Kif Niżviluppaw l-Abbiltà li Nirraġunaw
1 Definizzjoni waħda tal-kelma “raġuni” hi “li titkellem maʼ ħaddieħor sabiex tinfluwenza l-azzjonijiet jew l-opinjonijiet tiegħu.” Sabiex ittejjeb l-effettività tiegħek fil-ministeru, int għandek bżonn tikkultiva l-abbiltà li tirraġuna maʼ dawk li tiltaqaʼ magħhom. (Atti 17:2-4) Imma kif tistaʼ tiżviluppaha din is-sengħa?
2 Din Tibda bil-Meditazzjoni: Meta tistudja l-veritajiet Bibliċi, int se ssibha t’għajnuna jekk tirrifletti fuq il-materjal. Jekk xi partijiet minnu jkunu jidhru ftit iktar komplikati, ħu l-ħin biex tagħmel xi ftit riċerka u timmedita fuq dak li tkun sibt. Ipprova ifhem b’mod ċar mhux biss l-ispjegazzjonijiet provduti imma wkoll ir-raġunijiet Skritturali għal dawk l-ispjegazzjonijiet.
3 Tinvolvi Preparazzjoni għall-Ministeru: Aħseb dwar kif kieku tispjega l-verità lil diversi tipi taʼ nies. Biex tqanqal l-interess, agħmel mistoqsija li ġġiegħel lil dak li jkun jaħseb. Iddetermina kif se tqabbel punt Skritturali u tirraġuna fuqu. Antiċipa xi oġġezzjonijiet li jistgħu jinħolqu, u aħseb dwar kif tistaʼ tiddiskutihom. Sib punt prinċipali li tistaʼ tapplika fil-pubblikazzjoni li tkun se toffri.
4 Segwi l-Eżempju taʼ Ġesù: Ġesù tana l-aqwa eżempju taʼ raġunar effettiv mill-Iskrittura. Sabiex tanalizza l-mod kif għallem, ikkunsidra r-rakkont misjub f’Luqa 10:25-37. Innota dan il-proċess: (1) Idderieġi l-attenzjoni lejn l-Iskrittura meta tkun se twieġeb il-mistoqsijiet tan-nies. (2) Stedinhom jesprimu ruħhom, u faħħarhom meta jagħmlu kummenti intelliġenti. (3) Oqgħod attent li tinżamm ċara l-konnessjoni bejn il-mistoqsija u l-Iskrittura. (4) Uża tixbieha li tappella għall-qalb biex tkun ċert li s-sinjifikat veru tat-tweġiba jiġi mifhum.—Ara t-Torri taʼ l-Għassa, taʼ l-1 taʼ Ġunju, 1986, paġni 17-18, paragrafi 8-10.
5 Uża l-Għodda li Ngħatatilna: Il-ktieb Reasoning From the Scriptures u l-ktejjeb Kif Nibdew u Nkomplu Diskussjonijiet Fuq il-Bibbja ġew pubblikati bħala manwali għall-ministeru taʼ l-għalqa. L-introduzzjonijiet, it-tweġibiet għal risposti intenzjonati li jwaqqfu l-konversazzjoni, u l-punti taʼ l-irraġunar tiegħu jgħinuna biex niżviluppaw l-abbiltà taʼ l-irraġunar. Il-ktieb Reasoning u l-ktejjeb Kif Nibdew u Nkomplu huma għodod imprezzabbli li dejjem għandna nġorruhom magħna fis-servizz u m’għandniex inżommu lura milli nużawhom meta jkollna diskussjonijiet Bibliċi. Irrevedi paġni 7-8 tal-ktieb biex tara kif tistaʼ tużah bl-aħjar mod possibbli.
6 Li tiżviluppa l-abbiltà taʼ l-irraġunar se jgħinek ittejjeb is-sengħa tiegħek fix-xogħol taʼ l-ippridkar u tat-tagħlim. Dan se jirriżulta f’barkiet għonja kemm għalik kif ukoll għal dawk li tiltaqaʼ magħhom fil-ministeru.