Il-​Fedeltà Tiġi Ppremjata

¹ F’Lhud 11:6 jintqalilna li Alla “jagħti l-​ħlas xieraq lil dawk li jfittxuh.” Mod wieħed kif jipp­remja lill-​qaddejja devoti tiegħu li kienu ‘fidili fil-​ftit’ huwa billi ‘jafdahom fuq ħafna.’ (Matt. 25:23) Fi kliem ieħor, Jehovah taʼ spiss jippremja xogħol tajjeb billi jagħti lix-​xhieda leali tiegħu iktar privileġġi taʼ servizz.

² Il-​fedeltà taʼ l-​appostlu Pawlu ġiet ippremjata billi ġie assenjat lilu ministeru li ħadu fl-​ibliet u fl-​irħula taʼ l-​Ewropa u taʼ l-​Asja Minuri. (1 Tim. 1:​12) Għalkemm kien involut sforz kbir biex iwettaq bis-​sħiħ il-​ministeru tiegħu, Pawlu stmah bil-​kbir il-​privileġġ li kien irċieva. (Rum. 11:13; Kol. 1:​25) Hu wera l-​apprezzament tiegħu mill-​qalb billi bil-​ħeġġa fittex opportunitajiet biex jippriedka. Bl-​attività żeluża tiegħu, wera biċ-​ċar li hu kien qiegħed jgħixha l-​fidi tiegħu. L-​eżempju tiegħu jqanqalna biex ngħożżuhom il-​privileġġi taʼ servizz tagħna.

³ Jehovah Tana Ministeru: Kif jistaʼ jkollna l-​istess ħarsa li wera Pawlu lejn dan ir-​rigal privileġġ­jat? Billi nfittxu modi kif inżidu s-​sehem tagħna fil-​ministeru. Billi nieħdu vantaġġ minn kull opportunità biex nagħtu xiehda informali, kif ukoll minn bieb għal bieb. Billi nerġgħu ­nagħmlu d-​djar fejn ma nkunu sibna lil ħadd u nagħmlu żjajjar lura lil dawk kollha li juru interess. U billi nżommu l-​appuntamenti li jkollna biex nikkonduċu studji tal-​Bibbja fid-​djar.

⁴ Rigward il-​ministeru tagħna, Pawlu ħeġġiġna: ‘Insistu.’ (2 Tim. 4:2) Xi ħaġa li trid tinsisti fuqha tkun xi ħaġa urġenti li jrid isir xi ħaġa dwarha malajr. Nagħmlu aħna l-​ministeru tagħna b’mod urġenti, billi nagħtuh prijorità f’ħajjitna? Per eżempju, ma rridux inħallu l-​attivitajiet rikreattivi tagħna u interessi persunali oħrajn fi tmiem il-​ġimgħa jiħdulna l-​ħin li suppost niddedikawh għall-​ministeru taʼ l-​għalqa. Peress li aħna konvinti li t-​tmiem taʼ din is-​sistema qiegħed joqrob ġmielu, konvinti wkoll li l-​ippridkar taʼ l-​aħbar tajba tas-​Saltna huwa l-​iktar xogħol importanti li nistgħu nagħmlu.

⁵ Il-​fedeltà tagħna lejn Alla tint­għaraf milli nkunu veri u leali lejh u kostanti fix-​xogħol li ħatarna biex nagħmlu. Ejjew inwett­qu bis-​sħiħ il-​ministeru tagħna, sabiex Jehovah jippremja l-​fedeltà tagħna bil-​kbir.