“Ħdimna t-​Territorju Tagħna Kemm-il Darba!”

¹ Qatt ħassejt li t-​territorju tiegħek tant ilu jinħadem li fih m’għadx baqaʼ wħud bħal nagħaġ? Forsi inti ħsibt: ‘Naf kif se jwiġbuna n-​nies. Għala għandna nibqgħu mmorru lura għand min m’huwiex interessat?’ Huwa minnu li ħafna territorji jinħadmu taʼ spiss. Madankollu, għandna nħarsu lejn dan b’mod pożittiv u mhux negattiv. Għala? Innota l-​erbaʼ raġunijiet imniżżlin hawn taħt.

² It-​Talb Tagħna Ġie Mwieġeb: Ġesù qal: “Il-​ħsad huwa kbir, imma l-​ħaddiema ftit. Itolbu mela lil Sid il-​ħsad biex jibgħat ħaddiema għall-​ħsad tiegħu.” (Lq. 10:2) Ilna nitolbu bil-​ħniena għal għaxriet taʼ snin lil Jehovah biex jagħtina għajnuna akbar. F’ħafna pajjiżi, issa għandna l-​ħaddiema li kellna bżonn, u qed inkopru t-​territorju iktar spiss. M’għandux il-​fatt li Jehovah semaʼ t-​talb tagħna jagħmilna ferħanin?

³ Il-​Persistenza Ġġib Frott Tajjeb: Anki f’territorji li jinħadmu taʼ spiss, in-​nies qed iwieġbu b’mod favorevoli għall-​messaġġ tas-​Saltna u qed jiksbu l-​għarfien tal-​verità. Għalhekk, aħna rridu nibqgħu mmorru darba wara l-​oħra bit-​tama li nsibu iktar uħud taʼ qalb onestà. (Is. 6:​8-​11) Bħalma għamlu d-​dixxipli bikrin taʼ Ġesù, trid tmur kontinwament għand in-​nies fit-​territorju assenjat lilek, filwaqt li tistinka biex tqajjem l-​interess tagħhom fis-​Saltna t’Alla.​—Mt. 10:​6, 7.

⁴ Fil-​Portugall ħafna kongregazzjonijiet ikopru t-​territorju tagħhom kull ġimgħa, iżda xorta għadhom isibu wħud bħal nagħaġ. Oħt partikulari għandha attitudni pożittiva ferm. Hi tgħid: “Qabel ma nitlaq għall-​ministeru kull fil-​għodu, nitlob lil Jehovah biex jgħinni nsib lil xi ħadd interessat f’li jistudja l-​Bibbja.” Darba waħda hi organizzat studju għal xi wħud li kienu jaħdmu f’ħanut tax-​xagħar. Iktar tard, però, persuna waħda biss ġiet għall-​istudju. Dik il-​persuna qaltilha: “L-​oħrajn m’humiex interessati, imma jien iva.” Wara xahar din il-​persuna stess kienet diġà qed tikkonduċi żewġ studji tal-​Bibbja. Ftit wara tgħammdet, u iktar tard bdiet taqdi fis-​servizz bħala pijuniera!

⁵ Ix-​Xogħol Qed Isir: L-​aħbar tajba qed tixxandar, bħalma bassar Ġesù li kellu jiġri. (Mt. 24:14) Anki f’postijiet fejn in-​nies ma ‘jridux jisimgħu minna,’ huma qed jiġu mwissijin permezz taʼ l-​attività taʼ l-​ippridkar. Aħna nistennew li xi wħud ma jilqgħuniex tajjeb jew saħansitra jiħduha kontra l-​verità. Madankollu, dawn xorta jridu jiġu avżati bix-​xieraq dwar il-​ġudizzju li ġej dalwaqt mingħand Jehovah.​—Eżek. 2:​4, 5; 3:​7, 8, 19.

⁶ Għadna Ma Spiċċajniex Għalissa: Mhux f’idejna li niddeċiedu meta għandu jieqaf ix-​xogħol taʼ l-​ippridkar. Jehovah jaf eżatt meta għandu jispiċċa. Hu jaf jekk hemmx xi nies fit-​territorju tagħna li għad iridu jwieġbu għall-​aħbar tajba. Illum, xi nies jgħidulna li m’humiex interessati, iżda bidliet drastiċi f’ħajjithom, bħal per eżempju telf taʼ impjieg, mard serju, jew il-​mewt taʼ xi ħadd maħbub, jistgħu jġagħluhom biex darb’oħra jkunu iktar lesti li jilqgħuna tajjeb. Minħabba l-​preġudizzju jew sempliċement għax ikunu mħabbtin wisq biex jisimgħuna, ħafna nies qatt ma semgħu verament dak li aħna nippridkaw. Nistgħu nqanqluhom biex jagħtu kas u jisimgħu jekk fiż-​żjajjar regulari tagħna nkunu dħulin magħhom.

⁷ Hemm dawk li f’dawn l-​aħħar snin kibru u issa għandhom il-​familji tagħhom stess, u għalhekk qed jieħdu l-​ħajja iktar bis-​serjetà u jistaqsu mistoqsijiet li l-​Kelma t’Alla biss tistaʼ tweġibhom. Omm żagħżugħa stiednet lil tnejn mix-​Xhieda d-​dar għandha u qaltilhom: “Meta kont għadni tifla, qatt ma stajt nifhem għala ommi kienet tkeċċi lix-​Xhieda taʼ Jehovah u tgħidilhom li ma kinitx interessata, meta kulma riedu kien li jkellmuha fuq il-​Bibbja. Jien kont iddeċidejt li meta nikber, niżżewweġ, u jkolli d-​dar tiegħi, nistieden lix-​Xhieda taʼ Jehovah għandi ħalli jispjegawli l-​Bibbja.” Hekk għamlet, b’ferħ għax-​Xhieda li marru jżuruha.

⁸ Tistaʼ Tkun Iktar Effettiv? Jekk insibuha diffiċli biex naħdmu t-​territorju spiss, mhux dejjem ikun tort tan-​nies li mmorru għandhom. Xi kultant inkunu aħna stess. Immorru aħna bi ħsibijiet negattivi? Dan jistaʼ jeffettwalna l-​attitudni tagħna u wisq probabbli anki t-​ton taʼ leħinna u l-​espressjoni taʼ wiċċna. Kun pożittiv u żomm tbissima fuq wiċċek. Ipprova metodi ġodda taʼ kif titkellem. Biddel il-​preżentazzjoni tiegħek, u stinka biex ittejjibha. Forsi tistaʼ tbiddel il-​mistoqsija li tibda biha jew iddaħħal skrittura differenti fil-​konversazzjoni. Staqsi lill-​aħwa l-​oħra dwar x’sabu li kien taʼ suċċess huma u jaħdmu t-​territorju. Aħdem maʼ pubblikaturi u pijunieri differenti fuq is-​servizz, u innota x’inhu dak li jagħmel il-​ministeru tagħhom wieħed effettiv.

⁹ Ix-​xogħol taʼ l-​ippridkar tas-​Saltna għandu l-​approvazzjoni u l-​barka taʼ Jehovah, u meta nieħdu sehem fih inkunu qed nagħtu prova taʼ l-​imħabba tagħna lejh u lejn għajrna. (Mt. 22:37-​39) Mela ejja nkomplu xogħolna sakemm jitlesta, filwaqt li naħdmu t-​territorju darba wara l-​oħra mingħajr ma negħjew.