L-​Iskola tal-​Ministeru Teokratiku għall-​2004

¹ Jehovah jipprovdi lin-​nies komuni dak li għandhom bżonn biex iwettqu xogħol taʼ importanza universali. Mod wieħed kif jagħmel dan hu permezz tat-​taħriġ li jipprovdi kull ġimgħa fl-​Iskola tal-​Ministeru Teokratiku. Qiegħed tipparteċipa bis-​sħiħ, kif jippermettu ċ-​ċirkustanzi tiegħek? F’Jannar se jibdew isiru xi ftit aġġustamenti bl-​iskop li jgħinu lill-​istudenti biex jiksbu l-​akbar benefiċċju minn dawn l-​arranġamenti.

² L-​Ajjutant li Jagħti l-​Pariri Jinbidel Kultant Żmien: L-​aħwa rġiel li jagħtu t-​taħdita taʼ istruzzjoni u l-​punti prinċipali mill-​Bibbja apprezzaw l-​osservazzjonijiet li joffri l-​ajjutant li jagħti l-​pariri. Fejn hemm biżżejjed anzjani kwalifikati, l-​inkarigu taʼ l-​ajjutant li jagħti l-​pariri jistaʼ jinbidel kull sena. B’dan il-​mod, il-​piż tax-​xogħol jistaʼ jinqasam; iżda l-​iktar importanti, l-​anzjani u l-​qaddejja ministerjali kwalifikati se jibbenefikaw mill-​esperjenza kollettiva taʼ varjetà taʼ kelliema u għalliema kapaċi.

³ Skeda tar-​Reviżjoni Orali: Jekk il-​kongregazzjoni tagħkom ikollha l-​assemblea tas-​circuit fil-​ġimgħa li jkun imiss ir-​reviżjoni orali, ir-​reviżjoni (u l-​bqija taʼ l-​iskeda għal dik il-​ġimgħa) għandha ssir il-​ġimgħa taʼ wara l-​assemblea, u l-​iskeda tal-​ġimgħa taʼ wara għandha ssir fil-​ġimgħa taʼ l-​assemblea. Madankollu, m’hemmx bżonn li jinbidlu l-​iskedi taʼ ġimagħtejn sħaħ meta r-​reviżjoni orali taħbat maż-​żjara taʼ l-​indokratur tas-​circuit. Minflok, l-​għanja, it-​taħdita tal-​kwalità tad-​diskors, u l-​punti prinċipali mill-​Bibbja għandhom isiru bħalma jkunu ppjanati fl-​iskeda. It-​taħdita taʼ istruzzjoni (li tingħata wara t-​taħdita tal-​kwalità tad-​diskors) għandha tittieħed mill-​iskeda tal-​ġimgħa taʼ wara. Wara li jsiru l-​punti prinċipali mill-​Bibbja, ikun hemm nofs siegħa taʼ Laqgħa tas-​Servizz, li tistaʼ tiġi aġġustata biex ikun hemm jew tliet partijiet taʼ 10 minuti jew tnejn taʼ 15-il minuta. (L-avviżi tal-​ftuħ għandhom jitneħħew.) Fi tmiem il-​Laqgħa tas-​Servizz ikun hemm l-​għanja u programm taʼ nofs siegħa mill-​indokratur tas-​circuit. L-​Iskola tal-​Ministeru Teokratiku għall-​ġimgħa taʼ wara se tkompli bit-​taħdita tal-​kwalità tad-​diskors u l-​punti prinċipali tal-​Bibbja kif ippjanati fl-​iskeda, u wara ssir ir-​reviżjoni orali.

⁴ Ħu vantaġġ minn kull opportunità biex tikber spiritwalment. Hekk kif tibbenefika mill-​edukazzjoni mill-​Iskola tal-​Ministeru Teokratiku, tistaʼ tinkuraġġixxi l-​kongregazzjoni tiegħek, ikollok parti fit-​twettiq tal-​profezija mill-​Bibbja, u ġġib tifħir lill-​Awtur tal-​messaġġ meraviljuż li għandna nxandru.—Is. 32:​3, 4; Apk. 9:19.