Mistoqsijiet mill-​Qarrejja

Is-​serp fil-​ġnien taʼ Għeden kif tahielha l-​idea lil Eva biex tikser il-​liġi t’Alla dwar is-​siġra tat-​tagħrif it-​tajjeb u l-​ħażin?

Ġenesi 3:1 jistqarr: “U s-​serp kien l-​aktar wieħed li jilħaqlu fost l-​annimali selvaġġi kollha, li kien għamel il-​Mulej Alla. U qal lill-​mara: ‘Tassew li Alla qalilkom: “La tiklux mis-​siġar kollha tal-​ġnien?”’” Saru diversi suġġerimenti dwar kif is-​serp setaʼ kkomunika m’Eva. Suġġeriment wieħed hu li dan għamlu permezz taʼ sinjali jew ġesti. Per eżempju, membru Ingliż tal-​kleru, Joseph Benson qal dwar dan: “Jidher li wisq probabbli dan sar permezz taʼ xi tip taʼ sinjali. Fil-​fatt, xi wħud ħasbu li r-​raġuni u d-​diskors kienu karatteristiċi normali għas-​sriep f’dak iż-​żmien, . . . iżda taʼ dan m’hemm l-​ebda prova.”

Madankollu, permezz tas-​sinjali biss, kif setaʼ s-​serp jikkomunika m’Eva l-​ħsieb li jekk tieħu mill-​frotta projbita kienet se ssir bħal Alla, kapaċi tiddeċiedi x’kien tajjeb u x’kien ħażin? Barra minn hekk, Eva ħadet sehem fil-​konversazzjoni, meta wieġbet il-​mistoqsija li qajjem is-​serp. (Ġenesi 3:​2-5) L-​opinjoni li s-​serp ikkomunika biss bis-​sinjali jew bil-​mossi, kieku ġġagħalna naslu għall-​konklużjoni li Eva wieġbet billi użat il-​ġesti, iżda l-​Bibbja tgħidilna li hi tkellmet.

Waqt li rrefera għal din il-​ġrajja, l-​appostlu Pawlu wissa lil sħabu l-​Kristjani: “Jiena nibżaʼ li, bħalma s-​serp qarraq b’Eva bil-​ħażen tiegħu, hekk fehmietkom jitħassru.” Il-​periklu li tkellem dwaru Pawlu kien minħabba “appostli foloz, ħaddiema qarrieqa.” It-​theddida li “appostli [“fini żżejjed,” NW]” bħal dawn ippreżentaw ma kinitx limitata għal sinjali jew ġesti. Kienet tinkludi d-​diskors tagħhom—kliem makakk, li kienu jgħidu biex iqarrqu bl-​oħrajn.—2 Korintin 11:​3-5, 13.

Għalkemm fil-​ġnien taʼ Għeden id-​diskors intuża biex jiżvija ’l Eva, m’hemm xejn x’jissuġġerixxi li s-​serp letterali kellu l-​kordi vokali. Propjament lanqas biss kellu bżonnhom. Meta l-​anġlu t’Alla tkellem maʼ Balgħam permezz taʼ ħmara, l-​annimal ma kellux bżonn dik il-​parti komplessa tal-​gerżuma li minnha toħroġ il-​vuċi bħal dik li għandu l-​bniedem. (Numri 22:​26-31) Ovvjament, meta dan il-​“ħmar tat-​tagħbija bla kliem tkellem bħal bniedem,” il-​qawwa wara l-​azzjoni kienet ġejja mill-​qasam taʼ l-​ispirti.—2 Pietru 2:16.

Il-ħliqa spirtu wara s-​serp li kellem ’l Eva huwa identifikat fil-​Bibbja bħala “s-​Serp tal-​qedem, li hu msejjaħ id-​Demonju u x-​Xitan.” (Apokalissi 12:9) Il-​kliem li nstemaʼ minn Eva u li wieġbet għalih kien ġej minn Satana, li jkompli “jitbiddel f’anġlu tad-​dawl.”—2 Korintin 11:14.

[Stampa f’paġna 27]

“Issiru bħal allat, li jafu t-​tajjeb u l-​ħażin”