Tistaʼ Terġaʼ Tingħaqad mal-Kumplament?
1 Matul dawn l-aħħar ħames snin, eluf taʼ pijunieri regulari sabu li kellhom bżonn iħallu s-servizz taʼ pijunier. Kont int wieħed minnhom? Jekk inhu hekk, żgur li kellek raġuni għalxiex tħalli dan il-privileġġ. Forsi ġralek xi ħaġa li ma kontx qed tistennieha u li ma stajtx tikkontrollaha. Għadha teżisti din ir-raġuni? Jekk kellek bżonn tieqaf minħabba problemi taʼ saħħa jew finanzjarji, jew obbligi tal-familja, tjiebu issa dawn iċ-ċirkustanzi? Tistaʼ tagħmel xi ftit aġġustamenti raġunevoli li jippermettulek terġaʼ tgawdi l-barkiet li jiġu mis-servizz taʼ pijunier regulari? Ħsibt biex tapplika mill-ġdid?
2 Bħalma taf, teħtieġ organizzazzjoni tajba u skeda mħejjija sew biex tirnexxi bħala pijunier. Għalkemm is-soltu pijunier ma jkollux ħafna ħin għar-rikreazzjoni, il-ħinijiet qosra li jkollu biex jistrieħ spiss ikunu iktar sodisfaċenti u premjanti. (Prov. 19:17; Atti 20:35) Billi tkun bieżel fis-servizz taʼ Jehovah, tiġi protett mill-influwenza tan-nies tad-dinja li jfittxu dak li jogħġob lilhom u li jridu jgħixu ħajja faċli. Jehovah wiegħed li se jagħmlek għani spiritwalment jekk ikollok spirtu taʼ sagrifiċċju u tpoġġi l-interessi tas-Saltna l-ewwel. Żgur li se tesperjenza ferħ u kuntentizza vera meta taqdi b’qalb sħiħa fis-servizz taʼ Jehovah.—Prov. 10:22; Kol. 3:23, 24.
3 Għandna nħarsu lejn il-ministeru full-time bħala privileġġ merfugħ biss għal ftit uħud speċjali? Le. Skond il-wegħda tad-dedikazzjoni tagħna, kull Kristjan għandu jaħseb bis-serjetà dwar li jaqdi fis-servizz full-time sakemm ma jkollux ċirkustanzi li jagħmluhielu impossibbli.—Mk. 12:30.
4 Jekk minħabba s-saħħa tiegħek u r-responsabbiltajiet Skritturali jidher ċar li ma tistax taqdi bħala pijunier bħalissa, tistaʼ tkun żgur li Jehovah jaf u jifhmek. Se jippremjak għall-fedeltà tiegħek f’dak li tagħmel skond ma jippermettulek iċ-ċirkustanzi. (1 Kor. 4:2; 2 Kor. 8:12) Madankollu, jekk jidher li issa hu possibbli li terġaʼ taqdi bħala pijunier, għax ma tavviċinax lill-indokratur li jippresiedi u titolbu formola biex tapplika?
5 Tistaʼ Tgħinek il-Familja Tiegħek? Għandek mnejn ħallejt is-servizz taʼ pijunier għax kellek bżonn tieħu ħsieb xi obbligi tal-familja. Jistaʼ jkun li issa xi membri oħrajn tal-familja jinsabu f’qagħda li jagħtu għajnuna li se tgħinek terġaʼ tibda taqdi fix-xogħol taʼ pijunier? Xi wħud, b’sempliċement naqra għajnuna f’li jieħdu ħsieb ċerti responsabbiltajiet, ikunu jistgħu jerġgħu jibdew jaqdu bħala pijunieri.
6 Kooperazzjoni tajba u naqra sforz akbar mill-membri l-oħrajn tal-familja jistgħu jgħinu biex dan isir possibbli. L-għajnuna tistaʼ tingħata b’mod finanzjarju jew permezz taʼ li jiġi provdut it-trasport, kif ukoll permezz taʼ arranġamenti regulari biex taħdmu flimkien fis-servizz taʼ l-għalqa. Wisq probabbli hemm modi oħra kif jistgħu jgħinu. Jekk iċ-ċirkustanzi ma jippermettulekx li terġaʼ tibda taqdi f’dan it-tip taʼ privileġġ taʼ servizz, forsi tistaʼ tagħti għajnuna bħal din lil xi membru ieħor tal-familja li jistaʼ jaqdi hu bħala pijunier.
7 Għala ma tiddiskutux din il-kwistjoni bħala familja? Jistaʼ jkollkom prospetti tajbin jekk tagħmluh bħala proġett li se taħdmu fuqu flimkien. Jekk jistaʼ jiżdied pijunier ieħor mal-kumplament, il-familja kollha tistaʼ tħossha daqslikieku qed tieħu sehem hi stess. Spirtu ġeneruż bħal dan mhux biss se jżid għax-xiehda tas-Saltna fit-territorju tiegħek iżda se jgħaqqad iktar lill-familja spiritwalment.—Lq. 6:38; Flp. 2:2-4. (km-E 8/94)