas kapitlu wieħed mill-​Bibbja fil-​għaxija qabel ma torqod. “Vera nieħu pjaċir, u nixtieq inkompli nagħmel dan fil-​futur.”

Liema ħarsa hija tajba u għaqlija? Hija l-​Bibbja tassew ktieb taʼ min jaqrah? Hija siewja u importanti għall-​ġenerazzjoni żagħżugħa? X’taħseb int?