Meqjusin Denji li Jirċievu Saltna

“Dan hu prova tal-​ġudizzju t’Alla, li jwassal biex titqiesu denji tas-​Saltna t’Alla, li għaliha tassew qed tbatu.”—2 TESS. 1:5.

1, 2. X’inhu l-​iskop tal-​ġudizzju t’Alla, u min se jagħmel il-​ġudizzju?

MADWAR is-​sena 50 taʼ l-​Era Komuni tagħna, l-​appostlu Pawlu kien f’Ateni. Imdejjaq minħabba l-​idolatrija li ra hemmhekk u li tant kienet mifruxa, hu tqanqal biex jagħti xiehda bis-​sengħa. Hu kkonkluda d-​diskors tiegħu b’dikjarazzjoni li żgur li ġibdet l-​attenzjoni tas-​semmiegħa tiegħu li kienu pagani. Hu qal: “Issa [Alla] qed jgħid lill-​bnedmin kullimkien li għandhom jindmu lkoll. Għax hu stabbilixxa jum li fih bi ħsiebu jiġġudika l-​art abitata fis-​sewwa permezz taʼ bniedem li ħatar, u ta garanzija lill-​bnedmin kollha billi rxoxtah mill-​imwiet.”—Atti 17:30, 31.

² Kemm hija kwistjoni serja li tirrifletti fuq il-​fatt li Alla ħejja jum taʼ ġudizzju għall-​umanità fil-​futur! Dan il-​ġudizzju se jsir mill-​wieħed li Pawlu ma semmiex fit-​taħdita tiegħu f’Ateni iżda li aħna nafu li hu Ġesù Kristu rxoxtat. Il-​ġudizzju taʼ Ġesù se jfisser ħajja jew mewt.

3. Ġeħova għala għamel patt m’Abraham, u min għandu rwol speċjali fit-​twettiq tiegħu?

³ Dan il-​Jum taʼ Ġudizzju se jdum 1,000 sena. Ġesù se jindokra dan il-​jum f’isem Ġeħova bħala Sultan tas-​Saltna t’Alla, iżda hu mhux se jkun waħdu. Ġeħova għażel oħrajn minn fost l-​umanità biex isaltnu maʼ Ġesù u jagħmlu ġudizzju matul dan il-​jum twil elf sena. (Qabbel Luqa 22:29, 30.) Kważi 4,000 sena ilu, Ġeħova ħejja l-​pedament għal dan il-​Jum taʼ Ġudizzju meta hu għamel patt mal-​qaddej leali tiegħu Abraham. (Aqra Ġenesi 22:17, 18.) B’mod ċar, dan il-​patt beda jgħodd fl-​1943 Q.E.K. M’għandniex xi ngħidu, Abraham ma setax jifhem bis-​sħiħ x’kien se jfisser dan il-​patt għall-​umanità. Madankollu, illum aħna nistgħu naraw li taħt il-​liġi tal-​patt Abrahamiku, in-​nisel t’Abraham għandu rwol speċjali fit-​twettiq taʼ l-​iskop t’Alla li jiġġudika lill-​bnedmin.

4, 5. (a) Min hu l-​parti primarja tan-​Nisel t’Abraham, u dan x’qal dwar is-​Saltna? (b) Meta saret disponibbli t-​tama li wieħed ikun parti mill-​arranġament tas-​Saltna?

⁴ Ġesù, il-​parti primarja tan-​Nisel t’Abraham, kien ġie midluk fis-​sena 29 E.K. bl-​ispirtu qaddis u sar il-​Messija, jew il-​Kristu, imwiegħed. (Gal. 3:16) Ġesù kellu jqattaʼ t-​tliet snin u nofs li kien imiss jippriedka l-​aħbar tajba tas-​Saltna lill-​ġens Lhudi. Wara l-​arrest taʼ Ġwanni l-​Battista, Ġesù wera li oħrajn setaʼ jkollhom it-​tama li jkunu membri taʼ din is-​Saltna meta hu qal: “Minn żmien Ġwanni l-​Battista s’issa, is-​saltna tas-​smewwiet hi l-​mira li qed jirsistu għaliha l-​bnedmin, u dawk li qed jirsistu qed jilħquha.”—Mt. 11:12.

⁵ Interessanti l-​fatt li eżatt qabel ma tkellem dwar dawk li kellhom ‘jilħqu’ s-​Saltna tas-​smewwiet, Ġesù qal: “Tassew ngħidilkom, Fost dawk li twieldu min-​nisa ħadd ma qam akbar minn Ġwanni l-​Battista; imma min hu fost l-​iżgħar fis-​saltna tas-​smewwiet hu akbar minnu.” (Mt. 11:11) Dan għala setaʼ jingħad? Għaliex it-​tama li wieħed ikun parti mill-​arranġament tas-​Saltna ma kinitx disponibbli għal uħud leali sakemm tferraʼ l-​ispirtu qaddis f’Pentekoste tas-​sena 33 E.K. Sa dak iż-​żmien, Ġwanni l-​Battista kien miet.—Atti 2:1-4.

Nisel Abraham Dikjarat Ġust

6, 7. (a) In-​nisel t’Abraham kif kellu jsir “bħall-​kwiekeb tas-​sema”? (b) Liema barka rċieva Abraham, u liema barka simili jirċievi n-​nisel tiegħu?

⁶ Lil Abraham intqallu li n-​nisel tiegħu kien se jitkattar u jsir “bħall-​kwiekeb tas-​sema” u bħar-​ramel f’xatt il-​baħar. (Ġen. 13:16; 22:17) Fi kliem ieħor, fi żmien Abraham kien impossibbli għall-​bnedmin li jkunu jafu n-​numru taʼ dawk li jagħmlu parti minn dan in-​nisel. Madankollu, in-​numru eżatt taʼ dan in-​nisel spiritwali maż-​żmien ġie rivelat. Flimkien maʼ Ġesù, dan in-​numru kellu jkun 144,000.—Riv. 7:4; 14:1.

⁷ Rigward il-​fidi t’Abraham, il-​Kelma t’Alla tgħid: “[Abraham] emmen fil-​Mulej, u dan għaddhulu b’ġustizzja.” (Ġen. 15:5, 6) Naturalment, l-​ebda bniedem m’hu ġust f’sens assolut. (Ġak. 3:2) Minkejja dan, minħabba l-​fidi li tispikka t’Abraham, Ġeħova ttratta miegħu bħallikieku kien ġust u saħansitra sejjaħlu l-​ħabib tiegħu. (Is. 41:8) Dawk li jagħmlu parti min-​nisel spiritwali t’Abraham flimkien maʼ Ġesù wkoll ġew dikjarati ġusti, u dan iġibilhom barkiet saħansitra akbar minn dawk li rċieva Abraham.

8. Liema barkiet huma disponibbli għall-​membri tan-​nisel t’Abraham?

⁸ Il-​Kristjani midlukin huma dikjarati ġusti minħabba li jeżerċitaw fidi fis-​sagrifiċċju tal-​fidwa taʼ Ġesù. (Rum. 3:24, 28) Mill-​ħarsa taʼ Ġeħova, huma meħlusin mid-​dnub u jistgħu jiġu midlukin bl-​ispirtu qaddis sabiex ikunu wlied spiritwali t’Alla, ħut Ġesù Kristu. (Ġw. 1:12, 13) Huma jidħlu fil-​patt il-​ġdid u jifformaw ġens ġdid, “l-​Iżrael t’Alla.” (Gal. 6:16; Lq. 22:20) Xi privileġġ meraviljuż jirrappreżenta dan kollu! B’riżultat taʼ dawn l-​azzjonijiet t’Alla għan-​nom tagħhom, il-​Kristjani midlukin ma jittamawx li jgħixu għal dejjem fuq l-​art. Huma jissagrifikaw dan il-​prospett biex ikollhom l-​hena li ma bħalha taʼ li wieħed ikun fuq in-​naħa taʼ Ġesù matul il-​Jum taʼ Ġudizzju u jaħkem miegħu fis-​smewwiet.—Aqra Rumani 8:17.

9, 10. (a) Il-​Kristjani meta ġew midlukin bl-​ispirtu qaddis għall-​ewwel darba, u x’kien hemm jistenniehom? (b) Liema għajnuna rċivew il-​Kristjani midlukin?

⁹ F’Pentekoste tas-​sena 33 E.K., grupp taʼ bnedmin leali ngħataw l-​opportunità li jkunu fost dawk li kellhom isaltnu maʼ Ġesù matul il-​Jum taʼ Ġudizzju. Madwar 120 dixxiplu taʼ Ġesù tgħammdu bl-​ispirtu qaddis, u b’hekk saru l-​ewwel Kristjani midlukin. Madankollu, għalihom dan kien biss il-​bidu. Minn dakinhar ’l hemm huma kellhom juru l-​lealtà tagħhom lejn Ġeħova minkejja l-​provi kollha li Satana kellu jagħmlilhom. Huma kellhom ikunu leali sal-​mewt sabiex ikunu jistgħu jirċievu l-​kuruna tal-​ħajja fis-​sema.—Riv. 2:10.

¹⁰ Għaldaqstant, permezz tal-​Kelma tiegħu u permezz tal-​kongregazzjoni Kristjana, Ġeħova pprovda twissijiet u inkuraġġiment li l-​Kristjani midlukin kellhom bżonn. Per eżempju, l-​appostlu Pawlu kiteb lill-​Kristjani midlukin f’Tessalonika: “Bħalma jagħmel missier maʼ wliedu, aħna bqajna nwiddbu lil kull wieħed minnkom, u nfarrġukom u nixhdulkom, bl-​għan li tibqgħu mexjin kif jixraq quddiem Alla li qed isejħilkom għas-​saltna u l-​glorja tiegħu.”—1 Tess. 2:11, 12.

11. Ġeħova liema provvediment bil-​miktub għamel għall-​membri taʼ “l-​Iżrael t’Alla”?

¹¹ Matul l-​iktar minn 60 sena minn mindu ntgħażlu l-​ewwel membri tal-​kongregazzjoni taʼ Kristjani midlukin, Ġeħova ra li hu xieraq li jkun hemm rekord permanenti tal-​ministeru taʼ Ġesù fuq l-​art kif ukoll tal-​mod kif Hu ttratta mal-​Kristjani midlukin taʼ l-​ewwel seklu u tal-​pariri li tahom. B’hekk, Ġeħova żied l-​Iskrittura Griega Kristjana ispirata maʼ l-​Iskrittura Ebrajka ispirata li kienet diġà teżisti. Fil-​bidu, l-​Iskrittura Ebrajka kienet miktuba għall-​ġens letterali taʼ Iżrael matul iż-​żmien li huma kellhom relazzjoni speċjali m’Alla. L-​Iskrittura Griega Kristjana kienet miktuba primarjament għall-​“Iżrael t’Alla,” dawk midlukin bħala ħut Kristu u wlied spiritwali t’Alla. M’għandniex xi ngħidu, dan bl-​ebda mod ma jfisser li dawk li ma kinux Iżraelin ma setgħux jibbenefikaw bil-​kbir minn studju taʼ l-​Iskrittura Ebrajka. B’mod simili, il-​Kristjani li m’humiex midlukin bl-​ispirtu qaddis jistgħu jiksbu benefiċċji bla qjies billi jistudjaw u jgħixu fi qbil mal-​pariri misjubin fl-​Iskrittura Griega Kristjana.—Aqra t-​2 Timotju 3:15-17.

12. Pawlu liema tfakkira tahom lill-​Kristjani midlukin?

¹² Il-​Kristjani taʼ l-​ewwel seklu kienu dikjarati ġusti u midlukin bl-​ispirtu qaddis bl-​iskop li jkunu jistgħu jirċievu l-​wirt tagħhom fis-​sema. Id-​dlik tagħhom m’għamilhomx slaten fuq sħabhom il-​Kristjani midlukin li kienu għadhom fuq l-​art. B’mod ċar, xi Kristjani tal-​bidu nsewh dan il-​fatt u bdew ifittxu prominenza mhix mistħoqqa fost ħuthom fil-​kongregazzjoni. B’riżultat taʼ dan, Pawlu tqanqal biex jistaqsi: “Diġà għandkom bix-​xabaʼ, hux hekk? Diġà stagħnejtu, hux tassew? Bdejtu ssaltnu mingħajrna, hux hekk? Tassew, nixtieq li bdejtu ssaltnu sabiex aħna wkoll inkunu nistgħu nsaltnu magħkom.” (1 Kor. 4:8) Għalhekk, Pawlu fakkar lill-​midlukin taʼ żmienu: “Mhux għax aħna s-​sidien tal-​fidi tagħkom, imma aħna ħaddiema sħabkom għall-​ferħ tagħkom.”—2 Kor. 1:24.

Jinġabar in-​Numru Kollu li Ġie Mbassar

13. Is-​sejħa tal-​midlukin kif bdiet miexja ’l quddiem wara s-​sena 33 E.K.?

¹³ Mhux il-​144,000 Kristjani midlukin kollha kienu magħżulin fl-​ewwel seklu. Is-​sejħa tagħhom kompliet sejra matul il-​perijodu appostoliku, u mbagħad matul is-​sekli baqaʼ jintgħażel numru relattivament żgħir. Madankollu, din kompliet matul is-​sekli taʼ wara saż-​żminijiet moderni. (Mt. 28:20) Maż-​żmien, wara li Ġesù beda jsaltan fl-​1914, l-​affarijiet bdew jiżviluppaw b’ħeffa li ma bħalha.

14, 15. X’ġara fi żmienna rigward is-​sejħa tal-​midlukin?

¹⁴ L-​ewwel, Ġesù naddaf is-​smewwiet minn kull traċċa t’oppożizzjoni għall-​ħakma t’Alla. (Aqra Rivelazzjoni 12:10, 12.) Imbagħad, hu dawwar l-​attenzjoni tiegħu lejn il-​ġbir tal-​fdal tal-​membri prospettivi tal-​gvern tas-​Saltna tiegħu sabiex jinġabar in-​numru kollu taʼ 144,000. Sa nofs is-​snin 30, b’mod ċar dan ix-​xogħol kien kważi tlesta u ħafna minn dawk li wieġbu għax-​xogħol taʼ l-​ippridkar ma kellhomx ix-​xewqa li jmorru s-​sema. L-​ispirtu ma kienx qed jixhed magħhom li huma kienu wlied Alla. (Qabbel Rumani 8:16.) Minflok, huma identifikaw ruħhom man-​“nagħaġ oħrajn,” li għandhom it-​tama li jgħixu għal dejjem fuq art magħmula ġenna. (Ġw. 10:16) B’hekk, wara l-​1935 l-​iskop ewlieni tax-​xogħol taʼ l-​ippridkar dar lejn il-​ġbir taʼ “folla kbira,” dik li l-​appostlu Ġwanni ra f’viżjoni u li kellha tibqaʼ ħajja fit-​“tribulazzjoni l-​kbira.”—Riv. 7:9, 10, 14.

¹⁵ Madankollu, matul iż-​żmien sa mis-​snin 30, ftit individwi ġew magħżulin biex ikollhom it-​tama għas-​sema. Għala? F’xi każi, jistaʼ jkun li huma ħadu post xi individwi li qabel kienu magħżulin u li ma baqgħux leali. (Qabbel Rivelazzjoni 3:16.) Pawlu tkellem ukoll dwar xi wħud li hu kien jaf personalment u li kienu ħallew il-​verità. (Flm. 3:17-19) Lil min kellu jsejjaħ Ġeħova biex iservu taʼ sostituti? M’għandniex xi ngħidu, din hija d-​deċiżjoni tiegħu. Però, jidher raġunevoli li hu ma kienx se jagħżel lil uħud li jkunu għadhom kif ikkonvertew, iżda lil individwi li—bħad-​dixxipli li kellem Ġesù meta beda l-​osservanza tat-​Tifkira—sa ċertu punt jkunu diġà taw prova tal-​lealtà tagħhom.a—Lq. 22:28.

16. Rigward il-​midlukin, għal liema ħaġa aħna grati, u x’nistgħu nemmnu b’fiduċja?

¹⁶ Madankollu, jidher li mhux dawk kollha li ġew imsejħin għat-​tama fis-​sema mis-​snin 30 ’l hawn huma sostituti taʼ dawk li ma baqgħux leali. B’mod ċar, Ġeħova għamel ċert li aħna jkollna fostna Kristjani midlukin matul l-​aħħar jiem taʼ din is-​sistema dinjija sakemm tiġi l-​qerda taʼ l-​għadu, “Babilonja l-​Kbira.”b (Riv. 17:5) U aħna nistgħu nkunu fiduċjużi li n-​numru komplut taʼ 144,000 membru se jinġabar kollu fiż-​żmien maħtur minn Ġeħova u li fl-​aħħar kollha se jaħkmu fil-​gvern tas-​Saltna. Aħna nistgħu wkoll nafdaw fil-​Kelma profetika li l-​folla l-​kbira li dejjem tikber se tkompli tagħti prova li bħala grupp hi leali. Dalwaqt, se ‘toħroġ mit-​tribulazzjoni l-​kbira’ li ġejja fuq id-​dinja taʼ Satana u se tidħol b’ferħ fid-​dinja l-​ġdida t’Alla.

Il-​Gvern t’Alla fis-​Sema Hu Kważi Komplut!

17. Skond l-​1 Tessalonikin 4:15-17 u Rivelazzjoni 6:9-11, x’sar minnhom il-​Kristjani midlukin li mietu leali?

¹⁷ Sa mis-​sena 33 E.K., għaxriet t’eluf taʼ Kristjani midlukin urew fidi soda u ssaportew lealment sal-​mewt. Dawn diġà ġew meqjusin bħala denji li jirċievu s-​Saltna u—b’mod evidenti b’seħħ mill-​bidu tal-​preżenza taʼ Kristu—ngħataw il-​premju tagħhom fis-​sema.—Aqra l-​1 Tessalonikin 4:15-17; Rivelazzjoni 6:9-11.

18. (a) Dawk il-​midlukin li għadhom fuq l-​art liema fiduċja għandhom? (b) Dawk li jagħmlu parti min-​nagħaġ oħrajn kif iqisu lil ħuthom il-​Kristjani midlukin?

¹⁸ Dawk il-​midlukin li għadhom fuq l-​art huma fiduċjużi għalkollox li jekk jibqgħu leali, huma dalwaqt se jirċievu l-​premju għall-​ħajja leali li għexu. Miljuni taʼ nagħaġ oħrajn, meta jaħsbu dwar il-​fidi taʼ ħuthom il-​midlukin, jaqblu mal-​kliem taʼ l-​appostlu Pawlu, li qal hekk dwar l-​aħwa midlukin f’Tessalonika: “Aħna kburin bikom fost il-​kongregazzjonijiet t’Alla minħabba s-​sabar u l-​fidi tagħkom fil-​persekuzzjonijiet kollha tagħkom u t-​tribulazzjonijiet li qed tissaportu. Dan hu prova tal-​ġudizzju ġust t’Alla, li jwassal biex titqiesu denji tas-​saltna t’Alla, li għaliha tassew qed tbatu.” (2 Tess. 1:3-5) Mal-​mewt taʼ l-​aħħar membru tal-​midlukin fuq l-​art, tkun meta tkun, il-​gvern t’Alla fis-​sema se jkun komplut. X’raġuni għal ferħ se tkun din—kemm fis-​sema kif ukoll fuq l-​art!

[Noti taʼ taħt]

Tistaʼ Tispjega?

• Alla xi rrivelalu lil Abraham li kellu x’jaqsam maʼ Jum il-​Ġudizzju?

• Abraham għala kien dikjarat ġust?

• Għal dawk min-​nisel t’Abraham xi jfisser li wieħed ikun dikjarat ġust?

• Liema fiduċja għandhom il-​Kristjani kollha?

[Stampa f’paġna 20]

Ġesù inkuraġġixxa lis-​segwaċi tiegħu biex jirsistu għas-​Saltna

[Stampa f’paġna 21]

F’Pentekoste tas-​sena 33 E.K., Ġeħova beda jagħżel il-​membri sekondarji tan-​nisel t’Abraham

[Stampa f’paġna 23]

In-​nagħaġ oħrajn huma grati li l-​Kristjani midlukin jinsabu magħhom matul l-​aħħar jiem