Konversazzjonijiet Spiritwali Jibnuna

“Ebda kelma mhux xierqa m’għandha toħroġ minn fommkom, imma kliem sewwa li jedifika skond il-​ħtieġa, kliem li jagħmel il-​ġid lil min jisimgħu.”​—Efesin 4:​29.

1, 2. (a) Kemm hu taʼ valur id-​diskors tal-​bnedmin? (b) Il-​qaddejja taʼ Jehovah kif jixtiequ jużaw id-​diskors tagħhom?

“ID-​DISKORS tal-​bnedmin huwa misteru; huwa rigal mingħand Alla, miraklu.” Hekk kiteb il-​lessikografu Ludwig Koehler. Forsi dan ir-​rigal prezzjuż mingħand Alla ma napprezzawhx biżżejjed. (Ġakbu 1:17) Imma ikkunsidra x’telfa kbira tkun meta xi ħadd mill-​maħbubin tagħna tagħtih xi puplesija u jitlef l-​abbiltà li jitkellem b’mod li jinftiehem. “Kellna komunikazzjoni mill-​aqwa li tant kienet tgħaqqadna,” tispjega Joan, li r-​raġel tagħha reċentement tatu puplesija. “Kemm nimmissjahom il-​konversazzjonijiet li kien ikollna!”

² Il-​konversazzjonijiet jistgħu jsaħħu l-​ħbiberiji, jirranġaw in-​nuqqas taʼ ftehim, jinkuraġġixxu lil dawk taʼ qalbhom maqtugħa, isaħħu l-​fidi, u jtejbu l-​ħajjiet​—imma mhux awtomatikament. Is-​Sultan għaref Salamun osserva: “Min iqassas b’ilsienu jinfed bħal sejf, imma lsien l-​għorrief idewwi.” (Proverbji 12:18) Bħala l-​qaddejja taʼ Jehovah, aħna rridu li l-​konversazzjonijiet tagħna jdewwu u jibnu minflok ma jweġġgħu u jkissru. Aħna nixtiequ wkoll nużaw id-​diskors tagħna biex infaħħru lil Jehovah, kemm fil-​ministeru pubbliku kif ukoll f’konversazzjonijiet privati. Is-​salmista kanta: “F’Alla niftaħar il-​ħin kollu; ismek infaħħru għal dejjem.”—Salm 44:9 (44:​8, NW).

3, 4. (a) Liema problema niffaċċjaw ilkoll kemm aħna fejn jidħol id-​diskors? (b) Id-​diskors tagħna għala huwa importanti?

³ “L-​ilsien,” iwissi d-​dixxiplu Ġakbu, ‘ħadd ma għandu ħila jimmansah.’ Hu jfakkarna: “Aħna lkoll niżbaljaw, u taʼ sikwit; jekk xi ħadd ma jiżbaljax f’dak li jgħid, dan ikun perfett, kapaċi jrażżan ġismu kollu.” (Ġakbu 3:​2, 8) Ħadd minna m’hu perfett. Għalhekk, minkejja li nagħmlu l-​aħjar li nistgħu, id-​diskors tagħna mhux dejjem jibni lil oħrajn jew ifaħħar lill-​Ħallieq tagħna. Allura, għandna nitgħallmu noqogħdu attenti għal dak li ngħidu. Iktar minn hekk, Ġesù qal: “Il-​bnedmin f’jum il-​ħaqq għad iridu jagħtu kont taʼ kull kelma fiergħa li jkunu qalu, għax minn kliemek tkun iġġustifikat, u minn kliemek tkun ikkundannat.” (Mattew 12:​36, 37) Iva, l-​Alla veru jitlob kont minna taʼ dak li ngħidu.

⁴ Wieħed mill-​aqwa modi biex nevitaw diskors li jġib il-​ħsara huwa li niżviluppaw id-​drawwa li nieħdu sehem f’konversazzjonijiet spiritwali. Dan l-​artiklu se jikkunsidra kif nistgħu nagħmlu dan, liema tip t’affarijiet nistgħu nitkellmu dwarhom, u liema benefiċċji nistgħu niksbu minn diskors li jibni.

Ara X’Hemm f’Qalbek

5. Il-​qalb x’parti prinċipali għandha f’li tippromwovi konversazzjonijiet li jibnu?

⁵ Meta niġu biex nikkultivaw id-​drawwa li nieħdu sehem f’konversazzjonijiet li jibnu, irridu l-​ewwel nirrikonoxxu li d-​diskors tagħna jirrifletti dak li hemm f’qalbna. Ġesù qal: “Mill-​milja tal-​qalb jitkellem il-​fomm.” (Mattew 12:34) Fi kliem sempliċi, aħna nieħdu pjaċir nitkellmu dwar l-​affarijiet li huma importanti għalina. Għalhekk, għandna bżonn nistaqsu lilna nfusna: ‘Il-​konversazzjonijiet tiegħi x’juru dwar il-​kundizzjoni taʼ qalbi? Meta nkun mal-​familja tiegħi jew maʼ sħabi fit-​twemmin, il-​konversazzjoni tiegħi tikkonċentra fuq affarijiet spiritwali jew dejjem nispiċċa nitkellem dwar l-​isport, il-​ħwejjeġ, il-​films, l-​ikel, xi ħaġa li nkun xtrajt, jew xi ħaġa oħra mhux importanti?’ Forsi mingħajr ma rridu, ħajjitna u l-​ħsibijiet tagħna saru jikkonċentraw fuq affarijiet li m’humiex daqshekk importanti. Billi naġġustaw il-​prijoritajiet tagħna aħna nistgħu ntejbu l-​konversazzjonijiet tagħna kif ukoll ħajjitna.—Filippin 1:10.

6. Il-​meditazzjoni x’parti għandha fil-​konversazzjonijiet tagħna?

⁶ Meditazzjoni bi skop hija mod ieħor kif intejbu l-​kwalità taʼ dak li ngħidu. Jekk aħna verament nagħmlu sforz biex naħsbu fuq affarijiet spiritwali, se nsibu li awtomatikament il-​konversazzjoni tagħna se tkun spiritwali. Is-​Sultan David ra din il-​konnessjoni. Hu kanta: “Ħa jkunu milqugħa quddiemek kliem fommi u ħsieb [“il-​meditazzjoni taʼ,” NW] qalbi, Mulej, blata tiegħi u feddej tiegħi.” (Salm 19:15 [19:​14, NW]) U s-​salmista Asaf qal: “Naħseb [“nimmedita,” NW] f’kull ma int għamilt; nixtarr l-​għemejjel kbar tiegħek.” (Salm 77:13 [77:​12, NW]) Qalb u moħħ konċernati bis-​serjetà dwar il-​veritajiet tal-​Kelma t’Alla se jfuru b’mod naturali b’diskors taʼ tifħir. Ġeremija ma setax iżomm lura milli jitkellem dwar l-​affarijiet li Jehovah kien għallmu. (Ġeremija 20:9) L-​istess nistgħu nagħmlu aħna jekk regolarment naħsbu fit-​tul dwar affarijiet spiritwali.—1 Timotju 4:​15.

7, 8. Liema suġġetti huma tajbin biex aħna jkollna konversazzjonijiet li jibnu?

⁷ Rutina spiritwali tajba se tipprovdilna ħafna suġġetti għal konversazzjonijiet li jibnu. (Filippin 3:​16) L-​assembleat, il-​konvenzjonijiet, il-​laqgħat tal-​kongregazzjoni, il-​pubblikazzjonijiet kurrenti, u l-​vers skritturali taʼ kuljum flimkien mal-​kumenti miktubin, kollha jfornuna b’ġawhar spiritwali li nistgħu naqsmu m’oħrajn. (Mattew 13:52) U kemm jistgħu jqanqluna spiritwalment l-​esperjenzi li jkollna fil-​ministeru Kristjan tagħna!

⁸ Is-​Sultan Salamun kien affaxxinat bil-​varjetà kbira taʼ siġar, annimali, għasafar, u ħut li ra f’Iżrael. (1 Slaten 5:13 [4:​33, NW]) Hu kien jitgħaxxaq jitkellem dwar il-​ħolqien meraviljuż t’Alla. L-​istess nistgħu nagħmlu aħna. Il-​qaddejja taʼ Jehovah jieħdu gost jitkellmu dwar diversi suġġetti, imma suġġetti spiritwali dejjem isebbħu l-​konversazzjonijiet taʼ nies inklinati spiritwalment.—1 Korintin 2:13.

‘F’Dan Kollu Komplu Aħsbu’

9. Pawlu liema twissija ta lill-​Filippin?

⁹ Ikun xi jkun is-​suġġett, il-​konversazzjonijiet tagħna se jibnu lil oħrajn jekk iżommu mat-​twissija li l-​appostlu Pawlu ta lill-​kongregazzjoni taʼ Filippi. Hu kiteb: “F’dan għandkom taħsbu: f’kull ma hu veru, f’kull ma hu xieraq [“serju,” NW], f’kull ma hu ġust, f’kull ma hu safi, f’kull ma jiġbed l-​imħabba, f’kull ma jistħoqqlu l-​ġieħ, f’kull ma hu virtù, f’kull ma ħaqqu t-​tifħir; f’dan kollu [“komplu,” NW] aħsbu.” (Filippin 4:8) L-​affarijiet li jsemmi Pawlu tant huma vitali li hu jgħid “f’dan kollu [“komplu,” “NW”] aħsbu.” Għandna nimlew moħħna u qalbna bihom. Għalhekk, ejja naraw kif il-​fatt li nagħtu attenzjoni lil kull wieħed mit-​tmien affarijiet li kkwota Pawlu jistaʼ jgħinna fil-​konversazzjonijiet tagħna.

10. Il-​konversazzjonijiet tagħna kif jistgħu jinvolvu affarijiet li huma veri?

¹⁰ Dak li hu veru jinvolvi iktar minn informazzjoni li hija korretta u mhux falza. Jirreferi għal xi ħaġa li hija onesta u taʼ min jafdaha, bħall-​verità tal-​Kelma t’Alla. B’hekk, meta nitkellmu m’oħrajn dwar il-​veritajiet tal-​Bibbja li impressjonawna, diskors jew taħditiet li inkuraġġewna, jew xi parir Skritturali li għenna, aħna nkunu qed nikkunsidraw affarijiet li huma veri. Mill-​banda l-​oħra, aħna ma naċċettawx “l-​għerf falz” li sempliċement jagħti l-​impressjoni li hu verità. (1 Timotju 6:​20) U aħna nevitaw li nirrepetu tqassis jew li nirrakkontaw esperjenzi dubjużi li ma jistgħux jiġu verifikati.

11. Liema affarijiet li huma serji jistgħu jiġu inklużi fil-​konversazzjonijiet tagħna?

¹¹ Affarijiet li huma serji huma suġġetti dinjitużi u importanti, u mhux bla siwi. Huma jinkludu tħassib dwar il-​ministeru Kristjan tagħna, iż-​żminijiet kritiċi li ngħixu fihom, u l-​bżonn li aħna nżommu kondotta tajba. Meta niddiskutu dawn l-​affarijiet serji, aħna nsaħħu d-​determinazzjoni tagħna li nibqgħu mqajmin spiritwalment, inżommu l-​integrità tagħna, u nkomplu nippridkaw l-​aħbar tajba. Tabilħaqq, esperjenzi interessanti fil-​ministeru tagħna kif ukoll ġrajjiet kurrenti li jfakkruna li qed ngħixu fl-​aħħar jiem jipprovdu varjetà taʼ materjal għal konversazzjonijiet inkuraġġanti.—Atti 14:27; 2 Timotju 3:​1-5.

12. Fi qbil mal-​parir taʼ Pawlu biex nikkunsidraw affarijiet li huma ġusti u safjin, x’għandna nevitaw?

¹² Il-​kelma ġust tfisser li nagħmlu s-​sewwa f’għajnejn Alla​—nilħqu l-​livelli tiegħu. Is-​safa tagħti l-​idea taʼ ndafa fil-​ħsieb u fil-​kondotta. Il-​malafama, iċ-​ċajt maħmuġ, jew il-​kliem doppju sens m’għandhom ebda lok fil-​konversazzjonijiet tagħna. (Efesin 5:3; Kolossin 3:8) Fil-​post tax-​xogħol jew fl-​iskola, il-​Kristjani bil-​għaqal kollu jitilqu meta l-​konversazzjonijiet jaqgħu fuq dawn is-​suġġetti.

13. Agħti eżempji taʼ konversazzjonijiet li jiċċentraw fuq affarijiet li jiġbdu l-​mħabba u jistħoqqilhom il-​ġieħ.

¹³ Meta Pawlu jissuġġerixxi li nikkunsidraw affarijiet li jiġbdu l-​imħabba, hu qed jirreferi għal affarijiet li huma pjaċevoli u ħelwin jew li jħeġġu l-​imħabba, u mhux dawk li jqanqlu l-​mibegħda, ir-​rabja, jew it-​tħaqqiq. Affarijiet li jistħoqqilhom il-​ġieħ jirreferu għal informazzjoni onesta jew rapport tajjeb. Rapporti tajbin bħal dawn jinkludu r-​rakkonti dwar il-​ħajja t’aħwa leali, li jidhru regolarment fir-​rivisti tat-​Torri taʼ l-​Għassa u Stenbaħ! Għala ma taqsamx m’oħrajn dak li taħseb int dwar dawn l-​artikli li tkun qrajt u li tant isaħħulna l-​fidi? U kemm hu taʼ inkuraġġiment meta tismaʼ dak li oħrajn wettqu spiritwalment! Dawn il-​konversazzjonijiet se jibnu l-​imħabba u l-​unità fil-​kongregazzjoni.

14. (a) X’jirrikjedi biex aħna nuru l-​virtù? (b) Id-​diskors tagħna kif jistaʼ jinkludi affarijiet li ħaqqhom tifħir?

¹⁴ Pawlu jitkellem dwar “kull ma hu virtù.” Il-​kelma virtù tirreferi għal tjubija jew eċċellenza morali. Irridu noqogħdu attenti li dak li ngħidu jkun gwidat minn prinċipji skritturali u ma jwarrabx mill-​ġustizzja, is-​safa, u l-​virtù. Ħaqqu tifħir ifisser “taʼ min jirrikkmandah.” Jekk tismaʼ taħdita inkuraġġanti jew tinnota eżempju taʼ lealtà fil-​kongregazzjoni, tkellem dwaru​—kemm maʼ l-​individwu involut kif ukoll m’oħrajn. L-​appostlu Pawlu spiss kien ifaħħar il-​kwalitajiet mill-​isbaħ taʼ sħabu fit-​twemmin. (Rumani 16:12; Filippin 2:​19-22; Filemon 4-7) U, m’għandniex xi ngħidu, dak li għamel il-​Ħallieq tagħna verament hu taʼ min ifaħħru. F’dan l-​aspett insibu abbundanza taʼ suġġetti għal konversazzjonijiet li jibnu.—Proverbji 6:​6-8; 20:12; 26:2.

Ħu Sehem f’Konversazzjonijiet li Jibnu

15. Liema kmand skritturali jobbliga lill-​ġenituri biex ikollhom konversazzjonijiet siewja maʼ wliedhom?

¹⁵ Dewteronomju 6:​6, 7 jgħid: “Żomm f’qalbek dan il-​kliem u dawn il-​kmandamenti li qiegħed nagħtik illum. Tennihom lil uliedek, u tkellem fuqhom meta tkun f’darek, u meta tkun miexi fit-​triq, u meta timtedd, u meta tqum.” Jidher ċar li dan il-​kmand jirrikjedi li l-​ġenituri jkollhom konversazzjonijiet spiritwali siewja maʼ wliedhom.

16, 17. Il-​ġenituri Kristjani x’jistgħu jitgħallmu mill-​eżempji taʼ Jehovah u Abraham?

¹⁶ Nistgħu nimmaġinaw il-​konversazzjonijiet twal li Ġesù kien ikollu maʼ Missieru tas-​sema meta kienu jiddiskutu l-​inkarigu tiegħu fuq l-​art. “Kien dak li bagħatni, jiġifieri l-​Missier, li ordnali xi ngħid u nitkellem,” Ġesù qal lid-​dixxipli. (Ġwanni 12:49; Dewteronomju 18:18) Il-​patrijarka Abraham żgur li qattaʼ ħafna sigħat jitkellem maʼ ibnu Iżakk dwar kif Jehovah kien bierek lilhom u lil missirijiethom. Konversazzjonijiet bħal dawn żgur li għenu kemm lil Ġesù u kemm lil Iżakk biex jissottomettu ruħhom għar-​rieda t’Alla.​—Ġenesi 22:​7-9; Mattew 26:39.

¹⁷ Uliedna wkoll jeħtieġu konversazzjonijiet li jibnu. Il-​ġenituri għandhom isibu l-​ħin fl-​iskeda mimlija tagħhom sabiex jitkellmu maʼ wliedhom. Jekk inhu possibbli, għala ma tirranġawx biex tieklu flimkien bħala familja għallinqas darba kuljum? Waqt dawn l-​ikliet u wara, se jkun hemm opportunitajiet għal diskussjonijiet li jibnu li tant jistgħu jkunu taʼ ġid għas-​saħħa spiritwali tal-​familja.

18. Semmi esperjenza li turi l-​benefiċċji taʼ komunikazzjoni tajba bejn il-​ġenituri u t-​tfal.

¹⁸ Alejandro, pijunier li għandu ftit iktar minn 20 sena, jiftakar id-​dubji li kellu taʼ 14-il sena. Hu jirrakkonta: “Minħabba l-​influwenza taʼ dawk fl-​iskola u l-​għalliema, ma kontx konvint dwar l-​eżistenza t’Alla u l-​awtentiċità tal-​Bibbja. Il-​ġenituri tiegħi qattgħu ħafna sigħat jirraġunaw miegħi bil-​paċenzja. Dawn il-​konversazzjonijiet mhux biss għenuni biex negħleb id-​dubji li kelli matul dak il-​perijodu diffiċli imma wkoll biex nieħu deċiżjonijiet tajbin f’ħajti.” U xi ngħidu għal-​lum? Alejandro jkompli: “Għadni ngħix id-​dar. Imma l-​iskedi mimlijin tagħna jagħmluha diffiċli biex jien u missieri nitkellmu fil-​privatezza. Għalhekk, it-​tnejn li aħna nieklu flimkien darba f’ġimgħa fil-​post fejn jaħdem. Jien verament ngħożż dawn il-​konversazzjonijiet.”

19. Għala lkoll kemm aħna neħtieġu konversazzjonijiet spiritwali?

¹⁹ Mhux anki aħna ngħożżu l-​opportunitajiet li ngawdu konversazzjonijiet spiritwali maʼ sħabna fit-​twemmin? Aħna jkollna opportunitajiet bħal dawn fil-​laqgħat, fil-​ministeru taʼ l-​għalqa, u f’laqgħat soċjali u meta nkunu qed nivvjaġġaw. Pawlu ħares ’il quddiem bil-​ħerqa biex jitkellem mal-​Kristjani f’Ruma. “Nixtieq ħafna narakom,” hu kitbilhom, “biex . . . inqawwu lil xulxin permezz tal-​fidi li għandna, jien lilkom u intom lili.” (Rumani 1:​11, 12) “Konversazzjonijiet spiritwali maʼ sħabna Kristjani jwettqu bżonn vitali,” josserva Johannes, li hu anzjan Kristjan. “Dawn iferrħu l-​qalb u jġagħlu l-​piżijiet taʼ kuljum jinħassu eħfef. Spiss nistaqsi lil uħud imdaħħlin fiż-​żmien biex jgħiduli dwar ħajjithom u dwar x’għenhom jibqgħu leali. Matul is-​snin, tkellimt maʼ ħafna, u tgħallimt u bbenefikajt minn kull wieħed minnhom, u b’hekk ħajti saret ħafna aħjar.”

20. X’nistgħu nagħmlu jekk nitkellmu maʼ xi ħadd li jistħi?

²⁰ X’tagħmel jekk xi ħadd ma jkomplix miegħek meta tqajjem suġġett spiritwali? Taqtax qalbek. Forsi iktar tard tkun tistaʼ ssib il-​ħin addattat. “Bħal tuffieħ tad-​deheb fuq platt tal-​fidda, hi l-​kelma li tingħad f’waqtha,” qal Salamun. (Proverbji 25:11) Uri li tifhem lil dawk li jkunu jistħu. “Il-​ħsieb f’moħħ il-​bniedem bħall-​ilma f’bir fond; min moħħu jilħaqlu jaf joħroġhulu.”a (Proverbji 20:5) Fuq kollox, qatt tħalli l-​attitudnijiet t’oħrajn iżommuk lura milli titkellem dwar l-​affarijiet li jmissulek qalbek.

Konversazzjonijiet Spiritwali Huma Premjanti

21, 22. Liema benefiċċji nieħdu jekk nipparteċipaw f’konversazzjonijiet spiritwali?

²¹ L-​appostlu Pawlu wissa: “Ebda kelma mhux xierqa m’għandha toħroġ minn fommkom, imma kliem sewwa li jedifika skond il-​ħtieġa, kliem li jagħmel il-​ġid lil min jisimgħu.” (Efesin 4:​29; Rumani 10:10) Jistaʼ jkun li hemm bżonn taʼ sforz biex indawru l-​konversazzjoni fuq suġġetti li jibnu, imma l-​barkiet huma ħafna. Konversazzjonijiet spiritwali jgħinuna nesprimu l-​fidi tagħna m’oħrajn u nsaħħu l-​fratellanza tagħna.

²² Għalhekk, ejja nużaw ir-​rigal tad-​diskors biex nibnu lil oħrajn u nfaħħru lil Alla. Konversazzjonijiet bħal dawn se jkunu sors taʼ sodisfazzjon għalina u taʼ inkuraġġiment għal oħrajn. Fuq kollox, se jferrħu qalb Jehovah għaliex hu jagħti kas il-​konversazzjonijiet tagħna u jifraħ meta nużaw il-​kliem tagħna b’mod xieraq. (Salm 139:4; Proverbji 27:11) Meta l-​konversazzjonijiet tagħna jkunu spiritwali, nistgħu nibqgħu żguri li Jehovah mhux se jinsiena. Il-​Bibbja tirreferi għal dawk li qed jaqdu lil Jehovah fi żmienna, billi tgħid: “Hekk qalu wieħed lil ieħor dawk li jibżgħu mill-​Mulej; u l-​Mulej ta widen u samaʼ; u nkiteb quddiemu ktieb it-​tifkiriet minħabba f’dawk li jibżgħu minnu u dawk li jafdaw f’Ismu.” (Malakija 3:16; 3:23 [4:​5, NW]) Kemm hu vitali li l-​konversazzjonijiet tagħna jibnu spiritwalment!

[Nota taʼ taħt]

Int Kif Twieġeb?

• Il-​konversazzjonijiet tagħna x’juru dwarna?

• Liema affarijiet li jibnu nistgħu nitkellmu dwarhom?

• Xi rwol importanti għandhom il-​konversazzjonijiet fil-​familja u fil-​kongregazzjoni Kristjana?

• X’benefiċċji jġibu konversazzjonijiet li jibnu?

[Stampi f’paġna 12]

Konversazzjonijiet li jibnu jiċċentraw fuq . . .

“kull ma hu veru”

‘kull ma hu serju’

“kull ma ħaqqu t-​tifħir”

“kull ma jistħoqqlu l-​ġieħ”

[Sorsi]

Video cover, Stalin: U.S. Army photo; Creator book cover, Eagle Nebula: J. Hester and P. Scowen (AZ State Univ.), NASA

[Stampa f’paġna 13]

Il-​ħin taʼ l-​ikel jipprovdi opportunitajiet eċċellenti biex nieħdu sehem f’konversazzjonijiet spiritwali