Ħalli l-​Kongregazzjoni Tfaħħar lil Ġeħova

“Inxandar ismek lil ħuti; infaħħrek bl-​għanjiet f’nofs il-​kongregazzjoni.”​—EBREJ 2:​12.

1, 2. Il-​kongregazzjoni għala hi daqshekk taʼ benefiċċju, u x’inhu l-​irwol prinċipali tagħha?

MATUL l-​istorja, in-​nies sabu kumpanija u sigurtà fiċ-​ċirku bażiku tal-​familja. Madankollu, il-​Bibbja tidentifika ċirku ieħor li fih numru bla għadd taʼ individwi madwar il-​globu llum li qed igawdu kumpanija u sigurtà li ma bħalhom. Dan iċ-​ċirku huwa l-​kongregazzjoni Kristjana. Sew jekk int parti minn familja li tappoġġak u sew jekk le, int tistaʼ u għandek tapprezza dak li Alla pprovda permezz taʼ l-​arranġament tal-​kongregazzjoni. M’għandniex xi ngħidu, jekk int diġà qed tissieħeb maʼ kongregazzjoni tax-​Xhieda taʼ Ġeħova, x’aktarx li int tistaʼ tagħti prova taʼ din is-​sħubija kollha mħabba li tgawdi hemmhekk u s-​sens taʼ sigurtà li għandek.

² Il-​kongregazzjoni m’hijiex sempliċi grupp soċjali. M’hijiex xi assoċjazzjoni tal-​komunità jew xi klabb fejn jiltaqgħu individwi li għandhom l-​istess sfond jew interessi f’xi sport jew passatemp. Minflok, l-​arranġament tal-​kongregazzjoni huwa primarjament għat-​tifħir t’Alla Ġeħova. Dan ilu hekk għal żmien twil, bħalma jenfasizza l-​ktieb tas-​Salmi. F’Salm 35:18 naqraw: “Niżżik ħajr qalb ġemgħa [“kongregazzjoni,” NW] kbira, qalb kotra taʼ nies infaħħrek.” B’mod simili, Salm 107:​31, 32 jinkuraġġina: “Ħa jroddu ħajr lill-​Mulej għal tjubitu, għall-​għeġubijiet tiegħu mal-​bnedmin. Ikabbruh fil-​ġemgħa [“kongregazzjoni,” NW] tal-​poplu, u jfaħħruh fil-​laqgħa tal-​kbarat.”

3. Skond Pawlu, il-​kongregazzjoni x’tagħmel?

³ L-​appostlu Kristjan Pawlu enfasizza rwol essenzjali ieħor li għandha l-​kongregazzjoni meta hu rrefera għad-​“dar t’Alla, il-​kongregazzjoni taʼ l-​Alla l-​ħaj, li hi pilastru u appoġġ tal-​verità.” (1 Timotju 3:​15) Dwar liema kongregazzjoni kien qed jitkellem Pawlu? Il-​Bibbja b’liema modi tuża l-​kelma “kongregazzjoni” jew “ġemgħa”? U liema impatt għandha tħalli l-​kongregazzjoni fuq il-​ħajja u l-​prospetti tagħna? Biex insiru nafu t-​tweġiba, ejja l-​ewwel neżaminaw id-​diversi modi kif tintuża l-​kelma “kongregazzjoni” jew “ġemgħa” fil-​Kelma t’Alla.

4. F’liema sens tintuża spiss il-​kelma “kongregazzjoni” fl-​Iskrittura Ebrajka?

⁴ Il-​kelma Ebrajka spiss tradotta “kongregazzjoni” ġejja mill-​għerq li jfisser “tiġbor” jew “tiġmaʼ” flimkien. (Dewteronomju 4:​10; 9:​10) Is-​salmista uża l-​kelma “ġemgħa” rigward l-​anġli fis-​sema, u tistaʼ tintuża biex tiddeskrivi grupp taʼ rġiel mill-​agħar. (Salm 26:5; 89:​6-8 [89:​5-7, NW]) Madankollu, ħafna drabi l-​Iskrittura Ebrajka tapplikaha għall-​Iżraelin. Alla indika li Ġakobb kellu ‘jsir ġemgħa [“kongregazzjoni,” NW] taʼ ġnus,’ u hekk ġara. (Ġenesi 28:​3, 35:11; 48:4) L-​Iżraelin ġew imsejħin, jew magħżulin, biex ikunu “l-​poplu tal-​Mulej,” “il-​ġemgħa tal-​Mulej.”​—Numri 20:4; Neħemija 13:1; Ġożwè 8:​35; 1 Samwel 17:47; Mikea 2:5.

5. Liema kelma Griega hija normalment tradotta “kongregazzjoni,” u kif tistaʼ tiġi applikata din il-​kelma?

⁵ Il-​kelma Griega li tikkorrispondi hija ekklesija, li ġejja minn żewġ kelmiet Griegi li jfissru li ssejjaħ flimkien. Tistaʼ tiġi applikata għal grupp mhux reliġjuż, bħalma hi “l-​assemblea” li qajjem Demetriju kontra Pawlu f’Efesu. (Atti 19:​32, 39, 41) Imma l-​Bibbja ġeneralment tużaha għall-​kongregazzjoni Kristjana. Xi traduzzjonijiet jittraduċu din il-​kelma bħala “knisja,” iżda The Imperial Bible-Dictionary jgħid li din “qatt . . . ma tfisser il-​bini letterali li fih kienu jiltaqgħu l-​Kristjani għall-​qima fil-​pubbliku.” Però, taʼ interess, fl-​Iskrittura Griega Kristjana nsibu l-​kelma “kongregazzjoni” applikata f’minn taʼ l-​inqas erbaʼ modi differenti.

Il-​Kongregazzjoni Midluka t’Alla

6. David u Ġesù x’għamlu fil-​kongregazzjoni?

⁶ Meta applika l-​kliem taʼ David li nsibu f’Salm 22:23 (22:​22, NW) għal Ġesù, l-​appostlu Pawlu kiteb: “‘Inxandar ismek lil ħuti; infaħħrek bl-​għanjiet f’nofs il-​kongregazzjoni.’ Għaldaqstant, [Ġesù] kellu jsir bħal ħutu f’kollox, biex isir qassis il-​kbir ħanin u leali fis-​servizz lil Alla.” (Ebrej 2:​12, 17) David kien faħħar lil Alla f’nofs il-​kongregazzjoni taʼ Iżrael tal-​qedem. (Salm 40:10 [40:​9, NW]) Madankollu, Pawlu għalxiex kien qed jirreferi meta qal li Ġesù faħħar lil Alla “f’nofs il-​kongregazzjoni”? Liema kongregazzjoni?

7. L-​Iskrittura Griega Kristjana b’liema mod primarju tuża l-​kelma “kongregazzjoni”?

⁷ Dak li naqraw f’Ebrej 2:​12, 17 huwa sinifikanti. Juri li Kristu kien inkluż bħala membru taʼ kongregazzjoni fejn hu ddikjara l-​isem t’Alla lil ħutu. Min kienu dawn ħutu? Dawk li jifformaw parti minn “nisel Abraham,” ħut Kristu midlukin bl-​ispirtu, ‘li għandhom sehem fis-​sejħa tas-​sema.’ (Ebrej 2:16–​3:1; Mattew 25:40) Tabilħaqq, is-​sens primarju tal-​kelma “kongregazzjoni” fl-​Iskrittura Griega Kristjana huwa grupp li jikkonsisti f’ħafna membri taʼ segwaċi taʼ Kristu midlukin bl-​ispirtu. Dawn il-​144,000 midluk jifformaw “il-​kongregazzjoni taʼ l-​ewwel imweldin li ġew miktubin fis-​smewwiet.”​—Ebrej 12:23.

8. Ġesù b’liema kliem indika bil-​quddiem il-​formazzjoni tal-​kongregazzjoni Kristjana?

⁸ Ġesù indika li din il-​“kongregazzjoni” Kristjana kellha tiġi fformata. Xi sena qabel mewtu, hu qal lil appostlu minnhom: “Int Pietru, u fuq din il-​blata nibni l-​kongregazzjoni tiegħi, u l-​bibien taʼ Ħades ma jegħlbuhiex.” (Mattew 16:18) Kemm Pietru u kemm Pawlu fehmu sew li Ġesù nnifsu kien il-​blata mbassra. Pietru kiteb li dawk li huma mibnijin bħala “ġebel ħaj” taʼ dar spiritwali fuq Kristu, il-​blata, kienu ‘poplu miksub bħala proprjetà speċjali, sabiex ixandru maʼ kullimkien il-​kwalitajiet eċċellenti’ tal-​Wieħed li sejħilhom.​—1 Pietru 2:​4-9; Salm 118:22; Isaija 8:​14; 1 Korintin 10:​1-4.

9. Il-​kongregazzjoni t’Alla meta bdiet tiġi fformata?

⁹ Dan “il-​poplu miksub bħala proprjetà speċjali” meta beda jiġi fformat f’kongregazzjoni Kristjana? Kien f’Pentekoste tas-​sena 33 E.K. meta Alla sawwab l-​ispirtu qaddis fuq id-​dixxipli meta kienu miġburin f’Ġerusalemm. Iktar tard dakinhar, Pietru għamel diskors mill-​aqwa lil grupp taʼ Lhud u proseliti. Ħafna wħud intlaqtu fil-​laħam il-​ħaj minħabba l-​mewt taʼ Ġesù; huma nidmu u tgħammdu. Fir-​rakkont Bibliku nsibu li tlett elef ruħ hekk għamlu, eżatt wara li saru parti mill-​kongregazzjoni ġdida t’Alla li dejjem tikber. (Atti 2:​1-4, 14, 37-​47) Kienet qed tikber għax iktar u iktar Lhud u proseliti aċċettaw il-​fatt li Iżrael bħala ġens ma kienx għadu iżjed il-​kongregazzjoni t’Alla. Minflok, il-​Kristjani midlukin li kienu jifformaw “l-​Iżrael t’Alla” spiritwali kienu saru l-​vera kongregazzjoni t’Alla.​—Galatin 6:​16; Atti 20:28.

10. X’relazzjoni hemm bejn Ġesù u l-​kongregazzjoni t’Alla?

¹⁰ Il-​Bibbja spiss tagħmel distinzjoni bejn Ġesù u l-​uħud midlukin, bħalma nsibu per eżempju fil-​frażi “qed nitkellem dwar Kristu u l-​kongregazzjoni.” Ġesù huwa l-​Kap taʼ din il-​kongregazzjoni taʼ Kristjani midlukin bl-​ispirtu. Pawlu kiteb li Alla “għamlu [lil Ġesù] kap fuq kollox għall-​kongregazzjoni, li hi l-​ġisem tiegħu.” (Efesin 1:​22, 23; 5:​23, 32; Kolossin 1:​18, 24) Illum, fuq l-​art għad baqaʼ fdal żgħir biss mill-​membri midlukin taʼ din il-​kongregazzjoni. Iżda, aħna nistgħu nkunu ċerti li Ġesù Kristu, il-​Kap tagħhom, iħobbhom. Is-​sentimenti tiegħu lejhom huma deskritti f’Efesin 5:​25: “Il-​Kristu wkoll ħabb lill-​kongregazzjoni u ta lilu nnifsu għaliha.” Hu jħobbhom għax b’mod attiv joffru “sagrifiċċju taʼ tifħir lil Alla, jiġifieri, il-​frott tax-​xofftejn li jistqarru ismu pubblikament,” bħalma għamel Ġesù meta kien fuq l-​art.​—Ebrej 13:15.

“Kongregazzjoni”​—Modi Oħrajn Kif Tintuża

11. Liema hu t-​tieni sens tal-​kelma “kongregazzjoni” li tuża l-​Iskrittura Griega Kristjana?

¹¹ Kultant, il-​Bibbja tuża l-​kelma “kongregazzjoni” f’sens iktar limitat jew dettaljat, u ma tiġix applikata għall-​grupp sħiħ taʼ 144,000 midluk li jifformaw “il-​kongregazzjoni t’Alla.” Per eżempju, Pawlu kiteb lil grupp wieħed taʼ Kristjani: “Tkunux taʼ tfixkil għal-​Lhud kif ukoll għall-​Griegi u għall-​kongregazzjoni t’Alla.” (1 Korintin 10:32) Naturalment, jekk Kristjan f’Korintu tal-​qedem kien jaġixxi b’mod mhux xieraq, dan setaʼ jkun sors taʼ tfixkil għal xi wħud. Però, setaʼ dan l-​att mhux xieraq ifixkel lill-​Griegi, lil-​Lhud jew lill-​midlukin kollha minn dak iż-​żmien sa llum il-​ġurnata? Dażgur li le. Għalhekk, jidher li f’dan il-​vers “il-​kongregazzjoni t’Alla” tapplika għall-​Kristjani li jgħixu fi żmien partikulari. Fi qbil maʼ dan, wieħed jistaʼ jirreferi għal Alla bħala li jidderieġi, jappoġġa, jew ibierek il-​kongregazzjoni, jiġifieri l-​Kristjani kollha f’ħin stipulat, huma fejn huma. Jew nistgħu nirreferu għall-​ferħ u l-​paċi li huma komuni fil-​kongregazzjoni t’Alla llum, jiġifieri fost il-​fratellanza sħiħa Kristjana.

12. Liema hu t-​tielet sens tal-​kelma “kongregazzjoni” fil-​Bibbja?

¹² It-​tielet mod li l-​Bibbja tuża l-​kelma “kongregazzjoni” japplika għall-​Kristjani kollha f’parti ġeografika. Naqraw: “Il-​kongregazzjoni fil-​Lhudija u l-​Galilija u s-​Samarija kollha ssaħħet u daħlet f’perijodu taʼ paċi.” (Atti 9:​31) Kien hemm iżjed minn grupp wieħed taʼ Kristjani f’dik il-​parti kbira, iżda dawn il-​gruppi kollha fil-​Lhudija, fil-​Galilija, u fis-​Samarija kienu jirreferu għalihom b’mod kollettiv bħala “l-​kongregazzjoni.” Meta wieħed iqis in-​numru taʼ wħud mgħammdin f’Pentekoste tas-​sena 33 E.K. u eżatt wara, setaʼ kien hemm saħansitra iktar minn grupp wieħed li kien jiltaqaʼ regolarment fl-​inħawi taʼ Ġerusalemm. (Atti 2:​41, 46, 47; 4:4; 6:​1, 7) Erodi Agrippa I ħakem il-​Lhudija sa ma miet fis-​sena 44 E.K., u jidher ċar mill-​vers taʼ l-​1 Tessalonikin 2:​14 li għallinqas sas-​sena 50 E.K., kien hemm għadd taʼ kongregazzjonijiet fil-​Lhudija. Għalhekk, meta naqraw li Erodi kien “qabad taħt idejh lil xi wħud mill-​kongregazzjoni,” dan jistaʼ jirreferi għal iktar minn grupp wieħed biss li kien jiltaqaʼ Ġerusalemm.​—Atti 12:1.

13. Liema hu r-​rabaʼ u l-​iktar mod komuni li l-​Bibbja tuża l-​kelma “kongregazzjoni”?

¹³ Ir-​rabaʼ sens, użu komuni u saħansitra iktar limitat tal-​kelma “kongregazzjoni” jirreferi għal Kristjani li jifformaw kongregazzjoni lokali waħda biss, bħalma hi f’dar. Pawlu semma “l-​kongregazzjonijiet tal-​Galazja.” Kien hemm iktar minn kongregazzjoni lokali waħda f’din il-​provinċja Rumana li kienet kbira. Pawlu darbtejn uża l-​plural “kongregazzjonijiet” rigward il-​Galazja, li setgħu inkludew lil dawk f’Antjokja, Derbe, Listra, u Ikonju. Irġiel ixjeħ kwalifikati, jew indokraturi, kienu maħturin f’dawn il-​kongregazzjonijiet lokali. (1 Korintin 16:1; Galatin 1:2; Atti 14:​19-​23) Skond l-​Iskrittura dawn kollha kienu “l-​kongregazzjonijiet t’Alla.”​—1 Korintin 11:16; 2 Tessalonikin 1:4.

14. X’nistgħu nikkonkludu mill-​użu tal-​kelma “kongregazzjoni” f’xi versi?

¹⁴ F’xi każi, il-​gruppi fil-​laqgħat Kristjani kellhom ikunu żgħar, sabiex ikunu jistgħu joqogħdu ġo dar privata. Xorta waħda, l-​espressjoni “kongregazzjoni” kienet tiġi applikata għal xi gruppi bħal dawn. Dawk li nafu dwarhom kienu kongregazzjonijiet fid-​djar t’Akwila u Priska, Nimfa, u Filemon. (Rumani 16:​3-5; Kolossin 4:​15; Filemon 2) Dan għandu jkun sors taʼ inkuraġġiment għall-​kongregazzjonijiet lokali llum li huma kemxejn żgħar u li għandhom mnejn jiltaqgħu regolarment f’dar privata. Ġeħova rrikonoxxa kongregazzjonijiet żgħar bħal dawn fl-​ewwel seklu, u hu ċertament li hekk jagħmel illum, billi jberikhom permezz taʼ l-​ispirtu tiegħu.

Il-​Kongregazzjonijiet Ifaħħru lil Ġeħova

15. Il-​ħidma taʼ l-​ispirtu qaddis kif intweriet f’xi kongregazzjonijiet tal-​bidu?

¹⁵ Kif semmejna qabel, fit-​twettiq taʼ Salm 22:23 [22:​22, NW], Ġesù faħħar lil Alla f’nofs il-​kongregazzjoni. (Ebrej 2:​12) Is-​segwaċi leali tiegħu kellhom jagħmlu l-​istess. Lura fl-​ewwel seklu meta l-​Kristjani veri ġew midlukin bl-​ispirtu qaddis biex isiru wlied Alla, u b’hekk ħut Kristu, xi wħud minnhom irċivew ħidmiet speċjali permezz taʼ l-​ispirtu. Huma rċivew għotjiet mirakolużi taʼ l-​ispirtu. Xi wħud mit-​turijiet taʼ dawn l-​għotjiet kienu kliem speċjali t’għerf jew għarfien, il-​qawwa tal-​fejqan jew l-​ipprofetizzar, jew saħansitra l-​abbiltà li jagħmlu stqarrijiet f’ilsna li ma kinux familjari magħhom.​—1 Korintin 12:​4-​11.

16. X’kienet mira waħda taʼ l-​għotjiet mirakolużi taʼ l-​ispirtu?

¹⁶ Rigward il-​kliem bl-​ilsna, Pawlu qal: “Inkanta għanjiet taʼ tifħir bl-​għotja taʼ l-​ispirtu, imma nkanta għanjiet taʼ tifħir b’moħħi wkoll.” (1 Korintin 14:15) Hu ra l-​importanza li oħrajn jifhmu kliemu, u b’hekk jitgħallmu. Il-​mira taʼ Pawlu kienet li jfaħħar lil Ġeħova fil-​kongregazzjoni. Hu ħeġġeġ lil oħrajn li kellhom l-​għotjiet taʼ l-​ispirtu: “Fittxu li toktru fihom biex tinbena l-​kongregazzjoni,” jiġifieri l-​kongregazzjoni lokali fejn kienu qed jużaw l-​għotja. (1 Korintin 14:​4, 5, 12, 23) B’mod ċar, Pawlu wera interess fil-​kongregazzjonijiet lokali, billi hu kien jaf li f’kull waħda minnhom, il-​Kristjani kien se jkollhom opportunitajiet biex ifaħħru lil Alla.

17. Rigward il-​kongregazzjonijiet lokali llum, dwar xiex nistgħu nkunu ċerti?

¹⁷ Ġeħova jkompli juża u jappoġġa l-​kongregazzjoni tiegħu. Hu qed ibierek il-​grupp magħmul minn Kristjani midlukin fuq l-​art illum. Dan jistaʼ jidher mill-​provvista abbundanti taʼ ikel spiritwali li qed igawdi l-​poplu t’Alla. (Luqa 12:42) Hu qed ibierek il-​fratellanza mad-​dinja kollha bis-​sħiħ. U hu qed ibierek il-​kongregazzjonijiet lokali, fejn aħna qed infaħħru lill-​Ħallieq tagħna permezz taʼ l-​għemejjel u l-​kummenti tagħna li jsaħħu l-​fidi. Hemmhekk nirċievu edukazzjoni u taħriġ sabiex inkunu nistgħu nfaħħru lil Alla f’okkażjonijiet oħrajn, meta m’aħniex fiżikament f’nofs il-​kongregazzjoni lokali tagħna.

18, 19. Il-​Kristjani devoti fi kwalunkwe kongregazzjoni x’għandhom jagħmlu?

¹⁸ Ftakar li l-​appostlu Pawlu ħeġġeġ lill-​Kristjani fil-​kongregazzjoni lokali taʼ Filippi, il-​Maċedonja: “Dan inkompli nitlob, li timtlew bi frott ġust, li hu permezz taʼ Ġesù Kristu, għall-​glorja u t-​tifħir t’Alla.” Dan jinkludi li jitkellmu m’oħrajn, lil persuni barra mill-​kongregazzjoni Kristjana, dwar il-​fidi tagħhom f’Ġesù u t-​tama meraviljuża li għandhom. (Filippin 1:​9-​11; 3:​8-​11) Fi qbil maʼ dan, Pawlu ħeġġeġ lil Kristjani sħabu: “Permezz [taʼ Ġesù], ħa noffru dejjem sagrifiċċju taʼ tifħir lil Alla, jiġifieri, il-​frott tax-​xofftejn li jistqarru ismu pubblikament.”​—Ebrej 13:15.

¹⁹ Issib int għaxqa f’li tfaħħar lil Alla “f’nofs il-​kongregazzjoni,” bħalma għamel Ġesù, u f’li tuża xofftejk biex tfaħħar lil Ġeħova quddiem dawk li għad iridu jsiru jafuh u jfaħħruh? (Ebrej 2:​12; Rumani 15:​9-​11) Sa ċertu punt, it-​tweġiba persunali tagħna tistaʼ tiddependi fuq kif inħossuna aħna dwar l-​irwol tal-​kongregazzjoni lokali tagħna fl-​iskop t’Alla. Fl-​artiklu li jmiss, ejja nikkunsidraw kif Ġeħova qed jidderieġi u juża l-​kongregazzjoni lokali tagħna u x’għandu jkun l-​irwol tagħha f’ħajjitna llum.

Tiftakar Int?

• “Il-​kongregazzjoni t’Alla,” magħmula minn Kristjani midlukin, kif bdiet teżisti?

• Semmi tliet modi oħrajn kif il-​Bibbja tuża l-​kelma “kongregazzjoni”?

• Rigward il-​kongregazzjoni, x’riedu jagħmlu David, Ġesù, u l-​Kristjani taʼ l-​ewwel seklu, u dan kif għandu jeffettwana?

[Stampa f’paġna 21]

Ġesù kien il-​pedament taʼ liema kongregazzjoni?

[Stampa f’paġna 23]

Gruppi lokali taʼ Kristjani ltaqgħu bħala “kongregazzjonijiet t’Alla”

[Stampa f’paġna 24]

Bħall-​Kristjani f’Benin, aħna nistgħu nfaħħru lil Ġeħova fost il-​ġemgħat tal-​kongregazzjoni