‘Ilbsu l-​Umiltà’

IR-​RAĠEL kien ġej minn belt prominenti. Hu kellu l-​vantaġġ li twieled bħala ċittadin Ruman u wisq probabbli kien ġej minn familja magħrufa. Dan ir-​raġel, Sawlu, irċieva ftit mill-​aqwa edukazzjoni li kienet provduta fl-​ewwel seklu E.K. Hu kien jitkellem minn taʼ l-​inqas b’żewġ lingwi u kien jappartjeni lil grupp reliġjuż Lhudi li kien magħruf sew​—il-​Fariżej.

Jistaʼ jkun li Sawlu tgħallem juri disprezz lejn in-​nies komuni u jkun kburi bis-​sewwa tiegħu. (Luqa 18:​11, 12; Atti 26:5) Sħab Sawlu l-​Fariżej ħassew li kienu superjuri għal oħrajn u kienu jħobbu l-​prominenza u t-​titli li jġegħluhom iħossuhom importanti. (Mattew 23:​6, 7; Luqa 11:43) X’aktarx li s-​sħubija maʼ nies bħal dawn għamlet lil Sawlu bniedem arroganti. Aħna nafu li hu kien persekutur żeluż tal-​Kristjani. Snin wara, meta sar magħruf bħala l-​appostlu Pawlu, hu qal li kien “midgħi u persekutur u raġel insolenti.”​—1 Timotju 1:13.

Iva, Sawlu sar Kristjan, l-​appostlu Pawlu, u l-​personalità tiegħu nbidlet għalkollox. Bħala appostlu Kristjan, hu b’umiltà ddikjara li kien “bniedem inqas mill-​inqas wieħed fost il-​qaddisin kollha.” (Efesin 3:8) Kien evanġelizzatur effettiv, imma ma ħa l-​ebda kredtu għalih innifsu għal dan. Pjuttost, hu ta l-​unur kollu lil Alla. (1 Korintin 3:​5-9; 2 Korintin 11:7) Kien Pawlu li ta twissija lill-​Kristjani sħabu: “Ilbsu sentimenti profondi taʼ mogħdrija, u qalb tajba, umiltà, ħlewwa, u sabar fit-​tul.”​—Kolossin 3:12.

Japplika dan il-​parir fis-​seklu tagħna, is-​seklu 21? Hemm vantaġġi meta tkun umli? Tistaʼ l-​umiltà verament tkun evidenza taʼ saħħa?

Huwa l-​Ħallieq li Jistaʼ Kollox Umli?

Kwalunkwe diskussjoni dwar l-​umiltà għandha tiġi kunsidrata mill-​ħarsa t’Alla. Għala? Għaliex huwa s-​Sovran u l-​Ħallieq tagħna. B’kuntrast miegħu, aħna għandna nagħrfu u naċċettaw il-​limitazzjonijiet tagħna stess. Aħna niddependu minnu. “Xaddaj li jistaʼ kollox aħna ma nilħquhx; Hu għoli fil-​qawwa,” qal żmien twil ilu wieħed raġel għaref jismu Eliħu. (Ġob 37:23) Tabilħaqq, il-​meditazzjoni dwar l-​univers kbir taʼ madwarna tgħinna numiljaw lilna nfusna! Il-​profeta Isaija jagħmlilna din l-​istedina: “Erfgħu għajnejkom ’il fuq u araw: min ħalaqhom dawn il-​ħlejjaq kollha? Imexxi u jgħodd l-​eżerċti tiegħu, u jsejjħilhom b’isimhom wieħed wieħed. Bis-​saħħa taʼ qawwietu, bil-​qawwa taʼ setegħtu, ħadd minnhom ma jonqos.”​—Isaija 40:26.

Minbarra li jistaʼ kollox, Alla Ġeħova huwa umli. Is-​Sultan David talbu: “Int tajtni t-​tarka tas-​salvazzjoni tiegħek; [“l-​umiltà,” NW] tiegħek kabbritni.” (2 Samwel 22:36) Alla huwa umli fis-​sens li hu juri konsiderazzjoni maʼ l-​umli li jipprovaw jogħġbuh, u hu jurihom ħniena. Hu bħallikieku jħares ’l isfel mill-​għoli sabiex juri qalb tajba lejn dawk li jibżgħu minnu.​—Salm 113:​5-7.

Iżjed minn hekk, Ġeħova japprezza l-​umiltà li juru l-​qaddejja tiegħu. L-​appostlu Pietru kiteb: “Alla jopponi lis-​suppervi, imma juri qalb tajba mhix mistħoqqa maʼ l-​umli.” (1 Pietru 5:5) Dwar il-​ħarsa t’Alla lejn il-​kburija, kittieb tal-​Bibbja qal: “Il-​Mulej jistmell lil kull min hu mkabbar.” (Proverbji 16:5) Allura, l-​umiltà kif tistaʼ tkun evidenza taʼ saħħa?

X’M’Hijiex l-​Umiltà

L-​umiltà m’hijiex l-​istess bħall-​umiljazzjoni. F’xi kulturi fl-​antik, xi ħadd tipikament umli kien ikun ilsir​—individwu li joqgħod għal kollox, miżerabbli, u taʼ min jitħassru. B’kuntrast, il-​Bibbja tenfasizza li l-​umiltà ġġib l-​unur. Per eżempju, ir-​raġel għaref kiteb: “Min jiċċekken u jibżaʼ mill-​Mulej, jieħu bi ħlasu għana, ġieħ u ħajja.” (Proverbji 22:4) U f’Salm 138:​6 naqraw: “Kbir il-​Mulej, imma jieħu ħsieb iż-​żgħar; u, għalkemm fl-​għoli, jagħraf mill-​bogħod.”

Il-​fatt li wieħed ikun umli ma jfissirx li m’għandux abbiltajiet jew miri x’jilħaq. Per eżempju, Ġesù Kristu qatt ma qal li ma kienx l-​iben uniġenitu taʼ Ġeħova, u qatt ma ppretenda li l-​ministeru tiegħu fuq l-​art kien bla valur. (Marku 14:​61, 62; Ġwanni 6:51) Madankollu, Ġesù wera l-​umiltà billi ta l-​kredtu lil Missieru għax-​xogħlijiet tiegħu u billi uża l-​qawwa tiegħu biex jaqdi u jgħin lil oħrajn u mhux biex jiddominahom jew jaħqarhom.

Evidenza taʼ Saħħa

Bla dubju, Ġesù Kristu sar magħruf mal-​kontemporanji tiegħu “permezz t’għemejjel setgħanin.” (Atti 2:22) Madankollu, f’għajnejn xi wħud hu kien “l-​iċken fost il-​bnedmin.” (Danjel 4:14 [4:​17, NW]) Hu mhux biss għex ħajja modesta, imma wkoll għallem ripetutament il-​valur li għandha l-​umiltà. (Luqa 9:48; Ġwanni 13:​2-16) Għaldaqstant, l-​umiltà tiegħu m’għamlitux dgħajjef. Hu ma kellux biżaʼ meta kien jiddefendi isem Missieru u wettaq il-​ministeru tiegħu. (Filippin 2:​6-8) Fil-​Bibbja, Ġesù huwa deskritt bħala ljun kuraġġuż. (Rivelazzjoni 5:5) L-​eżempju taʼ Ġesù juri li l-​umiltà hija fi qbil mas-​saħħa morali u l-​karattru sod.

Hekk kif nistinkaw biex nikkultivaw umiltà ġenwina, aħna nirrealizzaw li dan jirrikjedi sforz ġenwin sabiex l-​umiltà ssir parti minn ħajjitna. Dan jinvolvi li dejjem inkunu sottomessi lejn ir-​rieda t’Alla minflok ma nagħżlu l-​eħfef triq jew inċedu għall-​inklinazzjonijiet tal-​ġisem. Il-​fatt li niżviluppaw l-​umiltà jirrikjedi li jkollna saħħa morali, minħabba li rridu nwarrbu fil-​ġenb l-​interessi persunali sabiex naqdu lil Ġeħova u l-​interessi t’oħrajn mingħajr egoiżmu.

Il-​Benefiċċji taʼ l-​Umiltà

L-​umiltà tinvolvi li ma nkunux kburin jew egoisti. L-​Iskrittura tuża l-​kelma “umiltà” biex tiddeskrivi dan. (Efesin 4:2) Jekk neżaminaw lilna nfusna b’mod realistiku​—il-​kwalitajiet tajbin u d-​dgħjufijiet tagħna, is-​suċċess u l-​falliment tagħna—aħna nistgħu niżviluppaw l-​umiltà li tikkontrollalna ħsibijietna. Pawlu tana parir għaqli dwar dan meta kiteb: “Ngħid lil kull wieħed minnkom biex ma jaħsibx li hu xi ħaġa iktar milli hu xieraq; imma jaħseb b’tali mod li jkollu moħħ f’loku.” (Rumani 12:3) Kulmin isegwi dan il-​parir ikun qed juri l-​umiltà.

L-umiltà tintwera wkoll meta aħna sinċerament inpoġġu l-​interessi t’oħrajn qabel tagħna. Pawlu kien imnebbaħ biex iwissi lill-​Kristjani: “Tagħmlu xejn bi ġlied jew bi kburija, imma b’umiltà tqisu lill-​oħrajn superjuri għalikom.” (Filippin 2:3) Dan kien fi qbil mal-​kmand taʼ Ġesù lis-​segwaċi tiegħu: “L-​akbar wieħed fostkom għandu jkun il-​qaddej tagħkom. Kulmin jitgħolla jiġi umiljat, u kulmin jumilja ruħu jitgħolla.”​—Mattew 23:​11, 12.

Tabilħaqq, Alla jonora tassew lil dawk li huma umli. Id-​dixxiplu Ġakbu enfasizza dan il-​fatt meta kiteb: “Umiljaw ruħkom f’għajnejn Ġeħova, u hu jeżaltakom.” (Ġakbu 4:10) Min ma jixtieqx ikun eżaltat minn Alla?

In-nuqqas t’umiltà ġab ħafna konfużjoni u konflitti bejn gruppi taʼ nies u bejn individwi. Mill-​banda l-​oħra, li wieħed ikun umli jġib riżultati pożittivi. Aħna jistaʼ jkollna l-​approvazzjoni sħiħa t’Alla. (Mikea 6:8) Nistgħu ngawdu paċi tal-​moħħ għax xi ħadd umli x’aktarx li jkun iktar ferħan u kuntent minn persuna mkabbra. (Salm 101:5) Ir-​relazzjonijiet tagħna mal-​familja, il-​ħbieb, il-​kollegi, u oħrajn se jkunu b’inqas problemi u iktar pjaċevoli. Uħud umli jevitaw li jkollhom xi nuqqas taʼ qbil u li jinsistu li tgħaddi tagħhom, imġiba li tistaʼ faċilment twassal għar-​rabja, relazzjonijiet bierda, il-​korla, u l-​imrar.​—Ġakbu 3:​14-16.

Tabilħaqq, il-​fatt li nikkultivaw l-​umiltà huwa mod tajjeb kif inżommu relazzjonijiet tajbin m’oħrajn. Dan jistaʼ jgħinna nkampaw maʼ l-​isfidi taʼ din id-​dinja egoista u kompetittiva. Bl-​għajnuna t’Alla, l-​appostlu Pawlu kien kapaċi jegħleb l-​arroganza u l-​kburija li kellu qabel. Bl-​istess mod, aħna nagħmlu tajjeb li nikkontrollaw kwalunkwe ġibda lejn il-​kburija jew lejn il-​ħsieb li aħna aħjar minn ħaddieħor. “Qabel il-​qerda tiġi l-​kburija, u qabel il-​waqgħa t-​tkabbir,” twissi l-​Bibbja. (Proverbji 16:18) Billi nsegwu l-​eżempju taʼ Pawlu u nieħdu l-​parir tiegħu, aħna se naraw l-​għerf f’li ‘nilbsu l-​umiltà.’​—Kolossin 3:12.

[Stampa f’paġna 4]

Pawlu rnexxielu jegħleb l-​arroganza u l-​kburija

[Stampa f’paġna 7]

Jekk ikollna l-​umiltà se niġu megħjunin inżommu relazzjonijiet tajbin m’oħrajn

[Sors tal-​Istampa f’paġna 5]

Anglo-Australian Observatory/David Malin Images