Id-​Deċiżjonijiet—Sfida li Ma Tistax Taħrabha

“XEJN ma hu iktar diffiċli, u allura iktar prezzjuż milli tkun kapaċi tiddeċiedi,” qal darba minnhom Napuljun Bonaparte, imperatur taʼ Franza fis-​seklu 19. Għandek mnejn taqbel maʼ dawn l-​istqarrijiet ladarba, ġeneralment, huwa importanti għan-​nies li jkollhom kontroll fuq ħajjithom stess. Fl-​istess ħin, huma tgħallmu li d-​deċiżjonijiet kultant xejn m’huma faċli.

Kemm jekk faċli u kemm jekk tqal, id-​deċiżjonijiet ma tistax taħrabhom. Aħna niffaċċjaw din il-​biċċa xogħol kuljum. Hekk kif inqumu fil-​għodu, irridu niddeċiedu x’se nilbsu, x’se nieklu għall-​kolazzjon, u kif se nagħmlu elf ħaġa oħra matul il-​ġurnata. Ħafna minn dawn id-​deċiżjonijiet m’humiex daqshekk importanti. Kważi qatt ma nerġgħu noqogħdu naħsbu fuqhom. Rari noqogħdu nħabblu rasna jekk kinux għaqlin jew le.

Mill-banda l-​oħra, xi deċiżjonijiet iħallu effett fit-​tul. Ħafna żgħażagħ fid-​dinja taʼ llum iridu jiddeċiedu liema miri għandhom isegwu. Għandu mnejn ikollhom jiddeċiedu x’edukazzjoni se jagħżlu u għal kemm żmien. Xi darba jew oħra ħafna minnhom se jiddeċiedu jekk humiex se jiżżewġu jew le. Dawk li jagħżlu li jiżżewġu jridu jiddeċiedu: ‘Jien kbir u matur biżżejjed biex niżżewweġ? X’tip taʼ sieħeb jew sieħba rrid, jew iktar importanti, għandi bżonn?’ Ftit huma d-​deċiżjonijiet fil-​ħajja li jinfluwenzawna iktar mill-​għażla tas-​sieħeb jew is-​sieħba.

Fi kwistjonijiet taʼ importanza kbira, huwa vitali li tieħu deċiżjonijiet għaqlin, ladarba l-​ferħ jiddependi ħafna milli nagħmlu hekk. Xi nies jistgħu jħossu li huma kapaċi jieħdu deċiżjonijiet bħal dawn u għandhom mnejn jirrifjutaw l-​għajnuna meta tiġi offruta. Huwa għaqli dan? Ejja naraw.

[Sors tal-​Istampa f’paġna 3]

Napuljun: Mill-​ktieb The Pictorial History of the World