Tibżax—Ġeħova Qiegħed Miegħek!

IKTAR minn 50 sena ilu, ftit wara li splodew l-​ewwel bombi nukleari, Harold C. Urey, xjenzat li rebaħ il-​Premju Nobel, qal dan dwar il-​futur: “Aħna se nieklu l-​biżaʼ, norqdu fil-​biżaʼ, ngħixu fil-​biżaʼ u mmutu fil-​biżaʼ.” Tabilħaqq, illum id-​dinja tagħna hi miżgħuda bil-​biżaʼ, u mhux taʼ b’xejn! Kuljum, gazzetti jannunzjaw rakkonti tal-​waħx dwar terroriżmu, kriminalità vjolenti, u mard misterjuż.

Bħala Kristjani, aħna nafu xi jfissru dawn il-​kundizzjonijiet. Jindikaw li qed ngħixu “fl-​aħħar jiem” taʼ din is-​sistema mill-​agħar, li l-​Bibbja bassret li kienu se jkunu identifikati minn “żminijiet kritiċi li diffiċli biex issib tarfhom.” (2 Timotju 3:1) Il-​fiduċja tagħna tiżdied minħabba l-​fatt li Alla Ġeħova dalwaqt se jġib dinja ġdida fejn tgħammar il-​ġustizzja. (2 Pietru 3:​13) Però, għandna aħna bħala Kristjani nħossuna beżgħanin?

Il-​Biżaʼ u l-​Qaddejja t’Alla

Ġakobb, David, u Elija kienu fost il-​qaddejja taʼ Ġeħova li esperjenzaw ċertu ammont taʼ biżaʼ meta ffaċċjaw sitwazzjonijiet perikolużi. (Ġenesi 32:​6, 7; 1 Samwel 21:​11, 12; 1 Slaten 19:​2, 3) Dawn l-​irġiel ma kinux neqsin mill-​fidi. Għall-​kuntrarju, huma straħu kompletament f’Ġeħova. Minkejja dan, Ġakobb, David, u Elija kienu umani; għalhekk kienu influwenzati mill-​biżaʼ. Id-​dixxiplu Ġakbu kiteb: “Elija kien raġel b’sentimenti bħal tagħna.”​—Ġakbu 5:​17.

Aħna wkoll forsi nħossuna mbeżżgħin hekk kif naħsbu dwar xi ostaklu li qed niffaċċjaw issa jew wieħed li forsi se niltaqgħu miegħu fil-​futur. Biżaʼ bħal dan huwa raġunevoli. Wara kollox, il-​Bibbja tgħid li Satana x-​Xitan huwa determinat li “jiggwerra kontra” dawk “li josservaw il-​kmandamenti t’Alla u li għandhom ix-​xogħol li jixhdu dwar Ġesù.” (Rivelazzjoni 12:17) Filwaqt li dan il-​kliem japplika speċifikament għall-​Kristjani midlukin, Pawlu kiteb: “Kulmin jixtieq jgħix bid-​devozzjoni lejn Alla fi sħubija maʼ Kristu Ġesù jkun persegwitat ukoll.” (2 Timotju 3:​12) Minkejja dan, il-​biżaʼ m’għandux jipparalizzana meta niffaċċjaw il-​problemi. Għala?

‘Alla li Jsalva’

Is-​salmista David kiteb: “Alla tagħna hu Alla li jsalvana.” (Salm 68:21 [68:​20, NW]) Darba wara l-​oħra Ġeħova wera l-​abbiltà tiegħu li jsalva lill-​poplu tiegħu, jew billi ħelishom minn sitwazzjonijiet perikolużi jew billi tahom is-​saħħa biex jissaportu. (Salm 34:18 [34:​17, NW]; Danjel 6:​22; 1 Korintin 10:13) Mill-​istudju tiegħek tal-​Bibbja, kemm tistaʼ tiftakar minn dawn l-​atti taʼ salvazzjoni?

Permezz tal-​Watch Tower Publications Index,a għala ma tagħmilx xi riċerka dwar xi wħud minn dawn il-​ġrajjiet li seħħew, bħad-​Dilluvju fi żmien Noè, il-​ħelsien taʼ Lot u l-​bniet tiegħu minn Sodoma u Gomorra, l-​Eżodu taʼ Iżrael mill-​Eġittu u l-​vjaġġ mill-​Baħar l-​Aħmar, jew il-​pjan li falla taʼ Ħaman biex jeqred lil-​Lhud? Jekk taqra u timmedita fuq dawn ir-​rakkonti eċċitanti, il-​fidi tiegħek se tissaħħaħ minħabba l-​fatt li Ġeħova hu Alla li jsalva. Imbagħad dan se jgħinek tiffaċċja l-​provi tal-​fidi tiegħek mingħajr biżaʼ.

Eżempji Moderni

Tistaʼ taħseb f’eżempji moderni taʼ wħud li wrew is-​sabar fil-​post fejn tgħix int? Forsi xi ħadd li ġie mitfugħ il-​ħabs minħabba li baqaʼ leali lejn Alla. Forsi taf b’xi Kristjan imdaħħal fiż-​żmien li qed jaqdi lil Ġeħova minkejja saħħa batuta. Jew aħseb f’żgħażagħ li qed jibqgħu separati mid-​dinja minkejja pressjoni kbira minn sħabhom taʼ l-​iskola. Imbagħad hemm ġenituri li mingħajr sieħeb jew sieħba qed irabbu t-​tfal, jew uħud mhux miżżewġin li qed jaqdu lil Ġeħova minkejja sentimenti taʼ solitudni. X’titgħallem minn dawn l-​uħud? Il-​fatt li taħseb dwar il-​lealtà tagħhom jistaʼ jgħinek tistabar u ma tibżax minkejja l-​provi li għandek mnejn tiffaċċja.

In-nuqqas taʼ biżaʼ huwa bżonnjuż mhux biss jekk niffaċċjaw l-​oppożizzjoni u l-​persekuzzjoni, imma wkoll jekk nibdew niddubitaw fl-​imħabba li Ġeħova għandu għalina. Hemm bżonn li nikkultivaw fiduċja li l-​fidwa taʼ Kristu tapplika għalina bħala individwi. (Galatin 2:​20) Imbagħad inkunu nistgħu nersqu lejn Ġeħova mingħajr ma nħossu biżaʼ jew twerwir mhux xieraq. Jekk inħossu li ma jixirqilniex l-​imħabba taʼ Ġeħova, nistgħu nirriflettu fuq il-​kliem taʼ Ġesù lis-​segwaċi tiegħu: “Ma jinbigħux żewġ għasafar tal-​bejt għal munita taʼ valur żgħir? Iżda lanqas wieħed minnhom ma jaqaʼ fl-​art mingħajr ma jkun jaf Missierkom. Għax saħansitra x-​xagħar taʼ raskom kollu hu magħdud. Għalhekk tibżgħux: intom tiswew iktar minn ħafna għasafar tal-​bejt.”—Mattew 10:​29-​31.

Ir-rivisti tat-​Torri taʼ l-​Għassa u Stenbaħ! spiss jippubblikaw esperjenzi taʼ Xhieda taʼ Ġeħova fi żmienna li ffaċċjaw sfidi bla biżaʼ. Dan ma jfissirx li ma kellhomx emozzjonijiet negattivi dwar is-​sitwazzjoni diffiċli tagħhom. Imma ma ħallewx lil dawn is-​sentimenti jġagħluhom jieqfu milli jaqdu lil Ġeħova. Ir-​rakkonti pubblikati tagħhom jistgħu jgħinuk tistabar bla biżaʼ wkoll. Ikkunsidra żewġ eżempji.

Inċident Biddillu Ħajtu

Il-​ħarġa taʼ Stenbaħ! tat-​8 taʼ Mejju, 2003, kien fiha l-​artiklu “Kif Inċident Biddilli Ħajti.” Fih, Stanley Ombeva, wieħed mix-​Xhieda taʼ Ġeħova fil-​Kenja, isemmi l-​isfidi li ffaċċja minħabba li laqtitu karozza li kienet għaddejja b’veloċità kbira. Hekk kif saħħtu marret għall-​agħar, hu tilef l-​impjieg tiegħu u l-​benefiċċji kollha. Ħuna Ombeva jammetti fir-​rakkont tiegħu: “Hekk kif bdejt nifhem sewwa r-​realtà tas-​sitwazzjoni tiegħi, sirt negattiv, moħħni fija nnifsi, u kollox beda jdejjaqni. Kultant kont inkun irrabjat u niħodha kontra kulħadd.” Minkejja s-​sitwazzjoni tiegħu, dan ir-​raġel Kristjan wera l-​kuraġġ. Ma ħalliex li d-​diżappunt jegħlbu u jġagħlu jaqtaʼ qalbu għalkollox. Minflok, hu straħ fuq Ġeħova. Ħuna Ombeva qal: “Hu dejjem għenni f’dak li kont għaddej minnu​—tant li xi drabi kont nitkaża bija nnifsi. Għamilt ukoll wegħda soda miegħi nnifsi li naqra u nimmedita fuq skritturi li kont naf li huma inkuraġġanti għas-​sitwazzjoni tiegħi.”

Il-kummenti sinċieri taʼ Ħuna Ombeva għenu lil ħafna oħrajn biex b’nuqqas taʼ biżaʼ jistabru fil-​provi. Oħt Kristjana kitbet: “Bkejt meta qrajt dan l-​artiklu. Ħassejt li permezz taʼ dan l-​artiklu Ġeħova kien qed juri mħabba u interess ġenwin fija u kien qed jagħtini l-​faraġ.” Xhud ieħor kiteb: “Artikli bħal dawn jagħtu faraġ kbir lil dawk l-​uħud minna li qed jesperjenzaw sitwazzjonijiet simili u li qed isofru mingħajr ma jgergru.”

Inkampaw maʼ Niket Emozzjonali

Esperjenza sabiħa oħra hija dik taʼ Herbert Jennings, rakkontata fl-​artiklu “Intom Ma Tafux X’Għad Isir Għada.”b Ħuna Jennings ikampa bil-​marda bipolar disorder (diżordni b’żewġ estremi fil-​burdata). Hekk kif irrifletta fuq l-​ewwel xhur tal-​marda tiegħu, hu jgħid: “Kienet verament taqtigħa kbira biex sempliċi nattendi l-​laqgħat Kristjani. Madankollu, kont assolutament konvint mill-​valur taʼ sħubija spiritwali. Biex ma nbatix iżżejjed, kont nidħol fis-​Sala tas-​Saltna wara li kulħadd ikun daħal u qagħad bil-​qiegħda, u kont nitlaq preċiż qabel jibda jqum kulħadd fi tmiem il-​programm.”

L-ippridkar kien diffiċli wkoll. Ħuna Jennings jirrakkonta: “Xi drabi, anki wara li nkun wasalt quddiem xi dar, ma kontx inkun nistaʼ nasal sal-​punt li nċempel il-​qanpiena. Imma ma kontx nitlaq għax kont nirrealizza li l-​ministeru tagħna jfisser salvazzjoni għalina u għal kulmin iwieġeb b’mod favorevoli. (1 Timotju 4:16) Wara xi ftit, kien jirnexxili nikkontrolla l-​emozzjonijiet tiegħi, navviċina l-​bieb li jkun imiss u nerġaʼ nipprova. Billi bqajt nieħu sehem fil-​ministeru, żammejt ruħi f’saħħti spiritwalment, u b’hekk kont iktar kapaċi nkampa.”

Ir-rakkont sinċier taʼ Ħuna Jennings għen lil ħafna qarrejja jiffaċċjaw in-​niket tagħhom bl-​istess nuqqas taʼ biżaʼ. Per eżempju, waħda oħt Kristjana kitbet: “Fit-​28 sena li ilni naqra r-​rivisti tat-​Torri taʼ l-​Għassa u Stenbaħ!, qatt ma ħassejtni daqshekk imqanqla bħalma ħassejtni meta qrajt dan l-​artiklu. Kelli nieqaf mis-​servizz full-time tiegħi u ħassejtni ħatja ħafna, ħassejt li kieku kelli iktar fidi kien jirnexxili nkompli. Meta qrajt kif Ħuna Jennings kellu jieqaf mill-​inkarigu tiegħu biex jieħu ħsieb il-​marda tiegħu stajt inħares lejn is-​sitwazzjoni tiegħi b’mod iktar bilanċjat. Din tassew kienet tweġiba għat-​talb tiegħi!”

B’mod simili, ħu Kristjan kiteb: “Wara li qdejt bħala anzjan fil-​kongregazzjoni għal għaxar snin, kelli nieqaf mill-​inkarigu tiegħi minħabba marda mentali. Tant kemm ħassejtni fallejt li spiss kien dipressanti għalija li naqra bijografiji, li spiss jirrakkontaw affarijiet straordinarji li wettqu l-​qaddejja taʼ Ġeħova. Imma l-​perseveranza taʼ Ħuna Jennings saħħitni ħafna. Qrajt l-​artiklu diversi drabi.”

Nimxu ’l Quddiem b’Fiduċja

Bħal Ħuna Ombeva u Ħuna Jennings, ħafna mix-​Xhieda taʼ Ġeħova jkomplu mingħajr biżaʼ jaqdu lil Alla Ġeħova minkejja ostakli diffiċli. Jekk int wieħed jew waħda minnhom, int taʼ min ifaħħrek. Kun ċert minn dan: “Alla mhux inġust biex jinsa għemilkom u l-​imħabba li wrejtu għal ismu, peress li qdejtu lill-​qaddisin u għadkom taqduhom.”​—Ebrej 6:​10.

Eżatt bħalma Ġeħova għen lill-​poplu leali tiegħu tal-​qedem biex jegħleb l-​għadu tiegħu, hu jistaʼ jgħinek tikseb rebħa fuq kwalunkwe ostaklu li tistaʼ tiffaċċja. Għalhekk, naqqax f’qalbek il-​kliem li Ġeħova qal permezz tal-​profeta Isaija: “La tibżax, għax miegħek jien! La titħassibx, għax Alla tiegħek jien! Jiena nwettqek, jien ngħinek; nwieżnek bil-​leminija rebbieħa tiegħi!”​—Isaija 41:10.

[Noti taʼ taħt]

[Stampi f’paġna 16]

Bħal Stanley Ombeva (fuq) u Herbert Jennings (lemin), ħafna qed jaqdu lil Ġeħova bla biżaʼ

[Stampa f’paġna 14]

Ritratt USAF