Uża l-Kelma t’Alla Sew
1 Meta kien qed jagħti xiehda lil wieħed uffiċjal, “Filippu fetaħ fommu u beda minn [ċerta] silta taʼ l-Iskrittura jxandarlu l-Evanġelju taʼ Ġesù.” (Atti 8:35) Filippu kien qed “ixandar bir-reqqa [jew, juża sew] il-kelma tal-verità.” (2 Tim. 2:15) Madankollu, illum il-ġurnata l-indokraturi li jivvjaġġaw innotaw li ħafna pubblikaturi rari jużaw il-Bibbja meta jkunu qed jagħtu xiehda. Tużaha int il-Bibbja fil-ministeru tiegħek?
2 Il-Kelma t’Alla hija s-sors taʼ dak kollu li nemmnu u ngħallmu. (2 Tim. 3:16, 17) Hi tiġbed lin-nies lejn Jehovah u tedukahom għal ħajjithom kollha. Għalhekk huwa importanti li nużaw il-Bibbja fil-ministeru tagħna u mhux sempliċement niddiskutu dwar suġġetti li jinteressawna. (Lhud 4:12) Peress li ħafna nies jafu ftit li xejn dwar il-Bibbja, hemm bżonn li naqrawlhom minnha biex nuruhom xi gwida prattika toffri u x’futur tippreżenta għall-bnedmin.
3 Aqra Direttament mill-Bibbja: Tistaʼ tipprova tmur fuq il-bibien mingħajr ma tieħu miegħek basket bil-kotba. Tistaʼ żżomm il-letteratura speċifika li tixtieq toffri f’folder żgħir u ġġorr il-Bibbja f’idek jew fil-but. Imbagħad, meta taqbad konversazzjoni maʼ xi ħadd, tistaʼ toħroġ il-Bibbja mingħajr ma ġġiegħel lill-individwu jħossu li qisek qed tipprova tagħmillu xi priedka. Oqgħod f’pożizzjoni b’tali mod li s-semmiegħ ikun jistaʼ jsegwi dak li tkun qed taqralu mill-Bibbja tiegħek. Forsi tistaʼ titolbu jaqra vers b’leħen għoli. Iktar se jeffettwah meta jarah direttament mill-Bibbja minflok ma jisimgħu biss mingħandek. Naturalment, biex tgħinu jifhem il-punt tal-vers, enfasizza l-kliem li joħroġ il-ħsieb li tixtieq taqsam miegħu.
4 Preżentazzjoni bi Skrittura Waħda: Wara li tintroduċi lilek innifsek, tistaʼ tgħid: “In-nies iduru lejn diversi sorsi biex juruhom x’għandhom jagħmlu f’ħajjithom. Liema taħseb li hu l-aħjar sors li jagħti gwida prattika? [Agħti ċans għal tweġiba.] X’taħseb dwar din l-istqarrija? [Aqra Proverbji 2:6, 7, u agħti ċans għal tweġiba.] L-għerf tal-bniedem jidher ċar li huwa difettuż bil-kbir, għax iġib lil ħafna nies fi stat taʼ disperazzjoni. Madankollu, l-għerf t’Alla minn dejjem ta prova li tistaʼ tafdah u li hu taʼ benefiċċju.” Imbagħad uri l-pubblikazzjoni li tkun qed tippreżenta, u enfasizza minnha eżempju wieħed taʼ l-għerf prattiku t’Alla.
5 Ġesù uża l-Iskrittura biex jgħin lill-uħud taʼ qalb onesta. (Lq. 24:32) Pawlu ta prova mill-Iskrittura taʼ l-affarijiet li għallem. (Atti 17:2, 3) Il-fiduċja u l-ferħ tagħna fil-ministeru se jiżdiedu hekk kif insiru iktar tas-sengħa f’li nużaw l-Kelma t’Alla sew.