Mistoqsijiet mill-​Qarrejja

In-​New World Translation għala tgħid f’Dewteronomju 31:2 li Mosè ma kienx ‘se jitħalla iktar joħroġ u jidħol’ bħala l-​mexxej taʼ Iżrael, meta traduzzjonijiet oħrajn jgħidu li ma kienx għadu jiflaħ jagħmel dan?

Għalkemm din il-​kelma Ebrajka involuta tistaʼ tiġi tradotta biż-​żewġ modi, f’ċerti traduzzjonijiet bil-​Malti tal-​Bibbja din il-​kelma tissuġġerixxi li lejn l-​aħħar taʼ ħajtu, Mosè kien marid, li ma kienx għadu jiflaħ fiżikament biex iwettaq ir-​responsabbiltajiet tiegħu tat-​tmexxija. Per eżempju, Il-​Bibbja taʼ l-​Għaqda Biblika Maltija tikkwota li Mosè jgħid: “Illum jien għandi mija u għoxrin sena, u ma niflaħx nibqaʼ dieħel u ħiereġ.” B’mod simili, Il-​Bibbja taʼ Saydon tgħid: “Jien . . . ma nkunx niflaħ iżjed noħroġ u nidħol.”

Madankollu, Dewteronomju 34:7 juri li għalkemm Mosè kien imdaħħal fiż-​żmien, hu ma kienx marid. Dan il-​vers jgħid: “Mija u għoxrin sena kellu Mosè meta miet; kien għadu ma ċċajparx dawl għajnejh, u anqas saħħtu ma rħietu.” Għalhekk, Mosè kien jiflaħ fiżikament imexxi lill-​ġens, imma ma kinitx ir-​rieda taʼ Ġeħova għalih li jkompli jagħmel dan. Dan jidher ċar minn dak li kompla jgħid Mosè: “Il-​Mulej qalli: ‘Int ma taqsamx dan il-​Ġordan.’” Milli jidher Ġeħova kien qed jirripeti dak li ordna ħdejn l-​ilmijiet taʼ Meriba.​—Numri 20:​9-​12.

Mosè għex ħajja twila u straordinarja li tistaʼ tinqasam fi tliet perijodi. Hu għex għal 40 sena fl-​Eġittu, fejn “kien istruwit fl-​għerf kollu taʼ l-​Eġizzjani” u fejn kien “setgħan fi kliemu u f’għemilu.” (Atti 7:​20-22) Għal 40 sena oħra, hu għex f’Midjan. Hemmhekk, hu kkultiva l-​kwalitajiet spiritwali li kellu bżonn biex imexxi lill-​poplu taʼ Ġeħova. Finalment, għal 40 sena Mosè ggwida u mexxa lill-​Iżraelin. Però, issa Ġeħova kien iddeċieda li kellu jkun Ġożwè u mhux Mosè li jmexxi lill-​ġens mix-​Xmara Ġordan għal ġo l-​Art Imwiegħda.​—Dewteronomju 31:3.

Għalhekk, in-​New World Translation tagħti t-​tifsira korretta taʼ Dewteronomju 31:2. Mosè ma kienx se jibqaʼ jmexxi lil Iżrael, mhux minħabba li ma kienx jiflaħ fiżikament, imma għaliex Ġeħova ma ħalliehx ikompli jagħmel dan.