Kif il-​Membri tal-​Familja Jikkooperaw għal Sehem Sħiħ—Fil-​Laqgħat tal-​Kongregazzjoni

¹ Il-​familji Kristjani jridu jobdu l-​kmand li jiltaqgħu flimkien għal-​laqgħat tal-​kongregazzjoni. (Lhud 10:​24, 25) B’kooperazzjoni tajba, kulħadd jistaʼ jirnexxilu jipprepara, jattendi, u jipparteċipa fil-​laqgħat. Iċ-​ċirkustanzi tal-​familja jvarjaw, imma hemm xi affarijiet li raġel Kristjan miżżewweġ, mara kredenta miżżewġa, jew ġenitur waħdu jistgħu jagħmlu biex jippromwovu l-​għaqda fil-​familja f’affarijiet spiritwali, minkejja n-​numru taʼ tfal fid-​dar u l-​etajiet tagħhom.​—Prov. 1:8.

² Ħudu l-​Ħin biex Tippreparaw: Il-​membri tal-​familja jikkooperaw biex jaraw li kull membru jkun ippreparat tajjeb għal-​laqgħat tal-​kongregazzjoni. Ħafna jikkunsidraw l-​artiklu għall-​Istudju tat-​Torri taʼ l-​Għassa taʼ kull ġimgħa flimkien. Xi wħud jippreparaw għall-​Istudju tal-​Ktieb tal-​Kongregazzjoni jew jaqraw il-​qari tal-​Bibbja taʼ kull ġimgħa bħala familja. L-​objettiv huwa li dak li jkun ikollu l-​punti prinċipali f’moħħu qabel ma jattendi l-​laqgħat. B’dan il-​mod, kulħadd se jibbenefika iktar minn dak li jismaʼ u jkun iktar ippreparat biex jipparteċipa meta jkun hemm opportunità.​—1 Tim. 4:15.

³ Ippjanaw biex Tipparteċipaw: Kulħadd fil-​familja għandu jkollu l-​mira li jiddikjara t-​tama tiegħu quddiem oħrajn billi jikkummenta fil-​laqgħat. (Lhud 10:23) Hemm xi membru fil-​familja li jeħtieġ l-​għajnuna jew l-​inkuraġġiment biex jagħmel dan? Liema għajnuna għandu bżonn kull individwu biex jipprepara l-​inkarigi għall-​Iskola tal-​Ministeru Teokratiku? In-​nisa japprezzawh meta żwieġhom jieħdu interess u forsi jagħtuhom idea dwar xi tixbieha addattata jew setting prattiku. Il-​ġenituri m’għandhomx għalfejn iħossu li jridu jippreparaw il-​partijiet għal uliedhom iż-​żgħar. Jekk jagħmlu hekk jistgħu joħonqu l-​inizjattiva tat-​tfal. Imma l-​ġenituri jistgħu jgħinu liż-​żgħar tagħhom u jisimgħuhom hekk kif jipprattikaw b’leħen għoli.​—Efes. 6:4.

⁴ Organizzaw biex Tattendu: Minn età żgħira t-​tfal jistgħu jiġu mgħallmin jilbsu u jlestu ħalli kulħadd jitlaq għal-​laqgħa f’ħin stipulat. Il-​membri tal-​familja għandhom jikkooperaw f’li jieħdu ħsieb il-​faċendi fid-​dar sabiex ma jkunx hemm dewmien.​—Ara s-​suġġerimenti fil-​kotba Hena Fil-​Familja, paġna 112, u l-​ktieb Young People Ask, paġni 316-17.

⁵ Il-​ġenituri u t-​tfal bl-​istess mod jistgħu jirriflettu fuq il-​kliem taʼ Ġożwè tal-​qedem, li qal: “Imma jien u dari naqdu l-​Mulej.” Imbagħad kun riżolut li tikkoopera għal sehem sħiħ fil-​laqgħat tal-​kongregazzjoni.​—Ġoż. 24:15.