Żomm il-Ħin Liberu f’Postu
1 F’dawn il-jiem diffiċli, ilkoll kemm aħna għandna bżonn naqtgħu mir-rutina kultant. Ċertu ammont taʼ rikreazzjoni huwa xieraq. Madankollu, ħafna ħin użat għas-serħan, id-divertiment, u okkażjonijiet soċjali jistaʼ jġiegħel lil persuna tnaqqas il-pass u tqattaʼ ħafna inqas ħin f’attivitajiet spiritwali. Għandna nżommu l-ħin liberu f’postu. (Mt. 5:3) Dan kif jistaʼ jsir? Billi nsegwu l-parir li hemm f’Efesin 5:15-17.
2 Poġġi Limiti: Pawlu kiteb li l-Kristjani għandhom “iqisu sewwa” kif jgħixu ħajjithom billi jużaw l-għerf. Hemm bżonn taʼ moderazzjoni u rażna sabiex inpoġġu limitu fuq il-ħin liberu, u nżommuh għal dak li hu neċessarju. Nagħmlu tajjeb jekk naħsbu bis-serjetà dwar il-mod kif inqattgħu l-ħin liberu tagħna. Ir-rikreazzjoni għandha tkun taʼ benefiċċju għalina u mhux tħallina nħossuna qisna ħlejna l-ħin tagħna jew għajjenin mejta. Jekk nispiċċaw inħossuna vojta, bla sodisfazzjon, u wkoll ħatja wara li nieħdu sehem f’xi attività, dan jurina li għandna bżonn nagħmlu xi aġġustamenti fl-użu tal-ħin tagħna.
3 Kun Raġunevoli: Pawlu ta l-parir dwar li ‘ngħożżu ż-żmien’ biex nużawh fl-iktar affarijiet importanti tal-ħajja, billi ma nsirux bla raġuni. Il-Kristjani dedikati ma jistgħux jagħtu prijorità f’ħajjithom lill-ħin liberu. Għalkemm il-mistrieħ u l-passatempi jistgħu jirrifreskawna fiżikament, is-sors taʼ l-enerġija spiritwali huwa l-forza attiva t’Alla. (Is. 40:29-31) Aħna nirċievu l-ispirtu tiegħu f’attivitajiet teokratiċi—fl-istudju tal-Bibbja, fl-attendenza għal-laqgħat tal-kongregazzjoni, meta nieħdu sehem fis-servizz taʼ l-għalqa—u mhux permezz tar-rikreazzjoni.
4 Agħmel il-Prijoritajiet: Pawlu ta l-istruzzjoni lill-Kristjani biex ‘ifittxu x’inhi r-rieda tal-Mulej.’ Ġesù għallem li l-attivitajiet tagħna għandhom ikunu b’tali mod li s-Saltna t’Alla tiġi l-ewwel f’ħajjitna. (Mt. 6:33) Huwa imperattiv li l-ewwel nagħmlu l-affarijiet li se jippermettulna ngħixu skond id-dedikazzjoni tagħna lil Jehovah. Wara dan, il-ħin liberu jkun jistaʼ jinżamm f’postu. Meta l-ħin liberu nużawh b’dan il-mod, se jħalli effett tajjeb, u se nieħdu iktar pjaċir bih.—Koħ. 5:11 (5:12, NW).