“Kif Nistaʼ . . . Jekk xi Ħadd Ma Jurinix?”

¹ Meta l-​evanġelizzatur Filippu staqsa lill-​ewnuku Etjopjan jekk kienx qed jifhem dak li kien qed jaqra mill-​Kelma t’Alla, ir-​raġel wieġbu: “Kif nistaʼ nifhem jekk xi ħadd ma jurinix?” Filippu kollu ferħan, għenu jifhem l-​aħbar tajba dwar Ġesù, u dan irriżulta f’li r-​raġel tgħammed minnufih. (Atti 8:26-38) Filippu kien qed jobdi l-​inkarigu mingħand Ġesù biex ‘jagħmel dixxipli mill-​ġnus kollha, jgħammidhom u jgħallimhom.’—Mt. 28:19, 20.

² Aħna rridu nobdu l-​inkarigu biex nagħmlu dixxipli, sewwa sew bħalma għamel Filippu. Madankollu, it-​tip taʼ progress spiritwali mgħaġġel li għamel l-​ewnuku Etjopjan ma tantx isir fost in-​nies li nkunu qed nistudjaw il-​Bibbja magħhom. Dak ir-​raġel, proselita Lhudi li kien midħla sew taʼ l-​Iskrittura, kellu qalb miftuħa u kulma kellu bżonn kien li jaċċetta l-​fatt li Ġesù kien il-​Messija mwiegħed. Hija taʼ sfida jekk dawk li nistudjaw magħhom ma jkunux familjari mal-​Bibbja, ikunu ġew imqarrqin b’tagħlim reliġjuż falz, jew ikunu mgħobbijin bi problemi persunali u diffiċli. X’se jgħinna biex ikollna suċċess f’li nuru lill-​istudenti tal-​Bibbja t-​triq għad-​dedikazzjoni u l-​magħmudija?

³ Agħraf il-​Bżonnijiet Spiritwali taʼ l-​Istudent tal-​Bibbja: L-​insert tal-​Ministeru tas-​Saltna t’Awissu 1998 iddiskuta dwar it-​tul taʼ żmien li nistgħu ndumu nistudjaw man-​nies, billi nużaw il-​browxer X’Jirrikjedi u l-​ktieb Għarfien. Kien fih din id-​direzzjoni: “Hemm bżonn li niddeterminaw il-​pass taʼ l-​istudju skond iċ-​ċirkustanzi u l-​abbiltà taʼ l-​istudent. . . . Ma rridux li minħabba l-​għaġla nissagrifikaw il-​fehma ċara li jrid ikollu l-​istudent. Kull student għandu bżonn bażi solida għall-​fidi ġdida li sab fil-​Kelma t’Alla.” Għaldaqstant, huwa rikkmandat li ma tgħaddix il-​materjal mill-​ktieb Għarfien bl-​għaġla bil-​ħsieb li tipprova tlestih f’sitt xhur. Forsi jirrikjedi ħafna iktar minn sitt xhur biex tgħin lil xi individwi jagħmlu progress sal-​punt tal-​magħmudija. Hekk kif tikkonduċi l-​istudju ġimgħa wara l-​oħra, ħu l-​ħin li hemm bżonn biex tgħin lill-​istudent jifhem u jaċċetta dak li qed jitgħallem mill-​Kelma t’Alla. F’xi każi, ikun hemm bżonn ġimagħtejn jew tlieta biex tkopri kapitlu wieħed mill-​ktieb Għarfien. Dan se jħallilek il-​ħin biex taqra u tiċċara ħafna mill-​iskritturi ċitati.—Rum. 12:2.

⁴ Madankollu, xi ngħidu jekk meta jitlesta l-​ktieb Għarfien, int tinduna li l-​istudent għadu ma fehemx il-​verità għalkollox jew li hu għadu m’huwiex motivat bis-​sħiħ biex jieħu waqfa għall-​verità u jiddedika ħajtu lil Alla? (1 Kor. 14:20) X’tistaʼ tagħmel iktar sabiex tiggwidah lejn it-​triq li twassal għall-​ħajja?—Mt. 7:14.

⁵ Issodisfa l-​Bżonnijiet Spiritwali taʼ l-​Istudent tal-​Bibbja: Jekk tara li dak li jkun qed jagħmel progress, għalkemm bil-​mod, u li qed jiżviluppa apprezzament għal dak li qed jitgħallem, kompli l-​istudju tal-​Bibbja bi ktieb ieħor wara li tlesti l-​browxer X’Jirrikjedi u l-​ktieb Għarfien. Dan mhux bilfors li jkun neċessarju f’kull każ, imma meta jkun meħtieġ, kompli l-​istudju bil-​ktieb Magħqudin fil-​Qima. Il-​biċċa l-​kbira tal-​pubblikaturi għandhom kopja persunali taʼ din il-​letteratura li tkun tistaʼ tużaha f’każ li l-​kongregazzjoni ma jkollhiex il-​provvista tagħha. Fi kwalunkwe każ, l-​ewwel iridu jiġu studjati l-​browxer X’Jirrikjedi u l-​ktieb Għarfien. L-​istudju tal-​Bibbja, iż-​żjajjar lura, u l-​ħin li tqattaʼ biex tkompli l-​istudju għandhom jingħaddu u jiġu rapportati, anki jekk l-​istudent jilħaq jitgħammed qabel ma jitlesta t-​tieni ktieb.

⁶ Ifisser dan li dawk li tgħammdu ftit ilu imma laħqu studjaw ktieb wieħed biss għandhom jerġgħu jirċievu għajnuna biex jistudjaw it-​tieni ktieb? Mhux bilfors. Madankollu, forsi huma saru inattivi jew m’għamlux progress fil-​verità, u jistgħu jħossuhom li għandhom bżonn għajnuna persunali biex japplikaw iktar il-​verità f’ħajjithom. Għandu jiġi konsultat l-​indokratur tas-​servizz qabel ma jinbeda xi studju mill-​ġdid maʼ pubblikatur mgħammed. Madankollu, jekk taf lil xi wħud li fil-​passat studjaw il-​ktieb Għarfien imma qatt m’għamlu progress għad-​dedikazzjoni u l-​magħmudija, int tistaʼ tieħu l-​inizjattiva biex tara jekk jixtiqux li jerġgħu jaqbdu l-​istudju tagħhom tal-​Bibbja.

⁷ Hija marka taʼ l-​imħabba Kristjana li nagħtu attenzjoni mill-​qrib u persunali lil kull persuna interessata li nistudjaw magħha. L-​objettiv tagħna hu li ngħinu lill-​istudent jikseb dehen akbar fil-​verità tal-​Kelma t’Alla. Imbagħad, hu jkun jistaʼ jieħu waqfa definita għall-​verità, ibbażata fuq fehma tajba, u jiddedika ħajtu lil Jehovah, billi jissimbolizza dik id-​dedikazzjoni permezz tal-​magħmudija taʼ l-​ilma.—Salm 40:9 [40:8, New World Translation]; Efes. 3:17-19.

⁸ Tiftakar x’ġara wara li l-​ewnuku Etjopjan tgħammed? “Baqaʼ sejjer fi triqtu kollu ferħan” bħala dixxiplu ġdid taʼ Ġesù Kristu. (Atti 8:39, 40) Jalla aħna u dawk li nuruhom b’suċċess it-​triq tal-​verità, insibu ferħ kbir f’li naqdu lil Alla Jehovah—issa u għal dejjem!