April—Żmien biex Inkunu Mħeġġin għall-​Għemil it-​Tajjeb!

¹ Hekk kif ikun qed joqrob uragan lejn inħawi popolati, jeħtieġ li n-​nies jiġu mwissijin b’urġenza dwar il-​periklu li jkun ġej. Iktar ma joqrob l-​uragan, iktar it-​twissijiet għandhom ikunu qawwijin. Għala? Għax il-​ħajjiet tan-​nies ikunu fil-​periklu! Forsi jkun hemm xi nies li ma semgħux it-​twissijiet li jkunu saru qabel. Oħrajn għandhom mnejn semgħu t-​twissijiet imma rrifjutaw li jieħdu azzjoni. L-​istess jgħodd għat-​twissija divina li aħna ġejna inkarigati nħabbru qabel ma “t-​tempesta” tar-​rabja ġusta t’Alla teqred kull traċċa taʼ din id-​dinja mill-​agħar. (Prov. 10:25) Eluf taʼ miljuni taʼ nies jinsabu fil-​periklu li jitilfu ħajjithom għal dejjem! It-twissija trid titħabbar. Aħna rridu nkunu ‘mħeġġin għall-​għemil it-​tajjeb.’—Titu 2:​11-14.

² L-​istaġun tal-​Mafkar, għal ħafna snin ilu jkun żmien speċjali mimli żelu fil-​ministeru għan-​nies taʼ Jehovah. Fir-​rebbiegħa taʼ l-​1939, l-​Informant, li kien joħroġ qabel ma kellna Il-​Ministeru tas-​Saltna, ipprovda dan l-​inkuraġġiment: “Billi r-​rebbiegħa hija magħna, kif ukoll it-​temp sabiħ, aħna nistennew li s-​sigħat fis-​servizz taʼ l-​għalqa tal-​pubblikaturi fil-​[kongregazzjoni] se jirdoppjaw, u li l-​ħin tal-​pijunieri jiżdied [mhux ħażin]. Ix-​xahar t’April fih ħames Ħdud. Fih ukoll ħames Sibtijiet. Uża kull Sibt u Ħadd matul April . . . bħala żmien taʼ xiehda speċjali.” L-​aħwa kellhom sfida kbira biex jilħqu din il-​mira 60 sena ilu! Din is-​sena, sewwa sew bħalma kien fl-​1939, ix-​xahar t’April fih ħames Sibtijiet u Ħdud. X’inhuma l-​pjanijiet tiegħek għal dan ix-​xahar? X’niżżilt fuq il-​kalendarju tiegħek għax-​xahar t’April 2000? Ippjana li jkollok sehem siewi fl-​għemil it-​tajjeb mal-​bqija tal-​poplu taʼ Jehovah matul dan ix-​xahar speċjali t’attività spiritwali miżjuda.

³ X’Qed Nittamaw li Nwettqu: L-​iktar jum importanti tas-​sena 2000 se jkun f’dan ix-​xahar. Huwa d-​19 t’April, l-​anniversarju tal-​mewt taʼ Ġesù. Ejja nagħmlu sforz speċjali sabiex nistiednu kemm jistaʼ jkun nies għall-​Mafkar. Bħalma ġie suġġerit ix-​xahar l-​ieħor, agħmel lista taʼ dawk kollha li għandhom mnejn jattendu għall-​Mafkar u ara li ma nsejt lil ħadd. Dawk li tistieden għandhom jinkludu kull pubblikatur inattiv, dawk li qed jistudjaw il-​Bibbja, iż-​żjajjar lura, dawk li qabel kienu jistudjaw, sħabek tax-​xogħol, sħabek fl-​iskola, il-​ġirien, il-​qraba, u oħrajn li taf. Dawk li jridu jattendu għandhom trasport biex jiġu? Jekk le, tistaʼ tgħinhom b’imħabba? F’dik il-​lejla tal-​Mafkar, ilkoll kemm aħna se jkollna l-​privileġġ li nilqgħu lil dawk li se jattendu. Wara l-​Mafkar, nistgħu nagħtu iktar għajnuna spiritwali lil uħud interessati bħal dawn.

⁴ Mod mill-​aħjar biex nuru lil Jehovah li tassew napprezzaw dak kollu li għamel għalina huwa billi nkunu ‘mħeġġin għall-​għemil it-​tajjeb’ matul il-​jiem taʼ qabel u wara l-​Mafkar. Billi jdum iktar biex jidlam u t-​temp ikun isbaħ, ħafna minna se nkunu nistgħu nżidu l-​isforzi tagħna fl-​attività taʼ l-​evanġelizzar. Jekk se tkun pijunier awżiljarju, int żgur li trid tagħti mill-​aħjar tiegħek biex tqattaʼ 50 siegħa jew iktar fil-​ministeru. (Mt. 5:37) Żomm qrib maʼ l-​iskeda li għamilt fil-​bidu tax-​xahar. (Koħ. 3:1; 1 Kor. 14:40) Jalla aħna, il-​pubblikaturi l-​oħrajn, nagħmlu dak li nistgħu sabiex nagħtu l-​appoġġ tagħna lill-​pijunieri kollha, kemm billi ninkuraġġuhom u kemm billi naħdmu magħhom fis-​servizz taʼ l-​għalqa. (Qabbel it-​2 Slaten 10:​15, 16.) Jekk aħna niżirgħu b’ħeġġa matul April, nistgħu nistennew ferħ kbir u barka mingħand Jehovah. (Mal. 3:10) Forsi dan kollu jservi bħala l-​pass li jmiss biex nagħmlu x-​xogħol taʼ pijunier awżiljarju kull xahar jew biex insiru pijunieri regulari. Jalla nibqgħu nuru din il-​ħeġġa biex inżidu fl-​attività spiritwali mhux biss matul April imma wkoll matul ix-​xhur taʼ wara hekk kif inkomplu nkunu pubblikaturi regulari tas-​Saltna.

⁵ Mingħajr ebda dubju, f’dan ix-​xahar eluf mill-​poplu taʼ Jehovah se jibdew iktar studji tal-​Bibbja fid-​djar. Tixtieq tibda wieħed? Itlob speċifikament għal studju, u aħdem fi qbil mat-​talb tiegħek. Int tistaʼ tibqaʼ ċert li Jehovah se japprezza t-​talbiet umlin tiegħek għall-​għajnuna biex issib lil xi ħadd taʼ qalb onesta ħalli tgħallmu.—1 Ġw. 3:22.

⁶ Se nuru mod wieħed kif tistaʼ tavviċina lin-​nies. Dan kien taʼ suċċess meta ġie provat fis-​servizz taʼ l-​għalqa u ntuża biex jinbdew konversazzjonijiet. Tibda billi tistaqsi: “Taħseb li l-​vjolenza kollha li hemm fl-​iskejjel pubbliċi hija ħtija tax-​Xitan, jew inkella tiġi minħabba n-​nuqqas taʼ taħriġ mill-​ġenituri?” Agħti ċans għal tweġiba. Jekk l-​inkwilin jgħid “ix-​Xitan,” aqra Apokalissi 12:​9, 12, u enfasizza l-​irwol tax-​Xitan f’li jqanqal l-​inkwiet fid-​dinja. Imbagħad iftaħ il-​browxer X’Jirrikjedi f’lezzjoni nru. 4, u staqsi lill-​inkwilin jekk qatt ħasibx minfejn ġie x-​Xitan. Kompli aqra u ddiskuti l-​ewwel żewġ paragrafi. Jekk l-​inkwilin jagħżel “nuqqas taʼ taħriġ mill-​ġenituri” bħala r-​raġuni għall-​vjolenza fl-​iskejjel, aqra t-​2 Timotju 3:​1-3 u iġbed l-​attenzjoni lejn il-​karatteristiċi tant ċari li jaħtu għal din il-​problema. Imbagħad iftaħ il-​browxer X’Jirrikjedi f’lezzjoni nru. 8, aqra paragrafu 5, u kompli bid-​diskussjoni. Jekk jirnexxilek tagħmel appuntament biex tmur lura, int tistaʼ tkun qed twitti t-​triq għal studju regulari tal-​Bibbja maʼ l-​inkwilin. Fiż-​żjara taʼ wara, staqsih jekk jafx lil xi ħaddieħor li jistaʼ jkun interessat f’li jismaʼ dak li qed jitgħallem.

⁷ Mod ieħor biex inkunu ‘mħeġġin għall-​għemil it-​tajjeb’ matul April hu li nieħdu sehem f’diversi aspetti taʼ l-​ippridkar. Ġieli ħsibt li tagħti xiehda f’xi ġnien jew f’xi post taʼ l-​ipparkjar? Meta tkun qed tistenna l-​karozza tal-​linja? Jew tixtieq tipprova tagħti xiehda bit-​telefon, fit-​triq, jew fit-​territorju tan-​negozju? Għax ma tpoġġix dawn il-​ħsibijiet fil-​prattika dan ix-​xahar? Jehovah se jgħinek tagħmel il-​ħila neċessarja. (Atti 4:31; 1 Tess. 2:2b) Forsi tkun tistaʼ tagħmel xi appuntament biex taħdem maʼ xi pijunier jew pubblikatur li għandu l-​esperjenza f’dawn l-​aspetti tal-​ministeru.

⁸ Kulmin jixtieq iżid is-​sehem tiegħu fix-​xogħol tax-​xandir irid jipparteċipa fix-​xiehda informali. Taʼ spiss, kulma jeħtieġ hu li tinvolvi persuna f’konversazzjoni bħala ħbieb. Sempliċement qajjem suġġett li kulħadd jinteressa ruħu fih, forsi billi tuża dak il-​mod li semmejna f’paragrafu 6. Stinka biex tuża tajjeb saħansitra l-​ftit ħin li jistaʼ sempliċement jinħela fix-​xejn. Bħalma ngħidu, bil-​qatra l-​qatra timtela l-​ġarra. Allura, għaliex ma tiħux vantaġġ saħansitra minn ħames minuti, għaxar minuti, jew kwarta biex tagħti xiehda informali?

⁹ Żmien għal Riflessjoni: Ftakar fil-​punti tajbin ferm li kienu ħarġu fid-​drama tas-​sena li għaddiet fil-​Konvenzjoni Distrettwali “Il-​Kelma Profetika t’Alla.” Id-​drama, intitolata Napprezzaw il-​Wirt Spiritwali Tagħna, ġagħlitna naħsbu bir-​reqqa dwar id-​differenza bejn Ġakobb u Eżaw. Eżaw qal li bħal Ġakobb, hu kellu interess għall-​affarijiet spiritwali, imma l-​għemejjel t’Eżaw ma kinux juruh dan. (Ġen. 25:​29-34) Xi twissija qawwija hi din għalina! Bħal Ġakobb, ejja nkunu lesti biex nitħabtu, saħansitra nissaraw, għall-​barka taʼ Jehovah. (Ġen. 32:25-30 [32:​24-29, NW]) Għax ma nużawx ix-​xahar t’April u x-​xhur kollha taʼ wara biex inġeddu l-​ħeġġa tagħna, billi qatt ma nonqsu li napprezzaw il-​wirt spiritwali meraviljuż li għandna?

¹⁰ “Il-​Jum il-​kbir tal-​Mulej fil-​qrib! Fil-​qrib, u riesaq b’ħeffa li ma bħalha!” (Sof. 1:14) L-​aħbar tajba tas-​Saltna trid titħabbar. Hemm il-​ħajjiet fil-​periklu! Jalla dan ix-​xahar ikun imbierek speċjalment għall-​poplu taʼ Jehovah kollu hekk kif magħqudin nuru li aħna ‘mħeġġin għall-​għemil it-​tajjeb.’

[Kaxxa f’Paġna 4]

Tfakkiriet għall-​Mafkar

Din is-​sena l-​osservanza tal-​Mafkar se taħbat nhar l-​Erbgħa, id-​19 t’April. L-​anzjani għandhom jagħtu attenzjoni għall-​affarijiet li ġejjin:◼ Meta tistabbilixxu l-​ħin tal-​laqgħa, kunu ċerti li l-​emblemi ma jitqassmux qabel inżul ix-​xemx.

◼ Kulħadd, inkluż il-​kelliemi, għandu jinforma ruħu dwar il-​ħin u l-​post eżatt taʼ l-​osservanza.

◼ Għandu jinkiseb u jitlesta t-​tip xieraq taʼ ħobż u nbid.—Ara t-​Torri taʼ l-​Għassa tal-​15 taʼ Marzu, 1985, paġna 17.

◼ Platti, tazzi, u mejda u tvalja addattati għandhom jinġiebu fis-​sala u jitpoġġew f’posthom minn qabel.

◼ Is-​Sala tas-​Saltna jew xi post ieħor fejn se ssir il-​laqgħa jridu jitnaddfu bir-​reqqa minn qabel.

◼ L-​attendants u dawk li se jservu jridu jintgħażlu u jingħataw istruzzjonijiet bil-​quddiem rigward l-​inkarigi tagħhom u l-​proċedura xierqa.

◼ Għandhom isiru arranġamenti biex xi ħadd iservi lil dawk l-​uħud mill-​midlukin li ma jkunux jifilħu u ma jistgħux ikunu preżenti.

◼ Meta iktar minn kongregazzjoni waħda hija pjanata li tuża l-​istess Sala tas-​Saltna, għandu jkun hemm koordinazzjoni tajba bejn il-​kongregazzjonijiet sabiex jevitaw iffollar bla bżonn fl-​intrata jew fid-​daħla, fuq il-​bankini, u fil-​post taʼ l-​ipparkjar.