Int Tistaʼ Temmen f’Art Magħmula Ġenna

MATUL l-​istorja tal-​bniedem, miljuni taʼ nies emmnu li eventwalment kienu se jħallu l-​art u jmorru fis-​sema. Xi wħud ħassew li l-​Ħallieq tagħna qatt ma ried li ngħixu għal dejjem fuq l-​art. L-​axxetiċi marru saħansitra iktar fl-​estrem. Għal ħafna minnhom, l-​art u l-​affarijiet materjali kollha huma ħżiena​—xi ħaġa li żżommhom milli jkollhom sodisfazzjon spiritwali veru u milli jkunu qrib t’Alla.

Dawk li żviluppaw dawn l-​ideat, jew ma kinux jafu dak li jgħid Alla dwar is-​suġġett t’art magħmula ġenna, jew għażlu li jinjorawh. Fil-​fatt, illum ħafna lanqas biss jinteressahom li jeżaminaw dak li Alla nebbaħ lill-​bnedmin biex jiktbu fuq dan is-​suġġett fil-​Kelma tiegħu, il-​Bibbja. (2 Timotju 3:​16, 17) Imma, kemm hu iktar għaqli li tafda l-​Kelma t’Alla minflok ma tadotta teoriji tal-​bnedmin! (Rumani 3:4) Fil-​fatt, huwa vitali li nagħmlu hekk, ladarba l-​Bibbja twissina li esseri mill-​agħar li hu qawwi imma inviżibbli għema lin-​nies spiritwalment u issa hu “l-​qarrieq tad-​dinja kollha.”​—Apokalissi 12:9; 2 Korintin 4:4.

Għala Tant Konfużjoni?

Ideat differenti dwar ir-​ruħ ġagħlu lin-​nies jitħawdu dwar x’verament hu l-​iskop t’Alla għall-​art. Ħafna jemmnu li aħna għandna ruħ immortali​—xi ħaġa li hi separata mill-​ġisem uman u li tibqaʼ tgħix wara l-​mewt. Oħrajn jemmnu li r-​ruħ kienet teżisti qabel ma ġie maħluq il-​ġisem uman. Skond xogħol wieħed taʼ referenza, il-​filosfu Grieg Platun ħaseb li r-​ruħ “hija maqfula fil-​ġisem bħala kastig għad-​dnubiet li għamlet meta kienet fis-​sema.” B’mod simili, it-​teologu Oriġene tat-​tielet seklu qal li “l-​erwieħ dinbu [fis-sema] qabel ma ngħaqqdu maʼ ġisem” u ġew “maqfulin [f’dan il-​ġisem fuq l-​art] bħala kastig għal dnubiethom.” U miljuni taʼ nies jemmnu li jinsabu fuq l-​art sempliċement bħala prova fil-​vjaġġ tagħhom lejn is-​sema.

Hemm ukoll diversi ideat dwar dak li jiġri mir-​ruħ meta xi ħadd imut. Skond il-​ktieb History of Western Philosophy, l-​Eġizzjani żviluppaw il-​ħarsa li “l-​erwieħ tal-​mejtin jinżlu fid-​dinja taʼ taħt l-​art.” Filosfi iktar tard argumentaw li l-​erwieħ tal-​mejtin ma niżlux fid-​dinja taʼ taħt l-​art mudlama imma attwalment telgħu f’qasam iktar għoli taʼ l-​ispirti. Hemm min jgħid li l-​filosfu Grieg Sokrate kien jemmen li meta xi ħadd imut ir-​ruħ “titlaq f’post inviżibbli . . . u tqattaʼ l-​kumplament taʼ l-​eżistenza tagħha maʼ l-​allat.”

Il-​Bibbja X’Tgħid?

Il-​Bibbja, il-​Kelma ispirata t’Alla, imkien ma tgħid li l-​bnedmin għandhom ruħ immortali. Aqra r-​rakkont f’Ġenesi 2:7. Hemmhekk jgħid: “Il-​Mulej Alla sawwar il-​bniedem mit-​trab taʼ l-​art u nefaħlu fi mnifsejh nifs il-​ħajja, u l-​bniedem sar [“ruħ,” Karm Żammit] ħajja.” Dan huwa ċar u ma jistax jiġi mifhum ħażin. Meta Alla ħalaq l-​ewwel bniedem, Adam, Hu ma poġġiex fih xi ħaġa li m’hijiex taʼ sustanza fiżika. Le, għax il-​Bibbja tgħid li “l-​bniedem sar [“ruħ,” KŻ] ħajja.” Il-​bniedem ma kellux ruħ ġo fih. Hu kien ruħ.

Meta ħalaq l-​art u l-​familja umana, Jehovah qatt ma ried li l-​bniedem imut. L-​iskop t’Alla kien li l-​bnedmin jgħixu fuq l-​art għal dejjem f’kundizzjonijiet taʼ ġenna taʼ l-​art. Adam miet għax m’obdiex il-​liġi t’Alla. (Ġenesi 2:​8, 15-​17; 3:​1-6; Isaija 45:18) Meta l-​ewwel bniedem miet, telaʼ f’xi qasam taʼ l-​ispirti? Le! Hu​—ir-​ruħ, Adam—reġaʼ lura lejn it-​trab bla ħajja li minnu kien ġie maħluq.​—Ġenesi 3:​17-​19.

Ilkoll kemm aħna writna d-​dnub u l-​mewt mingħand l-​antenat tagħna Adam. (Rumani 5:​12) Din il-​mewt hija waqfien t’eżistenza, eżatt bħalma kienet għal Adam. (Salm 146:​3, 4) Fil-​fatt, f’kull wieħed mis-​66 ktieb tagħha, il-​Bibbja qatt ma torbot it-​termini “immortali” jew “dejjiemi” mal-​kelma “ruħ.” Għall-​kuntrarju, l-​Iskrittura tgħid ċar u tond li r-​ruħ​—il-​persuna​—hija mortali. Ir-​ruħ tmut.​—Koħèlet 9:​5, 10; Eżekjel 18:​4, KŻ.

Huma l-​Affarijiet Materjali Ħżiena Minnhom Infushom?

Xi ngħidu dwar l-​idea li l-​affarijiet materjali, inkluż l-​art, huma ħżiena? Is-​segwaċi tal-​Manikejiżmu, moviment reliġjuż li beda fil-​Persja matul it-​tielet seklu E.K. minn individwu jismu Mani, hekk kienu jemmnu. The New Encyclopædia Britannica tgħid: ‘Il-​Manikejiżmu kien risposta għad-​diqa li kienet tidher fil-​kundizzjoni tal-​bniedem.’ Mani kien jemmen li n-​natura umana “kienet xi ħaġa mhux naturali, li ma tissaportihiex, u totalment ħażina.” Hu kien jemmen ukoll li l-​uniku mod biex tiskansa din id-​“diqa” kien billi r-​ruħ titlaq mill-​ġisem, tħalli l-​art, u tikseb eżistenza spiritwali fid-​dinja taʼ l-​ispirti.

B’kuntrast, il-​Bibbja tgħidilna li fil-​ħarsa t’Alla “kull ma kien għamel” meta ħalaq l-​art u l-​umanità kien “tajjeb ħafna.” (Ġenesi 1:​31) Dak iż-​żmien ma kien hemm ebda ostaklu bejn il-​bnedmin u Alla. Adam u Eva gawdew komunikazzjoni mill-​qrib maʼ Jehovah, saħansitra bħalma l-​bniedem perfett Ġesù Kristu gawda relazzjoni intima maʼ Missieru tas-​sema.​—Mattew 3:​17.

Kieku l-​ewwel ġenituri tagħna, Adam u Eva, ma qabdux it-​triq tad-​dnub, kieku huma kienu jgawdu għal dejjem relazzjoni mill-​qrib m’Alla Jehovah f’art magħmula ġenna. Huma bdew il-​ħajja tagħhom fil-​Ġenna taʼ l-​art, għax l-​Iskrittura tgħidilna: “Il-​Mulej Alla ħawwel ġnien fl-​Għeden, in-​naħa tal-​lvant, u qiegħed hemm il-​bniedem li kien sawwar.” (Ġenesi 2:8) Kien f’dak il-​ġnien bħal ġenna li Eva ġiet maħluqa. Kieku Adam u Eva ma dinbux, kieku huma u n-​nisel perfett tagħhom setgħu jaħdmu flimkien ferħanin sakemm l-​art kollha tkun saret Ġenna taʼ l-​art. (Ġenesi 2:​21; 3:​23, 24) Il-​Ġenna taʼ l-​art kienet tkun id-​dar taʼ l-​umanità għal dejjem.

Xi Wħud Għala Jmorru fis-​Sema?

‘Imma,’ għandek mnejn tgħid, ‘il-​Bibbja titkellem dwar nies li jmorru fis-​sema, mhux hekk?’ Iva. Wara li Adam dineb, l-​iskop taʼ Jehovah kien li jistabbilixxi Saltna fis-​smewwiet li fiha ftit mid-​dixxendenti taʼ Adam kellhom “isaltnu fuq l-​art” flimkien maʼ Ġesù Kristu. (Apokalissi 5:​10; Rumani 8:​17) Huma kellhom jiġu rxoxtati lejn ħajja immortali fis-​sema. In-​numru finali tagħhom hu 144,000, u l-​ewwel ftit fosthom kienu d-​dixxipli leali taʼ Ġesù taʼ l-​ewwel seklu.​—Luqa 12:32; 1 Korintin 15:​42-​44; Apokalissi 14:​1-5.

Madankollu, ma kienx l-​iskop oriġinali t’Alla li bnedmin ġusti jħallu l-​art u jmorru fis-​sema. Fil-​fatt, meta Ġesù kien fuq l-​art, hu stqarr: “Ħadd ma telaʼ s-​sema ħlief Bin il-​bniedem, li niżel mis-​sema.” (Ġwanni 3:13) Permezz taʼ “Bin il-​bniedem,” Ġesù Kristu, Alla pprovda fidwa li permezz tagħha l-​ħajja taʼ dejjem hija possibbli għal dawk li jeżerċitaw fidi fis-​sagrifiċċju taʼ Ġesù. (Rumani 5:8) Imma dawn il-​miljuni taʼ bnedmin fejn se jgħixu għal dejjem?

L-​Iskop Oriġinali t’Alla Se Jitwettaq

Għalkemm l-​iskop t’Alla hu li jieħu lil xi wħud mill-​familja umana biex jaqdu bħala ħakkiema bi sħab maʼ Ġesù Kristu fis-​Saltna tas-​smewwiet, dan ma jfissirx li n-​nies tajbin kollha se jmorru fis-​sema. Jehovah ħalaq l-​art biex tkun il-​Ġenna li kellha tkun id-​dar tal-​familja umana. Dalwaqt, Alla se jwettaq l-​iskop oriġinali tiegħu.​—Mattew 6:​9, 10.

Taħt il-​ħakma taʼ Ġesù Kristu u l-​ħakkiema bi sħab miegħu, il-​paċi u l-​ferħ se jinfirxu maʼ l-​art kollha. (Salm 37:​9-​11) Dawk li qegħdin fil-​memorja t’Alla se jiġu rxoxtati u se jgawdu saħħa perfetta. (Atti 24:15) Permezz tal-​lealtà tagħhom lejn Alla, il-​bnedmin ubbidjenti se jingħataw dak li tilfu l-​ewwel ġenituri tagħna​—ħajja taʼ dejjem f’perfezzjoni fuq art magħmula ġenna.​—Apokalissi 21:​3, 4.

Alla Jehovah qatt ma jonqos li jwettaq l-​iskopijiet tiegħu. Permezz tal-​profeta tiegħu Isaija, hu ddikjara: “Bħalma x-​xita u s-​silġ jinżlu mis-​smewwiet, u ma jerġgħux lura mnejn ġew bla ma jsaqqu l-​art, imma jġegħluha tnissel u tnibbet, u tagħti ż-​żerriegħa ’l min jiżraʼ u l-​ħobż ’il min jiekol, hekk jiġri minn kelmti: hija toħroġ minn fommi, u ma terġax lura vojta, imma tagħmel dak li jogħġob lili, u ttemm dak li nkun bgħattha tagħmel.”​—Isaija 55:​10, 11.

Fil-ktieb Bibliku taʼ Isaija, naraw stampa taʼ kif se tkun il-​ħajja fil-​Ġenna taʼ l-​art. Ħadd minn min jgħix fil-​Ġenna taʼ l-​art m’hu se jgħid, “jien marid.” (Isaija 33:24) L-​annimali mhux se jkunu taʼ periklu għall-​bnedmin. (Isaija 11:​6-9) In-​nies se jibnu djar mill-​isbaħ u jgħixu fihom u se jiżirgħu l-​uċuħ tar-​rabaʼ u jieklu sa ma jixbgħu. (Isaija 65:​21-​25) Iktar minn hekk, Alla se ‘jeqred il-​mewt għal dejjem, u Sidi l-​Mulej se jixxotta d-​dmugħ minn fuq kull wiċċ.’​—Isaija 25:8.

Dalwaqt, il-​bnedmin ubbidjenti se jgħixu f’dawn il-​kundizzjonijiet taʼ l-​għaġeb. Huma “għad ikunu meħlusa mill-​jasar tat-​taħsir u jiksbu l-​ħelsien tal-​glorja taʼ wlied Alla.” (Rumani 8:​21) Kemm se jkun taʼ l-​għaġeb li ngħixu għal dejjem fuq l-​art magħmula Ġenna mwiegħda! (Luqa 23:43) Int tistaʼ tkun hemm jekk taġixxi issa fuq l-​għarfien eżatt taʼ l-​Iskrittura u teżerċita fidi f’Alla Jehovah u Ġesù Kristu. U tistaʼ tkun fiduċjuż li huwa raġunevoli li temmen f’art magħmula ġenna.

[Stampa f’paġna 5]

Adam u Eva nħolqu bl-​iskop li jgħixu għal dejjem f’ġenna taʼ l-​art

[Stampi f’paġna 7]

Fl-​art magħmula Ġenna . . .

se jibnu djar

se jħawlu dwieli

se jiġu mberkin minn Jehovah

[Sors tal-​Istampa f’paġna 4]

U.S. Fish & Wildlife Service, Washington, D.C./NASA