Jehovah Jimpurtah Minnek

“Ixħtu [fuq Alla] l-​ħsibijiet kollha tagħkom għax hu jaħseb fikom.”—1 Pietru 5:7.

1. Jehovah u Satana f’liema ħaġa importanti huma kompletament l-​oppost taʼ xulxin?

JEHOVAH u Satana huma kompletament l-​oppost taʼ xulxin. Kulmin iħossu miġbud lejn Jehovah, bilfors li jħoss li x-​Xitan jiddiżgustah. Dan il-​kuntrast jissemma fi ktieb taʼ referenza popolari. Rigward l-​attivitajiet taʼ Satana kif jissemmew fil-​ktieb Bibliku taʼ Ġob, l-​Encyclopædia Britannica (1970) tgħid: ‘Xogħol Satana huwa li jdur maʼ l-​art ifittex atti jew persuni biex jirrapporta kontrihom; b’hekk hu jaħdem il-​kontra taʼ “għajnejn il-​Mulej,” li jiġru fuq l-​art biex isaħħu kulma hu tajjeb (II Kron. xvi, 9). Satana ma jemminx li l-​bnedmin jistgħu jagħmlu t-​tajjeb mingħajr motiv egoistiku, u jitħalla jittestja dan taħt l-​awtorità u l-​kontroll t’Alla u fil-​limiti li jqiegħed Alla.’ Iva, x’kuntrast dak!—Ġob 1:​6-12; 2:​1-7.

2, 3. (a) It-tifsir tal-​kelma “Xitan” kif jintwera tajjeb minn dak li ġralu Ġob? (b) Il-​Bibbja kif turi li Satana għadu jixli lill-​qaddejja taʼ Jehovah fuq l-​art?

² Il-​kelma “Xitan” ġejja mill-​kelma Griega li tfisser “xellej falz,” “kalunnjatur.” Il-​ktieb taʼ Ġob juri li Ġob, qaddej leali taʼ Jehovah, ġie mixli minn Satana li kien qed jaqdi lil Jehovah għax kien jaqbillu. Satana qal: “Tgħid għal xejn Ġob jibżaʼ minn Alla?” (Ġob 1:9) Ir-​rakkont fil-​ktieb taʼ Ġob juri li minkejja l-​provi li kellu, Ġob resaq ħafna eqreb taʼ Jehovah. (Ġob 10:​9, 12; 12:​9, 10; 19:25; 27:5; 28:28) Wara l-​esperjenza kerha li kellu, hu qal lil Alla: “Fuqek jien b’widnejja smajt; imma issa b’għajnejja rajtek.”—Ġob 42:5.

³ Waqaf Satana jixlihom lill-​qaddejja leali t’Alla minn żmien Ġob ’l hawn? Le. Il-​ktieb t’Apokalissi juri li f’dan iż-​żmien tat-​tmiem, Satana qed ikompli jixli lill-​aħwa midlukin taʼ Kristu u ċertament ukoll lil sħabhom leali. (2 Timotju 3:12; Apokalissi 12:​10, 17) Għaldaqstant, aħna lkoll bħala Kristjani veri għandna bżonn ħafna li nissottomettu ruħna lejn Alla Jehovah, li jieħu ħsiebna ferm, billi naqduh imqanqlin mill-​imħabba profonda li għandna lejh, u b’hekk nuru li l-​akkuża taʼ Satana hija falza. Jekk nagħmlu hekk, se nferrħu qalb Jehovah.—Proverbji 27:11.

Jehovah Ifittex Kif Jgħinna

4, 5. (a) B’kuntrast maʼ Satana, Jehovah xi jfittex fuq l-​art? (b) Biex nesperjenzaw il-​favur taʼ Jehovah, x’hemm bżonn min-​naħa tagħna?

⁴ Ix-​Xitan idur maʼ l-​art, u jfittex li jixli u jiblaʼ lil xi ħadd. (Ġob 1:​7, 9; 1 Pietru 5:8) B’kuntrast, Jehovah ifittex li jgħin lil dawk li għandhom bżonn is-​saħħa tiegħu. Il-​profeta Ħanani qal lis-​Sultan Asa: “Għajnejh [Jehovah] jiġru fuq l-​art kollha, isaħħaħ lil dawk li qalbhom marbuta fis-​sħiħ miegħu.” (2 Kronaki 16:9) X’differenza bejn Satana li jiflilna l-​irqaqat kollha u Jehovah li jieħu ħsiebna b’imħabba!

⁵ Jehovah mhux qed jispijana biex jipprova jaqbad kull difett u nuqqas tagħna. Is-​salmista kiteb: “Jekk tal-​ħtijiet int tagħti kas, Mulej, Sidi, min jistaʼ jżomm sħiħ?” (Salm 130:3) It-​tweġiba indikata hi: ħadd. (Koħèlet 7:20) Jekk nersqu qrib Jehovah b’qalb sħiħa, għajnejh se jkunu fuqna, mhux biex jikkundannawna, imma biex jaraw l-​isforzi li nagħmlu u jwieġbu t-​talb tagħna għall-​għajnuna u l-​maħfra. L-​appostlu Pietru kiteb: “Għajnejn il-​Mulej huma fuq il-​ġusti u widnejh miftuħa għat-​talb tagħhom. Imma [“wiċċ Jehovah qiegħed kontra,” NW] dawk li jagħmlu l-​ħażen.”—1 Pietru 3:12.

6. Il-​każ taʼ David kif inhu taʼ faraġ kif ukoll taʼ twissija għalina?

⁶ David kien imperfett u dineb bil-​kbir. (2 Samwel 12:​7-9) Imma hu fetaħ qalbu maʼ Jehovah u resaq lejh b’talb mimli ħrara. (Salm 51:​1-14 [51:​1-12, sopraskrizzjoni, NW]) Jehovah semaʼ t-​talba tiegħu u ħafirlu, għalkemm David ħasad konsegwenzi koroh għad-​dnub tiegħu. (2 Samwel 12:​10-14) Dan għandu jkun kemm taʼ faraġ u kemm taʼ twissija għalina. Huwa taʼ faraġ li nkunu nafu li Jehovah huwa lest li jaħfrilna dnubietna jekk inkunu verament niedma, imma niġu f’sensina meta nirrealizzaw li d-​dnubiet spiss iġibu konsegwenzi serji. (Galatin 6:​7-9) Jekk irridu nersqu qrib Jehovah għandna noqogħdu ’l bogħod kemm jistaʼ jkun minn kull ħaġa li ma togħġbux.—Salm 97:10.

Jehovah Jiġbed lin-​Nies Tiegħu Lejh

7. X’tip taʼ nies jgħasses fuqhom Jehovah, u kif jiġbidhom lejh?

⁷ David kiteb f’wieħed mis-​salmi tiegħu: “Fil-​għoli l-​Mulej, iżda jara l-​umli, [“imma lill-​wieħed imkabbar jafu biss,” NW] mill-​bogħod.” (Salm 138:​6, Saydon) B’mod simili, salm ieħor jgħid: “Min hu bħall-​Mulej, Alla tagħna, li qiegħed fl-​għoli? Hu li jħares ’l isfel, lejn is-​smewwiet u lejn l-​art. Hu li jqajjem mit-​trab l-​imsejken.” (Salm 113:​5-7) Iva, il-​Ħallieq li jistaʼ kollox taʼ l-​univers jindenja ruħu jħares ’l isfel lejn l-​art, u għajnejh jaraw “l-​umli,” “l-​imsejken,” nies li “jitniehdu u jitbikkew minħabba l-​qżiżijiet kollha li jsiru.” (Eżekjel 9:4) Hu jiġbed lil uħud bħal dawn lejh permezz taʼ Ibnu. Waqt li kien fuq l-​art, Ġesù qal: “Ħadd ma jistaʼ jiġi għandi jekk il-​Missier li bagħatni ma jiġbdux lejja . . . Ħadd ma jistaʼ jiġi għandi jekk il-​Missier ma jagħtihx li jiġi.”—Ġwann 6:​44, 65.

8, 9. (a) Għala għandna lkoll niġu għand Ġesù? (b) X’hemm li jispikka ħafna fl-​arranġament tal-​fidwa?

⁸ Il-​bnedmin kollha għandhom jiġu għand Ġesù u jpoġġu fidi fis-​sagrifiċċju li tħallas bħala prezz tal-​fidwa għax huma twieldu midinbin, imbegħdin minn Alla. (Ġwann 3:36) Iridu jerġgħu jitħabbu m’Alla. (2 Korintin 5:20) Alla ma stenniex li l-​midinbin jitolbuh jipprovdi xi arranġament li bih setgħu jerġgħu jagħmlu paċi miegħu. L-​appostlu Pawlu kiteb: “Alla wriena l-​imħabba tiegħu meta Kristu miet għalina, aħna li konna għadna midinbin. . . . Jekk meta konna għadna għedewwa taʼ Alla tħabbibna miegħu bis-​saħħa tal-​mewt taʼ Ibnu, kemm iktar issa, li aħna ħbieb miegħu, nsalvaw permezz tal-​ħajja tiegħu?”—Rumani 5:​8, 10.

⁹ L-​appostlu Ġwanni kkonferma l-​verità sublimi li Alla qed iħabbeb lill-​bnedmin miegħu nnifsu, u kiteb: “B’dan dehret l-​imħabba taʼ Alla fina, għax Alla bagħat lil Ibnu l-​waħdieni fid-​dinja, biex ngħixu bih. U hawn qiegħda l-​imħabba; mhux għax aħna ħabbejna ’l Alla, imma għax ħabbna Hu u bagħat lil Ibnu biex ikun taʼ tpattija għal dnubietna.” (1 Ġwann 4:​9, 10) Kien Alla li ħa l-​inizjattiva mhux il-​bnedmin. Ma tħossokx tinġibed lejn Alla li wera daqstant imħabba għalina l-​bnedmin li mhux biss konna “midinbin” imma wkoll “għedewwa”?—Ġwann 3:16.

Il-​Bżonn li Nfittxu lil Jehovah

10, 11. (a) Xi rridu nagħmlu biex infittxu lil Jehovah? (b) Kif għandna nqisuha s-​sistema t’affarijiet taʼ Satana?

¹⁰ M’għandniex xi ngħidu, Jehovah ma jisforzaniex biex niġu għandu. Aħna rridu nfittxuh, ‘inħossuh b’idejna u nsibuh; u tassew, hu m’huwiex ’il bogħod minn kull wieħed minna.’ (Atti 17:27) Irridu nagħrfu d-​dritt li għandu Jehovah li jitlob li nkunu sottomessi lejh. Id-​dixxiplu Ġakbu kiteb: “Mela oqogħdu għar-​rieda taʼ Alla. Ieqfu lix-​xitan, u hu jaħrab minnkom. Ersqu lejn Alla, u hu jersaq lejkom. Midinbin, naddfu jdejkom; nies taʼ moħħ imħawwad, saffu qlubkom.” (Ġakbu 4:​7, 8) M’għandniex naħsbuha darbtejn biex nieħdu waqfa soda kontra x-​Xitan u favur Jehovah.

¹¹ Dan ifisser li nitbiegħdu mis-​sistema t’affarijiet mill-​agħar taʼ Satana. Ġakbu kiteb ukoll: “Ma tafux li l-​ħbiberija mad-​dinja hija l-​għadu taʼ Alla? Min mela jrid isir ħabib tad-​dinja huwa għadu taʼ Alla.” (Ġakbu 4:4) Mill-​banda l-​oħra, jekk irridu nkunu l-​ħbieb taʼ Jehovah, irridu nistennew li d-​dinja taʼ Satana se tobgħodna.—Ġwann 15:19; 1 Ġwann 3:13.

12. (a) Liema kliem taʼ faraġ kiteb David? (b) Liema twissija ta Jehovah permezz tal-​profeta Għażarija?

¹² Meta d-​dinja taʼ Satana topponina b’xi mod partikulari, ikollna bżonn b’mod speċjali li nersqu lejn Jehovah bit-​talb, u nitolbuh għall-​għajnuna. David, li kemm-il darba ħass l-​id taʼ Jehovah issalvah, kiteb kliem taʼ faraġ għalina: “Qrib il-​Mulej lejn kull min isejjaħlu, lejn kull min isejjaħlu fis-​sewwa. Jaqtgħalhom xewqithom ’il dawk li jibżgħu minnu, jismaʼ l-​għajta tagħhom, u jsalvahom. Iħares il-​Mulej lil ħbiebu kollha, imma lill-​ħżiena jeqridhom.” (Salm 145:​18-20) Dan is-​salm juri li Jehovah jistaʼ jsalvana individwalment meta nġarrbu xi prova u se jsalva l-​poplu tiegħu kollettivament meta tiġi t-​tribulazzjoni l-​kbira. (Apokalissi 7:14) Jehovah se jibqaʼ qrib tagħna jekk aħna nibqgħu qrib tiegħu. Gwidat mill-​“ispirtu tal-​Mulej,” il-​profeta Għażarija qal xi ħaġa li nistgħu niħduha bħala verità li tapplika b’mod ġenerali: “Il-​Mulej ikun magħkom, meta intom tkunu miegħu; u meta intom tfittxuh, intom issibuh; u meta intom titilquh, hu jitlaqkom.”—2 Kronaki 15:​1, 2.

Jehovah Irid Ikun Reali Għalina

13. Kif nistgħu nuru li Jehovah hu reali għalina?

¹³ L-​appostlu Pawlu kiteb dwar Mosè li “żamm iebes, daqs kemm kieku kien qiegħed jara lil Alla li ma jidhirx.” (Lhud 11:27) M’għandniex xi ngħidu, Mosè qatt ma ra lil Jehovah verament. (Eżodu 33:20) Imma tant kien reali għalih li kien daqslikieku qed jara lil Jehovah. B’mod simili, wara l-​provi li ġarrab, l-​għajnejn tal-​fidi taʼ Ġob raw lil Jehovah iktar ċar, bħala Alla li jippermetti l-​qaddejja leali tiegħu jgħaddu minn provi imma li qatt ma jabbandunahom. (Ġob 42:5) Dwar Ħenok u Noè ntqal li huma ‘kienu jimxu sewwa maʼ Alla.’ Dan għamluh billi fittxew li jogħġbu lil Alla u jobduh. (Ġenesi 5:​22-24; 6:​9, 22; Lhud 11:​5, 7) Jekk Jehovah ikun reali għalina daqskemm kien għal Ħenok, Noè, Ġob, u Mosè, ‘fih se naħsbu f’kull ma nagħmlu, u hu jwittilna triqatna.’—Proverbji 3:​5, 6.

14. X’jiġifieri li ‘ningħaqdu’ maʼ Jehovah?

¹⁴ Eżatt qabel ma kien wasal il-​waqt li l-​Iżraelin jidħlu fl-​Art Imwiegħda, Mosè wissiehom: “Intom għandkom timxu wara l-​Mulej, u minnu tibżgħu, u l-​kmandamenti tiegħu tħarsu, u leħnu tisimgħu, u lilu taqdu, u miegħu tingħaqdu.” (Dewteronomju 13:5 [13:​4, NW]) Kellhom isegwu lil Jehovah, jibżgħu minnu, jobduh, u jingħaqdu miegħu. Rigward il-​kelma hawn tradotta “tingħaqdu,” studjuż tal-​Bibbja jgħid li “l-​lingwa [Ebrajka] tindika relazzjoni mill-​qrib u intima.” Is-​salmista qal: “Midħla l-​Mulej taʼ dawk li jibżgħu minnu, lilhom jgħarraf il-​patt tiegħu.” (Salm 25:14) Se jkollna din ir-​relazzjoni prezzjuża u intima maʼ Jehovah jekk hu jkun reali għalina u jekk tant inkunu nħobbuh li nibżgħu nagħmlu kwalunkwe ħaġa li ma togħġbux.—Salm 19:​10-15 (9-14, NW).

Tirrealizza li Jehovah Jimpurtah Minnek?

15, 16. (a) Salm 34 kif juri li Jehovah jimpurtah minna? (b) X’għandna nagħmlu jekk insibuha diffiċli li niftakru l-​affarijiet tajbin li Jehovah għamel magħna?

¹⁵ Wieħed mill-​atti makakki taʼ Satana hu li jipprova jnessina l-​fatt li Alla tagħna, Jehovah, qiegħed il-​ħin kollu jieħu ħsieb il-​qaddejja leali tiegħu. Is-​Sultan David taʼ Iżrael irrealizza b’mod ċar li Jehovah kellu l-​qawwa li jipproteġih anki meta kien iffaċċja mument perikoluż ferm. Meta kellu bilfors jagħmilha taʼ miġnun quddiem is-​Sultan Akis taʼ Gatt, hu kkompona għanja, salm veru sabiħ, li fiha kien hemm dawn l-​espressjonijiet taʼ fidi: “Xandru l-​kobor tal-​Mulej miegħi; ħa ngħollu ismu flimkien. Jien fittixt il-​Mulej, u weġibni, minn kull biżaʼ tiegħi ħelisni. L-​anġlu tal-​Mulej jgħasses madwar dawk li jibżgħu minnu, u jeħlishom. Ippruvaw u taraw kemm hu tajjeb il-​Mulej; hieni l-​bniedem li jistkenn fih. Qrib il-​Mulej lejn dawk b’qalbhom maqsuma, jgħin lil dawk b’ruħhom mifnija. Kbar huma l-​ħsarat tar-​raġel sewwa, iżda minnhom kollha jeħilsu l-​Mulej.”—Salm 34:​4, 5, 8, 9, 19, 20 (34:​3, 4, 7, 8, 18, 19, NW); 1 Samwel 21:​11-16 (21:​10-15, NW).

¹⁶ Konvint int mill-​qawwa li għandu Jehovah biex isalva? Tirrealizza li hu jipprovdi protezzjoni permezz taʼ l-​anġli? Ipprovajt u rajt personalment kemm hu tajjeb Jehovah? Meta kienet l-​aħħar darba li kont konxju b’mod partikulari li Jehovah kien qalbu tajba miegħek? Ipprova ftakar. Kien dan meta ħabbatt l-​aħħar bieb fil-​ministeru, preċiż meta ħassejtek li ma flaħtx tkompli iktar? Forsi mbagħad kellek konversazzjoni sabiħa ħafna maʼ l-​inkwilin. Ftakart tirringrazzja lil Jehovah talli tak is-​saħħa li kellek bżonn u talli bierkek? (2 Korintin 4:7) Mill-​banda l-​oħra, forsi ssibha diffiċli li tiftakar f’xi ħaġa tajba partikulari li Jehovah għamel miegħek. Forsi jkollok taħseb fil-​ġimgħa li għaddiet, ix-​xahar li għadda, is-​sena li għaddiet, jew iktar. Jekk dan huwa l-​każ, għax ma tkunx determinat li tagħmel sforz biex tersaq eqreb lejn Jehovah u tipprova tara kif jiggwidak u jidderiġik? L-​appostlu Pietru widdeb lill-​Kristjani: “Kunu . . . umli taħt l-​id setgħana taʼ Alla . . . Ixħtu fuqu l-​ħsibijiet kollha tagħkom għax hu jaħseb fikom.” (1 Pietru 5:​6, 7) Tabilħaqq, se tibqaʼ skantat b’kemm jimpurtah minnek!—Salm 73:28.

Kompli Fittex lil Jehovah

17. X’għandna bżonn biex nibqgħu nfittxu lil Jehovah?

¹⁷ Li nżommu r-​relazzjoni tagħna maʼ Jehovah hija xi ħaġa kontinwa. Ġesù qal f’talba lil Missieru: “Din hi l-​ħajja taʼ dejjem, li jagħrfu lilek, Alla waħdek veru, u lil Ġesù Kristu, li inti bgħatt.” (Ġwann 17:3) Biex nieħdu għarfien dwar Jehovah u Ibnu jeħtieġ sforz kontinwu min-​naħa tagħna. Għandna bżonn l-​għajnuna tat-​talb u l-​ispirtu qaddis biex nifhmu l-​affarijiet profondi t’Alla. (1 Korintin 2:10; Luqa 11:13) Għandna bżonn ukoll il-​gwida taʼ l-​ilsir leali u diskret biex nitimgħu lil moħħna bl-​ikel spiritwali mogħti “fil-​ħin.” (Mattew 24:45) B’dan il-​mezz taʼ komunikazzjoni, Jehovah tana l-​parir li naqraw il-​Kelma tiegħu kuljum, nattendu l-​laqgħat Kristjani regolarment, u nieħdu sehem b’qalb sħiħa fl-​ippridkar taʼ “l-​Evanġelju tas-​Saltna.” (Mattew 24:14) Billi nagħmlu hekk se nkomplu nfittxu lil Alla tagħna Jehovah li tant jieħu ħsiebna.

18, 19. (a) X’għandna nkunu determinati li nagħmlu? (b) Jekk nieħdu l-​waqfa soda tagħna kontra x-​Xitan u nibqgħu nfittxu lil Jehovah, kif se nitbierku?

¹⁸ Satana qed jagħmel kulma jistaʼ biex iġib persekuzzjoni, oppożizzjoni, u pressjoni minn kull naħa fuq il-​poplu taʼ Jehovah. Hu jipprova jtellfilna l-​paċi tagħna u jeqred il-​waqfa tajba li għandna m’Alla tagħna. Hu ma jridniex inkomplu x-​xogħol tagħna taʼ li nsibu lil uħud taʼ qalb onesta u ngħinuhom jiġu fuq in-​naħa taʼ Jehovah fil-​kwistjoni tas-​sovranità universali. Imma rridu nkunu determinati li nibqgħu leali lejn Jehovah, u nafdaw fih biex jeħlisna mill-​wieħed mill-​agħar. Billi nħallu l-​Kelma t’Alla tiggwidana u billi nibqgħu attivi maʼ l-​organizzazzjoni viżibbli tiegħu, nistgħu nkunu ċerti li hu dejjem se jappoġġana.—Isaija 41:​8-13.

¹⁹ Għalhekk, ejja lkoll nieħdu l-​waqfa soda tagħna kontra x-​Xitan u l-​atti makakki tiegħu, u dejjem infittxu lill-​għażiż Alla tagħna, Jehovah, li m’huwiex se jonqos li ‘jsaħħaħna u jqegħedna fis-​sod.’ (1 Pietru 5:​8-11) B’hekk se ‘nżommu rwieħna fl-​imħabba taʼ Alla, [waqt li] nistennew il-​ħniena taʼ Sidna Ġesù Kristu għall-​ħajja taʼ dejjem.’—Ġuda 21.

Int Kif Twieġeb?

• Il-kelma “Xitan” xi tfisser, u x-​Xitan kif jgħix fi qbil maʼ dak it-​titlu?

• Jehovah kif inhu differenti mix-​Xitan fil-​mod kif iħares lejn dawk li jgħixu fuq l-​art?

• Persuna għala għandha taċċetta l-​fidwa biex tersaq lejn Jehovah?

• Xi jfisser li ‘ningħaqdu’ maʼ Jehovah, u kif nistgħu nibqgħu nfittxuh?

[Stampa f’paġna 15]

Minkejja l-​provi tiegħu, Ġob sar japprezza l-​fatt li Jehovah kien jimpurtah minnu

[Stampi f’paġna 16]

Il-​qari tal-​Bibbja kuljum, l-​attendenza regulari għal-​laqgħat Kristjani, u l-​parteċipazzjoni żeluża fix-​xogħol taʼ l-​ippridkar ifakkruna li Jehovah jimpurtah minna