Il-​Konvenzjonijiet Distrettwali “Il-​Kelma Profetika t’Alla” għall-​1999

¹ Bla dubju int diġà għamilt l-​arranġamenti biex tattendi kull ġurnata tal-​konvenzjoni għax temmen li Jehovah qed jistenniek tattendi. Billi nattendu kull ġurnata tal-​konvenzjoni mill-​għanja tal-​ftuħ sat-​talba taʼ l-​għeluq, aħna nuru lil Jehovah li napprezzaw il-​kliem li jgħidilna. (Dt. 4:10) Aħna wkoll nuru apprezzament għax-​xogħol iebes taʼ ħafna minn ħutna involuti fil-​preparamenti għall-​konvenzjoni. L-​informazzjoni u t-​tfakkiriet li ġejjin huma provduti sabiex int tkun tistaʼ tasal għall-​konvenzjoni preparat sew biex tgawdi l-​ikel spiritwali u s-​sħubija Kristjana.

Qabel il-​Konvenzjoni

² Dawk li tikkonduċi studju tal-​Bibbja magħhom u wħud oħrajn interessati, għandhom bżonn xi għajnuna biex jagħmlu arranġamenti persunali ħalli jattendu l-​konvenzjoni? Dak li jaraw u jisimgħu waqt li jkunu hemm jistaʼ jqanqalhom biex isiru adoraturi taʼ Jehovah. (1 Kor. 14:25) L-​anzjani għandhom ikunu jafu b’kulmin ikollu bżonn xi għajnuna bit-​trasport, b’mod partikulari l-​membri tal-​kongregazzjoni anzjani fl-​età. Bl-​imħabba dawn għandhom jaraw li l-​bżonnijiet tagħhom jiġu ssodisfati.​—Gal. 6:10.

³ Peress li d-​Dipartiment taʼ l-​Ewwel Għajnuna fil-​konvenzjoni qiegħed hemm biex jieħu ħsieb sitwazzjonijiet t’emerġenza biss, nissuġġerulkom li għall-​konvenzjoni ġġibu magħkom xi aspirina, faxex, pompi tan-​nifs, għajnuniet għad-​diġestjoni, u oġġetti simili, jekk taħsbu li se jkollkom bżonnhom. Jekk int jew xi ħadd għażiż għalik għandkom xi mard serju, bħal xi problema tal-​qalb, dijabete, jew riskju taʼ xi attakki, jekk jogħġobkom għall-​konvenzjoni ġibu l-​medikazzjoni meħtieġa biex tieħdu ħsieb dawn il-​bżonnijiet.

Matul il-​Konvenzjoni

⁴ Fil-​post tal-​konvenzjoni l-​bibien se jinfetħu kuljum fit–8:00 a.m. Tistaʼ żżomm il-​postijiet biss għal dawk tal-​familja immedjata tiegħek jew għall-​grupp li jkollok fil-​karozza. Kuljum hekk kif tkun se titlaq minn postok, jekk jogħġbok iċċekkja ħalli tiżgura li għandek l-​affarijiet tiegħek kollha.

⁵ Se titgħammed fil-​konvenzjoni distrettwali? Għas-​sessjoni tas-​Sibt fil-​għodu, sezzjoni mis-​siġġijiet se tkun riżervata għall-​kandidati tal-​magħmudija, u l-​attendants se jiggwidawk lejn dan il-​post speċifiku. Jekk jistaʼ jkun, jekk jogħġbok poġġi hemm qabel ma tibda s-​sessjoni. Miegħek ġib il-​Bibbja, il-​ktieb taʼ l-​għanjiet, xugaman, u malja diċenti. Qliezet tal-​jeans maqtugħin qosra, flokkijiet bil-​kliem fuqhom, u lbies simili ma jixirqux għal okkażjoni daqshekk dinjituża. L-​anzjani li jkunu qed jirrevedu l-​mistoqsijiet mill-​pubblikazzjoni Tagħlim Elementari tal-​Bibbja mal-​kandidati tal-​magħmudija għandhom jiżguraw li kull wieħed minnhom jifhem dawn il-​punti. Ladarba l-​magħmudija hija simbolu taʼ dedikazzjoni persunali lil Alla Jehovah, ma jkunx xieraq li l-​kandidati jżommu idejn xulxin waqt li jitgħammdu.

⁶ Għall-​benefiċċju tal-​ħin u s-​sempliċità, is-​Soċjetà talbitna nġibu l-​ikel tagħna stess għal kull ġurnata tal-​konvenzjoni. Il-​biċċa l-​kbira taʼ l-​aħwa segwew din id-​direzzjoni u sabu li wara li jitilqu għall-​pawsa taʼ nofsinhar, ikunu jistgħu joqogħdu bil-​qegħda mal-​familji tagħhom u jieklu dak li jkunu ġabu magħhom dakinhar. Huma qalu li l-​opportunità biex jistrieħu matul il-​pawsa taʼ nofsinhar u jqattgħu iktar ħin maʼ ħuthom kienet pjaċevoli.

⁷ Tistaʼ tkun volontier biex tgħin kuljum fit-​tindif tal-​post wara s-​sessjonijiet? Jew tistaʼ taħdem f’xi wieħed mid-​dipartimenti l-​oħrajn tal-​konvenzjoni? Jekk tistaʼ tgħin, jekk jogħġbok ejja sad-​Dipartiment tas-​Servizz taʼ Volontieri fil-​konvenzjoni. Tfal taħt is-​16-il sena jistgħu jaħdmu flimkien mal-​ġenituri jew maʼ xi adult responsabbli ieħor. M’għandniex xi ngħidu, kulħadd jistaʼ jgħin fit-​tindif tal-​post billi naraw li kull skart jinġabar u jintrema kif suppost.

⁸ Irċivejna gwidi eċċellenti dwar liema lbies u dehra huma addattati fil-​konvenzjonijiet tagħna. Per eżempju: Għandna direzzjoni dwar din il-​kwistjoni fl-​inserts taʼ Il-​Ministeru tas-​Saltna, għandna l-​istampi u r-​ritratti fil-​letteratura tagħna, u fuq kollox, għandna dak li Jehovah jgħidilna fil-​Bibbja. (Rum. 12:2; 1 Tim. 2:​9, 10) In-​nies jafu min aħna u għala nkunu nġbarna fl-​inħawi tagħhom. B’hekk, l-​ilbies u d-​dehra tagħna jagħtu xiehda qawwija waħedhom. Il-​biċċa l-​kbira tan-​nies taʼ Jehovah jagħtu eżempju tajjeb f’dan ir-​rigward. Minn żmien għal żmien, iżda, naraw li l-​ilbies u d-​dehra taʼ xi wħud li jattendu l-​konvenzjonijiet tagħna jirriflettu l-​ispirtu tad-​dinja. Kull tip taʼ lbies provokattiv jitfaʼ dubju serju fuq l-​individwu li jsostni li hu spiritwali. Dehra diċenti, nadifa, u pulita hija l-​iktar waħda attraenti. Għalhekk, il-​kapijiet tal-​familja għandhom jikkunsidraw bir-​reqqa dak li jkunu lebsin il-​membri tal-​familja tagħhom. Dan japplika wkoll meta ma nkunux fil-​post tal-​konvenzjoni. Il-​fatt li nilbsu l-​beġġ tagħna qabel u wara s-​sessjoni tal-​ġurnata jkompli jidentifikana maʼ Jehovah u l-​poplu nadif tiegħu.​—Qabbel Mark 8:38.

⁹ L-​għaref Sultan Salamun ġie ispirat josserva li “l-​bluha b’għeruqha fil-​qalb taʼ kull tifel” u “tifel mitluq għal riħu jagħmel għajb lil ommu.” (Prov. 22:15; 29:15) Waqt is-​sessjonijiet, Xhieda iżgħar li tħallew mingħajr superviżjoni, kienu taʼ distrazzjoni għall-​aħwa li kienu qed jipprovaw jibbenefikaw mill-​programm. Ladarba l-​ġenituri jridu jagħtu kont lil Jehovah għall-​kondotta taʼ wliedhom, omm jew missier jistgħu jkunu ċerti li t-​tfal qed iġibu ruħhom sew u qed jisimgħu l-​istruzzjonijiet taʼ Jehovah biss jekk ikunu bil-​qegħda ħdejhom. L-​attendants se javviċinaw lil kulmin ikun qed ifixkel u jitolbuh jieqaf milli jagħmel hekk, billi ġentilment ifakkruhom biex joqogħdu attenti għall-​programm.

¹⁰ In-​nies taʼ Jehovah minn dejjem kienu ġenerużi biex jikkontribwixxu għall-​interessi teokratiċi. (Eżo. 36:​5-7; 2 Kron. 31:10; Rum. 15:​26, 27) Il-​kontribuzzjonijiet volontarji tiegħek lejn ix-​xogħol mad-​dinja kollha jintużaw biex ikopru l-​ispejjeż assoċjati mal-​kiri taʼ faċilitajiet kbar fejn jinżammu l-​konvenzjonijiet. Jekk il-​kontribuzzjoni tiegħek tagħmilha permezz taʼ ċekk, jekk jogħġbok agħmlu pagabbli lis-​“Central Account of Jehovah’s Witnesses.”

¹¹ Bħala “dak li jikxef il-​misteri,” Jehovah ġiegħel li mijiet taʼ profeziji li twettqu eżattament u kompletament jiġu dokumentati fil-​Bibbja. (Dan. 2:​28, 47) Wegħdi grandjużi għad iridu jitwettqu. Il-​Konvenzjonijiet Distrettwali “Il-​Kelma Profetika t’Alla” għall-​1999 se jsaħħulek il-​fidi fil-​wegħdi t’Alla. Ismaʼ sew dak li jgħidlek Jehovah. Applika dak li se tara u tismaʼ​—fil-​ministeru, fil-​kongregazzjoni, u fil-​ħajja persunali tiegħek. Aħna nitolbu għall-​barka abbundanti taʼ Jehovah fuq l-​arranġamenti kollha tiegħek biex tattendi kull ġurnata taʼ din il-​festa rikka u spiritwali!