“Itolbu Hekk”

TAF x’tgħid it-​Talba tal-​Missierna? Hija t-​talba mudell li għallem Ġesù Kristu. Fil-​Priedka magħrufa tiegħu taʼ fuq il-​Muntanja, Ġesù qal: “Mela itolbu hekk.” (Mattew 6:9) Peress li qalha Ġesù, spiss tissejjaħ it-​Talba tal-​Mulej, u hi magħrufa wkoll bħala l-​Missierna.—Bil-​Latin, Paternoster.

Miljuni taʼ nies madwar id-​dinja tgħallmu l-​Missierna bl-​amment u jirripetuha spiss, jekk mhux kuljum. F’dawn l-​aħħar snin, ħafna rripetew din it-​talba fl-​iskejjel u f’okkażjonijiet pubbliċi. Il-​Missierna għala hija meqjusa daqshekk importanti?

Ċiprijan, teologu tat-​tielet seklu, kiteb: “Liema talba tistaʼ tkun iktar spiritwali minn dik li tana Kristu . . . ? Liema talb lill-​Missier jistaʼ jkun iktar ġenwin minn dak li ngħatalna mill-​Iben li hu l-​Verità?”—Ġwanni 14:6.

Fil-katekiżmu tagħha, il-​Knisja Kattolika Rumana tikkunsidra l-​Missierna bħala “t-​talba Kristjana fundamentali.” The World Book Encyclopedia tirrikonoxxi li din it-​talba hija importanti fir-​reliġjonijiet kollha tal-​Kristjaneżmu, u ssejħilha waħda mill-​“istqarrijiet bażiċi tal-​fidi Kristjana.”

Madankollu, irridu nirrikonoxxu li ħafna minn dawk li jirripetu l-​Missierna bl-​amment ma jifhmuhiex sew. Il-​gazzetta Kanadiża Ottawa Citizen tgħid li “jekk għandek xi tip taʼ trobbija Kristjana, hu probabbli li taf tgħid il-​Missierna bl-​amment mingħajr ma tieqaf biex tieħu n-​nifs, imma għandek mnejn issibha diffiċli biex tgħidha bil-​mod u tifhimha.”

Huwa tassew importanti li nifhmu t-​talb tagħna lil Alla? Ġesù għala tana t-​Talba tal-​Missierna? Xi tfisser għalik? Ejja nikkunsidraw dawn il-​mistoqsijiet.