Ikkultiva Stennijiet Raġunevoli, u Kun Ferħan

“REĠAʼ ma rnexxilix!” Kemm-il darba għedt xi ħaġa simili minħabba li ma stajtx twettaq dak li kont ippjanajt li tagħmel? Omm Kristjana żagħżugħa għandha mnejn tesprimi ruħha b’dan il-​mod għax tħossha għajjiena ħafna u stressata minħabba l-​attenzjoni li trid tagħti b’mod kontinwu lit-​tarbija ġdida tagħha u tħossha frustrata li ma tistax tagħti iktar attenzjoni lill-​interessi spiritwali daqskemm tixtieq. Kristjan ieħor forsi jħossu limitat minħabba t-​trobbija tiegħu u jaħseb li qatt ma jagħmel biżżejjed fil-​kongregazzjoni. Xhud imdaħħla fiż-​żmien għandha mnejn tħossha skuraġġita għax ma tistax tieħu sehem bis-​sħiħ fl-​attivitajiet Kristjani li kienet tgawdi meta kellha iktar enerġija u ma kinitx limitata fiżikament. “Kultant taħdita li tinkuraġġixxi x-​xogħol taʼ pijunier hija biżżejjed biex ninfaqaʼ nibki,” tgħid Christiane, li minħabba s-​sitwazzjoni fil-​familja tagħha ma tistax tagħmel daqs kemm tixtieq fis-​servizz taʼ Ġeħova.

X’nistgħu nagħmlu meta nħossuna hekk? Xi Kristjani kif irnexxielhom jikkultivaw ħarsa realistika lejn iċ-​ċirkustanzi tagħhom? X’inhuma l-​benefiċċji taʼ li jkollok stennijiet bilanċjati?

Kun Raġunevoli

L-​appostlu Pawlu jgħidilna kif nistgħu nibqgħu ferħanin meta jgħid: “Ifirħu dejjem fil-​Mulej. Nerġaʼ ngħidilkom, Ifirħu! Ħa jkun jaf kulħadd kemm intom raġunevoli.” (Flp. 4:4, 5) Sabiex nesperjenzaw il-​ferħ u s-​sodisfazzjon fis-​servizz tagħna lil Alla, għandna bżonn nikkultivaw stennijiet raġunevoli skond l-​abbiltajiet u ċ-​ċirkustanzi tagħna. Jekk inħabirku biex nilħqu miri li m’humiex raġunevoli akkost taʼ kollox, inkunu qed noħolqu tensjoni żejda għalina nfusna. Min-​naħa l-​oħra, għandna noqogħdu attenti li ma nurux tant ħniena magħna nfusna li nibdew nużaw dawk li mill-​ħarsa tagħna huma limitazzjonijiet bħala skuża biex innaqqsu iktar milli hemm bżonn il-​ministeru Kristjan tagħna.

Huma x’inhuma ċ-​ċirkustanzi tagħna, Ġeħova jrid li nagħtuh l-​aħjar tagħna—servizz b’ruħna u b’qalbna kollha. (Kol. 3:23, 24) Jekk lil Ġeħova nagħtuh inqas mill-​aħjar li nistgħu nagħtu, ma nkunux qed ngħixu fi qbil mad-​dedikazzjoni tagħna lejh. (Rum. 12:1) Barra minn hekk, inkunu qed inċaħħdu lilna nfusna minn sodisfazzjon profond, ferħ ġenwin, u barkiet għonja oħrajn li jiġu minn servizz li nagħtu b’ruħna kollha.—Prov. 10:22.

Il-kelma li fil-​Bibbja tiġi tradotta bħala “raġunevoli” ġġorr il-​ħsieb taʼ li turi konsiderazzjoni. It-​tifsira letterali tagħha hija “li ċċedi.” (Ġak. 3:17) Il-​kelma tagħti l-​ħsieb ukoll taʼ li ma tkunx strett iżżejjed. Għalhekk, mela, jekk aħna raġunevoli, se nkunu nistgħu nħarsu lejn iċ-​ċirkustanzi tagħna b’mod bilanċjat. Huwa dan diffiċli? Għal xi wħud iva, avolja huma stess kapaċi juru konsiderazzjoni lil oħrajn. Per eżempju, jekk xi ħabib tal-​qalb ikun jidher għajjien ħafna minħabba li jkun qed ilaħħaq maʼ ħafna affarijiet, ma nipprovawx aħna ngħinuh jara kemm ikun għaqli li jagħmel xi aġġustamenti f’ħajtu? Bl-​istess mod, irridu nitgħallmu nagħrfu s-​sinjali li juruna li qed nagħmlu iktar milli nifilħu.—Prov. 11:17.

Jekk inkunu ġejna mrobbijin minn ġenituri li jkunu jippretendu żżejjed minna jistaʼ jkun iktar taʼ sfida li jkollna ħarsa raġunevoli lejn il-​limitazzjonijiet tagħna. Xi wħud fit-​tfulija tagħhom ħassew li dejjem kellhom jagħmlu iktar jew imorru aħjar sabiex ikunu jistgħu jiġu maħbubin mill-​ġenituri tagħhom. Jekk dan hu minnu fil-​każ tagħna, għandu mnejn li għandna ħarsa żbaljata tal-​mod kif iqisna Ġeħova. Hu jħobbna għax is-​servizz tagħna lejh nagħtuh b’qalbna kollha. Il-​Kelma t’Alla tassigurana li Ġeħova “jaf kif aħna magħġuna, jiftakar li aħna trab.” (Salm 103:14) Hu jaf x’inhuma l-​limitazzjonijiet tagħna u jħobbna meta naqduh b’żelu minkejja dawn il-​limitazzjonijiet. Jekk niftakru li Alla m’huwiex bħal xi mgħallem tax-​xogħol li hu esiġenti, se niġu megħjunin biex ma nistennewx iżżejjed minna nfusna billi nirrikonoxxu l-​limitazzjonijiet tagħna.—Mik. 6:8.

Xorta waħda, xi wħud isibuha diffiċli jikkultivaw attitudni bilanċjata bħal din. Jekk dan hu minnu fil-​każ tiegħek, għala ma tfittixx l-​għajnuna taʼ xi Kristjan taʼ l-​esperjenza li jafek sew? (Prov. 27:9) Per eżempju, tixtieq int taqdi bħala pijunier regulari? Din hija mira mill-​aqwa! Qed issibha diffiċli biex tilħaqha din il-​mira? Forsi għandek bżonn l-​għajnuna biex tissimplifika ħajtek. Jew xi ħabib Kristjan li tafdah għandu mnejn jiddiskuti miegħek dwar jekk il-​mira li taqdi bħala pijunier regulari hijiex prattika issa minħabba l-​ħafna responsabbiltajiet li għandek tal-​familja. Hu għandu mnejn jgħinek tara jekk l-​attivitajiet li tixtieq iżżid tistax tagħmilhom jew liema aġġustamenti tistaʼ tagħmel sabiex tkun tistaʼ tagħmel iktar. Ir-​raġel ukoll huwa f’pożizzjoni tajba biex jgħin lil martu tara x’tistaʼ tagħmel skond iċ-​ċirkustanzi tagħha. Per eżempju, hu jistaʼ jissuġġerixxi li tistrieħ ftit qabel ma tibda xahar ġdid taʼ iktar attività. Dan jistaʼ jagħtiha iktar enerġija u jgħinha biex tibqaʼ ferħana fil-​ministeru.

Fittex l-​Affarijiet li Tistaʼ Tagħmel

Età avanzata u saħħa batuta għandhom mnejn jillimitaw dak li tistaʼ tagħmel fis-​servizz taʼ Ġeħova. Jekk int ġenitur, forsi tħoss li ftit li xejn qed tibbenefika mill-​istudju persunali jew mil-​laqgħat Kristjani minħabba li ħafna mill-​ħin u l-​enerġija tiegħek tiddedikahom lit-​tfal żgħar tiegħek. Madankollu, jistaʼ jkun li l-​fatt li kultant toqgħod tikkonċentra fuq il-​limitazzjonijiet tiegħek qed iżommok lura milli tara x’tistaʼ tagħmel?

Eluf taʼ snin ilu, wieħed Levita esprima xewqa li kienet impossibbli għalih li jwettaqha. Hu kellu l-​privileġġ jaqdi fit-​tempju għal ġimagħtejn fis-​sena. Madankollu, hu esprima x-​xewqa taʼ min ifaħħarha li jgħix għal dejjem ħdejn l-​artal. (Salm 84:2-4 [84:1-3, NW]) X’għen lil dan ir-​raġel leali jkun kuntent? Hu rrealizza li anki ġurnata waħda fil-​btieħi tat-​tempju kien privileġġ uniku. (Salm 84:5, 6, 11 [84:4, 5, 10, NW]) Bl-​istess mod, minflok ma noqogħdu naħsbu dwar il-​limitazzjonijiet tagħna, għandna nipprovaw naraw x’nistgħu nagħmlu u nkunu grati għal dan.

Ħu per eżempju lil Nerlande, oħt Kristjana fil-​Kanada. Hi qiegħda f’siġġu tar-​roti u kienet tħossha tassew limitata f’dak li setgħet tagħmel fil-​ministeru. Madankollu, hi bidlet l-​attitudni tagħha u bdiet ċentru tal-​ħwienet li kien fil-​viċin bħala t-​territorju persunali tagħha biex tippriedka. Hi tgħid: “Noqgħod fis-​siġġu tar-​roti tiegħi ħdejn xi bank fiċ-​ċentru tal-​ħwienet. Nieħu gost nagħti xiehda lin-​nies li jiġu u jpoġġu bil-​qiegħda biex jistrieħu ftit.” Dan it-​tip taʼ ministeru imprezzabbli jġibilha sodisfazzjon kbir lil Nerlande.

Jekk Hemm Bżonn Agħmel Aġġustamenti

Dgħajsa bil-​qlugħ tistaʼ tkun għaddejja b’veloċità kbira bir-​riħ jonfoħ fil-​qlugħ tagħha. Madankollu, meta l-​baħri li jkollu t-​tmun f’idejh jiltaqaʼ maʼ maltempata, hu bilfors ikollu jirranġa l-​qlugħ. Hu ma jistax jikkontrolla l-​maltempata, imma billi jagħmel xi aġġustamenti jistaʼ jibqaʼ jikkontrolla d-​dgħajsa tiegħu. B’mod simili, ħafna drabi ma nkunux nistgħu nikkontrollaw iċ-​ċirkustanzi diffiċli li niltaqgħu magħhom fil-​ħajja. Imma jekk naġġustaw il-​mod kif nużaw ir-​riżorsi fiżiċi, mentali, u emozzjonali tagħna jistaʼ jkollna kontroll fuq ħajjitna kemm jistaʼ jkun. Meta nqisu ċ-​ċirkustanzi ġodda tagħna, se niġu megħjunin nibqgħu sodisfatti u ferħanin fis-​servizz t’Alla.—Prov. 11:2.

Ikkunsidra xi eżempji. Jekk ftit għandna enerġija, għandu mnejn insibuha t’għajnuna li fil-​għodu nevitaw attivitajiet li jgħejjuna ħalli fil-​għaxija jkollna s-​saħħa biex nattendu l-​laqgħat Kristjani. Dan se jippermettilna nieħdu vantaġġ sħiħ mis-​sħubija tagħna mal-​Kristjani sħabna. Jew jekk omm ma tistax tieħu sehem fil-​ministeru minn dar għal dar minħabba li t-​tarbija tagħha tkun ma tiflaħx, hi tistaʼ ssibha t’għajnuna li tistieden lil xi oħt Kristjana d-​dar tagħha sabiex flimkien ikunu jistgħu jagħtu xiehda bit-​telefon waqt li t-​tarbija tkun rieqda.

Xi ngħidu jekk iċ-​ċirkustanzi tiegħek ma jippermettulekx tistudja minn qabel dak kollu li jkun se jiġi diskuss fil-​laqgħat tal-​kongregazzjoni? Int tistaʼ tiddetermina kemm tistaʼ tipprepara u agħmel dan bl-​aħjar mod li tistaʼ. Billi naġġustaw il-​miri li għandna bħalissa, nistgħu nibqgħu attivi u ferħanin.

Biex naġġustaw il-​miri tagħna jirrikjedi determinazzjoni u sforz. Serge u Agnès, koppja minn Franza, kellhom jagħmlu bidla kbira fil-​pjanijiet tagħhom. “Meta sirna nafu li Agnès kienet qed tistenna tarbija, il-​ħolma li nsiru missjunarji għosfrot,” jgħid Serge. Issa li huwa missier taʼ żewġt ibniet kollhom enerġija, Serge jispjega kif huma għamlu mira ġdida bħala koppja. Hu jgħid: “Peress li ma stajniex naqdu f’pajjiż ieħor, iddeċidejna li nkunu ‘missjunarji’ f’pajjiżna stess. Bdejna naqdu fi grupp taʼ lingwa barranija.” Ibbenefikaw huma talli għamlu din il-​mira ġdida? Serge jgħid: “Inħossuna li nistgħu nkunu utli f’din il-​kongregazzjoni.”

Odile, oħt Kristjana fi Franza li għandha ’l fuq minn 70 sena u ssofri minn artrite fi rkopptejha, ma tistax toqgħod bil-​wieqfa għal ħafna ħin. Hi ħassitha skuraġġita minħabba li l-​kundizzjoni fiżika tagħha żammitha lura milli jkollha sehem fil-​ministeru minn dar għal dar. Madankollu, ma qatgħetx qalbha. Għamlet aġġustamenti fl-​attivitajiet tagħha billi bdiet tagħti xiehda bit-​telefon. Hi tgħid: “Huwa eħfef u iktar pjaċevoli milli ħsibt!” Dan il-​metodu taʼ l-​ippridkar reġaʼ taha l-​motivazzjoni għall-​ministeru.

Stennijiet Raġunevoli Jġibu Barkiet

Jekk nikkultivaw ħarsa raġunevoli lejn dak li nistgħu nagħmlu se nnaqqsu ħafna frustrazzjonijiet. Meta nagħmlu miri bilanċjati se nħossu li wettaqna xi ħaġa minkejja l-​limitazzjonijiet tagħna. B’hekk, se nifirħu minħabba dak li nkunu wettaqna, anki jekk dan ikun ftit.—Gal. 6:4.

Hekk kif nilħqu bilanċ f’dak li nistennew minna nfusna, se nuru iktar konsiderazzjoni mal-​Kristjani sħabna. Meta nkunu konxji tal-​limitazzjonijiet tagħhom, dejjem se napprezzaw dak li jagħmlu għalina. Billi nuru apprezzament għall-​għajnuna li joffrulna, aħna nkunu qed nikkontribwixxu għal spirtu taʼ kooperazzjoni u nibdew nifhmu iktar lil xulxin. (1 Pt. 3:8) Ftakar li bħala Missier kollu mħabba, Ġeħova qatt ma jitlob minna iktar milli nistgħu nagħtu. U meta jkollna stennijiet bilanċjati u nagħmlu miri li jistgħu jintlaħqu, l-​attivitajiet spiritwali tagħna se jġibulna iktar ferħ u sodisfazzjon!

[Kumment f’paġna 29]

Sabiex nesperjenzaw il-​ferħ u s-​sodisfazzjon fis-​servizz tagħna lil Alla, għandna bżonn nikkultivaw stennijiet raġunevoli skond l-​abbiltajiet u ċ-​ċirkustanzi tagħna

[Stampa f’paġna 30]

Nerlande ssib il-​ferħ billi tagħmel dak li tistaʼ fil-​ministeru

[Stampa f’paġna 31]

Tgħallem “aġġusta l-​qlugħ”

[Sors]

© Wave Royalty Free/age fotostock

[Stampa f’paġna 32]

Serge u Agnès ibbenefikaw talli għamlu miri ġodda