“Fejn Nistaʼ Nsib il-Ħin?”
1 Ħafna minna ngergru b’dan il-mod għax ħajjitna hija mimlija attivitajiet. Kien hemm min qal li l-ħin huwa wieħed mir-riżorsi l-iktar prezzjużi li għandna u l-iktar wieħed li jispiċċa malajr. Mela fejn nistgħu nsibu l-ħin għall-affarijiet li huma verament importanti, bħall-qari u l-istudju tal-Kelma t’Alla?—Flp. 1:10.
2 Is-soluzzjoni m’hijiex li nfittxu iktar ħin iżda f’li niddeċiedu x’irridu nagħmlu bil-ħin li għandna. Ilkoll kemm aħna għandna 168 siegħa fil-ġimgħa, u madwar 100 minnhom inqattgħuhom fl-irqad u fix-xogħol. Mela kif nistgħu nieħdu l-aqwa benefiċċju minn kif nużaw is-sigħat li jibqgħalna? Efesin 5:15-17 jagħtina l-parir biex nimxu “mhux bħal nies bla dehen, iżda bħal nies għorrief, li jgħożżu ż-żmien” li ‘jfittxu x’inhi r-rieda tal-Mulej.’ Dan jurina li għandna bżonn nużaw sew kull opportunità biex nagħmlu l-affarijiet li Jehovah jgħid li huma essenzjali.
3 Ġesù qabbel żmienna maʼ żmien Noè. (Lq. 17:26, 27) In-nies taʼ dak iż-żmien kellhom ħajja mimlija bl-attivitajiet tal-ħajja taʼ kuljum. Madankollu, Noè sab il-ħin biex jibni arka enormi u jippriedka. (Lhud 11:7; 2 Pt. 2:5) Kif? Billi poġġa r-rieda t’Alla l-ewwel u obdieh meta għamel l-affarijiet “preċiż hekk.”—Ġen. 6:22, New World Tranlation.
4 X’Għandu Jiġi l-Ewwel? Ġesù qal: “Il-bniedem mhux bil-ħobż biss jgħix, iżda b’kull kelma li toħroġ minn fomm Alla.” (Mt. 4:4) Kull ġimgħa aħna nirċievu ‘f’waqtu sehemna taʼ l-ikel [spiritwali].’ (Lq 12:42, Saydon) Għal dan hemm bżonn taʼ skeda regulari taʼ qari u studju persunali sabiex inkunu nistgħu niddiġerixxu kollox jekk irridu nibbenefikaw verament. Minħabba li aħna grati għall-ikel spiritwali, ma nqisuhx bħall-ikel li jsir taʼ malajr, li nikluh bil-ħatfa bħalma nistgħu nieklu l-ikel materjali. Minflok, l-apprezzament xieraq iqanqalna biex nieħdu ħin biżżejjed ħalli nistudjaw u nieħdu pjaċir bl-affarijiet spiritwali.
5 Li nitimgħu lilna nfusna bl-ikel spiritwali jistaʼ jwassalna għall-ħajja taʼ dejjem. (Ġw. 17:3) Jixraqlu li jkun fuq quddiem fl-iskeda tagħna taʼ kuljum. Nistgħu nsibu l-ħin biex nagħmlu l-wisaʼ għall-qari tal-Bibbja taʼ kuljum u biex nippreparaw għal-laqgħat Kristjani? Iva, nistgħu. Imbagħad, se nirċievu l-“ħlas tajjeb” li jiġi meta nkunu nafu r-rieda t’Alla u nagħmluha.—Salm 19:8-12 (19:7-11, NW).