Meħtieġa l-Għajnuna Tiegħek
1 “Grazzi taʼ dak kollu li tagħmlu għalina lkoll. Tassew li xogħolkom hu taʼ benefiċċju kbir għalina.” Dan il-kumment jesprimi tajjeb il-gratitudni tagħna għall-anzjani Kristjani li hemm fostna. Hekk kif tkompli tespandi l-organizzazzjoni t’Alla, hemm ħtieġa kontinwa għal irġiel maturi biex jaqdu fi kważi 100,000 kongregazzjoni madwar id-dinja. Jekk int ħu mgħammed, l-għajnuna tiegħek hi meħtieġa.
2 ‘Irsisti’: Kif tistaʼ tirsisti għal iktar privileġġi taʼ servizz? (1 Tim. 3:1) Bażikament billi tkun t’eżempju tajjeb fl-aspetti kollha taʼ ħajtek. (1 Tim. 4:12; Titu 2:6-8; 1 Pt. 5:3) Ipparteċipa kemm tistaʼ fix-xogħol taʼ l-ippridkar, u għin lil oħrajn biex jagħmlu l-istess. (2 Tim. 4:5) Uri interess ġenwin fil-benesseri taʼ sħabna fit-twemmin. (Rum. 12:13) Kun student ħabrieki tal-Kelma t’Alla, u żviluppa l-arti tat-tagħlim. (Titu 1:9; 1 Tim. 4:13) Ħabrek biex twettaq l-inkarigi li jafdawlek l-anzjani. (1 Tim. 3:10) Jekk int kap taʼ familja, ‘ippresiedi fuq dawk taʼ darek bl-aħjar mod.’—1 Tim. 3:4, 5, 12.
3 Biex taqdi bħala anzjan jew qaddej ministerjali jinvolvi ħafna xogħol u jitlob minnek spirtu taʼ sagrifiċċju. (1 Tim. 5:17) Għalhekk, waqt li tkun qed tirsisti għal din il-mira, iffoka fuq li taqdi lil oħrajn b’umiltà. (Mt. 20:25-28; Ġw. 13:3-5, 12-17) Immedita fuq il-personalità taʼ Timotju, u ipprova imitah. (Flp. 2:20-22) Agħmel bħalu u ħalli l-kondotta tajba tiegħek titkellem għalik. (Atti 16:1, 2) Waqt li tikkultiva l-kwalitajiet spiritwali meħtieġa biex tkun tistaʼ terfaʼ iżjed responsabbiltajiet u tapplika xi pariri li tingħata biex timxi ’l quddiem, “kulħadd jara li [tkun] qed tavanza.”—1 Tim. 4:15.
4 Ġenituri, Ħarrġu lil Uliedkom biex Jgħinu: It-tfal jistgħu jibdew jitgħallmu jgħinu miċ-ċokon. Ħarrġuhom biex joqogħdu attenti fil-laqgħat, biex jippridkaw, u biex ikunu t’eżempju fil-kondotta kemm fis-Sala tas-Saltna u kemm l-iskola. Għinuhom jipparteċipaw biex jaqdu lil oħrajn bil-ferħ, bħal fit-tindif tas-Sala tas-Saltna, li jagħtu għajnuna lil dawk imdaħħlin fiż-żmien, eċċetra. Ħalluhom jesperjenzaw l-hena li jħossu meta jagħtu. (Atti 20:35) Dan it-tip taʼ taħriġ jistaʼ jgħinhom isiru l-qaddejja ministerjali u l-anzjani t’għada.