Qiegħed Ikun t’Ostaklu għall-​Ippridkar?

¹ Ħafna nies jgħixu ħajja mgħaġġla. Ix-​Xhieda taʼ Jehovah huma fost dawk li l-​iktar għandhom ħajja mgħaġġla—jistudjaw il-​Kelma t’Alla, jattendu għal-​laqgħat tal-​kongregazzjoni, u jieħdu sehem fis-​servizz taʼ l-​għalqa. Barra minn hekk, aħna okkupati bix-​xogħol sekulari, ix-​xogħol tad-​dar jew taʼ l-​iskola, u ħafna responsabbiltajiet oħrajn, li kollha jieħdu l-​ħin. Dan hu speċjalment taʼ sfida għall-​kapijiet tal-​familja.

² Minħabba li l-​qagħda ekonomika m’hijiex tajba f’ħafna postijiet, il-​kapijiet tal-​familji jistaʼ jkollhom jaħdmu iebes u għal ħinijiet twal sabiex jaqilgħu l-​għajxien tagħhom. Meta x-​xogħlijiet sekulari ibsin jiħdulhom il-​biċċa l-​kbira mill-​ħin u l-​enerġija tagħhom, ftit se jibqgħalhom għax-​xogħol taʼ l-​ippridkar. Minħabba li għandhom l-​obbligu biex jipprovdu materjalment għall-​familji tagħhom, xi wħud iħossu li jistaʼ jkollhom biss sehem limitat fil-​ministeru. (1 Tim. 5:8) Veru, illum hemm ħafna pressjonijiet involuti sabiex dak li jkun jikseb il-​bżonnijiet tal-​ħajja. Iżda x-​xogħol sekulari taʼ dak li jkun m’għandux isir ostaklu għall-​ippridkar taʼ l-​aħbar tajba. (Mk. 13:10) B’hekk, nagħmlu sew jekk neżaminaw f’liema sitwazzjoni ninsabu verament.

³ Peress li s-​sura taʼ din id-​dinja qiegħda dejjem tinbidel, kap taʼ familja jistaʼ jitħajjar biex iqattaʼ ammont taʼ ħin esaġerat fuq ix-​xogħol, bl-​għan li jżid il-​finanzi tiegħu u jwarrabhom għal meta tinqalaʼ xi kriżi mhux mistennija. (1 Kor. 7:31) Żjieda fix-​xogħol sekulari tistaʼ tidher li qed tgħinek tikseb iżjed affarijiet materjali jew ikollok iktar opportunitajiet għar-​rikreazzjoni u divertiment. Iżda se jagħmel dan lill-​familja iktar hienja u kuntenta jekk minħabba f’hekk jitnaqqas il-​ħin mill-​affarijiet spiritwali u mill-​attendenza regulari tal-​laqgħat? Żgur li rridu nevitaw kwalunkwe ħaġa li se tpoġġi fil-​periklu l-​ispiritwalità tagħna. Jekk nagħtu kas il-​parir taʼ Ġesù biex ‘inġemmgħu teżori fis-​sema’ u ‘nistagħnew quddiem Alla’ nkunu qed nieħdu t-​triq għaqlija.​—Mt. 6:​19-​21; Lq. 12:15-​21.

⁴ Fittex l-​Interessi tas-​Saltna l-​Ewwel: Ġesù għallem lis-​segwaċi tiegħu biex ipoġġu l-​affarijiet spiritwali l-​ewwel u qabel kollox. Hu ħeġġiġhom: “Toqogħdux tinkwetaw ruħkom u tgħidu, ‘X’se nieklu?’ jew ‘X’se nixorbu?’ jew ‘X’se nilbsu?’” Għala qal hekk? Hu spjega: “Missierkom li hu fis-​smewwiet jaf li dan kollu teħtiġuh.” Jekk aħna verament konvinti minn dan, m’hu se jkun hemm l-​ebda ostaklu li se jżommna milli nagħmlu dak li Ġesù qal wara: “Mela fittxu l-​ewwel is-​Saltna u l-​ġustizzja taʼ Alla, u dan [il-bżonn materjali] kollu jingħatalkom ukoll.” Alla se jieħu ħsieb taʼ dan! (Mt. 6:​31-​33) Dan żgur li m’huwiex iż-​żmien li noqogħdu naljenaw rasna minħabba ansjetà żejda biex niksbu l-​għajxien jew minħabba l-​ġibda li nfittxu ħajja komda finanzjarjament f’sistema t’affarijiet li dalwaqt se tgħaddi.​—1 Pt. 5:7; 1 Ġw. 2:​15-​17.

⁵ L-​iskop ewlieni tax-​xogħol sekulari huwa li jipprovdi għall-​bżonnijiet materjali taʼ dak li jkun. Iżda x’inhu l-​bżonn? L-​appostlu Pawlu kiteb: “Sakemm għandna x’nieklu u x’nilbsu, dan għandu jkun biżżejjed għalina.” Qegħdin nipprovaw niksbu iktar minn hekk? Jekk inhu hekk, aħna nistgħu qed naħsdu l-​konsegwenzi li Pawlu wissiena dwarhom: “Dawk li jridu jistagħnu jaqgħu fit-​tiġrib u fix-​xibka u f’ħafna xewqat bla sens u taʼ ħsara li jitfgħu lill-​bnedmin fil-​qerda u t-​telfien.” (1 Tim. 6:8, 9; Mt. 6:24; Lq. 14:33) Kif nistgħu nindunaw jekk aħniex qed nintrebħu minn xewqat li m’humiex neċessarji?

⁶ Jekk minħabba l-​attivitajiet sekulari tagħna jkollna biss sehem minimu fis-​servizz taʼ l-​għalqa jew nibdew ma narawx il-​bżonn taʼ li nagħmlu sagrifiċċji għall-​aħbar tajba, f’dan il-​każ għandna bżonn nagħmlu aġġustamenti dwar x’inhuma l-​prijoritajiet. (Lhud 13:15, 16) Stil taʼ ħajja iktar sempliċi se jgħinna ħafna biex negħlbu dan l-​ostaklu għall-​ippridkar tagħna. L-​interessi tas-​Saltna għandhom dejjem jiġu l-​ewwel f’ħajjitna meta niġu biex nużaw il-​ħin u l-​enerġija tagħna.

⁷ Il-​Ħidma li M’Hijiex Għalxejn: Il-​kliem taʼ Pawlu jinkuraġġina biex ‘inħabirku dejjem fil-​ħidma tal-​Mulej, [għax] nafu li l-​ħidma tagħna fil-​Mulej m’hijiex għalxejn.’ (1 Kor. 15:58) L-​iktar “ħidma tal-​Mulej” importanti hi l-​ippridkar tas-​Saltna u x-​xogħol taʼ li nagħmlu dixxipli. (Mt. 24:14; 28:19, 20) Biex ikollna l-​akbar sehem possibbli, irridu nagħmlu ħin fl-​iskeda tagħna għas-​servizz taʼ l-​għalqa kull ġimgħa u nistinkaw biex ma nużawx dak il-​ħin għal attivitajiet oħrajn. (Efes. 5:​15-​17) Imbagħad, la x-​xogħol sekulari u lanqas ebda ħaġa oħra ma se jkunu t’ostaklu għall-​ministeru tagħna.

⁸ Meta nagħtu minna nfusna sabiex naqsmu l-​veritajiet tal-​Bibbja m’oħrajn, aħna nesperjenzaw ferħ akbar li jiġi mill-​għoti. (Atti 20:35) Meta nfittxu l-​ewwel f’ħajjitna x-​xogħol taʼ l-​ippridkar tas-​Saltna, nistgħu nħarsu ’l quddiem lejn il-​futur b’fiduċja, ‘għax Alla mhux se jkun hekk inġust li jinsa dak li aħna għamilna u l-​imħabba li wrejna lejn ismu meta qdejna u għadna naqdu lill-​qaddisin.’​—Lhud 6:10.