Kaxxa għall-​Mistoqsija

◼ Min għandu jgħid it-​talba fil-​laqgħat tal-​kongregazzjoni?

It-​talb tal-​kongregazzjoni huwa parti vitali tal-​qima tagħna. Li wieħed jirrappreżenta lil oħrajn quddiem Jehovah huwa privileġġ prezzjuż u responsabbiltà serja. Meta jqisu l-​importanza taʼ dan, l-​anzjani għandhom bżonn jużaw id-​dehen meta jiddeċiedu liema aħwa rġiel jikkwalifikaw biex jgħidu t-​talba fil-​laqgħat. L-aħwa rġiel mgħammdin li jirrappreżentaw lill-​kongregazzjoni jridu jkunu ministri Kristjani maturi magħrufin bħala li huma eżemplari u li għandhom ir-​rispett tal-​kongregazzjoni. It-​talb riverenzjali u rispettabbli tagħhom għandu juri li għandhom relazzjoni mill-​aħjar m’Alla Jehovah. L-artiklu “Praying Before Others With a Humble Heart” fil-​ħarġa taʼ The Watchtower tal-​15 taʼ Mejju, 1986, jenfasizza l-​prinċipji importanti li huma t’għajnuna speċjali għal dawk li jitolbu pubblikament għan-​nom tal-​kongregazzjoni.

L-anzjani mhux se jqabbdu lil xi ħu biex jgħid it-​talba jekk huwa magħruf bħala wieħed li għandu mġiba dubjuża jew mhux serju. M’għandux jiġi magħżul xi ħu li jħobb ikun bil-​buli jew inklinat li juża t-​talb pubbliku bħala mezz biex jesponi xi differenzi persunali. (1 Tim. 2:8) Anki jekk ikun hemm xi ħu adolexxent mgħammed, l-​anzjani jridu jiddeterminaw jekk għandux il-​maturità spiritwali biex jitlob għan-​nom tal-​kongregazzjoni.—Atti 16:1, 2.

Xi kultant fil-​laqgħat għas-​servizz taʼ l-​għalqa, għandu mnejn ikun neċessarju li xi oħt mgħammda tgħid it-​talba jekk ma jkunx hemm ħu kwalifikat biex jirrappreżenta lill-​grupp. Ikollha bżonn tilbes għata xierqa fuq rasha. Jekk f’ċerti laqgħat għas-​servizz x’aktarx li mhux se jkun hemm xi ħu kwalifikat, l-​anzjani għandhom jinkarigaw lil oħt kwalifikata biex tieħu t-​tmexxija.

Id-drawwa hi li ċ-​chairman tal-​Laqgħa Pubblika jiftaħ bit-​talba. Madankollu, waqt laqgħat oħra tal-​kongregazzjoni, meta jkun hemm ħafna iktar aħwa rġiel kwalifikati disponibbli, jistaʼ jiġi mistieden xi ħadd minnhom biex jiftaħ jew jagħlaq bit-​talba minflok il-​ħu li jkun se jiftaħ il-​laqgħa jew dak il-​wieħed inkarigat bl-​aħħar parti. Ikun min ikun, il-​ħu li jkun se jiġi mistieden biex jitlob fil-​laqgħa tal-​kongregazzjoni għandu jiġi informat minn qabel sabiex ikun jistaʼ jilħaq jaħseb x’se jgħid. Imbagħad, ikun jistaʼ jgħid talba bil-​ħeġġa, li tkun faċli għal kulħadd biex isegwiha, u xierqa għal dik il-​laqgħa partikulari.

Talb bħal dan m’għandux għalfejn ikun twil. Meta ħu jgħid talba fil-​pubbliku, normalment jinftiehem aħjar jekk iqum bil-​wieqfa, jekk jesprimi lilu nnifsu b’vuċi għolja biżżejjed, u jekk jitkellem ċar. B’hekk, dawk kollha miġburin se jkunu jistgħu jisimgħu t-​talba sew u fi tmiemha jgħidu “Amen” mill-​qalb!—1 Kron. 16:36; 1 Kor. 14:16.