Għajnuna f’Waqtha
1 Meta l-appostlu Pietru ra l-bżonn li jsaħħaħ lil kredenti sħabu, l-interess tiegħu fihom qanqlu biex jagħtihom tfakkiriet u inkuraġġiment bl-imħabba. (2 Pt. 1:12, 13; 3:1) Hu ħeġġeġ lil dawk ‘li kellhom fidi’ biex jibqgħu jiżviluppaw kwalitajiet spiritwali sabiex ma jsirux ‘rieqda u bla frott fl-għarfien tagħhom taʼ Sidna Ġesù Kristu.’ (2 Pt. 1:1, 5-8) L-iskop taʼ Pietru kien li jgħinhom isaħħu s-sejħa u l-għażla tagħhom li rċivew mingħand Jehovah, ħalli b’hekk fl-aħħar ‘jinstabu fis-sliem, bla tebgħa u bla dnub.’ (2 Pt. 1:10, 11; 3:14) Għal ħafna, l-inkuraġġiment tiegħu kien għajnuna f’waqtha.
2 Illum, l-indokraturi Kristjani għandhom l-istess tħassib għan-nies t’Alla. F’dan iż-“żmien iebes,” ħafna qaddejja taʼ Jehovah iridu jkampaw maʼ ċirkustanzi diffiċli. (2 Tim. 3:1) Minħabba problemi kontinwi taʼ finanzi, dawk fil-familja, jew dawk persunali, xi wħud jistgħu jħossuhom bħalma ħassu David: “Għax għalquni minn kull naħa ħsarat li ma jingħaddux; ħakmuni ħtijieti u ma nistax nara; huma aktar mix-xagħar taʼ rasi; għandi qalbi maqtugħa.” (Salm 40:13 [40:12, NW]) Dawn il-pressjonijiet jistgħu tant isiru kbar li wħud bħal dawn jistgħu jittraskuraw responsabbiltajiet spiritwali vitali u jieqfu milli jkunu regulari fil-ministeru Kristjan. Imma, minkejja d-diffikultajiet tagħhom, ‘ma nsewx il-kmandamenti tiegħu [taʼ Jehovah].’ (Salm 119:176) Issa huwa l-ħin f’waqtu biex l-anzjani jagħtu l-għajnuna li hemm bżonn lil uħud bħal dawn.—Is. 32:1, 2.
3 Sabiex jilħqu dan il-bżonn, l-anzjani ġew inkuraġġiti biex jagħmlu sforz speċjali u jassistu lil dawk li bħalissa m’humiex jieħdu sehem fix-xogħol taʼ l-ippridkar. Biex dan iseħħ, bħalissa qiegħed isir sforz intensiv, u dan se jkompli wkoll fix-xahar taʼ Marzu. L-indokraturi taʼ l-istudju tal-ktieb qegħdin jintalbu jżuru lil dawk inattivi biex joffrulhom għajnuna spiritwali bil-ħsieb li jgħinuhom jerġgħu jibdew ikunu attivi fil-kongregazzjoni. Fejn ikun hemm bżonn, jistaʼ jsir studju persunali tal-Bibbja. Tistaʼ wkoll tintalab l-għajnuna t’oħrajn. Jekk inti tiġi mistieden biex tagħmel dan, l-isforzi tiegħek jistgħu jagħmlu ħafna ġid, speċjalment jekk tinkuraġġixxi bil-ħlewwa u bil-mogħdrija.
4 Tkun xi ħaġa taʼ ferħ għal kulħadd meta xi ħadd jerġaʼ jsir attiv fil-kongregazzjoni. (Lq. 15:6) L-isforzi tagħna biex ninkuraġġixxu lil uħud inattivi jistgħu verament ikunu bħal “kelma li tingħad f’waqtha.”—Prov. 25:11.