Dalwaqt Tispiċċa l-Pjaneta Art?
Liema taħseb li hi t-tweġiba t-tajba għal dan li ġej?
Fil-futur qarib, il-kundizzjonijiet taʼ l-art se
(a) jitjiebu?
(b) jibqgħu l-istess?
(ċ) jeħżienu?
TIPPROVA int iżżomm ħarsa pożittiva dwar il-futur? Hemm ħafna benefiċċji jekk tagħmel dan. L-istudji wrew li n-nies b’ħarsa ottimista huma iktar intelliġenti u huma iktar f’saħħithom. Studju fit-tul saħansitra wera li l-irġiel li kienu ottimisti kellhom ħafna inqas ċans li jbatu minn mard tal-qalb minn dawk li kellhom ħarsa pessimista lejn il-ħajja. Dawn ir-riżultati huma fi qbil maʼ stqarrija li saret fil-Bibbja ħafna sekli ilu: “Qalb ferħana hi mediċina tajba: iżda spirtu mnikket inixxef il-għadam.”—Proverbji 17:22, Karm Żammit.
Madankollu, meta nqisu dak li l-esperti tax-xjenza qed ibassru dwar il-futur tal-pjaneta Art, ħafna jsibuha diffiċli biex jibqgħu ferħanin u ottimisti. Ikkunsidra biss ftit mit-tbassir ikrah li qed jidher fuq l-aħbarijiet.
Pjaneta fil-Periklu
Fl-2002, l-Istitut taʼ l-Ambjent li Jinsab fi Stokkolma, li huwa rispettat ħafna, wissa li jekk ma nnaqqsux l-effett negattiv taʼ l-umanità fuq l-ambjent sabiex nipproteġu l-iżvilupp ekonomiku x’aktarx li se nagħtu bidu għal “ġrajjiet li jistgħu jittrasformaw bil-kbir il-klima u s-sistemi ekoloġiċi tal-pjaneta.” Ir-rapport kompla jgħid li l-faqar, l-inġustizzja kontinwa, u l-qerda kontinwa tar-riżorsi taʼ l-ambjent madwar id-dinja jistgħu jikkaġunaw lis-soċjetà biex taqaʼ “fi kriżi waħda wara l-oħra kemm ambjentali, kemm soċjali, u kemm tas-sigurtà.”
Fl-2005, il-Ġnus Magħquda ħarġet Rapport Dwar Sintesi li Fih Stima taʼ l-Ekosistema għall-Millennju. Dan kien ir-riżultat taʼ studju globali dwar l-ambjent taʼ l-Art li ħa erbaʼ snin, u li involva iktar minn 1,360 espert minn 95 pajjiż. Ir-rapport kien fih twissija iebsa: “L-attività tal-bniedem tant qed tagħmel pressjoni fuq il-funzjonijiet naturali taʼ l-Art li l-abbiltà tas-sistemi ekoloġiċi tal-pjaneta biex isostnu lill-ġenerazzjonijiet tal-futur m’għadhiex tistaʼ tittieħed bħala xi ħaġa ċerta.” Biex jiġi evitat dan l-inkwiet kbir hemm bżonn “bidliet sinifikanti li għadhom ma bdewx iseħħu fil-politika, fl-istituzzjonijiet, u fil-proċeduri,” jgħid ir-rapport.
Anna Tibaijuka, direttriċi esekuttiva tal-Programm tal-Ġnus Magħquda Biex Isolvi Kwistjonijiet Umani, tesprimi l-opinjoni taʼ iktar u iktar riċerkaturi. Hi tgħid: “Jekk nibqgħu sejrin hekk, hemm diżastru jistenniena fil-futur.”
Raġuni għall-Ottimiżmu
Ix-Xhieda taʼ Ġeħova, li jippubblikaw din ir-rivista, ukoll jemmnu li ġrajjiet drastiċi li se jibdlu l-art jinsabu fil-qrib. Madankollu, huma konvinti li minflok ma se jwasslu għal futur diżastruż, dawn il-ġrajjiet se jiftħu t-triq għall-iktar kundizzjonijiet meraviljużi li qatt rat id-dinja. Għala għandhom din il-ħarsa ottimista? Għaliex huma jafdaw fil-wegħdi li hemm fil-Kelma t’Alla, il-Bibbja. Innota waħda minn dawn il-wegħdi: “Ftit ieħor biss, u l-ħażin ma jkunx iktar; u int tħares bir-reqqa fejn kien, u ma jkunx hemm. Imma l-ġwejdin se jirtu l-art, u bi sliem kotran jitgħaxxqu ferm.”—Salm 37:10, 11.
Hija din it-tama sempliċi ħolma? Qabel ma twieġeb din il-mistoqsija, ikkunsidra bis-serjetà din l-istqarrija: Eluf taʼ snin ilu, il-Bibbja bassret bir-reqqa bosta mill-akbar problemi li llum qed narawhom iħassru l-art u jnikktu l-umanità. Jekk jogħġbok aqra l-iskritturi ċitati fl-artiklu li jmiss u qabbel dak li jgħidu maʼ dak li qed tara jseħħ fid-dinja. Hekk kif tagħmel dan, se tkabbar il-fiduċja tiegħek fit-tbassir bir-reqqa tal-Bibbja dwar il-ġrajjiet tal-futur.