Ngħinu lil Dawk b’“Attitudni Xierqa”
1. Fi żmienna, Jehovah lil min qiegħed jiġbor għalih innifsu?
1 Kull persuna għandha attitudni stabbilita fil-fond tal-qalb figurattiva tagħha. (Mt. 12:35) Il-Bibbja titkellem dwar dak li “qalbu bil-ġlied mimlija.” (Salm 55:22 [55:21, NW]) Xi wħud għandhom l-attitudni li jirrabjaw. Iżda hemm dawk ukoll li għandhom “attitudni xierqa lejn il-ħajja taʼ dejjem.” (Atti 13:48, NW) Fi żmienna, Jehovah qiegħed jiġbor għalih innifsu wħud b’attitudni xierqa bħal dawn. (Ħag. 2:7) Kif nistgħu ngħinu lil dawn l-uħud biex isiru aduraturi taʼ Jehovah?
2. X’inhu involut biex inwettqu x-xogħol tagħna taʼ li nagħmlu dixxipli?
2 Agħmel iż-Żjajjar Lura bir-Reqqa: Huwa vitali li jkollna l-ħarsa xierqa meta niġu biex nagħmlu ż-żjajjar lura biex b’hekk inkunu nistgħu nwettqu x-xogħol tagħna taʼ li nagħmlu dixxipli. (Mt. 28:19, 20) Inħabirku aħna biex nikkultivaw l-interess li nkunu sibna? Immorru lura għand dawk kollha li jaċċettaw il-letteratura jew jesprimu interess fl-aħbar tajba? Nippersistu fl-isforzi tagħna biex ngħinuhom jikbru spiritwalment? Ladarba hemm il-ħajjiet involuti, għandna nfittxu li nikkultivaw l-interess kollu li nsibu.
3. X’għandna nagħmlu wara li nitkellmu maʼ xi ħadd fil-ministeru?
3 Waqt li konversazzjoni maʼ persuna interessata tkun għadha friska f’moħħok, ħu ftit ħin biex tikteb l-isem u l-indirizz tagħha. Niżżel is-suġġett li ddiskutejtu, l-iskritturi li qrajt, u x’letteratura ħallejt. Imbagħad, agħmilha mira li terġaʼ tmur malajr kemm jistaʼ jkun.
4. Kif nistgħu nagħmlu żjajjar lura effettivi?
4 Kif Nagħmlu ż-Żjajjar Lura: Meta tkun qed tagħmel żjara lura, huwa taʼ għajnuna li tkun kordjali u dħuli u turi interess persunali sinċier fl-inkwilin. Żomm id-diskussjoni sempliċi u Skritturali. Ipprepara suġġett interessanti x’tiddiskuti minn fuq il-Bibbja, u fil-konklużjoni taʼ kull żjara, qajjem mistoqsija li tistaʼ tiġi mwieġba fiż-żjara li jkun imissek tagħmel darb’oħra. L-aħjar ħaġa tkun li tevita li taqbad argument dwar xi ħarsa mhix skritturali li l-inkwilin għandu mnejn jesprimi. Stinka biex tibni fuq affarijiet simili li hemm bejnietkom.—Kol. 4:6.
5. Xi sforz għamel pijunier wieħed, u b’liema riżultati?
5 Jirrikjedi sforz biex nagħmlu żjajjar lura, iżda l-barkiet huma sodisfaċenti. Pijunier fil-Ġappun għamilha l-mira tiegħu li jagħmel iktar żjajjar lura kull xahar. Beda jżomm nota taʼ dawk kollha li ltaqaʼ magħhom fix-xogħol minn dar għal dar, imbagħad fi żmien ġimgħa kien jerġaʼ jmur għandhom. Hu pprepara tajjeb dak li kien se jgħid, u wettaq il-ministeru tiegħu b’konvinzjoni sħiħa fil-messaġġ li kien qed jaqsam. F’waħda miż-żjajjar lura tiegħu, irnexxielu jibda studju maʼ persuna li qalet: “Qatt ma ħallejtkom tkellmuni. Din hija l-ewwel darba li qed nismagħkom.” Il-persistenza taʼ dan il-pijunier ġabet ir-riżultati. Fl-aħħar tax-xahar kien qed jirrapporta għaxar studji tal-Bibbja.
6. Għala għandna nippersistu biex nagħmlu ż-żjajjar lura?
6 Iċ-ċirkustanzi tan-nies qegħdin jinbidlu l-ħin kollu. (1 Kor. 7:31) Taʼ spiss ikollok tmur diversi drabi biex terġaʼ ssib lil xi ħadd interessat id-dar. Billi nagħmlu ż-żjajjar lura bir-reqqa, nistgħu ngħinu lil dawk li għandhom attitudni xierqa biex jaqbdu t-triq li twassal għall-ħajja taʼ dejjem.—Mt. 7:13, 14.