Min Kien Tassew Ġesù

WARA li sar jaf mill-​appostli tiegħu x’kienu qed jaħsbu fuqu n-​nies, Ġesù staqsiehom: “Imma intom min tgħidu li jien?” Skond l-​Evanġelju taʼ Mattew, l-​appostlu Pietru wieġeb: “Inti l-​Messija, Bin Alla l-​ħaj.” (Mattew 16:​15, 16) Kien hemm oħrajn li kienu taʼ l-​istess ħsieb. Natanjel, li wara sar wieħed mill-​appostli, qal lil Ġesù: “Rabbi, . . . int l-​Iben taʼ Alla, inti s-​sultan taʼ Iżrael!” (Ġwann 1:49) Ġesù nnifsu tkellem dwar l-​importanza taʼ l-​irwol tiegħu: “Jiena hu t-​Triq, il-​Verità u l-​Ħajja. Ħadd ma jmur għand il-​Missier jekk mhux permezz tiegħi.” (Ġwann 14:6) F’diversi okkażjonijiet, irrefera għalih innifsu bħala “l-​Iben taʼ Alla.” (Ġwann 5:​24, 25; 11:4) U hu wera li din l-​istqarrija kienet minnha billi wettaq xogħlijiet mirakolużi, saħansitra qajjem lill-​mejtin.

Dubji Bbażati fis-​Sod?

Imma nistgħu aħna nafdaw tassew il-​verżjoni li jagħtuna l-​Evanġelji dwar Ġesù? Jagħtu deskrizzjoni vera taʼ Ġesù? Frederick F. Bruce, li qabel ma miet kien professur tal-​kritika u taʼ l-​analisi Biblika fl-​Università taʼ Manchester, l-​Ingilterra, qal: “Ġeneralment m’huwiex possibbli li turi permezz t’argumenti storiċi jekk kull dettall f’kitba antika huwiex minnu jew le, sew jekk dan ikun fil-​Bibbja u sew jekk le. Huwa biżżejjed li jkollok fiduċja raġunevoli fl-​[onestà] ġenerali taʼ kittieb; u jekk din tiġi stabbilita, hemm probabbiltà [bbażata fuq fatti magħrufin] li d-​dettalji li jipprovdi huma minnhom. . . . Il-​fatt li l-​Kristjani jaċċettaw it-​Testment il-​Ġdid bħala letteratura ‘sagra’ ma jurix li hemm inqas ċans li hu taʼ min joqgħod fuqu storikament.”

Wara li eżamina d-​dubji dwar Ġesù skond kif inhu deskritt fl-​Evanġelji, James R. Edwards, professur tar-​reliġjon fil-​Kulleġġ taʼ Jamestown, North Dakota, fl-​Istati Uniti, kiteb: “Nistgħu ngħidu b’fiduċja li l-​Evanġelji fihom ġabra taʼ evidenzi mżewqa u sinifikanti tal-​verità attwali dwar Ġesù. . . . L-​iktar tweġiba loġika għall-​mistoqsija għala l-​Evanġelji jippreżentaw lil Ġesù bil-​mod li jippreżentawh hija li bażikament hekk kien Ġesù. L-​Evanġelji jippreservaw lealment l-​impressjoni li hu ħalla fuq is-​segwaċi tiegħu, li hu kien tassew mibgħut minn Alla u mogħti s-​setgħa biex ikun l-​Iben u l-​Qaddej t’Alla.”a

It-​Tfittxija għal Ġesù

Xi ngħidu għal dawk ir-​referenzi dwar Ġesù Kristu li m’humiex fil-​Bibbja? Kif inhuma meqjusin? Ix-​xogħlijiet taʼ Taċitu, Swetonju, Ġużeppi Flavju, Plinju ż-​Żgħir, u xi kittieba klassiċi oħrajn jinkludu numru taʼ referenzi għal Ġesù. Dwarhom, The New Encyclopædia Britannica (1995) tgħid: “Dawn ir-​rakkonti indipendenti juru li fl-​antik anki dawk li kienu kontra l-​Kristjanità qatt ma ddubitaw l-​awtentiċità storika taʼ Ġesù. Dan l-​argument inqalaʼ għall-​ewwel darba u fuq bażi xejn soda fl-​aħħar tas-​seklu 18, matul is-​seklu 19, u fil-​bidu tas-​seklu 20.”

B’sogħba, l-​istudjużi moderni, fit-​tfittxija tagħhom għal Ġesù “veru” jew “storiku,” jidhru li ħbew l-​identità vera tiegħu taħt ħafna spekulazzjonijiet bla bażi, inċertezzi bla raġuni, u teoriji mhux ibbażati fis-​sod. F’ċertu sens, huma ħatja taʼ l-​istess ħaġa li b’mod falz qed jakkużaw lill-​kittieba taʼ l-​Evanġelji biha, jiġifieri li jivvintaw il-​ħrejjef. Xi wħud tant iridu jżidu l-​popolarità tagħhom u huma ħerqana biex ikollhom isimhom marbut maʼ xi teorija ġdida taʼ l-​għaġeb li ma jeżaminawx onestament l-​evidenza dwar Ġesù. Ir-​riżultat taʼ dan il-​proċess huwa li jinħoloq “Ġesù” li huwa biss frott l-​immaġinazzjoni taʼ l-​istudjużi.

Għal dawk li jridu jsibu lil Ġesù, l-​identità vera tiegħu tistaʼ tinstab fil-​Bibbja. Luke Johnson, professur tat-​Testment il-​Ġdid u l-​oriġini tal-​Kristjanità fl-​Iskola tat-​Teoloġija taʼ Candler fl-​Università taʼ Emory, isostni li l-​biċċa l-​kbira mir-​riċerka dwar Ġesù skond l-​istorja m’hijiex fi qbil mal-​objettiv tal-​Bibbja. Hu jgħid li jistaʼ jkun interessanti li teżamina l-​kuntest soċjali, politiku, antropoloġiku, u kulturali tal-​ħajja taʼ Ġesù u żmienu. Madankollu, hu jżid jgħid illi l-​fatt li nsibu dak li l-​istudjużi jsejħulu Ġesù storiku “ftit li xejn huwa l-​objettiv taʼ l-​Iskrittura.” Din hi “iktar interessata fid-​deskrizzjoni tal-​karattru taʼ Ġesù,” il-​messaġġ tiegħu, u l-​irwol tiegħu bħala l-​Feddej. Mela, kif kien tassew il-​karattru taʼ Ġesù u x’kien il-​messaġġ tiegħu?

Min Kien Tassew Ġesù

L-​Evanġelji—l-​erbaʼ rakkonti Bibliċi dwar il-​ħajja taʼ Ġesù—jagħtu stampa taʼ raġel li kien juri empatija kbira. Il-ħniena u lmogħdrija qanqlu lil Ġesù biex jgħin lin-​nies li kienu morda, għomja, jew qegħdin isofru minħabba affarijiet oħrajn. (Mattew 9:​36; 14:14; 20:34) Ġesù ‘ħass ruħu mqanqal u beda jibki’ meta miet il-​ħabib tiegħu Lazzru u ra lil ħutu mnikktin. (Ġwann 11:​32-36) Fil-​fatt, l-​Evanġelji juru l-​varjetà tas-​sentimenti taʼ Ġesù—simpatija għal wieħed imġiddem, ferħ kbir minħabba s-​suċċess tad-​dixxipli tiegħu, rabja għall-​indifferenza li kienu juru l-​legalisti, u dwejjaq minħabba li Ġerusalemm ċaħdet lill-​Messija.

Meta Ġesù kien iwettaq xi miraklu, hu taʼ spiss iffoka fuq il-​parti li kellha fil-​proċess il-​persuna li saritilha l-​miraklu: “Il-​fidi tiegħek fejjqitek.” (Mattew 9:22) Hu faħħar lil Natanjel bħala wieħed li huwa ‘tassew minn Iżrael,’ billi qal: “Ma hemm ebda qerq fih.” (Ġwann 1:47) Meta xi wħud ħasbu li r-​rigal li tat waħda mara biex turi l-​apprezzament tagħha kien għoli wisq, Ġesù qabeż għaliha u qal li r-​rakkont tal-​ġenerożità tagħha kien se jibqaʼ jissemma. (Mattew 26:​6-13) Hu wera lis-​segwaċi tiegħu li hu kien ħabib veru u sieħeb mimli affezzjoni, u “baqaʼ jħobbhom sa l-​aħħar.”—Ġwann 13:​1, Saydon; 15:​11-15.

L-Evanġelji juru wkoll li Ġesù malajr kien jagħraf x’kienu l-​bżonnijiet tal-​biċċa l-​kbira tan-​nies li kien jiltaqaʼ magħhom. Sew jekk kien ikun qed jitkellem maʼ mara fejn il-​bir, m’għalliem reliġjuż fi ġnien, jew sajjied ħdejn il-​baħar, hu mill-​ewwel kien imissilhom qalbhom. Wara li kien jgħidilhom l-​ewwel ftit kelmiet, ħafna minn dawn in-​nies kienu jgħidulu dwar l-​iktar ħsibijiet moħbija tagħhom. Hu kien iqanqalhom biex jaġixxu. Għalkemm in-​nies taʼ żmienu setgħu jevitaw li jassoċjaw maʼ nies li kellhom pożizzjoni t’awtorità, fil-​każ taʼ Ġesù, in-​nies kienu jiffollaw madwaru. Huma kienu jieħdu gost ikunu maʼ Ġesù. Huma kienu jħossuhom komdi fil-​kumpanija tiegħu. Anki t-​tfal kienu jħossuhom komdi miegħu. Meta darba Ġesù ħa tifel biex jużah bħala eżempju, hu ma ħalliehx biss bil-​wieqfa quddiem id-​dixxipli tiegħu imma “ħaddnu bejn dirgħajh.” (Mark 9:36; 10:​13-16) Tabilħaqq, l-​Evanġelji jiddeskrivu lil Ġesù bħala raġel li tant kellu kariżma li n-​nies qagħdu tlett ijiem sħaħ jisimgħuh sempliċement għax kliemu kien jaffaxxinahom.—Mattew 15:32.

Il-​perfezzjoni taʼ Ġesù m’għamlitux jikkritika żżejjed jew arroganti u dominanti man-​nies imperfetti u midinba li kien jgħix u jippriedka fosthom. (Mattew 9:​10-13; 21:​31, 32; Luqa 7:​36-48; 15:​1-32; 18:​9-14) Ġesù qatt ma kien jitlob iżżejjed minn ħaddieħor. Hu ma kompliex iżid mat-​tagħbijiet tan-​nies. Minflok, hu qal: “Ejjew għandi, intom ilkoll li tinsabu mħabbtin . . . u jiena nserraħkom.” Id-​dixxipli tiegħu esperjenzawh personalment il-​fatt li hu kellu “qalb ħelwa u umli.” Il-​madmad tiegħu kien ħelu, u t-​toqol tiegħu ħafif.—Mattew 11:​28-30.

Ir-​rakkonti taʼ l-​Evanġelju joħorġu l-​karattru taʼ Ġesù b’mod ċar u sinċier. M’hijiex xi ħaġa faċli li erbaʼ individwi differenti jivvintaw persuna straordinarja u jagħtu l-​istess stampa tiegħu matul l-​erbaʼ rakkonti differenti. Huwa kważi impossibbli li erbaʼ kittieba differenti jiddeskrivu l-​istess persuna u jagħtu l-​istess deskrizzjoni tiegħu l-​ħin kollu li kieku dan il-​karattru m’eżistiex tassew.

Il-kittieb taʼ l-​istorja Michael Grant jistaqsi mistoqsija li ġġagħlek taħseb: “Kif jistaʼ jkun li matul it-​tradizzjonijiet kollha taʼ l-​Evanġelju, mingħajr ebda eċċezzjoni, toħroġ stampa straordinarja u distinta taʼ żagħżugħ attraenti li kien jassoċja maʼ kull xorta taʼ nisa, inkluż dawk taʼ fama ħażina, mingħajr traċċa taʼ sentimentalità, superfiċjalità, jew skrupli żejda, u madankollu, f’kull ċirkustanza, iżomm b’mod sempliċi l-​integrità tal-​karattru tiegħu?” It-​tweġiba raġunevoli hija li veru eżista raġel bħal dan u li aġixxa bil-​mod kif tgħid il-​Bibbja.

L-​Identità Vera taʼ Ġesù u l-​Futur Tiegħek

Minbarra li tagħti deskrizzjoni vera taʼ Ġesù waqt li kien fuq l-​art, il-​Bibbja turina wkoll li hu qabel ma sar bniedem kien jeżisti bħala l-​Iben uniġenitu t’Alla, “l-​ewwel fost il-​ħlejjaq kollha.” (Kolossin 1:​15, Saydon) Elfejn sena ilu, Alla ttrasferixxa l-​ħajja taʼ Ibnu mis-​sema għal ġol-​ġuf taʼ verġni Lhudija biex ikun jistaʼ jitwieled bħala bniedem. (Mattew 1:18) Matul il-​ministeru tiegħu fuq l-​art, Ġesù xandar is-​Saltna t’Alla bħala l-​unika tama għall-​umanità mnikkta, u ħarreġ lid-​dixxipli tiegħu biex ikomplu dan ix-​xogħol taʼ l-​ippridkar.—Mattew 4:​17; 10:​5-7; 28:​19, 20.

Fl-14 taʼ Nisan (madwar l-​1 t’April), tas-​sena 33 E.K., Ġesù ġie arrestat, mgħoddi ġuri, kundannat, u maqtul fuq l-​akkuża falza taʼ tixwix. (Mattew 26:​18-20,Mt. 26: 48–27:50) Il-​mewt taʼ Ġesù sservi bħala fidwa biex teħles lill-​bnedmin li jemmnu mill-​istat midneb tagħhom, u b’hekk tiftaħ it-​triq għall-​ħajja taʼ dejjem lil dawk li juru fidi fih b’mod attiv. (Rumani 3:​23, 24; 1 Ġwann 2:2) Fis-​16 taʼ Nisan, Ġesù ġie mqajjem mill-​mewt, u ftit wara telaʼ lura fis-​sema. (Mark 16:​1-8; Luqa 24:​50-53; Atti 1:​6-9) Bħala s-​sultan maħtur taʼ Jehovah, Ġesù rxoxtat għandu awtorità sħiħa biex iwettaq l-​iskop oriġinali t’Alla għall-​bnedmin. (Isaija 9:​6, 7; Luqa 1:​32, 33) Iva, il-​Bibbja tippreżenta lil Ġesù bħal l-​figura ewlenija fit-​twettiq taʼ l-​iskopijiet t’Alla.

Fl-ewwel seklu, kotriet kbar aċċettaw lil Ġesù għal dak li kien—il-​Messija mwiegħed, jew Kristu, mibgħut fuq l-​art biex jivvindika s-​sovranità taʼ Jehovah u jmut bħala prezz tal-​fidwa għall-​bnedmin. (Mattew 20:28; Luqa 2:​25-32; Ġwann 17:​25, 26; 18:37) Li kieku n-​nies ma kinux ċerti mill-​identità taʼ Ġesù, żgur li ma kinux se jitqanqlu jsiru dixxipli tiegħu u jiffaċċjaw il-​persekuzzjoni ħarxa li qamet kontrihom. B’kuraġġ u b’żelu, huma daħlu għall-​inkarigu li tahom, li ‘jagħmlu dixxipli mill-​ġnus kollha.’—Mattew 28:19.

Illum, miljuni taʼ Kristjani sinċieri u informati tajjeb jafu li Ġesù m’huwiex xi persuna leġġendarja. Huma jaċċettawh bħala s-​Sultan fuq it-​tron tas-​Saltna t’Alla stabbilita fis-​sema, li dalwaqt se tieħu l-​kontroll sħiħ taʼ l-​art u l-​kwistjonijiet kollha tagħha. Dan il-​gvern divin huwa t’aħbar sabiħa għaliex iwiegħed serħan mill-​problemi dinjin. Il-​veri Kristjani juru li huma jappoġġaw lealment is-​Sultan magħżul taʼ Jehovah billi jxandru “dan l-​Evanġelju tas-​Saltna” lil oħrajn.—Mattew 24:14.

Dawk li jappoġġaw l-​arranġament tas-​Saltna permezz taʼ Kristu, l-​Iben taʼ dak Alla ħaj, se jgħixu u jgawdu barkiet eterni. Dawn il-​barkiet jistgħu jkunu tiegħek ukoll! Il-​pubblikaturi taʼ din ir-​rivista huma ferħanin li jgħinuk issir taf verament lil Ġesù.

[Nota taʼ taħt]

[Kaxxa/Stampa f’paġna 6]

X’Qalu Oħrajn

“Jien dejjem qist lil Ġesù taʼ Nazaret bħala wieħed mill-​aqwa għalliema li qatt kellha d-​dinja. . . . Lill-​Ħindu ngħidilhom li ħajjitkom ma tistax tkun kompleta jekk ma tkunux studjajtu b’rispett it-​tagħlim taʼ Ġesù.” Mohandas K. Gandhi, The Message of Jesus Christ.

“Karattru tant oriġinali, tant komplet, tant konsistenti, tant perfett, tant uman iżda fl-​istess ħin tant ogħla minn kull kobor uman ieħor, li la jistaʼ jkun qarrieq u lanqas fittizju. . . . Teħtieġ lil xi ħadd aqwa minn Ġesù biex tivvinta l-​karattru taʼ Ġesù.” Philip Schaff, History of the Christian Church.

“Li ftit irġiel komuni f’ġenerazzjoni waħda vvintaw personalità tant qawwija u li tappella, etika tant għolja u stampa taʼ fratellanza umana li tant tqanqal, kien ikun miraklu ferm iktar inkredibbli minn kwalunkwe wieħed li hemm miktub fl-​Evanġelji.” Will Durant, Caesar and Christ.

“Li jkollok moviment reliġjuż mal-​globu kollu mwaqqaf minn bniedem li qatt m’eżista, imma li ġie vvintat bħallikieku xi strateġija promozzjonali antika, jistaʼ jidher li ma tantx jagħmel sens meta tqis il-​fatt li kien hawn ħafna wħud li għexu tassew illi pprovaw iwaqqfu reliġjonijiet u ma rnexxilhomx.” Gregg Easterbrook, Beside Still Waters.

‘Bħala studjuż taʼ l-​istorja letterarja jien konvint mija fil-​mija li l-​Evanġelji jistgħu jkunu kollox minbarra leġġendi. Ma fihomx biżżejjed immaġinazzjoni biex ikunu leġġendi. Il-​parti l-​kbira mill-​ħajja taʼ Ġesù ma nafuhiex, u l-​ebda individwu li jivvinta leġġenda m’huwa se jħalli daqshekk dettalji barra.’ C. S. Lewis, God in the Dock.

[Stampi f’paġni 7]

L-​Evanġelju juru i-varjeta tas-​sentimenti taʼĠesù