“Ersqu Lejn Alla, U Hu Jersaq Lejkom”
Qabel u Wara- Ħajjitha Nbidlet Għalkollox
KEMM kienet saret taʼ dwejjaq u bla skop il-ħajja għal Matsepang! Hi kienet naqra taʼ tifla fil-Lesoto, pajjiż fil-qalba taʼ l-Afrika t’Isfel. Matsepang trabbiet bħala Kattolika. Madankollu, minflok ma ġiet megħjuna tersaq qrib t’Alla, għal snin sħaħ is-sorijiet kienu jabbużaw minnha billi jużaw il-flus ħalli jħajruha tieħu sehem f’atti immorali.
B’riżultat t’hekk, Matsepang baqgħet diżappuntata bir-reliġjon u ma setgħetx tniżżilha li kien hemm Ħallieq li jħobb u li jimpurtah ġenwinament mill-bnedmin li ħalaq. Minħabba l-abbandun u l-abbuż li sofriet, Matsepang batiet ħafna emozzjonalment u kienet tħossha li ma tiswa assolutament għalxejn. Meta kibret saret vjolenti u aggressiva ħafna. Dan wassalha għall-kriminalità.
Maż-żmien Matsepang issieħbet maʼ klikka u kienet tmur magħhom tisraq l-affarijiet tan-nies minn fuq il-ferroviji. Hi ġiet arrestata u ntbagħtet il-ħabs fl-Afrika t’Isfel. Iktar tard, ġiet deportata lejn art twelidha, il-Lesoto, u hemmhekk kompliet tgħix ħajja taʼ kriminalità, sokor, vjolenza, u immoralità.
Darba minnhom Matsepang kienet għaddejja minn perijodu ikrah ħafna f’ħajjitha, u talbet lil Alla b’mod iddisprat biex jgħinha. Hi wegħditu, “Alla, jekk nibqaʼ ħajja, nagħmel kulma nistaʼ biex naqdik.”
Ftit taż-żmien wara, Matsepang ġiet avviċinata minn missjunarji li kienu Xhieda taʼ Jehovah. Huma offrewlha li jistudjaw il-Bibbja magħha. Minn dan l-istudju bdiet tirrealizza li m’huwiex veru li Alla hu indifferenti u ma jimpurtahx. Fil-fatt, fehmet b’mod ċar li Satana, “missier il-gideb,” juża tattiċi makakki u qarrieqa biex lil xi wħud idaħħlilhom f’moħħhom li huma ma jiswew għalxejn u jġagħalhom jemmnu li Jehovah qatt ma se jsib xi ħaġa xi jħobb fihom.—Ġwann 8:44; Efesin 6:11.
Għall-kuntrarju, kemm ħassitha tistrieħ Matsepang meta saret taf li aħna jistaʼ jerġaʼ jkollna rispett xieraq lejna nfusna jekk nindmu mill-passat midneb tagħna, infittxu l-maħfra t’Alla, u nistinkaw biex nogħġbuh! Hi ġiet megħjuna tifhem li “Alla hu aqwa mill-kuxjenza tagħna” u jħares lejna b’tali mod li jistaʼ jkun kemxejn differenti minn kif aħna nħarsu lejna nfusna.—1 Ġwann 3:19, 20.
Matsepang ħassitha mqanqla meta qrat dan il-kliem tas-salmista David: “Qrib il-Mulej lejn dawk b’qalbhom maqsuma, jgħin lil dawk b’ruħhom mifnija.” (Salm 34:19 [34:18, NW]) Bħala waħda minn dawn l-uħud “b’ruħhom mifnija,” bdiet tirrealizza li Jehovah ma jabbandunax lill-qaddejja tiegħu, anki jekk xi wħud minnhom isiru dipressi jew iħossuhom li m’humiex importanti. Ħasset qalbha tfur bil-ferħ għall-fatt li Alla jimpurtah min-nagħaġ kollha tiegħu u jwiżinhom matul żminijiet diffiċli. (Salm 55:23 [55:22, NW]; 1 Pietru 5:6, 7) L-iktar kliem li laqatha kien dan: “Ersqu lejn Alla, u hu jersaq lejkom.”—Ġakbu 4:8.
Il-qawwa tal-Kelma t’Alla, il-Bibbja, ma damitx ma bdiet tidher fil-ħajja taʼ Matsepang. Hi bdiet tattendi regolarment il-laqgħat Kristjani u waqqfet għalkollox il-prattiċi mhux skritturali tagħha. X’kien ir-riżultat? Hi m’għadhiex tħossha li ma jistħoqqilhiex l-imħabba u l-approvazzjoni t’Alla. Minn mindu tgħammdet bħala waħda mix-Xhieda taʼ Jehovah, hi qattgħet eluf taʼ sigħat fil-ministeru Kristjan bħala proklamatriċi taʼ l-aħbar tajba tas-Saltna. Minkejja l-ġrieħi tal-passat, Matsepang issa qed tgħix ħajja ferħana u bi skop. X’turija din taʼ kemm il-qawwa tal-Bibbja tistaʼ ttejjeb il-ħajjiet!—Lhud 4:12.
[Kumment f’paġna 9]
“Alla, jekk nibqaʼ ħajja, nagħmel kulma nistaʼ biex naqdik”
[Kaxxa f’paġna 9]
Il-Prinċipji tal-Bibbja Jagħmlu Xogħolhom
Fost il-prinċipji Bibliċi li farrġu lil vittmi t’abbuż insibu dawn li ġejjin:
“Meta joktor l-hemm ġo qalbi, il-faraġ tiegħek [t’Alla] hennieli ruħi.”(Salm 94:19) Il-“faraġ” taʼ Jehovah misjub fil-Kelma tiegħu huwa sors kbir taʼ konsolazzjoni. Jekk nirriflettu fuqu waqt il-meditazzjoni u t-talb, inkunu nistgħu ntaffu ħsibijiet taʼ dwejjaq u nibnu l-fiduċja tagħna f’Alla bħala Ħabib li jifhimna.
“Hu [Jehovah] jfejjaq il-qlub maqsuma, hu jorbot il-ġrieħi tagħhom.”(Salm 147:3) Jekk nuru gratitudni lejn il-ħniena taʼ Jehovah u l-provvediment tiegħu biex jgħattilna dnubietna permezz tas-sagrifiċċju taʼ Ġesù bħala fidwa, nistgħu nersqu lejn Alla b’moħħna mistrieħ mingħajr ma nibqgħu nħossuna ħatja f’qalbna. Dan jistaʼ jġibilna faraġ u paċi tal-moħħ li ma nistgħux niksbuhom minn xi mkien ieħor.
“Ħadd ma jistaʼ jiġi għandi [Ġesù Kristu] jekk il-Missier li bagħatni ma jiġbdux lejja; u jiena nqajjmu mill-imwiet fl-aħħar jum.” (Ġwann 6:44) Permezz taʼ l-ispirtu qaddis tiegħu u x-xogħol taʼ l-ippridkar tas-Saltna, Jehovah iressaqna personalment lejn Ibnu u jagħtina t-tama taʼ ħajja taʼ dejjem.