Jehovah Isebbaħ lill-Poplu Tiegħu bid-Dawl
“Qum [ja mara]! Ħa jiddi wiċċek! Id-dawl tiegħek wasal! Jiddi fuqek sebħ il-Mulej!”—Isaija 60:1.
1, 2. (a) X’inhi l-kundizzjoni taʼ l-umanità? (b) Min hemm wara d-dlam taʼ l-umanità?
“O KEMM għandna bżonn taʼ xi Isaija jew xi San Pawl!” Din kienet il-karba tal-President Amerikan Harry Truman lura fis-snin 40 tas-seklu l-ieħor. Għala qal hekk? Għaliex kien qed iħoss il-bżonn li jkun hemm mexxejja morali taʼ l-ogħla kalibru fid-dinja taʼ żmienu. L-umanità kienet għadha kemm għaddiet mill-iktar perijodu mudlam tas-seklu 20, it-tieni gwerra dinjija. Madankollu, għalkemm il-gwerra kienet spiċċat, id-dinja ma kinitx tinsab fil-paċi. Id-dlam kien għadu hemm. Tabilħaqq, 57 sena wara li ntemmet dik il-gwerra, id-dinja għadha fid-dlam. Kieku l-President Truman kien għadu ħaj illum, żgur li xorta kien jara l-ħtieġa li jkollna mexxejja morali tal-kalibru taʼ Isaija jew taʼ l-appostlu Pawlu.
2 Jekk il-President Truman kienx jafha din il-ħaġa jew le, l-appostlu Pawlu tkellem dwar id-dlam li jaħkem lill-bnedmin, u wissa dwaru f’dak li kiteb. Per eżempju, hu wissa lil sħabu fit-twemmin: “Il-ġlieda tagħna m’hijiex kontra d-demm u l-laħam, imma kontra s-Setgħat, kontra l-Qawwiet, kontra l-Prinċpijiet taʼ din id-dinja taʼ dlamijiet, kontra l-ispirti ħżiena li jgħammru fil-wisaʼ tas-smewwiet.” (Efesin 6:12, korsiv tagħna.) B’dan il-kliem Pawlu ma weriex biss li kien konxju tad-dlam spiritwali li jiksi d-dinja imma wkoll li kien jaf min hu s-sors veru tiegħu—forzi demoniċi qawwijin deskritti bħala “Prinċpijiet taʼ din id-dinja.” Ladarba wara d-dlam taʼ din id-dinja hemm spirti qawwijin, x’jistgħu jagħmlu l-bnedmin biex jeħilsu minnu?
3. Minkejja l-kundizzjoni mudlama tal-bnedmin, Isaija x’bassar għal min hu leali?
3 Isaija, bl-istess mod, tkellem dwar id-dlam li qed jaħkem lill-bnedmin. (Isaija 8:22; 59:9) Madankollu, waqt li ħares ’il quddiem lejn żmienna, hu bassar, taħt ispirazzjoni, li saħansitra f’dawn iż-żminijiet mudlama, Jehovah kien se jdawwal il-ħarsa taʼ min iħobb id-dawl. Iva, għalkemm m’għandniex lil Pawlu u lil Isaija preżenti magħna, għandna fil-fatt il-kitbiet imnebbħin tagħhom biex jiggwidawna. Sabiex naraw kemm din hija barka għal dawk li jħobbu lil Jehovah, ejja nikkunsidraw il-kliem profetiku taʼ Isaija li nsibu f’kapitlu 60 tal-ktieb tiegħu.
Mara Profetika Tixħet id-Dawl
4, 5. (a) Jehovah x’jikkmandaha tagħmel lil waħda mara, u liema wegħda jagħmel? (b) Isaija kapitlu 60 liema tagħrif eċċitanti fih?
4 L-ewwel kliem taʼ Isaija kapitlu 60 jintqal lil waħda mara li tinsab f’sitwazzjoni tassew taʼ niket—mixħuta minn tulha maʼ l-art fid-dlam. F’daqqa waħda, dawl jinfed id-dlam, u Jehovah isejħilha: “Qum [ja mara]! Ħa jiddi wiċċek! Id-dawl tiegħek wasal! Jiddi fuqek sebħ il-Mulej!” (Isaija 60:1) Wasal iż-żmien biex din il-mara tqum bil-wieqfa u tirrifletti d-dawl t’Alla, il-glorja tiegħu. Għala? It-tweġiba narawha fit-tieni vers: “Ara d-dlamijiet jiksu l-art, u sħab iswed il-popli: iżda fuqek jiddi l-Mulej, u sebħu jfiġġ fuqek.” (Isaija 60:2) Meta l-mara tobdi l-kmand taʼ Jehovah, tiġi aċċertata li se jkollha riżultat taʼ l-għaġeb. Jehovah jgħid: “Il-ġnus għad jimxu fid-dawl tiegħek, u s-slaten fid-dija taʼ sbiħek.”—Isaija 60:3.
5 Il-kliem eċċitanti f’dawn it-tliet versi huwa kemm introduzzjoni għall-kumplament taʼ Isaija kapitlu 60 kif ukoll ġabra fil-qosor tiegħu. Ibassar l-esperjenzi taʼ mara profetika u jispjega kif aħna nistgħu ngħixu fid-dawl taʼ Jehovah minkejja d-dlam li jaħkem lill-bnedmin. Iżda, xi jfissru preċiżament is-simboli li hemm f’dawn l-ewwel tliet versi?
6. Min hi l-mara li tissemma f’Isaija kapitlu 60, u min jirrappreżentaha fuq l-art?
6 Il-mara taʼ Isaija 60:1-3 hija Sijon, l-organizzazzjoni taʼ Jehovah fis-sema magħmula minn ħlejjaq spirti. Illum, Sijon hija rappreżentata fuq l-art mill-fdal taʼ l-“Iżrael taʼ Alla,” il-kongregazzjoni internazzjonali taʼ Kristjani midlukin bl-ispirtu li għandhom it-tama li jsaltnu maʼ Kristu fis-sema. (Galatin 6:16) Dan il-ġens spiritwali se jkollu b’kollox 144,000 membru, u t-twettiq modern taʼ Isaija kapitlu 60 jiċċentra fuq dawk minnhom li jkunu ħajjin fuq l-art matul “l-aħħar tad-dinja.” (2 Timotju 3:1; Apokalissi 14:1) Il-profezija għandha wkoll ħafna xi tgħid dwar sħab dawn il-Kristjani midlukin, il-“kotra kbira” taʼ “nagħaġ oħra.”—Apokalissi 7:9; Ġwann 10:16.
7. X’kienet il-kundizzjoni taʼ Sijon fl-1918, u kif kien ġie profetizzat dan?
7 Kien hemm xi żmien meta l-“Iżrael taʼ Alla” kien mixħut fid-dlam, bħalma ġie ffigurat bil-quddiem minn din il-mara profetika? Iva, dan seħħ iktar minn 80 sena ilu. Matul l-ewwel gwerra dinjija, il-Kristjani midlukin kellhom taqbida iebsa biex iżommu x-xogħol taʼ għoti taʼ xiehda għaddej. Imma fl-1918, l-aħħar sena tal-gwerra, ix-xogħol organizzat taʼ l-ippridkar tistaʼ tgħid li waqaf għalkollox. Joseph F. Rutherford, li kien qed jindokra x-xogħol taʼ l-ippridkar madwar id-dinja, u Kristjani prominenti oħrajn ngħataw sentenzi twal taʼ ħabs fuq akkużi foloz. Fil-ktieb taʼ l-Apokalissi, il-Kristjani midlukin, li f’dak iż-żmien ikunu fuq l-art, ġew deskritti profetikament bħala iġsma mejtin imħollijin “fil-pjazza tal-Belt il-Kbira, li jsejjħulha b’tixbiha Sodoma u Eġittu.” (Apokalissi 11:8) Dak kien verament żmien mudlam għal Sijon, kif rappreżentata minn uliedha l-midlukin fuq l-art!
8. Liema bidla impressjonanti seħħet fl-1919, u b’liema riżultat?
8 Madankollu, is-sena 1919 rat bidla impressjonanti. Jehovah xeħet id-dawl fuq Sijon! Dawk mill-Iżrael t’Alla li baqgħu ħajjin qamu fuq saqajhom sabiex jirriflettu d-dawl t’Alla, billi bla biżaʼ reġgħu bdew jipproklamaw l-aħbar tajba. (Mattew 5:14-16) Grazzi għaż-żelu li reġaʼ tnissel f’dawn il-Kristjani, kien hemm oħrajn li nġibdu lejn id-dawl taʼ Jehovah. Għall-ewwel, dawn kienu midlukin bħala membri ġodda taʼ l-Iżrael t’Alla. Huma deskritti bħala slaten f’Isaija 60:3, ladarba se jkunu werrieta bi sħab maʼ Kristu fis-Saltna t’Alla fis-sema. (Apokalissi 20:6) Iktar tard, kotra kbira taʼ nagħaġ oħra bdiet tinġibed lejn id-dawl taʼ Jehovah. Dawn huma l-“ġnus” li jissemmew fil-profezija.
Ulied il-Mara Jiġu d-Dar!
9, 10. (a) Liema dehra meraviljuża rat quddiemha l-mara, u dan x’iffigura bil-quddiem? (b) Sijon liema raġuni kellha biex tifraħ?
9 Issa, Jehovah jibda jagħti iktar dettalji dwar it-tagħrif mogħti f’Isaija 60:1-3. Hu jagħti kmand ieħor lill-mara. Ismaʼ sewwa x’jgħidilha: “Għolli u dawwar għajnejk madwarek u ara.” Il-mara tobdi, u x’dehra li tqanqal il-qalb tara b’għajnejha! Uliedha ġejjin id-dar. L-iskrittura tkompli tgħid: “Lkoll miġbura ġejjin għandek. Uliedek ġejjin mill-bogħod, u bnietek iġorruhom fuq id-dirgħajn.” (Isaija 60:4) L-ipproklamar tas-Saltna mad-dinja kollha li beda fl-1919 ġibed eluf taʼ wħud ġodda lejn is-servizz taʼ Jehovah. Dawn ukoll saru ‘wlied subien u bniet’ taʼ Sijon, membri midlukin taʼ l-Iżrael t’Alla. B’hekk, Jehovah sebbaħ lil Sijon billi ressaq lill-aħħar ftit mill-144,000 lejn id-dawl.
10 Tistaʼ int timmaġina l-ferħ taʼ Sijon issa li għandha lil uliedha magħha? Madankollu, Jehovah jagħtiha raġunijiet oħrajn għalxiex tifraħ lil Sijon. Naqraw: “Mbagħad tħares u wiċċek jiddi, u tħabbat u timtela qalbek, għax fuqek taqaʼ l-kotra tal-ġid taʼ l-ibħra, u l-għana tal-ġnus jiġi għandek.” (Isaija 60:5) Fi qbil maʼ dan il-kliem profetiku, mis-snin 30 tas-seklu 20 ’l hawn, kotriet taʼ Kristjani bit-tama li jgħixu għal dejjem fuq l-art ġew bi ħġarhom lejn Sijon. Dawn ħarġu mill-‘baħar’ tal-bnedmin imbegħdin minn Alla u jirrappreżentaw ir-riżorsi tal-ġnus. Huma “l-ġid kollu tal-popli.” (Ħaggaj 2:7; Isaija 57:20) Innota, ukoll, li dawk li jifformaw dan il-“ġid” ma jissoktawx jaqdu lil Jehovah kull wieħed kif jidhirlu hu. Le, dawn iżidu mas-sbuħija taʼ Sijon billi jiġu jqimu fi sħubija maʼ ħuthom il-midlukin, u magħhom isiru “merħla waħda” taħt “ragħaj wieħed.”—Ġwann 10:16.
Merkanti, Rgħajja, u Negozjanti Jiġu Għand Sijon
11, 12. Iddeskrivi l-folol li jidhru sejrin lejn Sijon.
11 Ir-riżultat taʼ dan il-ġbir imbassar huwa żjieda taʼ l-għaġeb fl-għadd taʼ nies li jfaħħru lil Jehovah. Dan huwa mbassar fil-kliem li jmiss tal-profezija. Immaġinak qiegħed bil-wieqfa mal-mara profetika fuq il-Muntanja Sijon. X’tara int u tħares lejn il-lvant? “Mrieħel taʼ iġmla . . . jgħattuk, l-iġmla żgħar taʼ Midjan u Għefa; lkoll minn Seba jiġu, mgħobbija bid-deheb u l-inċens, u jxandru t-tifħir tal-Mulej.” (Isaija 60:6) Folol taʼ merkanti bil-karavani tagħhom misjuqin mill-iġmla qed jivvjaġġaw tul it-triq li tagħti għal Ġerusalemm. L-iġmla huma bħal għargħar li jiksi l-art! In-negozjanti qed iġorru rigali taʼ valur, ‘deheb u inċens.’ U dawn il-merkanti jiġu lejn id-dawl t’Alla sabiex ifaħħruh pubblikament, “ixandru t-tifħir tal-Mulej.”
12 Mhux il-merkanti biss hemm għaddejjin. Hemm rgħajja wkoll li ġejjin lejn Sijon. Il-profezija tkompli tgħid: “L-imrieħel kollha taʼ Kedar jinġabru fik, u l-kbiex taʼ Nebajot jaqduk.” (Isaija 60:7a) Tribujiet sħaħ taʼ rgħajja ġejjin lejn il-belt qaddisa biex joffru l-aħjar mill-merħliet tagħhom lil Jehovah. Huma saħansitra joffru lilhom infushom biex jaqdu lil Sijon! Jehovah kif jilqagħhom lil dawn il-barranin? Alla nnifsu jwieġeb: “Jilqgħuhom u joffruhom fuq l-artal tiegħi, u jiena nsebbaħ dar il-kobor tiegħi.” (Isaija 60:7b) Jehovah jaċċetta bil-ħlewwa l-offerti u s-servizz taʼ dawn il-barranin. Il-preżenza tagħhom issebbaħ it-tempju tiegħu.
13, 14. X’jidher ġej mill-punent?
13 Issa dawwar wiċċek u ifli sewwa x-xefaq lejn il-punent. X’tara? Fil-bogħod, hemm bħal sħaba bajda għaddejja fuq wiċċ il-baħar. Jehovah jistaqsi l-mistoqsija li qed tberren f’moħħok: “Min huma dawn li bħal sħab jittajjru, bħal ħamiem lejn il-bejtiet tagħhom?” (Isaija 60:8) Jehovah iwieġeb il-mistoqsija tiegħu stess: “Għalija jinġabru l-bastimenti tal-gżejjer, bl-iġfna taʼ Tarsis quddiemnett, biex iġibu ’l uliedek mill-bogħod, u magħhom il-fidda u dehebhom, f’ġieħ isem Jaħweh Alla tiegħek, il-Qaddis taʼ Iżrael, għax hu li sebbħek.”—Isaija 60:9.
14 Tistaʼ timmaġina din ix-xena quddiem għajnejk? Dik is-sħaba bajda resqet iktar qrib u issa tidher qisha ħafna tikek żgħar ’il bogħod lejn il-punent. Tidher qisha qatgħa għasafar titliegħeb mal-mewġ. Imma hekk kif jibdew joqorbu iktar, tinduna li huma bastimenti bil-qlugħ miftuħin biex jonfoħhom ir-riħ. Tant hemm iġfna jbaħħru lejn Ġerusalemm li qishom qatgħa ħamiem. Minn portijiet fil-bogħod, il-flotta għaddejja b’veloċità qawwija filwaqt li ġġib adoraturi lejn Ġerusalemm biex iqimu lil Jehovah.
L-Organizzazzjoni taʼ Jehovah Tkompli Tikber
15. (a) Il-kliem taʼ Isaija 60:4-9 liema żjieda jbassar? (b) Il-Kristjani ġenwini liema spirtu juru?
15 Xi stampa profetika qawwija jagħtuna versi 4 sa 9 tat-tkabbir mad-dinja kollha li seħħ mill-1919 ’l hawn! Jehovah għala bierek lil Sijon b’żjieda bħal din? Għaliex mill-1919 ’l hawn, l-Iżrael t’Alla obda u xeħet id-dawl taʼ Jehovah bla waqfien. Indunajt, iżda, li skond vers 7, dawn li għadhom kif waslu ‘joffru [ruħhom] fuq l-artal t’Alla’? Artal hu l-post fejn isiru s-sagrifiċċji, u din il-karatteristika tal-profezija tfakkarna li s-servizz taʼ Jehovah jinvolvi sagrifiċċju. L-appostlu Pawlu kiteb: “Nitlobkom . . . offru ġisimkom b’sagrifiċċju ħaj, qaddis, jogħġob lil Alla, jiġifieri l-qima spiritwali tagħkom.” (Rumani 12:1) Fi qbil mal-kliem taʼ Pawlu, il-Kristjani ġenwini m’humiex sodisfatti biss b’li jattendu xi servizzi reliġjużi darba fil-ġimgħa. Huma jagħtu minn ħinhom, mill-enerġija tagħhom, u mir-riżorsi tagħhom biex iġibu ’l quddiem il-qima safja. Ma ssebbaħhiex lil dar Jehovah il-preżenza t’adoraturi devoti bħal dawn? Il-profezija taʼ Isaija qalet li hekk jiġri. U nistgħu nkunu ċerti li dawn l-adoraturi żelużi huma, mill-banda l-oħra, sbieħ f’għajnejh Jehovah.
16. Min għen fix-xogħol taʼ bini mill-ġdid fl-antik, u min għamel hekk fi żmienna?
16 L-uħud li għadhom kif waslu jridu xogħol x’jagħmlu. Il-profezija tkompli tgħid: “Il-barranin jibnulek swarek, u jaqduk is-slaten tagħhom.” (Isaija 60:10) Fl-ewwel twettiq taʼ dan il-kliem, fi żmien il-miġja lura mill-eżilju f’Babilonja, kien hemm slaten u oħrajn mill-ġnus li fil-fatt għenu fil-bini mill-ġdid tat-tempju u tal-belt taʼ Ġerusalemm. (Esdra 3:7; Neħemija 3:26) Fit-twettiq taʼ żmienna, il-kotra kbira appoġġat lill-fdal midluk fil-bini tal-qima vera. Għenu fit-twaqqif taʼ kongregazzjonijiet Kristjani, u b’hekk qed isaħħu s-‘swar’ taʼ l-organizzazzjoni taʼ Jehovah li hija bħal belt. Huma jieħdu sehem ukoll f’xogħol taʼ bini letterali—jibnu Swali tas-Saltna, Swali għall-Assembleat, u djar taʼ Betel. B’dawn il-modi kollha, huma jappoġġaw lil ħuthom il-midlukin biex jieħdu ħsieb il-bżonnijiet taʼ l-organizzazzjoni taʼ Jehovah li dejjem qed tikber!
17. Liema hu mod wieħed kif Jehovah isebbaħ lin-nies tiegħu?
17 Kemm iqawwilna qalbna l-kliem finali taʼ Isaija 60:10! Jehovah jgħid: “Jekk sawwattek fil-qilla tiegħi, fil-ħniena tiegħi jien ħennejt għalik.” Iva, lura fl-1918/19, Jehovah iddixxiplina lin-nies tiegħu. Imma dak għadda. Issa huwa ż-żmien biex Jehovah juri ħniena lill-qaddejja midlukin tiegħu u lil sħabhom in-nagħaġ oħra. L-evidenza taʼ dan tidher fiż-żjieda straordinarja li berikhom biha, u b’dan il-mod ‘sebbaħhom.’
18, 19. (a) Jehovah liema wegħda jagħmel dwar l-uħud ġodda li deħlin fl-organizzazzjoni tiegħu? (b) X’jgħidulna l-versi li baqaʼ minn kapitlu 60 taʼ Isaija?
18 Kull sena, mijiet taʼ eluf oħrajn taʼ “barranin” qed jissieħbu maʼ l-organizzazzjoni taʼ Jehovah, u t-triq se tibqaʼ miftuħa għal ħafna iktar biex isegwuhom. Jehovah jgħid lil Sijon: “Il-bibien tiegħek ikunu miftuħin dejjem, lejl u nhar ma jingħalqux, biex jiġi għandek il-ġid tal-ġnus, u s-slaten tagħhom miexja quddiem.” (Isaija 60:11) Xi wħud li jopponu jipprovaw jagħlquhom dawn il-“bibien,” imma aħna nafu li mhux se jirnexxilhom. Jehovah innifsu qal li b’mod jew ieħor, il-bibien se jibqgħu miftuħin. Iż-żjieda se tkompli sejra.
19 Hemm jerġaʼ modi oħrajn kif Jehovah bierek u sebbaħ lin-nies tiegħu f’dawn l-aħħar jiem. Il-versi li baqaʼ minn Isaija kapitlu 60 jirrivelaw profetikament x’inhuma dawn il-modi.
Tistaʼ Tispjega?
• Min hi l-“mara” t’Alla, u min jirrappreżentaha fuq l-art?
• Ulied Sijon meta kienu mixħutin minn tulhom maʼ l-art, u meta u kif ‘qamu’?
• Waqt li uża simboli differenti, Jehovah kif bassar iż-żjieda taʼ llum f’dawk li huma predikaturi tas-Saltna?
• Jehovah b’liema modi ġiegħel li d-dawl jiddi fuq in-nies tiegħu?
[Stampa f’paġna 10]
Il-“mara” taʼ Jehovah tiġi kmandata tqum
[Stampa f’paġna 12]
Il-flotta taʼ bastimenti tidher qisha ħamiem fuq ix-xefaq