Kaxxa Għall-mistoqsija
◼ X’inhuma l-perikli meta nużaw l-Internet biex nikkomunikaw maʼ xi ħadd li ma nafuhx?
Diversi Web sites saru għan-nies biex jiltaqgħu u jikkuntattjaw lil xulxin fuq l-Internet. Ħafna minn dawn is-sites jippermettu lill-individwi biex joħolqu u jippubblikaw id-deskrizzjoni tagħhom stess, li għandha mnejn tinkludi ritratti u informazzjoni persunali oħra. Imbagħad, in-nies li jaraw id-deskrizzjoni jistgħu jagħmlu kuntatt. Web sites bħal dawn huma popolari ħafna fost iż-żgħażagħ, u xi żgħażagħ fil-kongregazzjoni użawhom biex jikkuntattjaw oħrajn li jgħidu li huma Xhieda taʼ Ġeħova.
Huwa faċli li individwu li nkunu ltqajna miegħu fuq l-Internet iqarraq dwar l-identità, l-ispiritwalità, jew il-motivi tiegħu. (Salm 26:4) Individwu li jgħid li hu Xhud taʼ Ġeħova jistaʼ fil-fatt ikun wieħed li ma jemminx, xi ħadd maqtugħ mis-sħubija, jew saħansitra apostata bl-iskop li jfixkel lill-Kristjani. (Gal. 2:4) Skond ir-rapporti, ħafna pedofili jużaw Web sites bħal dawn biex ifittxu lill-vittmi tagħhom.
Anki jekk aħna konvinti li dawk li qed nikkomunikaw magħhom għandhom waqfa tajba fil-kongregazzjoni, il-konversazzjonijiet f’dan l-ambjent jistgħu faċilment jinbidlu f’diskors taʼ ħsara. Dan minħabba l-fatt li n-nies għandhom it-tendenza li ma jżommux daqshekk lura minn individwi li ma jkunux iltaqgħu magħhom personalment. Ukoll, għandhom mnejn iqisu l-komunikazzjoni fuq l-Internet bħala xi ħaġa privata u jħossu li jgħidu, x’jgħidu ħadd, bħall-ġenituri jew l-anzjani, ma se jkunu jafu x’qed jingħad. B’sogħba, xi żgħażagħ minn familji Kristjani nqabdu fin-nassa u involvew ruħhom f’diskors oxxen. (Efes. 5:3, 4; Kol. 3:8) Oħrajn inkludew fid-deskrizzjoni tagħhom fuq il-kompjuter ritratti provokattivi sesswalment tagħhom infushom, laqmijiet indeċenti, jew konnessjonijiet maʼ vidjos tal-mużika espliċiti sesswalment.
Meta nqisu dak li semmejna, il-ġenituri għandhom josservaw il-mod kif uliedhom jużaw il-kompjuter. (Prov. 29:15) Ikun perikoluż jekk nistiednu stranġier f’darna jew inħalluh waħdu maʼ wliedna. B’mod simili, huwa perikoluż għalina jew għal uliedna li jagħmlu ħbieb maʼ stranġieri fuq l-Internet, saħansitra jekk jgħidu li huma Xhieda taʼ Ġeħova.—Prov. 22:3.