Strieħ fuq Jehovah għall-Qawwa
1 Għandna bżonn nistrieħu fuq Jehovah għal bosta raġunijiet. Li nippridkaw l-aħbar tajba “fid-dinja kollha” huwa inkarigu taʼ sfida. (Mt. 24:14) Il-ħin kollu nissaraw kontra l-ġisem imperfett tagħna. (Rum. 7:21-23) Iktar minn hekk, “il-ġlieda tagħna” hija “kontra l-Prinċpijiet [sovrumani] taʼ din id-dinja taʼ dlamijiet.” (Efes. 6:11, 12) Jidher ċar li għandna bżonn l-għajnuna. Kif nistgħu niksbu l-qawwa mingħand Jehovah?
2 Bit-Talb: Jehovah jagħti bla limitu l-ispirtu qaddis qawwi tiegħu lill-qaddejja tiegħu li jitolbuhulu. (Lq. 11:13) Għandek nuqqas taʼ fiduċja fl-abbiltà tiegħek biex tagħti xiehda minn dar għal dar, fit-triq, jew bit-telefon? Tistħi tagħti xiehda informali? L-apatija tan-nies fit-territorju naqqsitlek iż-żelu tiegħek? Xi ngħidu jekk issirlek pressjoni biex tikkomprometti l-fidi jew l-integrità tiegħek? Strieħ fuq Jehovah. Itlob għall-qawwa.—Flp. 4:13.
3 Bl-Istudju Persunali: Sewwa sew bħalma niksbu s-saħħa meta nieklu ikel fiżiku, bl-istess mod nissaħħu spiritwalment meta nieklu regolarment mill-Kelma t’Alla u minn pubblikazzjonijiet oħra taʼ l-ilsir leali u diskret. (Mt. 4:4; 24:45) Meta ġie mistoqsi dwar x’qawwieh biex jissaporti maqful f’ċella waħdu għal snin sħaħ fiċ-Ċina mingħajr Bibbja, Stanley Jones qal: “Nistgħu nieqfu sodi fil-fidi. Dażgur, l-ewwel irridu nistudjaw. Ma jkollniex saħħa ġewwinija jekk ma nistudjawx.”
4 Bl-Attendenza għal-Laqgħat: F’laqgħa Kristjana taʼ l-ewwel seklu, Ġuda u Sila “farrġu lill-aħwa u [saħħewhom] b’ħafna kliem.” (Atti 15:32) Bl-istess mod illum, dak li nisimgħu fil-laqgħat ikabbrilna l-apprezzament għal Jehovah, jibnilna l-fidi, u jqanqalna biex noħorġu fil-ministeru. Il-laqgħat iġibuna f’kuntatt regulari maʼ dawk ‘li qegħdin jaħdmu magħna għas-Saltna taʼ Alla,’ li huma ‘taʼ faraġ kbir għalina.’—Kol. 4:11.
5 Għandna bżonn l-għajnuna f’dan iż-“żmien iebes.” (2 Tim. 3:1) Rigward dawk li jiksbu l-qawwa mingħand Jehovah, aħna żgurati: “Itellgħu l-ġwienaħ bħall-ajkli, jiġru bla ma jegħjew, jimxu bla ma jintelqu.”—Is. 40:31.