Nikkonduċu Studji Tal-​Bibbja Fid-​Djar Progressivi

¹ X’għandhom komuni waħda infermiera fit-​Tanzanija, żagħżugħa fl-​Arġentina, u omm fil-​Latvja? In-​1997 Yearbook (pġi. 8, 46, u 56) jirrapporta li t-​tlieta li huma għamlu progress mgħaġġel fl-​istudji tal-​Bibbja fid-​djar tagħhom, grazzi għall-​volontà tagħhom li jkollhom iktar minn sessjoni waħda kull ġimgħa fil-​ktieb Għarfien. Ġie rrikmandat li, fejn hu possibbli, il-​pubblikaturi għandhom jipprovaw jiddiskutu kapitlu wieħed tal-​ktieb matul kull sessjoni taʼ l-​istudju. Madankollu, xi wħud isibuha taʼ sfida biex jagħmlu dan. Għalkemm ħafna se jiddependi miċ-​ċirkostanzi u mill-​abbiltà taʼ kull student, għalliema taʼ l-​esperjenza kellhom suċċess billi ħadmu fuq is-​suġġerimenti li ġejjin.

² Kif kien ġie diskuss fl-​insert taʼ Il-​Ministeru Tas-​Saltna taʼ Ġunju 1996, huwa neċessarju li tħarreġ lill-​istudenti tiegħek biex jippreparaw għall-​istudju. Mill-​bidunett, ikun tajjeb li tispjega u turi kif dan isir. Urihom il-​kopja taʼ l-​istudju persunali tiegħek tal-​ktieb Għarfien. Ippreparaw l-​ewwel lezzjoni flimkien. Għin lill-​istudenti jsibu l-​kliem jew frażijiet prinċipali li jwieġbu direttament il-​mistoqsija mniżżla u mbagħad jagħmlu sinjal taħthom jew jimmarkawhom. Xi pubblikaturi anki taw lill-​istudenti tagħhom highlighter biex jimmarkaw bih. Inkuraġġihom biex ifittxu l-​iskritturi kollha waqt li jippreparaw għall-​istudju. B’dan il-​mod, tkun qiegħed tħarriġhom ukoll biex jippreparaw għal meta jattendu l-​Istudju tal-​Ktieb tal-​Kongregazzjoni u l-​Istudju tat-​Torri Taʼ L-​Għassa.​—Luqa 6:​40.

³ Għalliem tajjeb se jara x’hemm f’qalb l-​istudent u mhux jitkellem iżżejjed hu nnifsu. Jevita li jintilef fuq xi punti żgħar. Rari jinkludi xi materjal żejjed. Minflok, hu jenfasizza l-​punti prinċipali tal-​lezzjoni. Xi wħud ipprovdew lill-​istudenti b’letteratura oħra biex tgħinhom isibu tweġibiet għal xi mistoqsijiet. Barra minn hekk, uħud li juru l-​interess se jirċievu iktar informazzjoni dettaljata billi jattendu l-​laqgħat tal-​kongregazzjoni.

⁴ Jistaʼ ma jkunx neċessarju li wieħed ifittex l-​iskritturi ċitati kollha fil-​lezzjoni. Xi punti prinċipali jistgħu jiġu spjegati mit-​testi kkwotati fil-​paragrafu. Matul ir-​reviżjoni, enfasizza l-​iskritturi prinċipali li ġew diskussi u inkuraġġixxi lill-​istudent biex jiftakarhom.

⁵ Kemm Għandha Ddum Kull Sessjoni?: L-​istudju m’għandux għalfejn ikun limitat għal siegħa waħda. Xi inkwilini għandhom ħin għad-​dispożizzjoni tagħhom u forsi jkunu jixtiequ jdumu jistudjaw iktar. Jew forsi l-​istudent ikun jixtieq jistudja iktar minn darba fil-​ġimgħa. Dan ikun taʼ benefiċċju għal dawk li jistgħu jagħmlu hekk.

⁶ Bħalma jiddeskrivi Isaija 60:​8, illum mijiet t’eluf taʼ wħud ġodda li jfaħħru lil Jehovah jiġu “bħal sħab jittajjru, bħal ħamiem lejn il-​bejtiet tagħhom” ġewwa l-​kongregazzjonijiet tal-​poplu tiegħu. Ejjew ilkoll kemm aħna nagħmlu s-​sehem tagħna f’li naħdmu mill-​qrib maʼ Jehovah hekk kif hu jgħaġġel il-​ġbir taʼ wħud bħal ngħaġ.​—Isa. 60:22.