Imita lil Ġeħova, “l-​Alla l-​Hieni” Tagħna

¹ Ġeħova tassew irid li n-​nies ikunu henjin. Il-​Kelma tiegħu timliena b’antiċipazzjoni għall-​barkiet meraviljużi li għandu preparati għall-​umanità. (Is. 65:​21-25) Għandu jkun evidenti għal oħrajn li aħna ferħanin li naqsmu magħhom “l-​aħbar tajba u glorjuża taʼ l-​Alla l-​hieni.” (1 Tim. 1:11) Il-​mod kif nitkellmu dwar il-​messaġġ tas-​Saltna għandu jirrifletti l-​imħabba tagħna għall-​verità u l-​interess ġenwin li għandna fin-​nies li nitkellmu magħhom.​—Rum. 1:​14-16.

² Huwa minnu li kultant jistaʼ jkun taʼ sfida li nżommu attitudni ferriħija. F’xi territorji, ftit insibu nies li jwieġbu b’mod favorevoli għall-​messaġġ tas-​Saltna. Forsi jkun hemm ġranet meta nkunu qed niffaċċjaw ċirkustanzi diffiċli f’ħajjitna stess. Sabiex inżommu attitudni ferriħija, nagħmlu tajjeb jekk nirriflettu dwar kemm in-​nies fit-​territorju tagħna għandhom bżonn jisimgħu u jifhmu l-​aħbar tajba tas-​Saltna li qed nippridkawlhom. (Rum. 10:​13, 14, 17) Jekk nimmeditaw dwar dan, se niġu megħjunin biex bil-​ferħ inkomplu nxandru l-​provvedimenti għas-​salvazzjoni li Ġeħova tana bil-​ħniena.

³ Iffoka fuq il-​Pożittiv: Irridu wkoll noqogħdu attenti għal dak li ngħidu. Għalkemm forsi nibdew diskussjoni billi nsemmu xi problema jew xi ħaġa li ssemmiet fl-​aħbarijiet u li n-​nies qed jaħsbu dwarha, għandna nevitaw li noqogħdu niddiskutu bla bżonn dwar affarijiet negattivi. L-​inkarigu tagħna hu li ‘nħabbru r-​riżq.’ (Is. 52:7; Rum. 10:15) Din l-​aħbar tajba hija messaġġ ibbażat fuq il-​wegħdi t’Alla għal futur aħjar. (2 Pt. 3:13) B’dan f’moħħok, uża l-​Iskrittura biex ‘iddewwi l-​qlub miksurin.’ (Is. 61:​1, 2) Dan se jgħin lil kull wieħed u waħda minna biex iżomm attitudni ferriħija u pożittiva.

⁴ In-​nies bla dubju se jinnotaw l-​attitudni ferriħija tagħna hekk kif nieħdu sehem fix-​xogħol taʼ l-​ippridkar. Għalhekk, ejja dejjem nirriflettu d-​dispożizzjoni taʼ Ġeħova, “l-​Alla l-​hieni” tagħna, hekk kif naqsmu l-​aħbar tajba tas-​Saltna man-​nies fit-​territorju tagħna.