Il-​Mixi fil-​Mogħdijiet taʼ Jehovah Iġib Premjijiet Kbar

QATT mort xi mixja fuq il-​muntanji? Jekk mort, x’aktarx li ħassejtek bħallikieku kont qiegħed fuq il-​quċċata tad-​dinja. Kemm ħadt gost tieħu dik l-​arja friska, tara tant ’il bogħod, titgħaxxaq b’dik is-​sbuħija naturali! Forsi t-​tħassib tad-​dinja taʼ taħtek ħassejtu inqas importanti.

Għall-biċċa l-​kbira min-​nies, ħarġiet bħal dawn huma ftit u rari, imma jekk int Kristjan dedikat, għandek mnejn ilek timxi fuq art muntanjuża għal xi żmien—f’sens spiritwali. Bħas-​salmista tal-​qedem, bla dubju int tlabt: “Triqatek, Mulej, għarrafni, il-​mogħdijiet tiegħek għallimni.” (Salm 25:4) Tiftakar kif ħassejtek meta tlajt għall-​ewwel darba fuq l-​għolja tad-​dar taʼ Jehovah u bdejt timxi fuq l-​għoljiet? (Mikea 4:2; Ħabakkuk 3:​19) Bla dubju, int malajr indunajt li l-​mixi f’dawn il-​mogħdijiet għoljin taʼ qima pura ġablek protezzjoni u ferħ. Bdejt tħossok bħas-​salmista: “Hieni l-​poplu li jaf jgħajjat bil-​ferħ, li jimxi, Mulej, fid-​dawl taʼ wiċċek.”—Salm 89:16 (89:​15, NW).

Kultant, iżda, dawk li jmorru jimxu fuq il-​muntanji jkollhom jitħabtu maʼ tlajjaʼ twal u weqfin. Riġlejhom jibdew juġgħuhom, u jibdew jgħejjew. Aħna wkoll nistgħu nġarrbu diffikultajiet fis-​servizz tagħna lil Alla. Forsi dan l-​aħħar il-​passi tagħna saru kemxejn tqal. Kif nistgħu nerġgħu niksbu s-​saħħa u l-​ferħ tagħna? L-​ewwel pass hu li nagħrfu s-​superjorità tat-​triqat taʼ Jehovah.

Il-​Liġijiet Għoljin taʼ Jehovah

It-​triqat taʼ Jehovah huma ‘’l fuq minn triqat il-​bniedem,’ u l-​qima tiegħu ‘għoliet ’il fuq mill-​muntanji u ntrefgħet ’il fuq mill-​għoljiet.’ (Isaija 55:9; Mikea 4:1) L-​għerf taʼ Jehovah huwa “l-​għerf li ġej mis-​sema.” (Ġakbu 3:17) Il-​liġijiet tiegħu huma superjuri għal-​liġijiet l-​oħra kollha. Per eżempju, fiż-​żmien meta l-​Kangħanin kienu joffru lit-​tfal f’sagrifiċċji krudili, Jehovah ta lill-​Iżraelin liġijiet li kienu għoljin moralment u li fihom kienet tispikka il-​mogħdrija. Hu qalilhom: “La tħarisx lejn wiċċ il-​fqir; lanqas ma tweġġaħ lill-​kbir għal wiċċu . . . Ikun għalikom il-​barrani bħal wieħed taʼ ġewwa; ħobbu bħalek innifsek.”—Levitiku 19:​15, 34.

Ħmistax-il seklu wara, Ġesù ta iktar eżempji tal-​liġi maestuża taʼ Jehovah. (Isaija 42:21) Fil-​Priedka taʼ fuq il-​Muntanja, hu qal lid-​dixxipli tiegħu: “Ħobbu lill-​għedewwa tagħkom, u itolbu għal dawk li jippersegwitawkom, biex tkunu wlied Missierkom li hu fis-​smewwiet.” (Mattew 5:​44, 45) “Mela dak kollu li tridu li l-​bnedmin jagħmlu lilkom, agħmluh ukoll intom lilhom,” żied hu, “għax din hi l-​Liġi u l-​Profeti.”—Mattew 7:12.

Dawn il-​liġijiet għoljin għandhom effett fuq il-​qlub tan-​nies li huma ħfief biex iwieġbu favorevolment, u jqanqluhom jimitaw lil dak Alla li huma jaqdu. (Efesin 5:1; 1 Tessalonikin 2:13) Aħseb dwar it-​trasformazzjoni li seħħet fil-​każ taʼ Pawlu. Meta nisimgħu dwaru għall-​ewwel darba, hu kien qed japprova l-​qtil taʼ Stiefnu u kien qed “jagħmel ħerba mill-​Knisja.” Ftit snin biss wara, hu kien qed jittratta l-​Kristjani f’Tessalonika b’ġentilezza bħalma “omm [li] traddaʼ tħaddan lil uliedha.” It-​tagħlim divin biddel lil Pawlu minn persekutur għal Kristjan li jieħu interess. (Atti 8:​1, 3; 1 Tessalonikin 2:7) Żgur li kien grat li l-​personalità tiegħu kienet ġiet magħġuna permezz tat-​tagħlim taʼ Kristu. (1 Timotju 1:​12, 13) Apprezzament bħal dan kif jistaʼ jgħinna nkomplu mexjin fil-​mogħdijiet għoljin t’Alla?

Nimxu b’Apprezzament

Dawk li jħobbu jimxu fuq il-​muntanji jitgħaxxqu bil-​veduti spettakolari li jidhru minn hemmhekk. Jitgħallmu wkoll jinnotaw u japprezzaw l-​affarijiet żgħar li jiltaqgħu magħhom huma u mexjin, bħal xi blata partikulari, xi fjura sabiħa, jew xi annimal salvaġġ li jkunu lemħu kemm kemm. Spiritwalment, aħna rridu niftħu għajnejna għall-​premjijiet—kbar u żgħar—li jiġu mill-​mixi tagħna m’Alla. Il-​fatt li nkunu konxji taʼ dan jistaʼ jagħti s-​saħħa mill-​ġdid lill-​mixi tagħna u minn mixja li tagħtina battikata tinbidel f’waħda li tagħtina l-​enerġija. Se ntennu l-​kliem taʼ David: “Fakkarni mas-​sebħ fi tjubitek, għax fik jien nittama. Għarrafni t-​triq li minnha għandi ngħaddi.”—Salm 143:8.

Mary, li ilha miexja għal ħafna snin fil-​mogħdijiet taʼ Jehovah, tgħid: “Meta nħares lejn il-​ħolqien taʼ Jehovah, ma narax biss id-​disinn elaborat imma wkoll il-​personalità mimlija mħabba li għandu Alla. Sew jekk ikun annimal, għasfur, jew insett, kull wieħed huwa dinja ċkejkna li tant issaħħrek. L-​istess pjaċir jiġi mill-​veritajiet spiritwali li jiċċaraw matul is-​snin.”

Kif nistgħu nkabbru l-​apprezzament tagħna? Sa ċertu punt, billi ma nqisux ħafif ħafif dak li Jehovah jagħmel għalina. “Itolbu bla heda,” kiteb Pawlu. “Iżżu ħajr lil Alla f’kollox.”—1 Tessalonikin 5:​17, 18; Salm 119:62.

L-istudju persunali jgħinna nikkultivaw spirtu taʼ gratitudni. Pawlu ħeġġeġ lill-​Kristjani Kolossin: “Għixu mela magħqudin [maʼ Kristu Ġesù]; . . . issaħħu fil-​fidi, . . . u mtlew bil-​gratitudni.” (Kolossin 2:​6, 7) Il-​qari tal-​Bibbja u l-​meditazzjoni dwar dak li naqraw isaħħu l-​fidi tagħna u jressquna eqreb taʼ l-​Awtur tal-​Bibbja. Fil-​paġni tagħha hemm teżori li jistgħu jqanqluna biex ‘nimtlew bil-​gratitudni.’

Il-fatt li naqdu lil Jehovah flimkien maʼ ħutna wkoll jagħmel it-​triq iktar faċli. Is-​salmista jgħid dwaru nnifsu: “Nissieħeb maʼ kull min għandu l-​biżaʼ tiegħek.” (Salm 119:63) Ftit mill-​isbaħ mumenti tagħna jkunu fl-​assembleat Kristjani jew f’okkażjonijiet oħrajn fil-​kumpanija taʼ ħutna. Aħna nirrikonoxxu li l-​familja Kristjana prezzjuża tagħna li tinsab mad-​dinja kollha teżisti minħabba Jehovah u t-​triqat għoljin tiegħu.—Salm 144:15b.

Minbarra l-​apprezzament, sens taʼ responsabbiltà se jsaħħaħna biex inkomplu mexjin ’il quddiem fil-​mogħdijiet għoljin taʼ Jehovah.

Nimxu b’Mod Responsabbli

Dawk li jħobbu jimxu fuq il-​muntanji u li jkollhom sens taʼ responsabbiltà jagħrfu l-​bżonn li joqogħdu attenti kif jimxu jekk ma jridux jintilfu jew jitbiegħdu minn triqithom u jispiċċaw qrib xi rdum perikoluż. Bħala persuni li nistgħu nagħżlu x’nagħmlu, Jehovah iħallilna ammont raġunevoli taʼ libertà u inizjattiva. Imma libertà bħal din tirrikjedi sens taʼ responsabbiltà hekk kif inwettqu l-​obbligi Kristjani tagħna.

Per eżempju, Jehovah jafda fil-​qaddejja tiegħu li dawn se jwettqu l-​obbligi tagħhom b’mod responsabbli. Ma jgħidilniex kemm għandna nużaw enerġija u ħin fl-​attivitajiet Kristjani jew kemm għandna nikkontribwixxu finanzjarjament jew b’modi oħrajn. Minflok, il-​kliem taʼ Pawlu lill-​Korintin japplika għalina lkoll: “Kull wieħed għandu jagħti skond ma jidhirlu hu minn rajh.”—2 Korintin 9:7; Lhud 13:​15, 16.

L-għoti Kristjan b’mod responsabbli jinkludi li naqsmu l-​aħbar tajba m’oħrajn. Anki meta nikkontribwixxu għax-​xogħol tas-​Saltna mad-​dinja kollha nkunu qed nuru li għandna sens taʼ responsabbiltà. Gerhardt, anzjan, jispjega li hu u martu żiedu l-​kontribuzzjonijiet tagħhom mhux ħażin wara li attendew assemblea fl-​Ewropa tal-​Lvant. “Rajna li ħutna hemmhekk tant għandhom ftit affarijiet materjali; però tant japprezzaw il-​letteratura Biblika tagħna,” jgħid hu, “u għalhekk iddeċidejna li ridna nagħtu appoġġ kemm nifilħu lil ħutna f’pajjiżi oħra li jinsabu fil-​bżonn.”

Nitgħallmu Nissaportu Iktar

Il-​mixi fuq il-​muntanji jitlob li individwu jkun jiflaħ jimxi għal ħin twil bla ma jċedi għall-​għeja. Dawk li jħobbu jimxu fuq il-​muntanji jagħmlu l-​eżerċizzju kulmeta jkunu jistgħu, u ħafna jmorru għal xi mixja żgħira biex jippreparaw ruħhom għal mixjiet twal. B’mod simili, Pawlu rrikkmandalna biex nibqgħu nħabirku fl-​attivitajiet teokratiċi sabiex nibqgħu f’qagħda spiritwali tajba. Dawk li jixtiequ ‘jgħixu sewwa kif jixraq’ lil Jehovah u ‘jitwettqu bil-​qawwa kollha,’ qal Pawlu, għandhom ‘jogħġbuh f’kollox bil-​frott taʼ kull opra tajba.’—Kolossin 1:​10, 11.

Il-motivazzjoni teffettwa kemm dak li jkun jissaporti fil-​mixi tiegħu fuq il-​muntanji. Kif? Il-​fatt li jiffoka fuq objettiv ċar, bħal xi muntanja fil-​bogħod, iġagħlu jibqaʼ għaddej. U meta jasal f’ċerti postijiet tul it-​triq, jistaʼ jkejjel il-​progress li għamel biex jilħaq il-​mira finali tiegħu. Hekk kif iħares lura lejn it-​triq twila li jkun diġà mexa, hu jħossu sodisfatt.

Bl-istess mod, it-​tama tagħna taʼ ħajja taʼ dejjem issostnina u timmotivana. (Rumani 12:12) Sadattant, hekk kif nimxu fit-​triqat taʼ Jehovah, inħossuna sodisfatti meta nagħmlu miri Kristjani u nilħquhom. U kemm inħossuna ferħanin meta nħarsu lura lejn is-​snin kollha taʼ servizz leali jew nosservaw il-​bidliet li għamilna fil-​personalità tagħna!—Salm 16:11.

Sabiex jimxu distanzi twal u ma jaħlux l-​enerġija, dawk li jimxu jagħmlu dan b’pass konsistenti. B’mod simili, rutina tajba li tinkludi laqgħat u servizz taʼ l-​għalqa regulari se żżommna mexjin bil-​ħerqa lejn il-​mira tagħna. B’hekk, Pawlu inkuraġġixxa lill-​Kristjani sħabu biex ikomplu mexjin bl-​ordni fl-​istess rutina.—Filippin 3:16.

M’għandniex xi ngħidu, aħna ma nimxux waħedna fil-​mogħdijiet taʼ Jehovah. “Naraw kif nistgħu nħajjru lil xulxin għall-​imħabba u għall-​għemil tajjeb,” jikteb Pawlu. (Lhud 10:24) Kumpanija spiritwali tajba se tagħmilhielna iktar faċli biex inżommu l-​pass hekk kif nimxu maʼ sħabna fit-​twemmin.—Proverbji 13:20.

Fl-aħħar, u l-​iktar importanti, m’għandna qatt ninsew il-​qawwa li jagħti Jehovah. Dawk li l-​qawwa tagħhom hi f’Jehovah se “jimxu u aktar jissaħħu.” (Salm 84:​6, 8 [84:​5, 7, NW]) Għalkemm xi drabi jkollna ngħaddu minn art imħarbta, bl-​għajnuna taʼ Jehovah nistgħu nirnexxu.