Nibnu Lkoll Magħqudin biex Infaħħru lil Alla

XI NIES f’waħda mill-​Gżejjer Solomon kienu qed jinnotaw Sala tas-​Saltna ġdida tax-​Xhieda taʼ Ġeħova. Waħda mara qalet: “Fil-​parroċċa tagħna għandna ħafna attivitajiet taʼ ġbir taʼ fondi. Aħna nitolbu lill-​membri tagħna jagħtu l-​flus iżda xorta ma jkollniex biżżejjed fondi biex nibnu knisja ġdida. Intom ix-​Xhieda minfejn tiġbru l-​fondi tagħkom?” Ix-​Xhud li kienet qed titkellem magħha wiġbitha: “Aħna naqdu lil Ġeħova bħala familja globali. Il-​kongregazzjoni tagħna u ħutna madwar id-​dinja taw id-​donazzjonijiet li kien hemm bżonn għas-​Sala tas-​Saltna l-​ġdida. Ġeħova għallimna nkunu magħqudin f’kollox.”

L-għaqda fost ix-​Xhieda taʼ Ġeħova tistaʼ taraha fl-​attivitajiet kollha tagħhom, inkluż il-​bini t’eluf taʼ Swali tas-​Saltna. Għaqda bħal din sabiex jitwettqu dawn il-​proġetti m’hijiex xi ħaġa ġdida. Din ilha teżisti fost il-​poplu t’Alla għal millennji sħaħ. Dan għala jistaʼ jingħad?

Il-​Bini tat-​Tabernaklu u tat-​Tempju

Ġeħova kien qed jirreferi għall-​ġens taʼ Iżrael meta iktar minn 3,500 sena ilu qal lil Mosè: “Jagħmluli santwarju.” (Eżodu 25:8) Dwar id-​disinn taʼ dan il-​proġett taʼ bini, Ġeħova kompla jgħid: “Tagħmluh [fil-plural, jirreferi għall-​ġens kollu] skond il-​mudell tat-​tinda u l-​għamara tagħha li se nurik [fis-singular, jirreferi għal Mosè].” (Eżodu 25:9) Imbagħad, Ġeħova pprovda pjanti dettaljati taʼ l-​istruttura tas-​santwarju, tat-​tagħmir, u taʼ l-​aċċessorji. (Eżodu 25:10–​27:19) Dan “it-​tabernaklu,” jew tinda, kellu jkun iċ-​ċentru taʼ qima vera għal Iżrael kollu.

Ma nafux kemm ħadmu nies fuq il-​proġett, iżda nafu li l-​Iżraelin kollha kienu mistidnin jappoġġawh. Mosè qalilhom: “Ħudu milli għandkom offerta lill-​Mulej. Kull min jitħajjar jagħti minn qalbu ħa jġib l-​offerti quddiem il-​Mulej.” (Eżodu 35:​4-9) L-​Iżraelin kif wieġbu? Eżodu 36:3 jgħid: “Ħadu mingħand Mosè l-​offerti kollha li l-​poplu taʼ Iżrael kien ġieb minn rajh għas-​servizz tas-​santwarju li kellu jsir. Imma l-​poplu baqaʼ jġiblu offerti għodwa wara l-​oħra.”

Malajr kien hemm kwantitajiet kbar t’affarijiet li ġew mogħtijin bħala donazzjoni, u n-​nies baqgħu jġibu iżjed. Fl-​aħħar, il-​ħaddiema tas-​sengħa li kienu qed jagħmlu x-​xogħol qalu lil Mosè: “In-​nies qegħdin iġibu iżjed milli jeħtieġ għax-​xogħol li ordnalna nagħmlu l-​Mulej.” Għalhekk, Mosè tahom il-​kmand: “Ebda raġel jew mara m’għandhom jagħmlu xejn iżjed biex joffru għas-​santwarju.” X’kien ir-​riżultat? “Kien hemm biżżejjed, anzi żżejjed, għax-​xogħol li kellu jsir.”​—Eżodu 36:​4-7.

Minħabba l-​ġenerożità taʼ l-​Iżraelin, it-​tabernaklu kien lest fi żmien sena. (Eżodu 19:1; 40:​1, 2) Billi appoġġa l-​qima vera, il-​poplu t’Alla wera rispett lejn Ġeħova. (Proverbji 3:9) Maż-​żmien, huma kellhom iwettqu proġett ħafna akbar taʼ bini. U għal darb’oħra, dawk kollha li xtaqu setgħu jieħdu sehem, sew jekk kienu tas-​sengħa fil-​qasam tal-​kostruzzjoni u sew jekk le.

Kważi ħames sekli wara li nbena t-​tabernaklu, Iżrael beda jibni t-​tempju f’Ġerusalemm. (1 Slaten 6:1) Dan kellu jkun struttura mill-​isbaħ u permanenti, magħmula mill-​ġebel u l-​injam. (1 Slaten 5:​31, 32 [5:​17, 18, NW]) Ġeħova ta l-​pjanti taʼ l-​arkitettura għat-​tempju taʼ David “b’ispirazzjoni” (NW). (1 Kronaki 28:​11-​19) Iżda hu għażel lil Salamun bin David biex imexxi x-​xogħol tal-​bini. (1 Kronaki 22:​6-​10) David appoġġa l-​proġett b’qalb sħiħa. Hu akkwista ġebel, travi, u materjali oħrajn u kkontribwixxa ammonti kbar mid-​deheb u l-​fidda tiegħu stess. Ukoll, hu inkuraġġixxa lill-​Iżraelin sħabu biex ikunu ġenerużi billi staqsiehom: “Min hu issa lest li jersaq b’idejh mimlija u jagħti minn qalbu offerta lill-​Mulej?” Kif wieġbu n-​nies?​—1 Kronaki 29:​1-5.

Sakemm Salamun beda jibni t-​tempju, hu kellu disponibbli eluf taʼ tunnellati taʼ deheb u fidda. Tant kien hemm ram u ħadid li bl-​ebda mod ma setgħu jiżnuh kollu. (1 Kronaki 22:​14-​16) Bl-​għajnuna taʼ Ġeħova u bl-​appoġġ taʼ Iżrael kollu, il-​proġett tlesta f’sebaʼ snin u nofs biss.​—1 Slaten 6:​1, 37, 38.

“Dar Alla” l-​Veru

Kemm it-​tabernaklu kif ukoll it-​tempju kienu msejħin “dar Alla” l-​veru. (Mħallfin 18:31; 1 Kronaki 24:7) Ġeħova qatt ma kellu bżonn il-​kenn taʼ dar. (Isaija 66:1) Hu għamel li jinbnew dawn l-​istrutturi għall-​benefiċċju tal-​bnedmin. Tabilħaqq, fl-​inawgurazzjoni tat-​tempju, Salamun staqsa: “Tassew li Alla se jgħix fuq l-​art? Ara! Lanqas biss is-​smewwiet – u s-​smewwiet tas-​smewwiet – ma jesgħuk, aħseb u ara dan id-​daqsxejn taʼ tempju li bnejt jien!”​—1 Slaten 8:​27.

Permezz tal-​profeta tiegħu Isaija, Ġeħova qal: “Dari ‘dar it-​talb’ tissejjaħ għall-​popli kollha.” (Isaija 56:7) Is-​sagrifiċċji u t-​talb offruti fit-​tempju, kif ukoll iċ-​ċerimonji li kienu jinżammu fih, ippermettew li n-​nies li kellhom devozzjoni lejn Alla​—Lhud u m’humiex​—jersqu qrib lejn l-​Alla l-​veru. Huma kisbu l-​ħbiberija u l-​protezzjoni taʼ Ġeħova billi taw qima f’daru. It-​talba li offra Salamun fid-​dedikazzjoni tat-​tempju tenfasizza din il-​verità. Int tistaʼ taqra l-​espressjonijiet tiegħu lil Alla li jmissu l-​qalb fl-​1 Slaten 8:​22-​53 u t-​2 Kronaki 6:​12-​42.

Din id-​dar tal-​qedem taʼ l-​Alla l-​veru nqerdet żmien twil ilu, iżda l-​Kelma t’Alla ssemmi żmien meta n-​nies tal-​ġnus kollha kellhom ikunu miġburin biex iqimu lil Ġeħova f’tempju spiritwali bil-​wisq akbar. (Isaija 2:2) Is-​sagrifiċċju perfett taʼ l-​Iben uniġenitu t’Alla, rappreżentat bil-​quddiem bis-​sagrifiċċji taʼ l-​annimali offruti fit-​tempju, kellu jkun il-​mod li bih dak li jkun jersaq lejn Ġeħova. (Ġwanni 14:6; Ebrej 7:​27; 9:​12) Ix-​Xhieda taʼ Ġeħova issa qed iqimu ’l Alla b’dan il-​mod superjuri, u qed jgħinu lil ħafna oħrajn biex jagħmlu l-​istess.

Proġetti taʼ Bini fi Żmienna

Madwar id-​dinja kollha, ix-​Xhieda taʼ Ġeħova jaqdu lill-​Alla l-​veru. Huma “ġens qawwi,” li l-​popolazzjoni tiegħu tkompli tikber. (Isaija 60:22) Il-​post ewlieni fejn jiltaqgħu x-​Xhieda taʼ Ġeħova huwa s-​Sala tas-​Saltna.a Qegħdin jintużaw eluf taʼ swali bħal dawn, u hemm il-​bżonn t’eluf oħra.

Ix-Xhieda taʼ Ġeħova joffru ruħhom ‘minn rajhom’ biex jibnu s-​Swali tas-​Saltna li jkun hemm bżonn. (Salm 110:​3, Saydon) Madankollu, ix-​Xhieda tal-​lokal spiss ma jkollhomx is-​sengħa meħtieġa tal-​bini, u xi reġjuni li qed jesperjenzaw ħafna tkabbir qed ibatu minn faqar kbir. Fl-​1999, il-​Ġemgħa li Tiggverna tax-​Xhieda taʼ Ġeħova stabbiliet programm taʼ bini tas-​Swali tas-​Saltna biex jgħin ħalli jingħelbu dawn l-​ostakli. Permezz taʼ dan il-​programm, ix-​Xhieda li huma tas-​sengħa fil-​qasam tal-​kostruzzjoni vvjaġġaw lejn artijiet imbegħdin ħalli jħarrġu lil ħuthom irġiel u nisa biex jibnu Swali tas-​Saltna. Dawn il-​ħaddiema mħarrġin imbagħad komplew bix-​xogħol tal-​bini f’dak ir-​reġjun. X’kienu r-​riżultati taʼ dan l-​isforz speċjali?

Sa Frar taʼ l-​2006, ix-​Xhieda taʼ Ġeħova f’pajjiżi b’riżorsi limitati kienu raw il-​bini taʼ iktar minn 13,000 Sala tas-​Saltna ġdida. Ara x’qalu wħud minn dawk li qed jużaw is-​Swali tas-​Saltna l-​ġodda.

“L-​attendenza medja tal-​kongregazzjoni hija taʼ 160. Fl-​ewwel laqgħa wara li nbniet is-​Sala tas-​Saltna l-​ġdida, l-​attendenza telgħet għal 200. Issa, sitt xhur wara għandhom attendenza taʼ 230. Il-​barka taʼ Ġeħova fuq ix-​xogħol taʼ dan il-​bini sempliċi imma utli hija evidenti.”​—Indokratur tas-​“circuit” fl-​Ekwador.

“Għal ħafna snin in-​nies staqsewna, ‘Meta se jkollkom Sala tas-​Saltna bħal dawk li naraw fil-​pubblikazzjonijiet tagħkom?’ Grazzi għal Ġeħova, fl-​aħħar għandna post preżentabbli fejn tingħata qima. Konna nagħmlu l-​laqgħat f’ħanut taʼ wieħed ħu, b’attendenza medja taʼ 30. Fl-​ewwel laqgħa fis-​Sala tas-​Saltna l-​ġdida, attendew 110 persuni.”​—Kongregazzjoni fl-​Uganda.

“Żewġ aħwa nisa li jaqdu bħala pijunieri regulari jgħidu li kemm ilha li nbiet is-​Sala tas-​Saltna, saru jieħdu iktar pjaċir jaħdmu t-​territorju. In-​nies huma iktar lesti li jisimgħu fil-​ministeru minn bieb għal bieb kif ukoll meta jingħataw xiehda informali. Dawn l-​aħwa nisa issa jikkonduċu 17-il studju tal-​Bibbja, u ħafna minn dawn l-​istudenti tal-​Bibbja jattendu l-​laqgħat.”​—L-​uffiċċju tal-​fergħa tal-​Gżejjer Solomon.

“Saċerdot li jgħix fil-​viċinanzi jgħid li s-​Sala tas-​Saltna l-​ġdida żżid id-​dinjità taʼ l-​akkwati kollha u li n-​nies tal-​lokal huma kburin biha. Ħafna wħud li jgħaddu minn quddiemha jikkummentaw dwar is-​sbuħija tas-​sala. Dan jagħti lill-​aħwa opportunitajiet mill-​aqwa biex jagħtu xiehda. Iktar u iktar nies iridu jkunu jafu dwar il-​fratellanza globali tagħna. Bosta wħud li m’attendewx il-​laqgħat għal diversi snin ġew imqanqlin biex jerġgħu jibdew jissieħbu regolarment.”​—L-​uffiċċju tal-​fergħa taʼ Myanmar.

“Waħda oħt stiednet raġel li wera interess biex jiġi jara l-​post tal-​kostruzzjoni fl-​inħawi tiegħu. Iktar tard, ir-​raġel qal: ‘Ħsibt li l-​ħaddiema ma kinux se jħalluni nidħol. B’sorpriża, ix-​Xhieda laqgħuni b’qalb tajba. L-​irġiel u n-​nisa kienu qed jaħdmu iebes, mhux jaħlu l-​ħin. Kien hemm armonija u spirtu ferrieħi.’ Ir-​raġel aċċetta studju tal-​Bibbja u beda jattendi l-​laqgħat. Iktar tard, hu qal: ‘Il-​mod taʼ ħsieb tiegħi nbidel. M’iniex se nħalli lil Alla issa li sibtu.’”​—L-​uffiċċju tal-​fergħa tal-​Kolombja.

L-​Appoġġ Tagħna Hu Importanti

Il-​bini tas-​Swali tas-​Saltna huwa parti importanti mis-​servizz sagru tagħna. Il-​mod li bih ix-​Xhieda taʼ Ġeħova madwar id-​dinja appoġġaw dan ix-​xogħol​—finanzjarjament u b’modi oħrajn​—huwa tassew taʼ min ifaħħru. Iżda għandna niftakru li aspetti oħrajn tas-​servizz sagru huma vitali wkoll. Minn żmien għal żmien, il-​Kristjani jispiċċaw vittmi taʼ diżastri naturali u jkollhom bżonn l-​għajnuna tagħna. Il-​produzzjoni taʼ letteratura Biblika tilgħab parti importanti fl-​appoġġ tas-​servizz sagru. Ħafna minna rajna kemm tistaʼ tkun qawwija rivista jew ktieb ibbażat fuq il-​Bibbja f’idejn persuna li jkollha attitudni xierqa. Iktar minn hekk, l-​appoġġ lill-​missjunarji u lil oħrajn fis-​servizz speċjali full-time huwa importanti ferm. Kristjani li għandhom spirtu taʼ sagrifiċċju bħal dan jilagħbu parti importanti fit-​tkabbir tax-​xogħol taʼ l-​ippridkar f’dawn l-​aħħar jiem.

Dawk li għenu fil-​bini tat-​tempju ferħu bil-​kbir. (1 Kronaki 29:9) Illum, l-​appoġġ li nagħtu lill-​qima vera permezz tal-​kontribuzzjonijiet tagħna bl-​istess mod iġibilna l-​hena. (Atti 20:35) Aħna nesperjenzaw dan l-​hena meta nitfgħu l-​kontribuzzjonijiet tagħna fil-​kaxxa li qiegħda apposta għall-​fond tas-​Swali tas-​Saltna u meta nikkontribwixxu għax-​xogħol taʼ madwar id-​dinja, u b’hekk nappoġġaw proġetti oħrajn marbutin maʼ l-​ippridkar taʼ l-​aħbar tajba tas-​Saltna. Illum, ix-​Xhieda taʼ Ġeħova huma magħqudin fil-​qima vera b’mod meraviljuż. Jalla lkoll kemm aħna jkollna abbundanza taʼ ferħ li jiġi meta wieħed jappoġġa din il-​qima!

[Nota taʼ taħt]

[Kaxxa/Stampa f’paġna 20, 21]

MODI KIF XI WĦUD JAGĦŻLU LI JAGĦTU

KONTRIBUZZJONIJIET GĦAX-​XOGĦOL MADWAR ID-​DINJA

Ħafna jwarrbu, jew ifaddlu, ammont li jitfgħuh fil-​kaxxi għall-​kontribuzzjonijiet immarkati “Kontribuzzjonijiet għax-​Xogħol madwar id-​Dinja​—Mattew 24:14.”

Kull xahar, il-​kongregazzjonijiet jibagħtu dawn l-​ammonti lill-​uffiċċju tax-​Xhieda taʼ Ġeħova li jieħu ħsieb ix-​xogħol f’pajjiżhom. Donazzjonijiet volontarji taʼ flus jistgħu jintbagħtu direttament lill-​Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-​2483, jew lill-​uffiċċju tal-​fergħa tax-​Xhieda taʼ Ġeħova li jaqdi f’pajjiżek. Iċ-​ċekkijiet li jintbagħtu fl-​indirizz t’hawn fuq għandhom ikunu pagabbli lill-​“Watch Tower.” Ġojjelli jew affarijiet prezzjużi oħrajn jistgħu jingħataw bħala donazzjoni wkoll. Maʼ dawn il-​kontribuzzjonijiet għandha tintbagħat ittra qasira li tistqarr li din hija għotja għalkollox.

ARRANĠAMENT TAʼ DONAZZJONI KUNDIZZJONALI

Il-​flus jistgħu jitpoġġew b’fedekommess mal-​Watch Tower biex jintużaw madwar id-​dinja. Madankollu, jekk jiġu mitlubin, il-​flus jerġgħu jingħataw lura. Għal iktar informazzjoni, jekk jogħġbok ikkuntattja lill-​Uffiċċju tat-​Teżorier fl-​indirizz li ngħata diġà.

IPPJANAR ĠENERUŻ

Minbarra l-​flus li jingħataw għalkollox bħala rigal, hemm metodi oħrajn kif wieħed jagħmel għotjiet li jkunu taʼ benefiċċju għas-​servizz tas-​Saltna mad-​dinja kollha. Dawn jinkludu:

Assigurazzjoni: Il-​Watch Tower tistaʼ tiġi intitolata bħala l-​benefiċjarja taʼ polza t’assigurazzjoni fuq il-​ħajja jew pjan taʼ rtirar mix-​xogħol u pensjoni.

Kontijiet fil-​Bank: Kontijiet fil-​bank, ċertifikati taʼ depożitu, jew kontijiet individwali taʼ rtirar mix-​xogħol jistgħu jingħataw b’fedekommess jew jintgħamlu pagabbli mal-​mewt lill-​Watch Tower, fi qbil mal-​ħtiġijiet lokali tal-​bank.

Ishma u Titoli: Jistgħu jingħataw ishma u titoli b’donazzjoni lill-​Watch Tower bħala għotja għalkollox.

Proprjetà Immobbli: Proprjetà immobbli li tistaʼ tinbiegħ tistaʼ tingħata jew bħala għotja għalkollox jew, fil-​każ taʼ proprjetà residenzjali, billi d-​donatur iżomm il-​proprjetà u jkompli jgħix fiha sakemm idum ħaj. Ikkuntattja lill-​uffiċċju tal-​fergħa f’pajjiżek qabel ma tagħmel kuntratt biex tagħti xi proprjetà immobbli.

Ippjanar Ġeneruż: għal Benefiċċju tax-​Xogħol tas-​Saltna Madwar id-​Dinja

Testmenti u Fedekommessi: Jistgħu jitħallew xi flus jew proprjetà lill-​Watch Tower permezz taʼ testment effettwat bil-​liġi, jew il-​Watch Tower tistaʼ tissejjaħ bħala l-​benefiċjarja taʼ ftehim fedekommess. Fedekommess li jkun taʼ benefiċċju għal organizzazzjoni reliġjuża jistaʼ jipprovdi ċerti vantaġġi mit-​taxxi.

Bħalma jimplika t-​terminu “ppjanar ġeneruż,” dawn it-​tipi taʼ donazzjonijiet jirrikjedu ġeneralment xi ppjanar min-​naħa tad-​donatur. Tħejja browxer bl-​Ingliż u bl-​Ispanjol intitolat Charitable Planning to Benefit Kingdom Service Worldwide biex jgħin lill-​individwi li jkunu jixtiequ jagħmlu xi forma taʼ ppjanar ġeneruż għall-​benefiċċju tax-​xogħol taʼ madwar id-​dinja tax-​Xhieda taʼ Ġeħova. Il-​browxer inkiteb sabiex jipprovdi informazzjoni rigward il-​modi differenti kif jistgħu jintgħamlu l-​għotjiet issa jew b’testment mal-​mewt. Wara li qraw il-​browxer u ħadu parir mingħand il-​konsulenti legali jew tat-​taxxi tagħhom, ħafna setgħu jgħinu biex jappoġġaw l-​attivitajiet reliġjużi u umanitarji tax-​Xhieda taʼ Ġeħova mad-​dinja kollha u fl-​istess ħin jieħdu l-​massimu mill-​benefiċċji marbutin mat-​taxxi talli għamlu dan. Dan il-​browxer jistaʼ jinkiseb billi wieħed jistaqsi għal kopja direttament miċ-​Charitable Planning Office.

Għal iktar informazzjoni, tistaʼ tikkuntattja liċ-​Charitable Planning Office, b’ittra jew bit-​telefon, fl-​indirizz t’hawn taħt, jew tistaʼ tikkuntattja l-​uffiċċju tax-​Xhieda taʼ Ġeħova li jieħu ħsieb ix-​xogħol f’pajjiżek.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-​9204

Telefon: (845) 306-​0707

[Stampa f’paġna 18]

L-​isforzi magħqudin tagħna jagħmluha possibbli li jinbnew Swali tas-​Saltna mill-​isbaħ madwar id-​dinja

[Stampa f’paġna 18]

Sala tas-​Saltna ġdida fil-​Gana