Nagħtu Xiehda B’kondotta Tajba
1 Fis-soċjetà permissiva tal-lum, ħafna żgħażagħ jaħlu ħajjithom kif ġie ġie fuq id-drogi, fuq l-immoralità, fuq ir-ribelljoni, u fuq il-vjolenza. B’kuntrast, il-kondotta eżemplari taʼ żgħażagħ prudenti fil-kongregazzjoni Kristjana hija rifreskanti meta taraha u żgur li hija xi ħaġa taʼ sbuħija għal Jehovah. Isservi bħala xiehda qawwija li tistaʼ tiġbed lil oħrajn lejn il-verità.—1 Pt. 2:12.
2 Ħafna esperjenzi juru li l-kondotta tajba taʼ żgħażagħ Kristjani kellha impatt pożittiv fuq dawk li jkunu qed josservaw. Waqt li kienet qed titkellem dwar Xhud żagħżugħa li kienet studenta tagħha, għalliema taʼ l-iskola qalet lill-klassi kollha kemm hi li Jehovah, dak Alla taʼ din it-tifla, hu dak Alla veru. Dan qalitu għaliex il-kondotta tat-tifla hija dejjem rispettabbli. Għalliem ieħor kiteb lis-Soċjetà, billi qal: “Nixtieq infaħħarkom għaż-żgħażagħ mill-aħjar li għandkom fir-reliġjon tagħkom . . . Iż-żgħażagħ tagħkom tassew huma taʼ eżempju. Huma jirrispettaw lill-anzjani tagħhom, huma edukati u jilbsu modest. U kemm jafuha sew il-Bibbja! Dik hi vera reliġjon!”
3 Għalliema oħra taʼ l-iskola kienet impressjonata bil-kondotta mill-aħjar taʼ Xhud taʼ sebaʼ snin fil-klassi tagħha. Hi nġibdet lejn il-personalità kalma u pjaċevoli tat-tifel, li ġagħlitu jispikka b’kuntrast qawwi maʼ subjien oħrajn. L-attitudni serja tiegħu lejn it-twemmin reliġjuż tiegħu—ma staħax li jkun differenti minħabba dak li kien jemmen, laqtitha. Hi setgħet tara li l-kuxjenza tiegħu kienet ġiet imħarrġa u li hu kien kapaċi ‘jagħżel bejn it-tajjeb u l-ħażin.’ (Lhud 5:14) Eventwalment, omm it-tifel żaret lill-għalliema, u nbeda studju tal-Bibbja. Maż-żmien, l-għalliema tgħammdet u iktar tard saret pijuniera regulari!
4 Wieħed żagħżugħ kien influwenzat mill-kondotta tajba taʼ Xhud fl-iskola tiegħu. Hi veru kienet differenti—edukata ħafna, studjuża, u dejjem modesta fl-ilbies tagħha; ukoll, kuntrarju għal bniet oħrajn, hi qatt ma tkessħet mas-subjien. Setaʼ jara li kienet qed tgħix fi qbil maʼ prinċipji Bibliċi. Iż-żagħżugħ staqsieha xi mistoqsijiet dwar it-twemmin reliġjuż tagħha u kien impressjonat b’dak li tgħallem. Beda jistudja, malajr tgħammed, u eventwalment ħa sehem fil-ministeru taʼ pijunier u fis-servizz taʼ Betel.
5 Jekk int Kristjan żagħżugħ li tixtieq tagħti xiehda mill-aħjar lil oħrajn, għasses il-kondotta tiegħek b’kull mod. Qatt tħalli l-għassa tiegħek tbatti billi tibda tapprova l-attitudnijiet, il-ħarsiet, jew l-istili taʼ ħajja permissivi tad-dinja. Agħti eżempju elevat fid-diskors, fl-ilbies, u fil-komportament tiegħek, mhux biss waqt li tkun qed tieħu sehem fil-ministeru taʼ l-għalqa u fil-laqgħat tal-kongregazzjoni imma wkoll waqt li tkun l-iskola u meta tieħu sehem f’xi rikreazzjoni. (1 Tim. 4:12) Se jkollok ferħ veru meta xi ħadd jieħu interess fil-verità minħabba li tkun ħallejt ‘id-dawl tiegħek jiddi’ permezz tal-kondotta tajba tiegħek.—Mt. 5:16.