Il-Kelma taʼ Jehovah Hi Ħajja
Punti Prinċipali mill-Ktieb tan-Numri
WARA l-Eżodu taʼ l-Iżraelin mill-Eġittu, huma ġew organizzati f’ġens. Ftit wara dan, setgħu jidħlu fl-Art Imwiegħda, imma dan ma seħħx. Minflok, huma kellhom jiġġerrew għal xi erbgħin sena f’“deżert kbir u jwaħħax.” (Dewteronomju 8:15) Għala? Ir-rakkont storiku fil-ktieb Bibliku tan-Numri jgħidilna x’ġara. Għandu jurina kemm hu importanti li nobdu lil Alla Jehovah u nirrispettaw lir-rappreżentanti tiegħu.
Il-ktieb tan-Numri nkiteb minn Mosè fix-xagħri u fil-Wita taʼ Mowab, u dan ikopri perijodu taʼ 38 sena u 9 xhur—mill-1512 Q.E.K. sa l-1473 Q.E.K. (Numri 1:1; Dewteronomju 1:3) Dan l-isem ittieħed miż-żewġ ċensimenti taʼ l-Iżraelin, li bejniethom kien hemm xi 38 sena. (Kapitli 1-4, 26) Dan ir-rakkont hu maqsum fi tliet sezzjonijiet. L-ewwel parti titkellem dwar ġrajjiet li seħħew ħdejn il-Muntanja Sinaj. It-tieni tkopri dak li seħħ waqt li l-Iżraelin kienu qed jiġġerrew fix-xagħri. U l-aħħar sezzjoni tikkunsidra l-ġrajjiet li seħħew fil-Wita taʼ Mowab. Hekk kif taqra dan ir-rakkont, għandek mnejn tkun trid tistaqsi lilek innifsek: ‘X’jgħallmuni dawn il-ġrajjiet? Hemm prinċipji f’dan il-ktieb li jistgħu jkunu taʼ ġid għalija llum?’
ĦDEJN IL-MUNTANJA SINAJ
L-ewwel wieħed miż-żewġ ċensimenti seħħ meta l-Iżraelin kienu għadhom fejn il-Muntanja Sinaj. Kien hemm 603,550 raġel li kellhom 20 sena jew iktar, minbarra l-Leviti. Iċ-ċensiment ovvjament sar għal skopijiet militari. Il-kamp kollu, inkluż in-nisa, it-tfal, u l-Leviti, setaʼ kien jgħodd iktar minn tliet miljun ruħ.
Wara ċ-ċensiment, l-Iżraelin irċivew istruzzjonijiet dwar l-arranġamenti taʼ kif kellhom jimxu, id-dmirijiet tal-Leviti u s-servizz tat-tabernaklu, l-ordnijiet tal-kwarantina, u l-liġijiet dwar każi fejn tidħol l-għira u l-wegħdi tan-Nażrin. Kapitlu 7 fih informazzjoni dwar l-offerti li kienu jsiru mill-kapijiet tat-tribujiet f’konnessjoni maʼ l-inawgurazzjoni taʼ l-artal, u kapitlu 9 jiddiskuti l-osservanza tal-Qbiż. Il-ġemgħa ngħatat ukoll istruzzjonijiet dwar kif tibni u żżarma l-kamp.
Mistoqsijiet Skritturali Mweġbin:
2:1, 2—X’kienet “l-arma,” jew l-istendard, li kull diviżjoni taʼ tliet tribujiet kellha twaqqaf il-kamp madwarha fix-xagħri? Il-Bibbja ma tagħtix deskrizzjoni taʼ x’kienu dawn l-armi. Madankollu, ma kinux iħarsu lejhom bħala xbihat sagri jew jagħtuhom tifsira reliġjuża. L-armi kienu jintużaw għal skopijiet prattiċi—biex jgħinu lill-individwu jsib il-post xieraq tiegħu fil-kamp.
5:27—Xi jfisser li ‘jaqgħu koxxtejn’ il-mara miżżewġa li tkun ħatja t’adulterju? It-terminu “koxxtejn” hawnhekk jintuża biex jirreferi għall-organi prokreattivi. (Ġenesi 46:26, Karm Żammit) Il-fatt li “jaqgħu” jissuġġerixxi t-taħsir taʼ dawn l-organi, sabiex il-konċepiment ikun impossibbli.
Lezzjonijiet Għalina:
6:1-7. In-Nażrin ma setgħux jieħdu mill-prodotti magħmulin mill-għeneb u mix-xorb kollu li jsakkar, u għalhekk kellhom bżonn iċaħħdu lilhom infushom. Huma kellhom iħallu xagħarhom jitwal—sinjal taʼ sottomissjoni lejn Jehovah, l-istess bħalma n-nisa kellhom ikunu sottomessi lejn żwieġhom u missirijiethom. In-Nażrin kellhom jibqgħu nodfa billi joqogħdu ’l bogħod minn kull ġisem mejjet, anki dak taʼ qarib maħbub. Il-qaddejja full-time llum juru spirtu taʼ sagrifiċċju persunali fejn hi involuta ċ-ċaħda u s-sottomissjoni lejn Jehovah u l-arranġament tiegħu. Xi inkarigi jistgħu jinvolvu li dawn imorru lejn xi pajjiż imbiegħed, u b’hekk jistaʼ jkun diffiċli jew impossibbli għal dawn l-individwi biex imorru lura d-dar għall-funeral taʼ xi membru maħbub tal-familja.
8:25, 26. Sabiex is-servizz taʼ Levita setaʼ jsir sew, u bħala konsiderazzjoni għall-età tagħhom, l-irġiel ixjeħ ġew ordnati jirtiraw mis-servizz obbligatorju. Madankollu, setgħu joffru ruħhom biex jgħinu Leviti oħra. Għalkemm il-proklamaturi tas-Saltna llum ma jirtirawx, il-prinċipju taʼ din il-liġi jgħallimna lezzjoni importanti. Jekk minħabba l-età avanzata, Kristjan ma jkunx jistaʼ jwettaq ċerti obbligi, hu jistaʼ jieħu sehem f’xi forma taʼ servizz li jiflaħ iwettaq bis-saħħa li għandu.
MINN POST GĦAL IEĦOR FIX-XAGĦRI
Malli titlaʼ s-sħaba fuq it-tabernaklu, l-Iżraelin jibdew mixja li għandha twassalhom fix-xagħri tad-deżert taʼ Mowab fi żmien 38 sena u xi xahar jew xahrejn. Tistaʼ tibbenefika jekk issegwi r-rotta tagħhom fuq il-mappa f’paġna 9 tal-browxer “See the Good Land” (“Ara l-Art Tajba”), pubblikat mix-Xhieda taʼ Jehovah.
Fi triqithom lejn Kades, fix-Xagħri taʼ Faran, l-Iżraelin jilmentaw mill-inqas fi tliet okkażjonijiet. L-ewwel każ jintemm meta Jehovah jibgħat in-nar biex jeqred lil xi wħud minnhom. Imbagħad, l-Iżraelin jibdew jokorbu għal-laħam, u Jehovah jibgħat is-summien. L-ilment taʼ Mirjam u Aron kontra Mosè jwassal biex, għal xi żmien, Mirjam tintlaqat bil-ġdiem.
Waqt li jinsabu kkampjati f’Kades, Mosè jibgħat 12-il raġel biex jagħmluha taʼ spiji fl-Art Imwiegħda. Huma jiġu lura wara 40 jum. Peress li jemmnu r-rapport ħażin t’għaxra mill-ispiji, in-nies ikunu jridu jħaġġru lil Mosè, Aron, u lill-ispiji leali Ġożwè u Kaleb. Jehovah ikun irid jidrobhom bil-pesta, imma Mosè jaqbeż għalihom, u Alla jiddikjara li huma se jkollhom jiġġerrew fid-deżert għal 40 sena—sakemm dawk imniżżla fiċ-ċensiment ikunu mietu.
Jehovah jagħmel iktar regoli. Koraħ u oħrajn jirribellaw kontra Mosè u Aron, imma r-ribelli jinqerdu bin-nar jew jinbelgħu mill-art. L-għada, il-ġemgħa kollha tilmenta kontra Mosè u Aron. Bħala riżultat, 14,700 ruħ imutu minħabba li Jehovah jidrobhom. Biex juri lil min għażel bħala l-qassis il-kbir, Alla jġiegħel li l-ħatar taʼ Aron joħroġ ir-rimi. Imbagħad, Jehovah jagħmel iktar liġijiet dwar l-obbligi tal-Leviti u l-indafa tal-poplu. L-użu taʼ l-irmied tal-baqar jissimbolizza bil-quddiem it-tindif permezz tas-sagrifiċċju taʼ Ġesù.—Lhud 9:13, 14.
Ulied Iżrael jirritornaw lejn Kades, fejn tmut Mirjam. Il-ġemgħa terġaʼ tilmenta kontra Mosè u Aron. Ir-raġuni? Nuqqas taʼ ilma. Minħabba li Mosè u Aron ma jqaddsux isem Jehovah meta b’miraklu jipprovdilhom l-ilma, huma jitilfu l-opportunità li jidħlu fl-Art Imwiegħda. Iżrael jitlaq minn Kades, u Aron imut fuq il-Muntanja Ħor. Waqt li qed iduru maʼ Edom, l-Iżraelin jgħejjew u jibdew jitkellmu kontra Alla u Mosè. Jehovah jibgħat sriep velenużi biex jikkastigahom. Mosè jerġaʼ jaqbeż għalihom, u Alla jgħidlu biex jagħmel serp tal-bronż u jqiegħdu m’arblu ħalli dawk li jingidmu jfiqu billi jħarsu lejh. Is-serp jiffigura bil-quddiem il-fatt li Ġesù Kristu kellu jissammar maʼ zokk għall-benefiċċju dejjiemi tagħna. (Ġwanni 3:14, 15) Iżrael jegħleb lis-Slaten Amurrin, Siħon u Og, u jieħu taħt idejh l-artijiet tagħhom.
Mistoqsijiet Skritturali Mwieġba:
12:1—Mirjam u Aron għala lmentaw kontra Mosè? Ir-raġuni proprja għall-ilment tagħhom milli jidher kienet ix-xewqa taʼ Mirjam biex ikollha iktar setgħa. Meta mart Mosè, Siffora, reġgħet ngħaqdet miegħu fix-xagħri, jistaʼ jkun li Mirjam beżgħet li ma kinitx se tibqaʼ tidher bħala l-iktar mara prominenti fil-kamp.—Eżodu 18:1-5.
12:9-11—Għala Mirjam biss intlaqtet bil-ġdiem? Wisq probabbli, kienet hi li qalgħet l-ilment u pperswadiet lil Aron biex jingħaqad magħha. Aron wera attitudni xierqa billi ammetta d-dnub tiegħu.
21:14, 15—Liema ktieb issemma hawnhekk? L-Iskrittura tirreferi għal diversi kotba li l-kittieba Bibliċi kienu jużaw bħala sors taʼ referenza. (Ġożwè 10:12, 13; 1 Slaten 11:41; 14:19, 29) “Ktieb il-Gwerer tal-Mulej” kien wieħed minn dawn il-kitbiet. Kien fih rakkont storiku tal-gwerer tal-poplu taʼ Jehovah.
Lezzjonijiet Għalina:
11:27-29. Mosè jipprovdi eżempju eċċellenti dwar kif għandna nirreaġixxu meta l-oħrajn jirċievu l-privileġġi fis-servizz taʼ Jehovah. Minflok ma qagħad jgħir u jfittex il-glorja għalih innifsu, Mosè kien kuntent li Eldad u Medad bdew jipprofetizzaw.
12:2, 9, 10; 16:1-3, 12-14, 31-35; 17:6, 11-15 (16:41, 46-50, NW). Jehovah jistenna li l-aduraturi tiegħu juru rispett lejn l-awtorità mogħtija minnu.
14:24. Mod fundamentali kif individwu jistaʼ jirreżisti l-pressjonijiet tad-dinja biex ma jagħmilx il-ħażen hu li jiżviluppa “spirtu ieħor,” jew attitudni mentali differenti. Irid ikollu spirtu differenti minn dak tad-dinja.
15:37-41. Il-ġmiemen, jew il-freneż, uniċi taʼ l-ilbies taʼ l-Iżraelin kienu jsiru bl-iskop li jfakkruhom li huma kienu poplu mwarrab għall-qima t’Alla u li kellu jobdi l-kmandamenti tiegħu. M’għandniex aħna wkoll ngħixu skond il-livelli t’Alla u nispikkaw bħala li aħna differenti mid-dinja?
FIL-WITA TAʼ MOWAB
Hekk kif ulied Iżrael jikkampjaw fil-wita taʼ Mowab, il-Mowabin jitwerwru minnhom. Għalhekk, is-Sultan Balak taʼ Mowab iqabbad lil Balgħam biex jisħet lill-Iżraelin. Imma Jehovah iġiegħel lil Balgħam iberikhom. Imbagħad, in-nisa Mowabin u Midjanin jintużaw biex iħajru lill-Iżraelin għall-immoralità u l-idolatrija. Minħabba f’hekk, Jehovah jeqred 24,000 midneb. Il-flaġell fl-aħħar jispiċċa meta Fineħas juri li hu ma jittollera ebda rivalità lejn Jehovah.
It-tieni ċensiment juri li ħadd minn dawk imniżżlin fl-ewwel wieħed m’għadu ħaj, ħlief Ġożwè u Kaleb. Ġożwè jiġi inkarigat biex jieħu post Mosè. L-Iżraelin jingħataw istruzzjonijiet dwar kif isiru diversi offerti u dwar kif jintgħamlu l-wegħdi. Ukoll, il-poplu taʼ Iżrael jieħu l-vendetta tiegħu fuq il-Midjanin. Ruben, Gad, u nofs it-tribù taʼ Manasse jistabbilixxu ruħhom fil-lvant tax-Xmara Ġordan. Iżrael jingħata istruzzjonijiet dwar kif għandu jaqsam il-Ġordan u jikkonkwista l-art. Jiġu spjegati l-limiti taʼ l-artijiet. Il-wirt kellu jitqassam bix-xorti. Il-Leviti jiġu inkarigati jieħdu ħsieb 48 belt, li 6 minnhom huma bliet tal-kenn.
Mistoqsijiet Skritturali Mwieġba:
22:20-22—Jehovah għala inkorla bil-kbir kontra Balgħam? Jehovah kien qal lill-profeta Balgħam li m’għandux jisħet lill-Iżraelin. (Numri 22:12) Madankollu, il-profeta mar maʼ l-irġiel taʼ Balak bl-intenzjoni li jisħet lil Iżrael. Balgħam ried jogħġob lis-sultan taʼ Mowab u jirċievi l-premju mingħandu. (2 Pietru 2: 15, 16; Ġuda 11) Anki meta Balgħam ġie sforzat ibierek minflok ma jisħet lil Iżrael, hu fittex il-favur tas-sultan billi ssuġġerixxa li jintużaw nisa li jqimu lil Bagħal sabiex jisseduċu lill-irġiel Iżraelin. (Numri 31:15,16) Għalhekk, ir-raġuni għala Alla inkorla għal Balgħam kienet minħabba r-regħba diżonesta tal-profeta.
30:7-9 (30:6-8, NW)—Jistaʼ raġel Kristjan iħassar il-wegħdi taʼ martu? Dwar il-wegħdi, Jehovah illum jittratta lill-aduraturi tiegħu b’mod individwali. Per eżempju, id-dedikazzjoni lil Jehovah hi wegħda persunali. (Galatin 6:5) Raġel miżżewweġ m’għandux l-awtorità li jwarrab jew iħassar wegħda bħal din. Madankollu, martu għandha tevita li tagħmel wegħdi li jmorru kontra l-Kelma t’Alla jew id-dmirijiet tagħha lejn żewġha.
Lezzjonijiet Għalina:
25:11. X’eżempju taʼ żelu għall-qima taʼ Jehovah ħallielna Fineħas! M’għandhiex ix-xewqa li nżommu l-kongregazzjoni nadifa tqanqalna nirrapportaw lill-anzjani Kristjani kwalunkwe immoralità skandaluża li nkunu nafu biha?
35:9-29. Il-fatt li min joqtol lil ħaddieħor bi żball kellu jitlaq minn pajjiżu u jaħrab f’belt tal-kenn għal xi żmien jgħallimna li l-ħajja hi qaddisa u rridu nirrispettawha.
35:33. L-art imniġġsa bid-demm imxerred taʼ l-innoċenti tistaʼ titħallas biss bid-demm taʼ dawk li jkunu xerrduh. Kemm hu xieraq li Jehovah se jeqred lill-ħżiena qabel ma l-art tiġi trasformata f’ġenna!—Proverbji 2:21, 22; Danjel 2:44.
Il-Kelma t’Alla Hi Qawwija
Irridu nuru rispett lejn Jehovah u lejn dawk li huma maħturin f’pożizzjonijiet taʼ responsabbiltà fost il-poplu tiegħu. Il-ktieb tan-Numri verament jenfasizza kemm hi minnha din il-verità. X’lezzjoni importanti sabiex tinżamm il-paċi u l-għaqda fil-kongregazzjoni llum!
L-affarijiet li seħħew u li huma mniżżlin fil-ktieb tan-Numri juru kemm hu faċli għal dawk li jittraskuraw l-ispiritwalità tagħhom li jaqgħu f’ħażen bħalma hu l-garr, l-immoralità, u l-idolatrija. Xi wħud mill-eżempji u l-lezzjonijiet minn dan il-ktieb Bibliku jistgħu jservu bħala bażi għall-bżonnijiet lokali fil-Laqgħa tas-Servizz tal-kongregazzjonijiet tax-Xhieda taʼ Jehovah. Tabilħaqq, “il-kelma taʼ Alla hi ħajja u qawwija” f’ħajjitna.—Lhud 4:12.
[Stampa f’paġna 25]
Permezz taʼ sħaba mirakoluża fuq it-tabernaklu, Jehovah mexxa lill-Iżraelin billi wriehom fejn kellhom jikkampjaw u meta kellhom jitilqu
[Stampi f’paġna 26]
Jehovah jixraqlu l-ubbidjenza tagħna u jistenna li nirrispettaw lir-rappreżentanti tiegħu