Kampanja b’Fuljett Speċjali mill-​20 t’Ottubru sas-​16 taʼ Novembru!

¹ B’seħħ mit-​Tnejn, 20 t’Ottubru, għal erbaʼ ġimgħat sħaħ, se nieħdu sehem fi tqassim speċjali taʼ fuljett ġdid intitolat Tixtieq Tkun Taf il-​Verità? Nittamaw li din il-​kampanja speċjali madwar id-​dinja se tqanqal l-​interess taʼ iktar nies fl-​uniku sors tal-​verità.—Ġw. 17:17.

² Il-​fuljett jagħti tweġibiet fil-​qosor mill-​Bibbja għal sitt mistoqsijiet importanti: “Veru li Alla jimpurtah minna?” “Il-​gwerer u t-​tbatija qatt se jispiċċaw?” “X’jiġrilna meta mmutu?” “Hemm xi tama għall-​mejtin?” “Kif nistaʼ nitlob b’mod li Alla jismagħni?” u “Kif jistaʼ jkolli l-​hena f’ħajti?” Il-​knejjes tal-​Kristjaneżmu qatt ma taw tweġibiet sodisfaċenti għal dawn il-​mistoqsijiet. Anki ħafna wħud li jistqarru li m’humiex Kristjani jaħsbu dwar dawn l-​affarijiet, imma forsi ma jafux li fil-​Bibbja hemm tweġibiet ċari. Għalhekk, nistennew li dan il-​messaġġ jogħġob lil ħafna wħud.

³ Kopri t-​Territorju Tiegħek: Stinka biex tkopri kemm jistaʼ jkun mit-​territorju tiegħek minn dar għal dar. Jekk għandkom territorju kbir, l-​anzjani jistgħu jinkuraġġukom biex tħallu kopja tal-​fuljett fejn ma jinstabux nies id-​dar fuq l-​ewwel żjara. Ftakar biex tagħti kopja lill-​ġirien, lill-​qraba, lin-​nies li taf fuq ix-​xogħol u fl-​iskola, u lil oħrajn li spiss titkellem magħhom. Forsi tistaʼ tagħmel pjanijiet biex taqdi bħala pijunier awżiljarju f’Ottubru jew f’Novembru. Għandek it-​tfal jew student tal-​Bibbja li qed jagħmel progress spiritwali u li jistaʼ jikkwalifika biex jingħaqad magħna f’din il-​kampanja bħala pubblikatur mhux mgħammed? Jekk inhu hekk, informa lill-​anzjani.

⁴ X’Tistaʼ Tgħid: Sabiex tilħaq iktar nies bil-​messaġġ, ikun aħjar li żżomm il-​preżentazzjoni tiegħek qasira. Sempliċement staqsi lill-​inkwilini waħda mis-​sitt mistoqsijiet li hemm fuq il-​qoxra u urihom it-​tweġiba mill-​fuljett. Dan se jippermetti lill-​pubblikaturi kollha biex jadattaw il-​preżentazzjoni tagħhom għall-​bżonnijiet tat-​territorju. Jekk xi ħadd juri interess, ħu nota taʼ dan u mur lura. Fi tmiem il-​ġimgħa, ir-​rivisti kurrenti jistgħu jiġu offruti flimkien mal-​fuljett. Wara li tispiċċa l-​kampanja fis-​16 taʼ Novembru, aħna se noffru l-​ktieb Il-​Bibbja X’Tgħallem? Kwalunkwe fuljett li jifdal għandu jintuża bl-​istess mod bħal fuljetti oħrajn disponibbli.

⁵ Ibda Studju tal-​Bibbja: Dan il-​fuljett ġie mħejji speċifikament biex jgħinna nibdew studji tal-​Bibbja. Meta terġaʼ żżur lil xi ħadd li wera interess, tistaʼ int tistaqsih liema verità tal-​Bibbja ġabitlu faraġ jew serħan? Iġbed l-​attenzjoni lejn il-​paġna taʼ wara fejn hu msemmi l-​arranġament tagħna għal studju tal-​Bibbja, u agħtih kopja tal-​ktieb Il-​Bibbja X’Tgħallem? Jekk ikun possibbli, ikkunsidra fil-​qosor paragrafu jew tnejn mill-​kapitlu li fih iktar informazzjoni dwar is-​suġġett li jkun għażel.

⁶ Ġeħova qed ifittex lil dawk l-​uħud li se jqimuh “bl-​ispirtu u l-​verità.” (Ġw. 4:23) Jalla lkoll kemm aħna nieħdu sehem f’din il-​kampanja speċjali biex ngħinu lil oħrajn isiru jafu l-​verità!