Kaxxa għall-​Mistoqsija

◼ Jekk koppja jixtiequ jużaw is-​Sala tas-​Saltna għat-​tieġ tagħhom, liema affarijiet għandhom bżonn jiddiskutu maʼ l-​anzjani?

It-​tiġijiet li jiġu rranġati skond il-​prinċipji tal-​Bibbja jġibu unur lil Ġeħova. Dan hu speċjalment minnu dwar it-​tiġijiet li jsiru fis-​Sala tas-​Saltna, ladarba l-​komunità tħares lejn il-​programmi li jsiru f’dan il-​post bħala riflessjoni taʼ l-​organizzazzjoni tagħna. Sabiex “isir kollox bid-​deċenza u bl-​ordni,” huwa xieraq li l-​anzjani lokali jkunu involuti meta jintalab permess biex is-​Sala tas-​Saltna tintuża għal tieġ.—1 Kor. 14:40.

Koppja li jixtiequ jużaw is-​Sala tas-​Saltna għat-​tieġ tagħhom għandhom jagħtu rikjesta bil-​miktub lill-​kumitat tas-​servizz tal-​kongregazzjoni li tiltaqaʼ f’dik is-​sala. L-​ittra tagħhom għandha tingħata ħafna minn qabel u għandha tindika d-​data u l-​ħin li fihom jixtiequ jużaw is-​sala. Għandhom iżommu f’moħħhom li l-​anzjani m’humiex se jċaqalqu l-​iskeda tal-​laqgħat biex jakkomodaw tieġ. Iktar minn hekk, huwa meħtieġ li l-​għarus u l-​għarusa jkollhom reputazzjoni tajba, jiġifieri, li jkunu jgħixu fi qbil mal-​prinċipji tal-​Bibbja u l-​livelli ġusti taʼ Ġeħova.

Biex il-​koppja jkunu ċerti li t-​tieġ jirrifletti sew fuq l-​Alla onorabbli tagħna, huma għandhom jiddiskutu l-​arranġamenti tat-​tieġ mal-​kumitat tas-​servizz qabel ma dawn jiġu finalizzati. Għalkemm l-​anzjani mhux se jipprovaw jimponu l-​preferenzi persunali tagħhom fuq il-​koppja, jekk tkun qed tiġi pjanata xi ħaġa oġġezzjonabbli l-​koppja għandhom jaġixxu skond id-​direzzjoni taʼ l-​anzjani. Tistaʼ tintuża biss mużika tal-​Kingdom Melodies jew li tinstab fil-​ktieb taʼ l-​għanjiet tagħna. Kwalunkwe tiżjin fis-​Sala tas-​Saltna jew irranġar tas-​siġġijiet ukoll irid jiġi approvat. Jekk jittieħdu xi ritratti jew isir xi vidjo rikording, dan m’għandux inaqqas mid-​dinjità taʼ l-​okkażjoni. L-​anzjani jistgħu jippermettu li jsiru xi provi fis-​Sala tas-​Saltna sakemm dawn ma jfixklux arranġamenti oħrajn tal-​kongregazzjoni. M’għandu jitpoġġa ebda invit fuq in-​notice board. Madankollu, l-​anzjani jistgħu jagħmlu avviż żgħir matul il-​Laqgħa tas-​Servizz biex jinformaw lill-​kongregazzjoni dwar it-​tieġ li jkun se jsir fis-​Sala tas-​Saltna.

Għalkemm m’hijiex ħtieġa li kulmin jagħmel parti mill-​grupp involut fl-​arranġamenti tat-​tieġ, bħall-​bridesmaids, ikun mgħammed, ma jkunx xieraq li jiġu inklużi individwi li l-​istil taʼ ħajjithom huwa kuntrarju għall-​aħħar għall-​prinċipji tal-​Bibbja jew li l-​kondotta tagħhom tistaʼ tqajjem xi dubji f’moħħ min jattendi. It-​tieġ għandu jingħata bidu minn anzjan maħtur, jekk ikun hemm wieħed disponibbli. L-​anzjani huma għalliema kwalifikati tal-​Kelma t’Alla, allura huma l-​iktar uħud kwalifikati biex jenfasizzaw prinċipji Skritturali li japplikaw f’din l-​okkażjoni importanti.—1 Tim. 3:2.

Ladarba t-​tieġ jirrifletti wkoll fuq l-​anzjan li se jagħmel iċ-​ċerimonja tat-​tieġ, hu wkoll għandu jinżamm informat dwar l-​arranġamenti tat-​tieġ. Hu se jiltaqaʼ mal-​koppja biex jistaqsi dwar l-​imġiba morali tagħhom matul l-​għerusija; il-​koppja għandhom ikunu sinċieri u onesti miegħu. Jekk xi ħadd mill-​koppja kien miżżewweġ qabel, dan għandu juri bil-​provi li hu ħieles Skritturalment u legalment biex jiżżewweġ. (Mt. 19:9) Dan jinkludi li juri lill-​anzjan kopja tad-​digriet finali tad-​divorzju.

Meta koppja jikkomunikaw bil-​miftuħ u jikkooperaw bis-​sħiħ maʼ l-​anzjani, it-​tieġ ikun okkażjoni taʼ ferħ għal kulħadd.—Prov. 15:22; Ebr. 13:17.